Служба преподобной Елене Дивеевской

Ме́сяца ма́я в 28-й день
Преподо́бныя Еле́ны Диве́евския

 

НА МА́ЛЕЙ ВЕЧЕ́РНИ

На Го́споди, воззва́х: стихи́ры на 4, глас 2:

Ки́ими похва́льными пе́сньми/ воспое́м преподо́бную Еле́ну,/ от ю́ности Бо́га возлюби́вшую,/ кро́ток нрав име́вшую,/ и́мже кро́ткому Го́споду Иису́су благоугоди́вшую,// Его́же мо́лит о спасе́нии душ на́ших?

Ки́ими похвала́ми/ согла́сно просла́вим Еле́ну богому́друю,/ а́нгельскому житию́ подража́вшую,/ и па́че сия́ния со́лнечнаго/ благода́тию Свята́го Ду́ха блиста́ющую,// и моля́щуюся о спасе́нии душ на́ших?

Ки́ими слове́сными венцы́/ украси́м Еле́ну досточу́дную,/ доброде́тели цвет неувяда́емый,/ а́нгельския чистоты́ ревни́тельницу,/ непоро́чную неве́сту Христа́ Бо́га на́шего,// Его́же мо́лит о спасе́нии душ на́ших?

Ко́е сплете́м ти славосло́вие,/ преподо́бная ма́ти Еле́но?/ Посеща́еши бо вся, притека́ющия к ра́це моще́й твои́х,/ от страсте́й покрыва́еши,/ от бед избавля́еши/ и мо́лишися приле́жно Бо́гу// о спасе́нии душ на́ших.

Сла́ва, глас 3:

Укра́шена добро́тами красоты́ Боже́ственныя,/ А́нгелов добро́ты зри́ши, ма́ти преподо́бная,/ и бога́тно чудеса́ источа́еши/ всем, с ве́рою приходя́щим к честны́м моще́м твои́м,/ и мо́лишися прегреше́ний оставле́ние дарова́ти// пра́зднующим святу́ю па́мять твою́.

И ны́не, пра́здника, или́ Богоро́дичен.

На стихо́вне стихи́ры, глас 1:

Преподо́бнаго Серафи́ма ча́до возлю́бленное,/ его́же моли́твами окормля́ема,/ мо́ре жите́йское безбе́дно преплыла́ еси́/ и, приста́нища спаси́тельнаго дости́гши,// ра́йскаго весе́лия наслажда́ешися, богоблаже́нная.

Стих: Ди́вен Бог во святы́х Свои́х,// Бог Изра́илев.

Испо́лньшися даро́в духо́вных,/ неду́ги неисце́льныя цели́ши/ и о́гненное опале́ние уставля́еши,/ ду́хи лука́выя отгоня́еши// и всем в печа́лех помога́еши, досточу́дная.

Стих: Честна́ пред Го́сподем// смерть преподо́бных Его́.

Преподо́бная ма́ти Еле́но,/ ты, всем се́рдцем Бо́га возлюби́вши,/ Вы́шняго Ца́рствия дости́гла еси́,/ помози́ и нам дух кро́тости и смире́ния стяжа́ти// и в покая́нии житие́ провожда́ти.

Сла́ва, глас 3:

На земли́ в послуша́нии подвиза́вшися/ и вре́менную смерть претерпе́вши,/ я́ко голуби́ца млада́я на Небеса́ возлете́ла еси́,/ позлаще́нне же криле́ доброде́тели стяжа́вши,/ в ра́йстей оби́тели вогнезди́лася еси́,// преподо́бная ма́ти Еле́но.

И ны́не, пра́здника, или́ Богоро́дичен.

Тропа́рь пи́сан на вели́цей вече́рни.

 

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 1.

Подо́бен: Небе́сных чино́в:

Небе́сных чино́в ра́дование,/ Пресвята́я Богоро́дица Де́ва/ яви́ уде́л Свой во вселе́нней/ и сподо́би тя, преподо́бная Еле́но,/ избра́нницею Ея́ бы́ти и нача́льницею оби́тели пречу́дныя.// Моли́ся, блаже́нная ма́ти, о любо́вию чту́щих тя.

