Текст благодарственной службы Святой Троице о принесении Ее иконы в Лавру преподобного Сергия
Ме́сяца ию́ня в 9-й день
Слу́жба благода́рственная ко Святе́й Тро́ице
о принесе́нии Ея́ свята́го о́браза,
от преподо́бнаго Андре́я иконопи́сца сотворе́ннаго,
в ла́вру преподо́бнаго Се́ргия
ЗРИ: А́ще прилучи́тся пра́здник в суббо́ту седмы́я седми́цы по Па́сце, или́ в Пятьдеся́тницу, или́ в Неде́лю всех святы́х, и в другу́ю Неде́лю, в ню́же пра́зднуем вся святы́я Це́ркве Ру́сския, слу́жба принесе́ния пое́тся в прииду́щий понеде́льник или́ во ин день, егда́ разсу́дит екклисиа́рх.
НА ВЕЛИ́ЦЕЙ ВЕЧЕ́РНИ
На Го́споди, воззва́х: пое́м стихи́ры пра́здника Трио́ди 3, и и́ны стихи́ры принесе́ния 5 (пи́саны по сих).
А́ще вне Трио́ди, стихи́ры принесе́ния, самогла́сны, глас 6:
А́нгельския предыди́те си́лы,/ во оби́тели Се́ргиевой угото́вайте храм:/ Святы́я бо Тро́ицы о́браз принесе́ся,/ прие́млет святы́ню Це́рковь,/ на ра́дость правосла́вным./ Лю́дие, рцем:// благослове́н освяща́яй нас, Бо́же наш, сла́ва Тебе́.
Свя́тостию Русь процве́тши,/ кра́сный плод принесе́/ моли́твы и духо́внаго де́лания,/ чу́дный о́браз Неразде́льныя Тро́ицы,/ Е́йже покланя́ющеся,/ лю́дие, рцем:// благослове́н ми́луяй нас, Бо́же наш, сла́ва Тебе́.
Единосу́щныя Тро́ицы о́браз,/ его́же святы́й Андре́й богому́дренно начерта́,/ благогове́йне созерца́юще,/ любве́ Боже́ственныя благода́тный прии́мем дар,/ да в Бо́зе еди́но бу́дем,/ и благода́рне рцем:// благослове́н уте́шивый нас, Бо́же наш, сла́ва Тебе́.
И́ны стихи́ры принесе́ния, глас 8.
Подо́бен: О, пресла́внаго чудесе́:
О, пресла́внаго чудесе́!/ Еще́ во чре́ве ма́терни/ преподо́бный Се́ргий/ три́жды во хра́ме возгласи́л есть,/ зна́менуя Святе́й Тро́ице служе́ние,/ Ю́же всем житие́м свои́м просла́ви,/ и вселе́ние Триеди́наго Божества́ быв,/ оби́тель во и́мя Его́ устро́и,// еди́наго Благоутро́бнаго.
О, пресла́внаго чудесе́!/ Андре́й богому́дрый,/ Ду́ха Свята́го испо́лнився,/ в похвалу́ Се́ргию вели́кому/ Богонача́льныя Тро́ицы благода́тную ико́ну написа́./ О, каковы́й дар земли́ Ру́сской дарова́ся,/ и́мже Свята́я Це́рковь красу́ющися,/ Триипоста́снаго Бо́га правосла́вно почита́ет,// еди́наго Благоутро́бнаго.
О, прему́дрых суде́б/ Всеси́льнаго Бо́га!/ Грех у́бо ра́ди на́ших/ о́бразу Своему́ попусти́ от безбо́жных я́тися,/ оба́че человеколю́бно вся стро́я,/ ми́лость Свою́ яви́л есть,/ и святы́ню во Свята́я возврати́,/ воскресе́ние Святы́я Руси́ зна́менуя,// я́ко еди́н Благоутро́бен.
О, пресла́внаго чудесе́!/ Живонача́льныя Тро́ицы/ о́браз пречестны́й/ во оби́тели Се́ргиевой па́ки водвори́ся днесь./ Сра́дуются нам вси концы́ земни́и,/ устраша́ются де́монския полки́,/ я́ко те́пле почита́ющим ико́ну сию́/ благода́ть Пресу́щнаго Бо́га источа́ется,// еди́наго Благоутро́бнаго.
Херуви́ми и Серафи́ми,/ ли́ца закрыва́юще,/ со тре́петом взыва́ют:/ Свят, Свят, Свят Госпо́дь Савао́ф,/ и́мже мы недосто́йнии подо́бящеся,/ о толи́ких благодея́ниих па́мятующе,/ на о́браз Триипоста́снаго Бо́га взира́ем,/ благода́рне воспева́юще// еди́наго Благоутро́бнаго.
Сла́ва, принесе́ния, глас то́йже:
Прииди́те, лю́дие,/ Триипоста́сному Божеству́ поклони́мся,/ Сы́ну во Отце́, со Святы́м Ду́хом:/ Той бо трисия́нный луч благода́ти Своея́ дре́вле яви́/ О́льзе равноапо́стольней ко просвеще́нию Оте́чества на́шего,/ и преподо́бнаго Се́ргия от чре́ва ма́терня избра́,/ во е́же едине́нием в любви́ Боже́ственней/ во времена́ лю́тая зе́млю Ру́сскую утверди́ти,/ свята́го же Андре́я умудри́ начерта́ти Свой о́браз,/ его́же почита́юще, вси́ глаго́лем:// Тро́ице Свята́я, сла́ва Тебе́.
