Тропари, кондак и молитва священномученику Николаю Беневоленскому
Ме́сяца ма́я в 3-й день
Священному́ченика Никола́я Беневоле́нскаго, пресви́тера
Тропа́рь, глас 2:
Благода́тию свяще́нства украси́вся,/ до́брый па́стырь ве́рным лю́дем яви́лся еси́,/ и Христу́ да́же до сме́рти после́довав,/ вене́ц жи́зни от Него́ прия́л еси́./ Те́мже ны́не помина́й нас, священному́чениче Нико́лае,// и моли́ся о спасе́нии душ на́ших.
Ин тропа́рь, глас 4:
Я́ко чадолюби́вый оте́ц и учи́тель благоче́стия,/ па́ству твою́ до́бре упа́сл еси́,/ милосе́рдием же и кро́тостию нра́ва украше́н,/ о́браз ве́ры во страда́ниих за Христа́ показа́л еси́./ Те́мже ны́не в Небе́сных черто́зех пребыва́я,/ помина́й нас, чту́щих святу́ю па́мять твою́,// священному́чениче Нико́лае досточу́дне.
Конда́к, глас 6:
Сро́дник и учени́к преподо́бнаго Алекси́я яви́лся еси́,/ священному́чениче Нико́лае всехва́льне,/ и я́ко до́блий во́ин Христо́в,/ ку́плю жите́йскую отри́нув,/ всего́ себе́ служе́нию Це́ркви Бо́жией посвяти́л еси́/ и в черто́г Небе́сный вше́л еси́, глаго́ля:/ под кро́вом Го́спода моего́// обря́щу поко́й и заступле́ние.
Моли́тва
О па́стырю до́брый и ве́рный служи́телю Христо́в, священному́чениче Нико́лае! Ты, ро́да пра́веднаго о́трасль быв, от ю́ности еди́ному Христу́ служи́ти возжеле́л еси́ и свяще́нства дар, я́ко не́кое Небе́сное сокро́вище, от Него́ прия́л еси́. Те́мже, не о себе́ помышля́я, но о па́стве твое́й пеки́йся, стра́ждущия всем потре́бным снабдева́л еси́. Во дни же гоне́ния лю́таго, зе́млю Ру́сскую пости́гшаго, ре́вность твоя́ я́же по Бо́зе ника́коже ослабе́, но па́че умно́жися, и ле́пота души́ твоея́ всем откры́ся. Ты гони́телей, кро́ва тя лиши́вших и зло́бою ды́шущих, не убоя́лся еси́ и во град преподо́бнаго Се́ргия кро́тко пресели́лся еси́, иде́же, я́ко до́брый па́стырь о лю́дех помышля́я и ре́вности проро́ка Бо́жия Илии́ подража́я, дерзнове́нно и немо́лчно о́вцы Христо́вы благонра́вному житию́ поуча́л еси́. Осужде́н же быв от богобо́рцев на изгна́ние и го́рькия рабо́ты, я́ко ве́рный раб Пастыренача́льника Христа́, во у́зах смерть неви́нную за Него́ прия́л еси́. И ны́не, свя́те Нико́лае, предстоя́ Престо́лу Святы́я Тро́ицы, исхода́тайствуй Оте́честву на́шему мир и благоде́нствие. Испроси́ у Го́спода па́стырем ре́вность апо́стольскую, служе́ние неле́ностное и о па́стве попече́ние изря́дное. Моли́ся, о́тче блаже́нне, и нам бога́тыя ми́лости от Го́спода улучи́ти, ве́ру правосла́вную до́бре храни́ти, наде́жду на Бо́га еди́наго возлага́ти и любо́вь ева́нгельскую в сердца́х на́ших возгрева́ти. Да богоуго́дне на земли́ пожи́вше, сподо́бимся и на Небесе́х при́сно сла́вити Отца́, и Сы́на, и Свята́го Ду́ха, Тро́ицу Единосу́щную и Неразде́льную, во ве́ки веко́в. Ами́нь.
