Тропарь, кондак и молитва святителю Симеону Тверскому
Ме́сяца февраля́ в 3-й день
и в собо́рех Белору́сских и Тверски́х святы́х
Святи́теля Симео́на, пе́рваго епи́скопа Тверска́го
Тропа́рь, глас 3:
Земли́ По́лоцкия плод благослове́нный,/ архиере́йским са́ном почте́н был еси́,/ святи́телю о́тче Симео́не,/ Тверски́я епа́рхии первопресто́льниче,/ па́ствы твоея́ до́брый устрои́телю,/ нему́дрых наказа́телю, беззако́нных обличи́телю./ Моли́ся ко Го́споду// о всех почита́ющих па́мять твою́.
Конда́к, глас 4:
Ме́рило пра́ведное/ яви́лся еси́, о́тче наш Симео́не,/ житию́ ева́нгельскому па́ству твою́ неуста́нно науча́л еси́,/ сего́ ра́ди во све́те невече́рнем пребыва́еши/ от Еди́ницы Трисо́лнечныя увенча́нный./ Те́мже и нас ко спасе́нию наста́ви// богоприя́тными твои́ми моли́твами.
Моли́тва
О святи́телю Симео́не пречу́дне, пе́рвый иера́рше земли́ Тверски́я, правосла́вныя ве́ры блюсти́телю, кня́зя страстоте́рпца Михаи́ла наста́вниче и собо́ра Спа́сова Златове́рхаго строи́телю и при́сный о созида́нии хра́мов ревни́телю! От лет дре́вних я́ко сугу́ба печа́льника за Русь Святу́ю Госпо́дь призва́ тя, пресели́в от страны́ за́падныя и собра́в под омофо́р твой святы́й лю́ди по́лоцкия и тверски́я, а́ще и разли́чныя прави́тели земны́я иму́щия, но тя еди́наго отца́ духо́внаго и засту́пника стяжа́вшия. Ей, свя́тче Бо́жий, помози́ нам, я́коже и сим пре́жде, то́кмо по глаго́лом ева́нгельским жи́ти, ве́ру правосла́вную сохрани́ти, во благоче́стии и стра́се Бо́жии при́сно пребыва́ти. Се бо мы свиде́тели есмы́, я́ко дея́ния рук челове́ческих прехо́дят, словеса́ же Госпо́дня не мимои́дут и утвержде́нное на ка́мени краеуго́льнем при́сно пребыва́ет, а́ще и испыта́ние терпи́т. О святи́телю Христо́в пресла́вне, бу́ди хода́тай за ны пред Престо́лом Вседержи́телевым! А́ще и мо́щи твоя́ святы́я от ми́ра сокрове́ны суть, но ду́хом твои́м от нас не отступа́еши. Сего́ ра́ди усе́рдно мо́лим тя: скорбя́щия уте́ши, малоду́шныя вразуми́, о́троки во благоче́стии наста́ви, и́ноки в моли́тве укрепи́, свяще́нники в безпоро́чнем служе́нии утверди́, во́инству христолюби́вому побе́ды на супоста́ты испроси́, власте́м до́бре пра́вити помози́ и всех нас ко спаси́тельному жи́тельству напра́ви твои́ми богоприя́тными моли́твами, да непреста́нно сла́вим неизрече́нное человеколю́бие Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