И ны́не, пра́здника Трио́ди.
А́ще вне Трио́ди: Сла́ва, и ны́не, принесе́ния.
Вход. Проки́мен дне. И чте́ния три.
Бытия́ чте́ние (глава́ 18):
Яви́ся Бог Авраа́му у ду́ба Мамври́я,/ седя́щему пред две́рьми се́ни своея́ в полу́дне,/ воззре́в же очи́ма свои́ма, узре́, и се трие́ му́жи стоя́ху пря́мо ему́./ И ви́дев я́, притече́ в сре́тение им от две́рий се́ни своея́,/ и поклони́ся до земли́, и рече́:/ Го́споди, а́ще обрето́х благода́ть пред лице́м твои́м,/ не мини́ раба́ твоего́,/ да принесе́тся вода́, и омы́ются но́ги ва́ша,/ и прохладите́ся под ду́бом, и принесу́ хле́бы, да я́сте./ И посе́м минете́ на путь свой,/ его́же ра́ди соврати́стеся се́мо к рабу́ своему́./ И ре́ша: та́ко сотвори́, я́коже глаго́ла./ И потща́вся Авраа́м в сень к Са́рре, и рече́ ей:/ ускори́ взя́ти три спу́ды муки́ чи́сты, и сотвори́ потре́бники./ И тече́ Авраа́м в кра́вы, и поя́ теле́ц млад и добр,/ и даде́ и́ рабу́ и ускори́ пригото́вити е́./ И взя ма́сло и млеко́ и теле́ц, е́же пригото́ва,/ и поста́ви пред ни́ми, и ядо́ша./ Сам же стоя́ше пред ни́ми под дре́вом./ Госпо́дь же рече́:/ еда́ утаю́ Аз от Авраа́ма раба́ моего́, я́же Аз творю́?/ Авраа́м же быва́я бу́дет в язы́к вели́к и мног,/ и благословя́тся о нем вси язы́цы земни́и:/ ве́м бо, я́ко запове́сть сыно́м свои́м и до́му своему́ по себе́,/ и сохраня́т пути́ Госпо́дни.
Проро́чества Иезеки́илева чте́ние (глава́ 36):
Та́ко глаго́лет Госпо́дь:/ прииму́ вас от язы́к, и соберу́ вы от всех язы́к стра́нных,/ и введу́ вы в зе́млю ва́шу,/ и окроплю́ на вы чи́стую во́ду, и очи́ститеся/ от всех нечисто́т ва́ших, и от всех и́дол ва́ших, и очи́щу вы./ И дам вам се́рдце но́вое, и дух но́вый дам вам,/ и отыму́ се́рдце ка́менное от пло́ти ва́шея,/ и дам вам се́рдце пло́тяное, и дух Мой дам в вас:/ И сотворю́, да во оправда́ниих мои́х хо́дите,/ и судьбы́ моя́ сохраните́, и сотворите́./ И вселите́ся в зе́млю, ю́же дах отце́м ва́шим,/ и бу́дете ми в лю́ди,/ и Аз бу́ду вам в Бо́га.
При́тчей чте́ние (глава́ 9):
Прему́дрость созда́ себе́ дом и утверди́ столпо́в седмь./ Закла́ своя́ же́ртвенная и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко мне./ И тре́бующим ума́ рече́:/ прииди́те, яди́те мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие:/ облича́яй же нечести́ваго, опоро́чит себе́,/ обличе́ния бо нечести́вому, ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости — страх Госпо́день, и сове́т святы́х — ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На стихо́вне стихи́ры принесе́ния, глас 2.
Подо́бен: До́ме Евфра́фов:
Земле́ Ру́сская,/ уде́ле избра́нный,/ красу́йся и лику́й:/ в тебе́ бо Свята́я Тро́ица// дом Себе́ устро́и.
Стих: Ве́лий Госпо́дь и хва́лен зело́// во гра́де Бо́га на́шего, в горе́ святе́й Его́.
Единосу́щныя/ Тро́ицы о́браз/ Андре́й богому́дрый/ богоно́сному Се́ргию// в похвалу́ списа́л есть.
Стих: Помяну́тся и обратя́тся ко Го́споду// вси концы́ земли́.
Ла́вра Се́ргиева,/ похвала́ Руси́ Святы́я,/ да́же до коне́ц земли́/ почита́ние Неразде́льныя Тро́ицы// велегла́сно пропове́дует.
Сла́ва, принесе́ния, глас 8.
Подо́бен: Язы́цы иногда́:
Денни́ца иногда́ низпады́й,/ богопротивле́нию челове́ки научи́;/ Христо́с же, на Крест возше́дый,/ боговсыновле́ние лю́дем дарова́./ Сы́нове диа́воли ве́ру истреби́ти го́рдостию мня́хуся;/ сы́нове же Ца́рствия ве́ру сохрани́ти кро́вию потща́шася./ Тогда́ у́бо святы́ня вся́кая попира́шеся,/ земли́ Ру́сския в поруга́ние;/ ны́не же лик Святы́я Тро́ицы возвраще́н бысть,// Руси́ Святе́й во обновле́ние.
И ны́не, пра́здника.
А́ще ли кроме́ Трио́ди: Сла́ва, и ны́не, принесе́ния.
Отпусти́тельный тропа́рь пра́здника Трио́ди.
Сла́ва, и ны́не, принесе́ния, глас 8.
