Тропарь, кондак и молитва священномученику Филиппу Распопову

Ме́сяца ноября́ в 23-й день
Священному́ченика Фили́ппа Распо́пова, пресви́тера

Тропа́рь, глас 3:

Тро́ице Святе́й изря́дно потруди́вшуся/ и да́ром любве́ Боже́ственныя обогати́вшуся,/ Фили́ппу священнострада́льцу уми́льно глаго́лем:/ умоли́ Триеди́наго Бо́га ми́лостию посети́ти ны,/ пое́т бо тя дальнеросси́йская земля́// я́ко усе́рднаго предста́теля тебе́ почита́ющих.

Конда́к, глас 5:

Во оде́жды жи́зни ве́чныя/ мно́зи лю́дие от рук твои́х оде́яшася/ во струя́х реки́ Аму́рския./ Риз же твои́х от рук гони́телей совлече́н,/ в купе́ли оледене́нней, свя́те Фили́ппе, спогре́блся еси́ Христу́/ и в ра́дость Го́спода твоего́ совше́л еси́./ Те́мже ны́не моли́ Человеколю́бца/ растопи́ти оледене́вшая сердца́ на́ша// огне́м любве́ Боже́ственныя.

Моли́тва

О пресла́вный о́тче наш Фили́ппе, иере́ю и испове́дниче, мно́гая муче́ния претерпе́вый и Христу́ ве́рен бы́вый да́же до сме́рти! Ты бо, Святе́й Тро́ице усе́рдно служа́, ника́коже отступи́л еси́ повеле́ния апо́стольскаго, е́же о́браз бы́ти ве́рным сло́вом, житие́м, любо́вию, ду́хом, ве́рою и чистото́ю. При́зри от Небе́снаго гра́да на преде́лы Росси́и Да́льния, на всю зе́млю Ру́сскую и на лю́ди ея́: се бо мно́зи, я́коже де́вы юро́дивыя, во тьме неве́дения хо́дят, ны́не же са́мая годи́на есть, е́же храм Свята́го Ду́ха в се́рдце свое́м созида́ти. Те́мже мо́лим тя: испроси́ у Всеблага́го Бо́га па́стырем ре́вность, мона́шествующим в моли́твах укрепле́ние, власте́м разсужде́ние, во́инству на́шему на враги́ одоле́ние, ю́ным наставле́ние и всем ве́рным во Правосла́вии утвержде́ние, да, на све́тлый о́браз жития́ твоего́ взира́юще, мы́сленныя на́ши о́чи ко Святе́й Тро́ице возведе́м и просла́вим Отца́, и Сы́на, и Свята́го Ду́ха, во ве́ки веко́в. Ами́нь.