Небе́сную Помо́щницу иму́щи,/ вра́жиих наве́тов не устраши́лася еси́/ и из глуби́ны души́ к Ней те́пле воззвала́ еси́:/ Влады́чице, спаси́ и приими́ обе́т мой./ И та́ко си́лою Засту́пницы Держа́вныя// ко́зни лука́ваго посрами́ла еси́, всеблаже́нная.

Па́мять твою́, Еле́но, све́тло пра́зднуем,/ ты бо, во́льным стремле́нием те́сную стезю́ избра́вши,/ све́том покая́ния се́рдце свое́ озари́ла еси́/ и, к ре́вности жития́ мона́шескаго себе́ подви́гши,/ Жениха́ Небе́снаго все́ю душе́ю возлюби́ла еси́,/ во́лею нас ра́ди пострада́вшаго и искупи́вшаго вся́.// С Ни́мже ны́не в ра́дости воскресе́ния пребыва́еши.

Глас 4:

Любо́вию Христо́вою уязви́вшися, ма́ти Еле́но,/ преподо́бнаго Серафи́ма смире́нно проси́ла еси́,/ е́же во и́ночестем чи́не Бо́гу послужи́ти./ Ста́рец же три ле́та со тща́нием тя испытова́ше,/ по́слежде на жи́тельство во оби́тель Диве́евскую посла́,/ иде́же ты, в моли́тве и молча́нии пребыва́ющи,/ о́браз благонра́внаго жития́ показа́ла еси́,// те́мже и досто́йная насле́дница ра́йския оби́тели яви́лася еси́.

Мироно́сицы жены́ у́тру глубоку́,/ арома́ты взе́мше,/ ко гро́бу Госпо́дню приидо́ша,/ ты же, богому́драя ма́ти Еле́но,/ мяте́жа мирска́го избе́гши,/ ти́хаго приста́нища оби́тели дости́гла еси́/ и, те́пле сле́зы пролива́ющи,/ благоуха́ние моли́твы чисте́йшия,/ я́ко ми́ро, Спа́су принесла́ еси́./ Боже́ственныя же благода́ти светови́дными луча́ми просвеща́ема,/ све́том богоразу́мия и на́ша сердца́ озари́,// ве́рою сла́вящих тя.

Преподо́бным Серафи́мом благослове́нная,/ та́инственная нача́льнице Ме́льничныя оби́тели,/ преподо́бная ма́ти Еле́но,/ послуша́ние того́ усе́рдно исполня́ющи,/ чистоту́ в хра́ме Бо́жии тща́тельно храни́ла еси́,/ в не́мже, я́ко в черто́зе украше́ннем, всегда́ пребыва́ла еси́./ Помози́ и нам, богоблаже́нная ма́ти,/ чистоту́ се́рдца соблюда́ти// и храм Бо́жий со усе́рдием посеща́ти.

Глас 5.

Подо́бен: Ра́дуйся, Живоно́сный Кре́сте:

Ра́дуйся, неве́сто Христо́ва, Еле́но всесла́вная!/ Ты, Неве́сту Неневе́стную непреста́нно песносло́вящи,/ смире́нием к высоте́ доброде́телей вознесла́ся еси́/ и к подвиго́м неосла́бным потекла́ еси́, зову́щи:/ се́рдце мое́ да возвы́сится к Тебе́, Сло́ве!/ Ему́же и обручи́лася еси́, чин а́нгельский прии́мши./ Моли́, богоблаже́нная, мир ми́рови дарова́ти// и душа́м на́шим ве́лию ми́лость.

Ра́дуйся, преподо́бная ма́ти на́ша Еле́но,/ а́нгельския чистоты́ ревни́тельнице!/ Ты, ору́жие воздержа́ния и щит моли́твы при́сно держа́щи,/ пра́вило благоче́стия и о́браз и́ноческаго жития́ яви́ла еси́./ Те́мже заступле́нием твои́м плодоно́сны Го́сподеви нас соде́лай,/ и моли́ мир ми́рови дарова́ти// и душа́м на́шим ве́лию ми́лость.