Подо́бен: Благослове́н:
Благослове́н еси́, Триеди́ный Го́споди,/ Це́рковь Ру́сскую уте́шивый,/ возврати́в нам Твой честны́й о́браз,/ и тем в ве́ре и любви́ наста́вивый.// Человеколю́бче, сла́ва Тебе́.
А́ще ли кроме́ Трио́ди, тропа́рь принесе́ния.
НА У́ТРЕНИ
На Бог Госпо́дь: тропа́рь пра́здника Трио́ди, два́жды. А́ще вне Трио́ди: Благослове́н еси́, Триеди́ный Го́споди: два́жды. Сла́ва, и ны́не, то́йже.
По 1-м стихосло́вии седа́лен, глас 2.
Подо́бен: Егда́ снизше́л:
Егда́ в нача́ле Ада́ма созда́ти восхоте́л еси́, Тво́рче и Влады́ко,/ тогда́ Сло́ву Твоему́ Ипоста́сному, и Единосу́щному Ду́ху возопи́л еси́, Благоутро́бне:/ сотвори́м челове́ка по о́бразу На́шему и по подо́бию./ Те́мже любо́вию вопие́м Ти́:/ Соде́телю Бо́же наш, сла́ва Тебе́.
Сла́ва, и ны́не, пра́здника.
А́ще ли кроме́ Трио́ди: Сла́ва, и ны́не, то́йже.
По 2-м стихосло́вии седа́лен, глас 4.
Подо́бен: Ско́ро предвари́:
Та́инство Еди́наго Бо́га в Трие́х Ли́цех,/ Авраа́му во о́бразе трие́х А́нгел дре́вле откры́вшееся,/ преподо́бный Се́ргий на Святе́й Руси́ почита́нием Единосу́щныя Тро́ицы пропове́да,/ святы́й же Андре́й ико́ною богодухнове́нною сие́ запечатле́,/ е́йже покланя́ющеся, освяще́ние почерпа́ем.
Сла́ва, и ны́не, пра́здника.
А́ще ли кроме́ Трио́ди: Сла́ва, и ны́не, то́йже.
Велича́ние:
Велича́ем Тя,/ Триипоста́сный Влады́ко,/ ве́рою правосла́вною зе́млю Ру́сскую озари́вшаго,/ и благода́тный о́браз Твой// нам дарова́вшаго.
Псало́м избра́нный:
1. Госпо́дь воцари́ся, в ле́поту облече́ся.
2. До́му Твоему́ подоба́ет святы́ня, Го́споди, в долготу́ дний.
1. Сло́вом Госпо́дним небеса́ утверди́шася, и Ду́хом уст Его́ вся си́ла их.
2. Терпя́ потерпе́х Го́спода, и внят ми и услы́ша моли́тву мою́.
1. Помяну́тся и обратя́тся ко Го́споду вси концы́ земли́.
2. И покло́нятся пред Ним вся оте́чествия язы́к.
1. Зна́менася на нас свет лица́ Твоего́, Го́споди.
2. Го́споди, во све́те лица́ Твоего́ по́йдем.
1. По́слеши Ду́ха Твоего́, и сози́ждутся, и обнови́ши лице́ земли́.
2. Дух Твой Благи́й наста́вит мя на зе́млю пра́ву.
1. Се́рдце чи́сто сози́жди во мне, Бо́же, и Дух прав обнови́ во утро́бе мое́й.
2. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.
1. Возда́ждь ми ра́дость спасе́ния Твоего́, и Ду́хом Влады́чним утверди́ мя.
2. Госпо́дь кре́пость лю́дем Свои́м даст, Госпо́дь благослови́т лю́ди Своя́ ми́ром.
Сла́ва, и ны́не: Аллилу́ия, аллилу́ия, аллилу́ия, сла́ва Тебе́, Бо́же. Три́жды.
По полиеле́и седа́лен, глас 6.
Подо́бен: Е́же о нас:
Е́же к нам яви́в благоволе́ние,/ во оби́тель вели́каго Се́ргия/ по ле́тех лю́тых возврати́л еси́ Твой благоле́пный о́браз,/ О́тче и Сы́не со Ду́хом Святы́м,/ любо́вь и едине́ние обновля́я,/ и вопия́ правосла́вно испове́дающим Тя:/ Аз есмь с ва́ми, и никто́же на вы.
Сла́ва, и ны́не, Богоро́дичен, глас то́йже:
Триеди́наго Бо́га явле́ние/ созерца́ем во благове́щении Тебе́, Пресвята́я Де́во,/ егда́ Арха́нгел Гаврии́л Сове́т Преве́чный откры́ Ти, глаго́ля:/ Дух Святы́й на́йдет на Тя,/ и Си́ла Вы́шняго осени́т Тя:/ те́мже и Ражда́емое Свя́то нарече́тся Сын Бо́жий./ Сего́ ра́ди Тя, Богоро́дице, со тре́петом сла́вим.
