Тропарь, кондак и молитва преподобномученику Никону (Беляеву)
Ме́сяца ноября́ в 27-й день
Преподобному́ченика Ни́кона (Беля́ева)
Тропа́рь, глас 4:
Преподобному́чениче Ни́коне,/ учи́телю прему́дрый и па́стырю до́брый,/ ты во дни гоне́ний, на Це́рковь Ру́сскую воздви́гнутых,/ ста́до Христо́во до́бре сохрани́ти потща́лся еси́,/ пропове́дании ве́рныя укрепля́я/ и к Ца́рству Небе́сному управля́я./ Те́мже, лю́тыми мучи́тели сме́рти пре́дан быв,/ ны́не пред Престо́лом Бо́жиим предстои́ши,/ преподобному́чениче Ни́коне,/ вене́ц побе́дный от Христа́ Бо́га прия́л еси́,/ Его́же моли́ Оте́честву на́шему в ми́ре сохрани́тися// и спасти́ся душа́м на́шим.
Конда́к, глас 7:
Пастыренача́льника Христа́ спаси́тельныя за́поведи возлюби́вый,/ да́нную ти па́ству до́бре упа́сл еси́,/ преподобному́чениче Ни́коне,/ и за испове́дание ве́ры во Христа́ страда́ния и смерть прия́л еси́./ Сего́ ра́ди, я́ко име́яй дерзнове́ние ко Го́споду,/ моли́ дарова́ти нам мир// и ве́лию ми́лость.
Моли́тва
О святы́й преподобному́чениче Ни́коне, па́стырю до́брый и ве́ры тве́рдый испове́дниче и ре́вностный пропове́дателю! Ты во дни гоне́ний на Це́рковь Ру́сскую усе́рдно па́ству твою́ наставля́я, страда́ния и смерть за Христа́ претерпе́л еси́. И ны́не, Невече́рним Све́том осия́емь, ве́чныя блаже́нныя жи́зни наслажда́ешися. Мы же, во тьме грехо́в су́щии и, я́ко тро́сти, ве́тром коле́блемии, от всех искуше́ний ми́ра сего́, на ны воздвиза́емых, обурева́еми есмы́ лю́те. Те́мже мо́лим тя, я́ко моли́твенника те́пла и служи́теля пред Престо́лом Бо́жиим благоприя́тна: испроси́ нам от Христа́ Бо́га на́шего ве́ры правосла́вныя укрепле́ние, Оте́чества на́шего утвержде́ние, ми́ра умире́ние, ересе́й и раско́лов искорене́ние, оби́тели твое́й во всем благо́е устрое́ние, ю́ным наставле́ние, от напа́стей бесо́вских избавле́ние, грехо́в и прегреше́ний на́ших проще́ние. Ей, свя́тче Бо́жий, умоли́ Го́спода Сил Ца́рствия Небе́снаго насле́дие нам улучи́ти и со все́ми святы́ми воспева́ти Еди́наго Бо́га, в Тро́ице сла́вимаго, Отца́, и Сы́на, и Свята́го Ду́ха, во ве́ки веко́в. Ами́нь.