Сла́ва, глас 6:

Преподо́бная ма́ти Еле́но,/ се́рдце твое́ оби́тель Свята́го Ду́ха соде́лала еси́,/ из него́же бла́гость любве́ Христо́вы источа́шеся,/ поне́же ми́лостыню та́йно твори́ла еси́/ и сестр, в ско́рби су́щих,/ сло́вом до́брым утеша́ла еси́./ Те́мже предвари́ на по́мощь тя призыва́ющим,/ и испроси́ у Бо́га нам му́дрости духо́вныя// и прегреше́ний оставле́ние.

И ны́не, пра́здника, или́ Богоро́дичен.

Вход. Проки́мен дне. И чте́ния три преподо́бническая.

На лити́и стихи́ра, глас 4:

Днесь и́нокинь мно́жество, соше́дшеся,/ любо́вию воспева́ют тя,/ преподо́бная ма́ти Еле́но,/ ты бо, све́тло украси́вши свети́льник еле́ем любве́ и ми́лости,/ в сре́тение Жениха́ Христа́ ра́достно притекла́ еси́/ и в черто́г украше́нный невестоле́пно возшла́ еси́./ Те́мже, я́ко дерзнове́ние иму́щи,/ моли́ ми́лостиваго Бо́га/ от бед Оте́честву на́шему изба́витися,/ ми́рови мир дарова́ти// и душа́м на́шим ве́лию ми́лость.

Сла́ва, и ны́не, пра́здника, или́ Богоро́дичен.

На стихо́вне стихи́ры, глас 5:

Преподо́бная ма́ти на́ша Еле́но,/ ты, в посте́, моли́тве и богомы́слии пребыва́ющи/ и красото́ю нра́ва крася́щися,/ соверше́нным смире́нием, кро́тостию и милосе́рдием Влады́це Христу́ послужи́ла еси́./ Мы же, ублажа́юще тя, во умиле́нии зове́м:/ не отмета́йся от нас, чад твои́х,/ и пода́ждь скорбя́щим утеше́ние,/ в беда́х всем поможе́ние,// и моли́ спасти́ся душа́м на́шим.

Стих: Ди́вен Бог во святы́х Свои́х,// Бог Изра́илев.

Преподо́бная ма́ти на́ша Еле́но,/ ты, чи́сте и богоуго́дне на земли́ пожи́вши,/ ве́рная служи́тельница Чи́стыя Де́вы яви́лася еси́/ и над устрое́нием святы́я Ея́ Кана́вки усе́рдно потруди́лася еси́./ Мы же, ве́дуще твое́ дерзнове́ние к Пречи́стей Богоро́дице, си́це вопие́м:/ моли́ оби́тель Диве́евскую во благоле́пии сохрани́ти// и спасти́ся душа́м на́шим.

Стих: Честна́ пред Го́сподем// смерть преподо́бных Его́.

Преподо́бная ма́ти на́ша Еле́но,/ кра́сный цве́те целому́дрия,/ бла́гости и любве́ исполне́ние,/ ве́ры неугаси́мая свеще́,/ мона́шествующих путеводи́тельнице/ и неусы́пная о всех предста́тельнице!/ Испроси́ нам благода́ть Пресвята́го Ду́ха,/ ра́дости блаже́нныя Того́ прия́тия// и спасе́ние душа́м на́шим.

Сла́ва, глас 2:

Преподо́бная ма́ти Еле́но,/ ты, послуша́нию преподо́бнаго Серафи́ма навы́кши/ и словеса́ того́ в се́рдце слага́ющи,/ открове́ний о оби́тели Диве́евстей сподо́билася еси́/ и, свя́то храня́щи вся тебе́ запове́данная,/ наставле́нием того́ ве́рно после́довала еси́./ В хра́ме же Бо́жии, псалмы́ неуста́нно вознося́щи/ и на Крест Христо́в со умиле́нием взира́ющи,/ о ми́ре всего́ ми́ра моли́лася еси́,/ взыва́ющи к Засту́пнице Усе́рдной:// Пресвята́я Богоро́дице, спаси́ нас.

И ны́не, пра́здника, или́ Богоро́дичен.