Степе́нна, 1-й антифо́н 4-го гла́са. Проки́мен, глас 4: До́му Твоему́ подоба́ет святы́ня, Го́споди,// в долготу́ дний. Стих: Госпо́дь воцари́ся, в ле́поту облече́ся. Вся́кое дыха́ние:
Ева́нгелие от Иоа́нна, зача́ло 48 (гл. 14, ст. 18–29):
Рече́ Госпо́дь Свои́м ученико́м: не оста́влю вас си́ры: прииду́ к вам. Еще́ ма́ло, и мир ктому́ не ви́дит мене́: вы же ви́дите Мя, я́ко Аз живу́, и вы жи́ви бу́дете. В той день разуме́ете вы, я́ко Аз во Отце́ мое́м, и вы во Мне, и Аз в вас. Име́яй за́поведи Моя́ и соблюда́яй их, той есть любя́й Мя: а любя́й Мя, возлю́блен бу́дет Отце́м Мои́м, и Аз возлюблю́ его́, и явлю́ся ему́ Сам. Глаго́ла Ему́ Иу́да, не Искарио́тский: Го́споди, и что бысть, я́ко нам хо́щеши яви́тися, а не ми́рови? Отвеща́ Иису́с и рече́ ему́: а́ще кто лю́бит Мя, сло́во Мое́ соблюде́т: и Оте́ц мой возлю́бит его́, и к нему́ прии́дема и оби́тель у него́ сотвори́ма. Не любя́й Мя, слове́с Мои́х не соблюда́ет: и сло́во, е́же слы́шасте, несть Мое́, но посла́вшаго Мя Отца́. Сия́ глаго́лах вам, в вас сый: Уте́шитель же Дух Святы́й, его́же по́слет Оте́ц во и́мя Мое́, Той вы научи́т всему́ и воспомяне́т вам вся, я́же рех вам. Мир оставля́ю вам: мир Мой даю́ вам, не я́коже мир дае́т, Аз даю́ вам. Да не смуща́ется се́рдце ва́ше, ни устраша́ет. Слы́шасте, я́ко Аз рех вам: иду́ и прииду́ к вам. А́ще бы́сте люби́ли Мя, возра́довалися бы́сте у́бо, я́ко рех: иду́ ко Отцу́: я́ко Оте́ц Мой бо́лий Мене́ есть. И ны́не рех вам, пре́жде да́же не бу́дет, да егда́ бу́дет, ве́ру и́мете.
По 50-м псалме́:
Сла́ва: Моли́твами преподо́бных оте́ц на́ших Се́ргия и Андре́я,/ Ми́лостиве, очи́сти// мно́жества согреше́ний на́ших.
И ны́не: Моли́твами Богоро́дицы,/ Ми́лостиве, очи́сти// мно́жества согреше́ний на́ших.
Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х,// очи́сти беззако́ние мое́.
И стихи́ра принесе́ния, глас 6:
О Тро́ице, Бо́же наш,/ О́тче, Сы́не и Ду́ше,/ чу́дный о́браз Твой благода́рным се́рдцем почита́юще,/ смире́нно мо́лим Тя:/ свы́шний мир Твой да́руй нам,// и ве́лию ми́лость.
Кано́н пра́здника Трио́ди, и кано́н в па́мять принесе́ния чудотво́рнаго о́браза Пресвяты́я Тро́ицы, его́же краегране́сие: Пресу́щную Тро́ицу во Еди́нице чтим и пое́м. Глас 8.
Песнь 1
Ирмо́с: Мо́ре огусти́л еси́,/ погрузи́вый со ору́жием го́рдаго фарао́на,/ и лю́ди спасл еси́ немо́кренно, Го́споди,/ и ввел еси́ я́ в го́ру святы́ни, вопию́щия:/ пои́м Тебе́, Бо́гу на́шему,// песнь побе́дную, я́ко просла́вися.
Припе́в: Пресвята́я Тро́ице, Бо́же наш, сла́ва Тебе́.
Прииди́те, ве́рнии,/ Триипоста́сному Божеству́ поклони́мся,/ ве́рою правосла́вною зе́млю Ру́сскую озари́вшему,/ о́браз Свой во оби́тели Се́ргия чудотво́рца просла́вльшему,/ и во вре́мя благопотре́бно/ па́ки се́мо возврати́вшему.
Равноапо́стольная прама́ти на́ша О́льга/ луч Трисия́тельнаго Божества́ узре́,/ я́ко зна́мение попече́ния Госпо́дня о Руси́,/ и на ме́сте том храм Пресвяты́я Тро́ицы созда́,/ да сла́вят лю́дие ру́сстии/ Преве́чнаго Триеди́наго Бо́га.
Егда́ от иноплеме́ннаго и́га и междоусо́бныя бра́ни/ страда́ зело́ Ру́сская земля́,/ тогда́ воздви́же Преблаги́й Бог/ Се́ргия преподо́бнаго,/ и́же во чре́ве ма́терни трикра́ты возгласи́,/ я́ко и́стинный служи́тель Святы́я Тро́ицы.
Богоро́дичен: Спаси́ мя, Бо́же мой,/ от вся́каго искуше́ния и озлобле́ния,/ И́же в Трие́х Ли́цех воспева́емый несказа́нно,/ Еди́нственне Бог и Всеси́льный,/ и Твое́ ста́до сохрани́,/ Богоро́дицы моли́твами.
Песнь 3
Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// еди́не Человеколю́бче.
Уловле́н любо́вию Святы́я Тро́ицы,/ и Трисия́тельною заре́ю просвеще́н,/ Се́ргию богому́дрому в похвалу́,/ по веле́нию Ни́кона преподо́бнаго,/ святы́й Андре́й созда́ о́браз чу́дный/ Еди́наго в Трие́х Ли́цех Бо́га.
Щедро́ты Твоя́ при́сно нам пода́ждь,/ О́тче, Сы́не и Ду́ше,/ защища́я ны во обстоя́ниих вся́ческих,/ я́коже ны́не соблаговоли́л еси́/ о́браз Твой святы́й в дом Твой возврати́ти,/ и любо́вию Твое́ю вся уще́дрити.
