Тропарь и кондак священномученику Анатолию Ивановскому

Ме́сяца октября́ в 17-й день
Священному́ченика Анато́лия Ивано́вскаго, пресви́тера

Тропа́рь, глас 4:

Правосла́вия побо́рника,/ благоче́стия ревни́теля неле́ностнаго,/ Анато́лия священному́ченика восхва́лим днесь, ве́рнии,/ воспева́юще того́ терпе́ние мно́гое,/ и́мже Небесе́ дости́же,/ и ны́не Престо́лу Бо́жию предстои́т,// моля́ о спасе́нии душ на́ших.

Конда́к, глас 3:

Ве́ру Христо́ву, я́ко ка́мень краеуго́льный,/ в жити́и твое́м положи́л еси́,/ священному́чениче Анато́лие прехва́льне,/ лише́ния и у́зы темни́чныя подъе́мля,/ гони́телей нечести́вых не убоя́лся еси́/ и те́ло на умерщвле́ние пре́дал еси́,/ ду́шу же, я́ко би́сер многоце́нный,/ чи́сту Бо́гови предста́вил еси́,/ Того́ моли́ и нам в пра́вей ве́ре непоколеби́мым пребы́ти// до сконча́ния ве́ка.