Тропа́рь, глас 1:

Доброде́тельми кро́тости, смире́ния и воздержа́ния просия́вши,/ та́инственная нача́льница Ме́льничныя общи́ны в Диве́еве яви́лася еси́,/ преподо́бная ма́ти на́ша Еле́но,/ да́же до сме́рти в соверше́ннем послуша́нии/ ста́рцу Серафи́му пребыла́ еси́/ и Го́спода лицезре́ти сподо́билася еси́./ Испроси́ нам дерзнове́ние Ему́ Еди́ному служи́ти// во спасе́ние душ на́ших.

 

НА У́ТРЕНИ

По 1-м стихосло́вии, седа́лен, глас 7:

Я́ко звезда́ у́тренняя и со́лнце све́тлое, возсия́ днесь па́мять твоя́, преподо́бная ма́ти Еле́но. Те́мже мо́лим тя: ум наш, нераде́нием омраче́нный, просвети́ и подви́гни сердца́ мона́шествующих по́стническому твоему́ житию́ подража́ти.

Сла́ва, и ны́не, пра́здника, или́ Богоро́дичен:

Удиви́шася, Чи́стая, ли́цы А́нгельстии, ка́ко Прича́стница су́ща богате́йшия ра́дости Небе́сныя, во юдо́ли скорбе́й челове́ческих при́сно пребыва́еши, и ко вся́кому во́плю моли́твы ма́терски тщи́шися, и благода́ть раздае́ши неиждива́емую, больны́х исцеля́ющи и печа́льных утеша́ющи, Де́во Ма́ти Госпо́дня, сокро́вище простра́ннейшее ми́лости Боже́ственныя.

По 2-м стихосло́вии седа́лен, глас 1:

Осия́ема ны́не непреста́нною сла́вою Пресвяты́я Тро́ицы, ма́ти на́ша Еле́но, и боже́ственнаго весе́лия и ра́дости испо́лнена, те́пле о нас моли́ся на Небесе́х, во е́же изба́витися нам му́ки ве́чныя.

Сла́ва, и ны́не, пра́здника, или́ Богоро́дичен:

О Тебе́ ра́дуемся и Тя прославля́ем, Де́во Пречи́стая, я́ко Невмести́маго вмести́ла еси́, Его́же при́сно моли́ о спасе́нии душ на́ших.

Велича́ние:

Ублажа́ем тя,/ преподо́бная ма́ти на́ша Еле́но,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Псало́м избра́нный: Терпя́ потерпе́х Го́спода:

По полиеле́и седа́лен, глас 2:

Ка́ко воспое́м терпе́ние и послуша́ние твое́, преподо́бная ма́ти? Ты бо, наставле́ньми преподо́бнаго Серафи́ма укрепля́ема, благослове́ние того́ на и́ноческий по́двиг кро́тце ожида́ла еси́, последи́ же, во́ли Бо́жии повину́ющися, вре́менную кончи́ну во смире́нии прия́ла еси́. Моли́ спасти́ся душа́м на́шим.

Сла́ва, и ны́не, пра́здника, или́ Богоро́дичен:

Ра́дуйся, А́нгелом ра́дость ми́ра прие́мшая; ра́дуйся, ро́ждшая Творца́ Твоего́ и Го́спода. Ра́дуйся, сподо́бльшаяся бы́ти Ма́ти Бо́жия.

Степе́нна, 1-й антифо́н 4 гла́са. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 6:

Ра́дуйся и весели́ся, оби́теле Бо́жия Ма́тере,/ обогати́вшаяся многоцеле́бными моща́ми/ преподо́бныя Еле́ны досточу́дныя!/ Днесь бо вои́стину свяще́нный/ и ра́достный пра́здник наста́,/ непоро́чная неве́ста Христо́ва/ пе́сньми духо́вными ублажа́ется,/ Небеса́ у́бо досто́йно веселя́тся,/ земля́ же ра́дуется,/ и́нокини, моли́твами тоя́ храни́мыя, лику́ют,/ ве́рнии благода́ть исцеле́ний обрета́ют,// соверша́юще све́тлое торжество́.

Кано́н, глас 8.

Песнь 1

Ирмо́с: Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в,/ и раздели́в мо́ре:/ Изра́иля же беглеца́, пешехо́дца спасе́,// песнь Бо́гови воспева́юща.