Ненави́стныя ро́зни ми́ра сего́ страх/ побежда́ется любо́вию Отца́ распина́ющею,/ любо́вию же Сы́на распина́емою/ и Ду́ха Свята́го любо́вию, си́лою Кре́стною торжеству́ющею,/ ея́же Та́инство зрим на ико́не Святы́я Тро́ицы.
Богоро́дичен: Ум у́бо Нерожде́нный Оте́ц,/ и Сло́во Сообра́зно,/ и Дух Сопресто́лен,/ Пресу́щная, Неизрече́нная, Великоде́йственная Тро́ице, Еди́нице,/ соблюда́й ста́до Твое́ моли́твами Богоро́дицы,/ я́ко Естество́м Человеколю́бец.
Седа́лен, глас 2:
А́ще и неизрече́нна Единосу́щныя Тро́ицы та́йна,/ ниже́ А́нгельскими, ниже́ челове́ческими помышле́нии постижи́ма,/ оба́че преподо́бный Андре́й,/ почита́ние Первоо́браза Боже́ственнаго/ от а́ввы Се́ргия восприе́м,/ ели́ко мо́щно, сию́ на ико́не святе́й запечатле́,/ е́йже вси ве́рою поклони́мся,/ моля́щеся со слеза́ми.
Сла́ва, и ны́не, пра́здника.
А́ще же кроме́ Трио́ди, Богоро́дичен, глас то́йже:
Моле́ние те́плое и стенá необори́мая,/ ми́лости исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́,/ и от бед избáви нас,/ еди́на вско́ре предстáтельствующая.
Песнь 4
Ирмо́с: Богоно́сный Ду́хом Святы́м просвети́вся проро́к Авваку́м,/ в после́дняя Твое́ прише́ствие прови́дев, вопия́ше:/ внегда́ прибли́житися ле́том, позна́ешися:/ внегда́ приити́ вре́мени, яви́шися.// Сла́ва си́ле Твое́й, Го́споди.
Ю́же дре́вле богосло́внии отцы́ пропове́даша сло́вом,/ Тро́ицу Единосу́щную и Неразде́льную,/ преподо́бный Андре́й, уче́нии Се́ргия богоно́снаго напое́н,/ ико́ною богодухнове́нною просла́ви.
Тро́ицы Пресвяты́я честно́е носи́ло и похвале́ние, а́вва Се́ргий,/ во о́бразе Ея́, и́же написа́ Андре́й святы́й,/ го́рнюю красоту́ нам явля́ет,/ в сердца́х ве́рных печатле́я Боже́ственный зрак,/ во спасе́ние душ на́ших.
Ру́сской земли́, от разделе́ний стра́ждущей,/ возсия́ Живонача́льныя Тро́ицы ико́на, я́ко дар Боже́ственный,/ отъя́та же быв в ле́та гоне́ний,/ па́ки во оби́тель свою́ возврати́ся,/ те́мже ве́лию ми́лость Бо́жию сла́вим.
Богоро́дичен: Обожи́ти хотя́ дре́вле истле́вшаго челове́ка,/ за бла́гость, Де́во, созда́вый,/ и показа́вый О́браза Боже́ственный зрак,/ Челове́к бысть из Тебе́,/ Еди́но Тричи́сленное Богонача́лие пропове́да.
Песнь 5
Ирмо́с: У́тренюет дух мой к Тебе́, Бо́же,/ от Отца́ рожде́нному неизрече́нно,/ и Ду́хом Святы́м очище́ние грехо́в дарова́вшему нам// во спасе́ние душ на́ших.
И́же па́ки прия́вый ико́ну Твою́, Единосу́щная Тро́ице,/ я́коже со́лнце, лучи́ облиста́ющу дарова́ний духо́вных,/ свят храм Твой, его́же в похвалу́ а́вве Се́ргию преподо́бный Ни́кон созда́,/ ди́вен в пра́вду.
Царя́ Небе́снаго черто́г мы́сленно явля́ется нам/ зре́нием о́браза Животворя́щия Тро́ицы,/ иде́же во све́те невече́рнем преподо́бнии Се́ргий, Ни́кон и Андре́й предстоя́т,/ моля́ще о спасе́нии душ на́ших.
Упова́ние мое́ Оте́ц, прибе́жище мое́ Сын,/ покро́в мой Дух Святы́й,/ благода́тию пречестна́го о́браза Твоего́ утоли́ церко́вныя собла́зны,/ я́ко Всеми́лостивый и Благи́й.
Богоро́дичен: Ви́димь быва́я дре́вними обра́зне,/ предвозвести́ло есть, е́же от Тебе́, Де́во, воплоще́ние, Сло́во:/ но по́слежде я́влься челове́ком,/ пои́стинне Триипоста́сное Единонача́лие яви́.
Песнь 6
Ирмо́с: Во Исаа́це страсть прописа́вый,/ и во Ио́не погребе́ние прообразова́вый,/ и воскресе́ние всем подая́й,/ Тебе́ вопие́м с проро́ком:// от тли нас возведи́, Благоутро́бне Го́споди.
О́бразу Твоему́ благода́тному/ со стра́хом, ве́рою и любо́вию благода́рне нам припа́дающим,/ се́рдце очища́ется и дух пра́вый обновля́ется,/ Благоутро́бне Трисвяты́й Го́споди.
Еще́ на земли́ во оби́тель Триеди́наго Бо́га/ ду́шу свою́ устро́ивый,/ и во и́мя Его́ храм и оби́тель и́ноком созда́вый,/ преподо́бный Се́ргий запове́дает нам воззре́нием на Святу́ю Тро́ицу/ еди́нство Це́ркви и Оте́чества храни́ти.
