Тропарь, кондак и молитва священномученику Серафиму, епископу Дмитровскому
Ме́сяца а́вгуста в 13-й день
Священному́ченика Серафи́ма, епи́скопа Дми́тровскаго
Тропа́рь, глас 4:
Днесь ве́рнии лю́дие гра́да Дми́трова све́тло пра́зднуют/ и вся Це́рковь Ру́сская духо́вно торжеству́ет,/ восхваля́юще тя, священному́чениче Серафи́ме,/ ты бо, заточе́ние и страда́ния лю́тая претерпе́в,/ смерть му́ченическую за Христа́ прия́л еси́/ и Ца́рство Небе́сное насле́довал еси́./ Те́мже, Престо́лу Пресвяты́я Тро́ицы предстоя́,/ моли́ грехо́в оставле́ние дарова́ти нам,// благоче́стно соверша́ющим святу́ю па́мять твою́.
Конда́к, глас 2:
Во́ине Христо́в добропобе́дный,/ я́ко Серафи́м пла́менный,/ любо́вию к Бо́гу возгоре́лся еси́,/ в посте́ и моли́тве подвиза́яся,/ Саро́вскому чудотво́рцу подража́л еси́,/ за́поведи же Бо́жия исполня́я,/ и́стинней ве́ре лю́ди наставля́л еси́,/ страда́ния за Христа́ претерпева́я,/ еди́нство церко́вное храни́ти призыва́л еси́./ Те́мже, соше́дшеся в па́мять твою́,/ ве́рою и любо́вию вопие́м ти:// ра́дуйся, священному́чениче Серафи́ме, Це́ркве Ру́сския похвало́ и украше́ние.
Моли́тва
О пресла́вный уго́дниче Бо́жий, священному́чениче Серафи́ме, ско́рый помо́щниче и моли́твенниче о всех, с ве́рою к тебе́ прибега́ющих! Ты, от ю́ности Христа́ возлюби́в, мона́шеское житие́ избра́л еси́ и па́стырь до́брый яви́лся еси́. Во дни же гоне́ний на Це́рковь Ру́сскую по́двиг святи́тельский небоя́зненно подъя́л еси́, та́же изгна́ния и страда́ния претерпе́в, кро́вию твое́ю ве́рность Христу́ запечатле́л еси́ и му́ченический вене́ц прия́л еси́. Сего́ ра́ди, прекло́ньше коле́на серде́ц на́ших, я́ко ве́рная ча́да твоя́, мо́лим: укрепи́ ны в любви́ ко Го́споду и тве́рдем стоя́нии за ве́ру правосла́вную, сохрани́ от раско́лов и лжеуче́ний, водвори́ во Оте́честве на́шем мир и благоче́стие. Помози́ нам, святи́телю Христо́в, в ми́ре сем житие́ провожда́ти целому́дренно, пра́ведно и благочести́во, осени́ нас Небе́сным твои́м благослове́нием и моли́ся за ны ко Го́споду, да твои́м хода́тайством и заступле́нием сподо́бимся улучи́ти Ца́рствие Небе́сное, иде́же вку́пе с тобо́ю просла́вим ди́внаго во святы́х Свои́х Бо́га, в Тро́ице сла́вимаго Отца́, и Сы́на, и Свята́го Ду́ха, во ве́ки веко́в. Ами́нь.
