Тропарь, кондак и молитва священномученику Никите, епископу Орехово-Зуевскому
Ме́сяца ноября́ в 6-й день
Священному́ченика Ники́ты, епи́скопа Оре́хово-Зу́евскаго
Тропа́рь, глас 5:
О́тче священному́чениче Ники́то,/ ты, в годи́ну лю́тых гоне́ний/ святи́тельский сан восприе́м,/ во благоче́стии до́бре подвиза́лся еси́,/ последи́ же, я́ко юро́д Христа́ ра́ди поживы́й,/ венце́м му́ченическим украси́лся еси́./ Сего́ ра́ди моли́ Всеблага́го Бо́га/ в ве́ре и́стинней нам утверди́тися// и спасти́ся душа́м на́шим.
Конда́к, глас 4:
Днесь ра́достно лику́ет град Оре́хово-Зу́ево,/ прославля́я святи́теля своего́,/ священному́ченика Ники́ту,/ той бо, нищету́ Христо́ву возлюби́в,/ пра́вило ве́ры и о́браз милосе́рдия яви́./ Ны́не же Престо́лу Бо́жию предстои́т// и мо́лится о душа́х на́ших.
Моли́тва
О пресла́вный священному́чениче, святи́телю о́тче наш Ники́то, гра́да Оре́хова-Зу́ева пе́рвый епи́скопе! Ты во вре́мя гоне́ния безбо́жнаго от сокро́вищницы души́ твоея́ спаси́тельное испове́дание правосла́вныя ве́ры изне́сл еси́ и, я́ко па́стырь до́брый, ду́шу свою́ за о́вцы полага́я, любве́ и милосе́рдия преиспо́лнен был еси́ и, в нищете́ пребыва́я, мно́гим благотвори́л еси́. Услы́ши нас гре́шных, моля́щихся тебе́ и к твоему́ предста́тельству усе́рдно притека́ющих, и помози́ нам ве́ру правосла́вную до конца́ жития́ на́шего соблюсти́, любо́вь нелицеме́рную к Бо́гу име́ти, за́поведи Госпо́дни неле́ностно исполня́ти, чистоту́ и целому́дрие храни́ти, оби́дящих проща́ти и бли́жних преи́скренне люби́ти. Ты во дни земна́го жития́ мно́гими испыта́нии искуше́н быв, мо́жеши ны́не и искуша́емым помо́щник бы́ти. Сего́ ра́ди про́сим тя: воззови́ ко Творцу́ вся́ческих, да да́рует малоду́шным – укрепле́ние, заблу́ждшим – исправле́ние, согреши́вшим – дух покая́ния, бе́дствующим – благовре́менную по́мощь, и всем нам – ре́вность ко исправле́нию грехо́внаго жития́ на́шего. Не оста́ви нас, к тебе́ с ве́рою притека́ющих, споспешеству́й, я́ко оте́ц чадолюби́вый, и́го Христо́во со упова́нием во благоду́шии и терпе́нии понести́, да сподо́бимся унасле́довати Небе́сныя оби́тели, иде́же ты со А́нгелы и все́ми святы́ми ны́не водворя́ешися, прославля́я Бо́га, в Тро́ице сла́вимаго, Отца́, и Сы́на, и Свята́го Ду́ха. Ами́нь.