Дарова́вый нам па́ки во хра́ме Твое́м зре́ти/ о́браз Твой, Тро́ице, Бо́же наш,/ сподо́би лице́м к Лицу́ зре́ти Тя/ в невече́рнем дни Ца́рствия Твоего́,/ моли́твами уго́дник Твои́х Ра́донежских.
Богоро́дичен: И́же всяк пре́жде соста́в осуществова́вый тва́ри,/ во утро́бе Твое́й осуществова́ся,/ неизче́тною бла́гостию, Богоро́дице,/ и свет Трисо́лнечный всем возсия́/ Еди́наго Божества́ и Госпо́дьства.
Конда́к, глас 6:
К боговиде́нию о́чи угото́вим,/ и досто́йно потщи́мся ви́дети/ о́браз Святы́я Тро́ицы всечестны́й,/ во оби́тели Се́ргия чудотво́рца/ па́ки водвори́выйся в просвеще́ние на́ше,/ да любо́вь и едине́ние в Преве́чнем Сове́те созерца́юще,// еди́ни в любви́ по сло́ву Госпо́дню пребу́дем.
И́кос:
Сра́дуются с на́ми у́мная вся чинонача́лия,/ ви́дяще благода́тный о́браз в Трие́х Ли́цех Еди́наго Бо́га,/ благогове́йне ве́рными почита́емый;/ сликовству́ют же и преподо́бнии Се́ргий, Ни́кон и Андре́й/ со все́ми святы́ми земли́ Ру́сския,/ зря́ще возвраще́ние ико́ны сея́ во Свята́я,/ я́ко зна́мение возрожде́ния Це́ркве и Оте́чества на́шего,/ по ле́тех лю́тых и мно́зех страда́ниих ве́ры ра́ди./ О, каковы́й дар нам дарова́ся!/ От него́же к Первообра́зному со тре́петом ду́хом простира́ющеся,/ за́поведи Бо́жия храни́ти потщи́мся, моля́щеся,/ да сподо́бимся зре́ти и воспева́ти Тро́ицу Животворя́щую,/ и еди́ни в любви́ по сло́ву Госпо́дню пребу́дем.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.
Неизрече́ннаго и Боже́ственнаго Первоо́браза Тро́ичный свет,/ я́коже в зерца́ле моли́твенно зря в начерта́ннем подо́бии,/ богове́дение оте́ц почерпа́ем.
И́стиннаго Бо́га чту́ще во о́бразе,/ его́же преподо́бный Андре́й Ду́хом Святы́м написа́,/ любо́вию Тро́ическою распала́емся,/ и ве́рою утвержда́емся.
Це́рковь Ру́сская ра́дуется о вас,/ чу́днии Се́ргие, Ни́коне и Андре́е,/ и диви́тся, ка́ко огню́ Боже́ственному приступи́сте/ и не опали́стеся.
Богоро́дичен: Еди́нственне и Трисве́тне, Влады́ко Бо́же,/ прегреше́ний избавле́ние и бед/ низпосли́ Твои́м певце́м,/ моли́твами Богома́тере.
Песнь 8
Ирмо́с: Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́йте снизше́дшее Сло́во,/ и огнь в ро́су претво́ршее,/ и превозноси́те всем жизнь подава́ющаго// Ду́ха Всесвята́го во ве́ки.
Чудоде́йствием мно́гим в тебе́ ди́вно просла́вися,/ богому́дре Се́ргие,/ в Трие́х Ипоста́сех и Еди́ном Существе́/ воспева́емый Бог наш,/ Его́же почита́ние в Ру́сской земли́ утверди́л еси́,/ и на Небесе́х превозно́сиши во ве́ки.
Трисия́ннаго Бо́га вселе́ние быв,/ богоно́сне Се́ргие,/ со все́ми святы́ми Це́ркве Ру́сския моли́ся о нас ко Го́споду,/ я́ко да убежи́м тьмы грехо́вныя,// и све́та невече́рняго яви́мся о́бщницы во ве́ки.
Искуша́еми пла́менем,/ трие́ о́троцы в пещи́ Тро́ицу прообрази́ша,/ преподо́бный же Андре́й, огне́м Ду́ха Свята́го просвеща́емь,/ о́браз Триеди́наго Бо́га яви́ нам,/ Его́же превозно́сим во ве́ки.
Богоро́дичен: Ма́ти Богоневе́стная,/ облиста́ла еси́ нам/ от Трисо́лнечныя сла́вы,/ Еди́наго, Всепе́тая, Христа́ Го́спода,/ всех тайнонауча́юща/ Еди́ному Богонача́лию в Трие́х Ли́цех/ пе́ти во ве́ки.
Честне́йшую не пое́м.
Песнь 9
Припе́в : Велича́й, душе́ моя́, Триипоста́снаго и Неразде́льнаго Божества́ держа́ву.
Ирмо́с: Благослове́н Госпо́дь Бог Изра́илев,/ воздви́гнувый рог спасе́ния нам,/ в дому́ Дави́дове о́трока Своего́,/ в ни́хже посети́ нас Восто́к с высоты́,// и напра́вил ны есть на путь ми́ра.
Припе́в: Ве́рнии, на о́браз Единосу́щныя Тро́ицы взира́юще, любо́вию и едине́нием спаса́ются.
