Тропарь, кондак и молитва священномученику Иоанну (Державину)
Ме́сяца декабря́ во 2-й день
Священному́ченика Иоа́нна Держа́вина
Тропа́рь, глас 2:
Цвет ди́вный лу́га духо́внаго/ новому́чеников Це́ркве Ру́сския/ яви́лся еси́, па́стырю до́брый, свя́те Иоа́нне,/ ты бо, ча́да твоя́ в ве́ре наставля́я,/ лю́тых преще́ний не убоя́лся еси́/ и, глад, нищету́, темни́чная заключе́ния претерпева́я,/ наве́ты гони́телей отве́ргл еси́./ Сего́ ра́ди му́ченическаго венца́ сподо́би тя Подвигополо́жник Христо́с,// Его́же моли́ спасти́ся душа́м на́шим.
Конда́к, глас 8:
Непобеди́мыя твоея́ ве́ры мучи́тели не одоле́ша/ и от любве́ Бо́жия тя не разлучи́ша,/ ты бо, я́ко до́брый во́ин Христо́в, безбо́жным противоста́в,/ оклевета́ния и темни́чнаго заточе́ния не убоя́лся еси́/ и Го́спода да́же до сме́рти испове́дал еси́./ Те́мже, восхваля́юще по́двиги твоя́, те́пле вопие́м:/ священному́чениче Иоа́нне,// моли́ Ми́лостиваго Бо́га спасти́ся душа́м на́шим.
Моли́тва
О избра́нниче и уго́дниче Христо́в, священному́чениче Иоа́нне, Це́ркве Ру́сския украше́ние, земли́ на́шея благо́е прозябе́ние и кра́сный плод, за сро́дников твои́х предста́телю и всем правосла́вным лю́дем наста́вниче! Ты во вре́мя гоне́ния безбо́жнаго от сокро́вищницы души́ твоея́ спаси́тельное испове́дание правосла́вныя ве́ры изне́сл еси́ и лю́дем ве́рным па́стырь до́брый яви́лся еси́, ду́шу твою́ за Христа́ и Его́ о́вцы полага́я и лю́тыя во́лки дале́че отгоня́я. Ны́не у́бо при́зри на нас, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Умоли́ Го́спода Бо́га, да прости́т согреше́ния на́ша и изба́вит от а́довых уз и ве́чнаго муче́ния. Утверди́ нас в святе́й правосла́вней ве́ре, научи́ нас всегда́ твори́ти во́лю Бо́жию и храни́ти за́поведи церко́вныя. Бу́ди па́стырем на́шим пра́вило ве́ры, во́ином – вождь духо́вный, боля́щим – врач изря́дный, печа́льным – уте́шитель, гони́мым – засту́пник, ю́ным – наста́вник, всем же благосе́рдый оте́ц и те́плый моли́твенник, я́ко да моли́твами твои́ми соблюде́тся в Правосла́вии Свята́я Русь и непреста́нно сла́вится в ней и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.