Чистоту́ помышле́ний даждь ми, Спа́се мой, е́же воспе́ти чистото́ю А́нгелом подо́бную, богоблаже́нную Еле́ну, сла́вную уго́дницу Христо́ву.

Ки́ими похвала́ми восхва́лим преподо́бнаго Серафи́ма, возрасти́вшаго во уде́ле Бо́жия Ма́тере ди́вную подви́жницу и те́плую о нас моли́твенницу?

Наставле́нием духо́внаго отца́ твоего́, вели́каго ста́рца Серафи́ма, усе́рдно после́довавши, ма́ти Еле́но, и́стинное послуша́ние стяжа́ла еси́.

Богоро́дичен: Ра́дуйся, Пресвята́я Госпоже́, освяти́вшая Диве́ево Твои́м прише́ствием; ра́дуйся, насади́вшая ве́ру и́стинную. Ра́дуйся, собра́вшая мона́шествующих мно́жество.

Песнь 3

Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.

Во оби́тель Диве́евскую притекла́ еси́, иде́же усе́рдно подвиза́вшися, у́зким путе́м послуша́ния да́же до сме́рти ше́ствовала еси́. Помози́ и нам, преподо́бная ма́ти, доброде́тель послуша́ния стяжа́ти.

Де́вственными добро́тами просвеще́на, богоблаже́нная Еле́но, Чи́стому Сло́ву уневе́стилася еси́ и, плотски́я стра́сти умертви́вши, Того́ живоно́сным стопа́м после́довала еси́.

Позлаще́нне криле́ доброде́тели стяжа́вши, на высоту́ Небе́сную возлете́ла еси́, блаже́нная Еле́но, я́ко голуби́ца нетле́нная.

Богоро́дичен: Ра́дуйся, во уде́л Себе́ Диве́ево избра́вшая; ра́дуйся, Засту́пницею ме́ста сего́ бы́ти изво́лившая. Ра́дуйся, Спору́чнице ве́чнаго спасе́ния.

Седа́лен, глас 4:

Красото́ю де́вственною преукра́шена, неве́сто непоро́чная, преподо́бная ма́ти Еле́но, в черто́г Христо́в, ра́дующися, возшла́ еси́, иде́же ли́цы А́нгельстии и святы́х собо́ри любо́вно тя срето́ша, и Сам Царь Сла́вы, возлю́бленный твой Жени́х, призре́ на тя ми́лостиво и увенча́ тя венце́м безсме́ртия. Его́же моли́, всеблаже́нная, не лиши́ти и нас, земны́х и пе́рстных, насле́дия Небе́снаго.

Сла́ва, и ны́не, пра́здника, или́ Богоро́дичен, глас то́йже:

Чи́стая, Всенепоро́чная и Неискусобра́чная, Еди́на безле́тнаго Сы́на и Сло́во Бо́жие в ле́те ро́ждшая, Того́ со все́ми святы́ми моли́, дарова́ти нам очище́ние и ве́лию ми́лость.

Песнь 4

Ирмо́с: Услы́шах Го́споди,/ смотре́ния Твоего́ та́инство:/ разуме́х дела́ Твоя́,// и просла́вих Твое́ Божество́.

Кро́тостию и смире́нием Христу́ подо́бящися, исто́чник избра́нный любве́ яви́лася еси́, преподо́бная Еле́но. Помоли́ся Го́споду, блаже́нная ма́ти, да огнь Боже́ственныя любве́ и в нас не уга́снет.

Да́ры Христу́ принесла́ еси́, чи́стое умерщвле́ние удо́в и труды́ воздержа́ния, те́мже и прия́ла еси́ Небе́сное Ца́рство и ве́чнующее наслажде́ние.

В Небе́сный черто́г всели́лася еси́, преподо́бная Еле́но, неве́ста избра́нна бы́вши Вседержи́телю. Те́мже и благода́ть от Него́ прия́ла еси́, исцеле́ния струи́ источа́ти и страстна́я тече́ния изсуша́ти.

Богоро́дичен: Ра́дуйся, те́плая Хода́таице о оби́тели Твое́й; ра́дуйся, ми́лость Сы́на Твоего́ до сконча́ния ве́ка ме́сту сему́ обеща́вшая. Ра́дуйся, Ра́досте душ и теле́с на́ших.