И́же от не су́щих вся приведы́й,/ Сло́вом созида́емая, соверша́емая Ду́хом,/ О́тче Небе́сный, дарова́вый нам любо́вь,/ да ча́да Твоя́ нарече́мся и бу́дем,/ очи́сти ны гре́шныя,/ да дерзнове́ние и́мамы в День Су́дный.
Припе́в: Ве́рнии, на о́браз Единосу́щныя Тро́ицы взира́юще, любо́вию и едине́нием спаса́ются.
Па́мятовати подоба́ет день сей,/ во́ньже во Свята́я возврати́ся Единосу́щныя Тро́ицы о́браз,/ неизсле́димыя пути́ Бо́жия о спасе́нии Руси́ явля́я,/ и моли́твы те́плыя о Це́ркви и Оте́честве возсыла́ти.
Припе́в: Ве́рнии, зря́ще о́браз Живонача́льныя Тро́ицы, возра́довашася, я́ко возврати́ся во оби́тель Се́ргиеву.
О́тче наш Се́ргие,/ со ученики́ твои́ми Ни́коном и Андре́ем,/ та́же со Алекса́ндром, и́же близ Сви́ри реки́ подвиза́ся,/ и во о́бразе трие́х А́нгелов виде́ния Святы́я Тро́ицы сподо́бися,/ моли́те Всеблага́го Бо́га спасти́ся нам.
Припе́в: Ве́рнии, зря́ще о́браз Живонача́льныя Тро́ицы, возра́довашася, я́ко возврати́ся во оби́тель Се́ргиеву.
Егда́ покая́ние и моли́твы люде́й ру́сских узре́л еси́,/ Безнача́льне О́тче, Соприсносу́щне Сло́ве и Ду́ше Святы́й,/ тогда́ благода́тную ико́ну Твою́ в дом Твой возврати́л еси́,/ ра́дость всему́ ми́ру да́руя.
Припе́в: Велича́й, душе́ моя́, Пречи́стую Де́ву, ро́ждшую Еди́наго от Животворя́щия Тро́ицы.
Богоро́дичен: Моле́ния на́ша приими́,/ И́же в Трие́х Богонача́льных Ипоста́сех/ Еди́н сый Бог, во и́стине ве́руемый:/ и пода́ждь Твои́м рабо́м утеше́ние,/ моли́твами Пречи́стыя и Препе́тыя Богома́тере.
Свети́лен.
Подо́бен: Не́бо звезда́ми:
Просла́вим, ве́рнии, Всеблага́го Бо́га,/ Трисо́лнечным Све́том озаря́еми от о́браза Святы́я Тро́ицы,/ и́же па́ки на све́щнице оби́тели Тро́ицкия возсия́.
Сла́ва, и ны́не, эксапостила́рий Пятьдеся́тницы,
подо́бен то́йже:
Свет Оте́ц, Свет Сло́во, Свет и Святы́й Дух,/ И́же во язы́цех о́гненных апо́столом посла́ся./ И Тем весь мир просвеща́ется Тро́ицу почита́ти Святу́ю.
На хвали́тех стихи́ры пра́здника 3, и принесе́ния 3, глас 1.
Подо́бен: Небе́сных чино́в:
Небеса́ пове́дают сла́ву Бо́жию,/ и мы на земли́ благодаре́ние прино́сим/ Триипоста́сному Бо́гу,/ благоволи́вшему возврати́ти чу́дный Свой о́браз/ во оби́тель печа́льника земли́ Ру́сския,// да пое́м: испо́лнь сла́вы дом Твой.
Живонача́льную Тро́ицу,/ Ю́же еще́ во чре́ве ма́терни просла́вил еси́,/ Се́ргие богоно́сне,/ моли́ с преподо́бными Ни́коном и Андре́ем/ о нас, ча́дех и ученице́х твои́х,// чту́щих любо́вию благослове́нный Сея́ о́браз.
О́бразу Пресвяты́я Тро́ицы,/ его́же в похвалу́ вели́кому а́вве Се́ргию/ начерта́л еси́, преподо́бне Андре́е,/ си́ла благода́тная даде́ся:/ зри́тельне бо открыва́ет и́стину,// я́же чи́стым се́рдцем и ве́рою постига́ется.
Сла́ва, принесе́ния, глас 6:
Воспои́м, ве́рнии,/ е́же о нас Бо́жия благодея́ния вели́чество:/ воздыха́ния бо серде́ц на́ших прия́в,/ во вре́мя благопотре́бно ди́вный о́браз Свой/ в ла́вру преподо́бнаго Се́ргия/ возврати́л есть,/ печатле́я в сердца́х лю́бящих Его́ Боже́ственный зрак./ Припаде́м у́бо к ико́не сей со тре́петом, бра́тие:/ благода́ть бо Ду́ха ве́рою почита́ющим ю́,/ неви́димо подава́ется от Первообра́зныя// и Преве́чныя Тро́ицы.
И ны́не, пра́здника.
А́ще ли кроме́ Трио́ди: Сла́ва, и ны́не, принесе́ния.
Славосло́вие вели́кое.
По славосло́вии тропа́рь принесе́ния. Сла́ва, и ны́не, пра́здника.
А́ще ли кроме́ Трио́ди, то́чию тропа́рь принесе́ния.
