Тропарь, кондак и молитва священномученику Михаилу (Рыбину)

Ме́сяца февраля́ в 4-й день
Священному́ченика Михаи́ла Ры́бина

Тропа́рь, глас 4:

Днесь ра́дуется земля́ Моско́вская,/ восхваля́ющи священному́ченика пресви́тера Михаи́ла,/ во дни гоне́ний небоя́зненно Христа́ испове́давшаго/ и мно́гия лю́ди в правосла́вней ве́ре укрепи́вшаго./ Мы же, страда́ния того́ почита́юще,/ с ве́рою и любо́вию вопие́м:/ о па́стырю ве́рный и му́чениче,/ моли́ся о нас ко Го́споду,// да поми́лует и спасе́т нас по вели́цей Свое́й ми́лости.

Конда́к, глас 2:

Я́ко ве́рный служи́тель Боже́ственных Та́ин,/ Михаи́ле му́чениче добропобе́дный,/ ты усе́рдно лю́дем послужи́л еси́/ и, Христа́ Воскре́сшаго испове́дуя,/ да́же до кро́ве пострада́л еси́./ Ны́не же, в селе́ниих Небе́сных пребыва́я,/ моли́ Человеколю́бца Бо́га,// спасти́ся душа́м на́шим.

Моли́тва

О святы́й священному́чениче Христо́в, о́тче наш Михаи́ле! Ты, от ю́ности Бо́га возлюби́в, служи́тель ре́вностный Того́ яви́лся еси́ и, я́ко па́стырь до́брый, ду́шу свою́ за слове́сныя о́вцы полага́я, вене́ц нетле́нный от Го́спода прия́л еси́. Ны́не же мы, недосто́йнии, прославля́юще тя со все́ми новому́ченики и испове́дники Це́ркве Ру́сския, я́ко предста́теля и моли́твенника на́шего, про́сим: просвети́ умы́ и сердца́ на́ша све́том Боже́ственнаго уче́ния, укрепи́ нас во и́стинней ве́ре, научи́ нас всегда́ твори́ти во́лю Бо́жию, благу́ю и соверше́нную, и храни́ти за́поведи ева́нгельския, пода́ждь ре́вность о умноже́нии бра́тския любве́, боля́щия и не́мощныя уврачу́й, печа́льныя уте́ши, гони́мыя защити́, ю́ныя наста́ви, всем же благосе́рдый оте́ц и те́плый моли́твенник яви́ся. О свя́тче Бо́жий! Моли́ Го́спода Бо́га, да соблюда́ется в ве́ре правосла́вней Оте́чество на́ше и в нем досто́йно и пра́ведно прославля́ется и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.



-
Яндекс.Метрика