Песнь 5

Ирмо́с: У́тренююще вопие́м Ти,/ Го́споди, спаси́ ны:/ Ты бо еси́ Бог наш,// ра́зве Тебе́ ино́го не ве́мы.

Стезю́ те́сную проше́дши в поще́нии, к широте́ приспе́ла еси́ ра́йстей, Еле́но всечестна́я.

Мона́шескаго чи́на украше́ние и оби́тели Диве́евския сла́ва ты яви́лася еси́, Еле́но преподо́бная.

А́нгельскому житию́ подража́ющи, псалмопе́ние Бо́гу непреста́нно возноси́ла еси́, богоблаже́нная ма́ти. Помози́ и нам чи́стым се́рдцем песнь Ему́ воспева́ти.

Богоро́дичен: Ра́дуйся, Де́во, я́ко благослове́нием Твои́м осени́ Диве́ево си́ла Вы́шняго; ра́дуйся, я́ко оби́тель Твоя́ напо́лнися подвиза́ющимися. Ра́дуйся, я́ко просия́ зде мно́жество преподо́бных, моля́щихся о спасе́нии душ на́ших.

Песнь 6

Ирмо́с: Ри́зу мне пода́ждь све́тлу,/ одея́йся све́том я́ко ри́зою,// многоми́лостиве Христе́ Бо́же наш.

До́брыми де́лы и словесы́ ева́нгельския за́поведи храня́щи, о́бразу Спа́сову навы́кла еси́ благогове́йне покланя́тися, блаже́нная ма́ти Еле́но.

Любви́ Госпо́дни подража́ющи, бога́тно бли́жним послужи́ла еси́, за́поведь Христо́ву соверше́нне испо́лнивши.

О́блак тя Христо́с показа́, ма́ти Еле́но, дождь живоно́сный источа́яй, ве́рою прося́щим у тебе́ по́мощи и заступле́ния.

Богоро́дичен: Ра́дуйся, я́ко насле́дие Твое́ при́сно призира́еши; ра́дуйся, я́ко благода́ти и ми́лости Своея́ нас сподобля́еши. Ра́дуйся, благослове́ние Сы́на Твоего́ на нас низводя́щая.

Конда́к, глас 5:

В мона́шестве благоче́стно пожи́вши/ и в ю́ных ле́тех путь свой сконча́вши,/ послуша́нием, посто́м и моли́твою непреста́нною/ к сре́тению Жениха́ себе́ предугото́вившая,/ богому́драя Еле́но, мо́лим тя:/ от бед изба́ви нас// твои́ми моли́твами, блаже́нная.

И́кос:

Струи́ мне сло́ва даждь, Бо́же мой,/ и исто́чник благочи́ния сотвори́ мой ум,/ и благослови́ язы́к мой, да воспою́ Твою́ а́гницу, ю́же венча́л еси́ бла́гостию Твое́ю;/ а́ще бо Сам не да́си ми сло́ва досто́йнаго, ка́ко принесу́ дар ни́щий бога́тней в словесе́х и дея́ниих!/ Те́мже пода́ждь ми си́лу испове́дати ея́ по́двиги,/ безпло́тнаго врага́ победи́вшую и Ца́рствия Небе́снаго дости́гшую.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.

О добро́те тле́ющей, преподо́бная, небрегла́ еси́, смотря́ющи та́мо су́щая воздая́ния и свет, и сла́ву Бо́жию нестаре́ющуюся и красоту́, и боже́ственное селе́ние.

Мир тле́ющий премени́ла еси́ преми́рным нестаре́ющим живото́м, и вре́менную пи́щу пребыва́ющим существо́м, плотска́го же обру́чника Небе́сным Женихо́м.

Ра́зум боголюби́в стяжа́ла еси́, Еле́но сла́вная, во пло́ти су́щи, А́нгелом уподо́билася еси́, любо́вию взыва́ющи: благослове́н еси́, Го́споди Бо́же, во ве́ки.

