Тропарь, кондак и молитва священномученику Василию Сокольскому
Ме́сяца а́вгуста в 28-й день
Свята́го священному́ченика Васи́лия Соко́льскаго,
пресви́тера Петрогра́дскаго
Тропа́рь, глас 4:
Гра́да свята́го Петра́ па́стыря до́браго,/ Правосла́вныя Це́ркве побо́рника, и лжеучи́телей нечести́вых обличи́теля,/ ве́рность Христу́ да́же до кро́ве сохра́ньшаго,/ восхва́лим, ве́рнии, священному́ченика Васи́лия/ и к нему́ усе́рдно с любо́вию возопии́м:/ сохраня́й нас моли́твами твои́ми от вся́каго зла,// страда́льче преди́вне.
Конда́к, глас то́йже:
Страда́льческим путе́м поте́к,/ священному́чениче Васи́лие достохва́льне,/ лжепа́стыри льсти́выя обличи́л еси́/ и мучи́тели безбо́жныя посрами́л еси́./ Пра́вду же Христо́ву страда́нием уве́рив,/ в Небе́сных черто́зех ны́не водворя́ешися,// и мо́лишися о душа́х на́ших.
Моли́тва
О святы́й сла́вный священному́чениче Васи́лие! Ты, измла́да во благоче́стии воспита́нный, свяще́нства дар досто́йно восприя́л еси́ и попече́ние о па́стве, вве́ренней тебе́, име́я, в вертогра́де духо́внем труды́ изря́дныя поне́сл еси́. Егда́ же гоне́ние наста́ на Це́рковь Ру́сскую, ты, свя́тче Бо́жий, мучи́телева преще́ния не убоя́лся еси́ и во гра́де свята́го Петра́ усе́рдный сорабо́тник священному́ченику Вениами́ну был еси́, льсти́выя обы́чаи, лжепа́стырьми вводи́мыя, обличи́л еси́ и па́ству в пра́вей ве́ре утверди́л еси́. Страда́ния в темни́цах и изгна́ниих кро́тко претерпе́вая, му́ченический вене́ц от Христа́ прия́л еси́. Ны́не же во Ца́рствии Небе́снем со А́нгелы и все́ми святы́ми ликовству́еши. Сего́ ра́ди мы, недосто́йная ча́да твоя́, пред святы́м о́бразом твои́м предстоя́ще, умиле́нно взыва́ем ти: испроси́ у Го́спода па́стырем ре́вность о спасе́нии пасо́мых, непра́ведно гони́мым заступле́ние, си́рым защище́ние, скорбя́щим утеше́ние, боля́щим здра́вие, ю́ным наставле́ние, ста́рым укрепле́ние, нам же всем му́жества дарова́ние, во е́же в ве́ре правосла́вней тве́рдо стоя́ти и за́поведи Бо́жия благоче́стно исполня́ти. Ей, уго́дниче Бо́жий! Умоли́ Всеблага́го Бо́га предста́тельством твои́м дарова́ти Це́ркви Святе́й любо́вь и едине́ние, держа́ве же на́шей мир и благоде́нствие, да непреста́нно прославля́ем неизрече́нное человеколю́бие Отца́, и Сы́на, и Свята́го Ду́ха, во ве́ки веко́в. Ами́нь.