НА ЛИТУРГИ́И
Блаже́нны от кано́на пра́здника Трио́ди, песнь рядова́я со ирмосо́м на 4, и от кано́на принесе́ния, песнь 6-я на 4. А́ще же кроме́ Трио́ди, блаже́нны от кано́на принесе́ния, пе́сни 3-я и 6-я. Проки́мен пра́здника Трио́ди. Та́же принесе́ния, глас 4: Го́споди, во све́те лица́ Твоего́ по́йдем,// и о и́мени Твое́м возра́дуемся во ве́ки. Стих: Ми́лости Твоя́, Го́споди, во век воспою́, в род и род возвещу́ и́стину Твою́ усты́ мои́ми. А́ще же кроме́ Трио́ди, проки́мен то́кмо принесе́ния.
Апо́стол, чте́ние дне, ряд. Та́же:
Собо́рнаго посла́ния Иоа́ннова чте́ние,
зача́ло 73 от полу́ (1 Ин. 4:11–16): Возлю́бленнии, а́ще си́це возлюби́л есть нас Бог, и мы до́лжни есмы́ друг дру́га люби́ти. Бо́га никто́же нигде́же ви́де. А́ще друг дру́га лю́бим, Бог в нас пребыва́ет, и любы́ Его́ соверше́нна есть в нас. О сем разуме́ем, я́ко в Нем пребыва́ем, и Той в нас, я́ко от Ду́ха Своего́ дал есть нам. И мы ви́дехом и свиде́тельствуем, я́ко Оте́ц посла́ Сы́на Спаси́теля ми́ру: и́же а́ще испове́сть, я́ко Иису́с есть Сын Бо́жий, Бог в нем пребыва́ет, и той в Бо́зе. И мы позна́хом и ве́ровахом любо́вь, ю́же и́мать Бог в нас. Бог любы́ есть, и пребыва́яй в любви́, в Бо́зе пребыва́ет, и Бог в нем пребыва́ет.
Аллилу́ия пра́здника Трио́ди. Та́же принесе́ния, глас 1: Воспо́йте Го́сподеви песнь но́ву, до́бре по́йте Ему́ со восклица́нием. Стих: Сло́вом Госпо́дним Небеса́ утверди́шася, и Ду́хом уст Его́ вся си́ла их. А́ще же кроме́ Трио́ди, аллилуиа́рий то́кмо принесе́ния.
Ева́нгелие, чте́ние дне, ряд. Та́же:
Ева́нгелие от Иоа́нна, зача́ло 48 (гл. 14, ст. 10–21):
Рече́ Госпо́дь Свои́м ученико́м: глаго́лы, я́же Аз глаго́лю ва́м, о Себе́ не глаго́лю: Оте́ц же во Мне пребыва́яй, Той твори́т дела́. Ве́руйте Мне, я́ко Аз во Отце́, и Оте́ц во Мне. А́ще ли же ни, за та дела́ ве́ру ими́те Ми. Ами́нь ами́нь глаго́лю вам: ве́руяй в Мя, дела́, я́же Аз творю́, и той сотвори́т, и бо́льша сих сотвори́т, я́ко Аз ко Отцу́ Моему́ гряду́. И е́же а́ще что про́сите от Отца́ о и́мени Мое́м, то́ сотворю́: да просла́вится Оте́ц в Сы́не. И а́ще чесо́ про́сите во и́мя Мое́, Аз сотворю́. А́ще лю́бите Мя, за́поведи Моя́ соблюди́те. И Аз умолю́ Отца́, и ино́го Уте́шителя даст вам, да бу́дет с ва́ми в век: Дух и́стины, Его́же мир не мо́жет прия́ти, я́ко не ви́дит Его́, ниже́ зна́ет Его́: вы же зна́ете Его́, я́ко в вас пребыва́ет, и в вас бу́дет. Не оста́влю вас си́ры: прииду́ к вам. Еще́ ма́ло, и мир ктому́ не ви́дит Мене́: вы же ви́дите Мя, я́ко Аз живу́, и вы жи́ви бу́дете. В той день разуме́ете вы, я́ко Аз во Отце́ мое́м, и вы во Мне, и Аз в вас. Име́яй за́поведи Моя́ и соблюда́яй их, той есть любя́й Мя: а любя́й Мя, возлю́блен бу́дет Отце́м мои́м, и Аз возлюблю́ его́, и явлю́ся ему́ Сам.
Прича́стен пра́здника Трио́ди, и принесе́ния: Го́споди, возлюби́х благоле́пие до́му Твоего́ и ме́сто селе́ния сла́вы Твоея́. А́ще же кроме́ Трио́ди, прича́стен то́кмо принесе́ния.
Моли́тва
Богонача́льная и Животворя́щая, Единосу́щная и Неразде́льная Свята́я Тро́ице, блаже́нное Естество́, незави́стная Благосты́не, вся́ческих Тво́рче и Влады́ко, Сый благослове́н во ве́ки! Благодаря́ще славосло́вим Тя о неизрече́нных ро́ду христиа́нскому благодея́ниих, наипа́че же о просвеще́нии и утвержде́нии во Правосла́вии земли́ Ру́сския, и дарова́нии нам чу́днаго о́браза Твоего́, его́же святы́й Андре́й начерта́, уче́нии уго́дника Твоего́ преподо́бнаго Се́ргия наставля́емь. Тех моли́твами, и моле́ньми всех святы́х земли́ Ру́сския, укрепи́ нас, Триеди́не Бо́же, любо́вию блюсти́ едине́ние ду́ха в сою́зе ми́ра, помина́юще, я́ко еди́но те́ло и еди́н дух есмы́, и непреста́нное славосло́вие возсыла́ти Тебе́, Безнача́льному Отцу́, со Единоро́дным Твои́м Сы́ном, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ами́нь.