Богоро́дичен: Ра́дуйся, вся́ких даро́в рабо́м Твои́м Всеще́драя Пода́тельнице; ра́дуйся, во бра́ни и боле́знех и труде́х их премилосе́рдая Уте́шительнице. Ра́дуйся, наде́ждо и спасе́ние душ на́ших.

Песнь 8

Ирмо́с: Богоглаго́ливии о́троцы в пещи́/ со огне́м пла́мень попира́юще, поя́ху:// благослови́те, дела́ Госпо́дня, Го́спода.

Укра́шена сия́нием чистоты́ и чи́стым житие́м просвеще́на, ма́ти Еле́но, предстои́ши Жениху́ твоему́, Христу́ Бо́гу на́шему, пою́щи: благослови́те Го́спода во ве́ки.

Го́спода лицезре́ти сподо́билася еси́, преподо́бная Еле́но, ви́девши Его́ я́ко Огнь Неизрече́нный, и во оби́тели Небе́сныя пре́жде кончи́ны Пречи́стою Де́вою введена́ была́ еси́, зову́щи: благослови́те Го́спода во ве́ки.

Я́ко свяще́нная же́ртва, и све́тлое приноше́ние, и кади́ло благоуха́нное принесла́ся еси́, преподо́бная ма́ти Еле́но, всех Влады́це Христу́ Бо́гу на́шему, Его́же благослови́м во ве́ки.

Богоро́дичен: Ра́дуйся, Храни́тельнице на́ша в настоя́щем ве́це; ра́дуйся, Предста́тельнице и непосты́дное упова́ние в бу́дущем. Ра́дуйся, прило́г вся́каго зла от жре́бия Своего́ отража́ющая.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв челове́к.// Те́мже Пречи́стую Богоро́дицу ве́рнии велича́ем.

Возжеле́ла еси́ добро́ту мы́сленную Жениха́ и чи́сто Того́ возлюби́ла еси́, те́пле вопию́щи: да почи́ю у Тебе́ и в Твои́х све́тлостех наслажду́ся, велича́ющи Твою́ бла́гость.

Ра́зум просвеще́н, смире́ние и боже́ственную кро́тость, ве́ру несумне́нну, наде́жду и любо́вь, ю́же к Бо́гу, стяжа́ла еси́, и́миже Тому́ угоди́ла еси́, блаже́нная Еле́но.

Днесь лю́дие собра́шася хвала́ми возвели́чити Го́спода, возвели́чившаго твое́ свято́е торжество́; в не́мже помина́й нас помина́ющих тя, предстоя́щи Христу́ Жениху́ твоему́, преподо́бная Еле́но всечестна́я.

Богоро́дичен: Пе́сни благода́рственныя прино́сим Ти, Ма́ти Бо́жия, я́ко спаса́еши нас при́сно от вся́каго обстоя́ния, и пита́еши, и о нас промышля́еши, и мо́лим Тя: оби́телей Небе́сных по кончи́не нас сподо́би.

Свети́лен:

Ра́дуйся, оби́теле Диве́евская, засту́пницу иму́щи, просия́вшую в тебе́, Еле́ну сла́вную, ея́же моли́твами озари́ омраче́нная сердца́ на́ша, да во све́те невече́рнем у́зрим Христа́ Бо́га на́шего.

Сла́ва, и ны́не, пра́здника, или́ Богоро́дичен:

Свет и́стинный ро́ждшая, Богоро́дице, помраче́нных нас тьмо́ю грехо́вною, просвети́ и прича́стники ве́чных благ соде́лай.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Житие́ твое́, преподо́бная ма́ти Еле́но, чу́дно яви́ся,/ вои́стину и кончи́на твоя́ чуде́сна,/ ю́же за повеле́ние от ста́рца Серафи́ма прия́ла еси́,/ позна́ние и́стинныя любве́ показу́ющи/ и исполне́ние соверше́ннаго послуша́ния,/ поне́же благодаре́ние смире́нно воздава́ла еси́/ и упова́ние на милосе́рдие Бо́га возлага́ла еси́.// Его́же моли́ дарова́ти нам ве́лию ми́лость.

О, пресла́внаго чудесе́!/ Егда́ Пречи́стая Всецари́ца Богоро́дица/ показа́ ти оби́тели Небе́сныя/ и Ца́рствия свет несказа́нный осия́ тя, всеблаже́нная,/ тогда́ моли́лася еси́ приле́жно:/ Свята́я Игу́мение, оби́тель на́шу не оста́ви!/ Ны́не же, в черто́зех Небе́сных пребыва́ющи,/ моли́ Бо́га, преподо́бная Еле́но,// дарова́ти нам ве́лию ми́лость.

Ди́вных открове́ний сла́вная прича́стница/ вои́стину яви́лася еси́, преподо́бная Еле́но,/ внегда́ Го́спода, я́ко Огнь Неизрече́нный, узре́ла еси́,/ и Цари́цу Небе́сную, и святы́х А́нгелов./ Ны́не же с ли́ки преподо́бных и пра́ведных/ Престо́лу Бо́жию предстои́ши/ и славосло́вие Святе́й Тро́ице возно́сиши,/ Ю́же моли́, блаже́нная ма́ти,// дарова́ти нам ве́лию ми́лость.

Днесь украша́ется све́тло оби́тель Диве́евская,/ сокро́вище многоце́нное иму́щи,/ ра́ку святы́х моще́й твои́х,/ я́же неоску́дную благода́ть исцеле́ний источа́ет,/ те́мже пе́сненными похвала́ми венча́ем тя, зову́щи:/ ма́ти на́ша Еле́но, с преподо́бными Алекса́ндрою и Ма́рфою,/ вку́пе же и с Серафи́мом богоблаже́нным,/ моли́теся Го́споду за оби́тель ва́шу земну́ю,// во спасе́ние душ на́ших.

Сла́ва, глас то́йже:

Ти́хостию нра́ва укра́шена,/ ти́хаго приста́нища дости́гла еси́,/ преподо́бная ма́ти Еле́но,/ ты бо, смиренному́дрием сопроти́вных се́тей избежа́вши,/ я́ко голуби́ца чи́стая,/ свято́ю душе́ю на Небеса́ возлете́ла еси́,/ иде́же Христу́ предстои́ши,/ Его́же моли́ спасти́ся нам,// почита́ющим святу́ю па́мять твою́.

И ны́не, пра́здника, или́ Богоро́дичен, глас то́йже:

Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.

НА ЛИТУРГИ́И

Блаже́нны от кано́на, пе́сни 3-я и 6-я, на 4. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 208. Аллилу́ия, глас 1: Терпя́ потерпе́х Го́спода, и внят ми, и услы́ша моли́тву мою́. Ева́нгелие от Луки́, зача́ло 33. Прича́стен: В па́мять ве́чную бу́дет пра́ведник, от слу́ха зла не убои́тся.

Моли́тва

О пресла́вная ма́ти, ско́рая на́ша помо́щнице и засту́пнице, и неусы́пная о нас моли́твеннице! Предстоя́ще ра́це моще́й твои́х и на сия́ со умиле́нием, я́ко живе́й ти су́щей, взира́юще, мо́лимся усе́рдно: приими́ проше́ния на́ша и принеси́ я́ ко Престо́лу Милосе́рдаго Отца́ Небе́снаго, я́ко дерзнове́ние мно́гое к Нему́ иму́щая; испроси́ притека́ющим к тебе́ и всем правосла́вным христиа́ном ве́чное спасе́ние и вре́менное благоде́нствие, на вся же блага́я дела́ и начина́ния ще́дрое благослове́ние, и от вся́ких бед и скорбе́й ско́рое избавле́ние. Ей, чадолюби́вая ма́ти на́ша! Тебе́, предстоя́щей Престо́лу Бо́жию, ве́домы суть ну́жды на́ша духо́вныя и жите́йския; при́зри на нас ма́терним о́ком и твои́ми моли́твами вся зла́я от нас отврати́, па́че же злых и богопроти́вных обы́чаев изба́ви; утверди́ же во всех ве́ры согла́сное ве́дение, взаи́мную любо́вь и единомы́слие, да во всем житии́ на́шем, словесы́ же и писа́нии и де́лы, сла́вится всесвято́е и́мя Отца́, и Сы́на, и Свята́го Ду́ха, во ве́ки веко́в. Ами́нь.



-
Яндекс.Метрика