Служба преподобному Нектарию Оптинскому
Ме́сяца апре́ля в 29-й день
Преподо́бнаго Некта́рия О́птинскаго
Обре́тение же честны́х моще́й его́ ме́сяца ию́ля в 3-й день
НА МА́ЛОЙ ВЕЧЕ́РНИ
На Го́споди, воззвáх: стихи́ры, глaс 1:
Богому́дре о́тче Некта́рие,/ по́двиг служе́ния бли́жнему/ во оби́тели О́птинстей досто́йно поне́сл еси́/ и, бре́мя го́рестей людски́х на ра́мо возложи́в,/ путь приско́рбный до конца́ претерпе́л еси́,/ те́мже, я́ко и́стинный раб Христо́в,/ вене́ц пра́вды от Бо́га прия́л еси́./ Того́ моли́ дарова́ти нам// мир и ве́лию ми́лость.
Преподо́бне о́тче Некта́рие,/ я́ко пчела́ в са́де духо́внем,/ некта́р прему́дрости оте́ческия собра́л еси́,/ сего́ ра́ди, дар разсужде́ния от Бо́га прие́м,/ та́йны серде́чныя прозрева́л еси́/ и, любо́вию Христо́вою распала́емь,/ с ве́рою к тебе́ притека́ющих// к по́льзе душе́вней наставля́л еси́.
Блаже́нне о́тче Некта́рие,/ пе́рвее потща́лся еси́ во смире́нии утверди́тися,/ я́ко основа́нии вся́кия доброде́тели,/ и, дре́вним отце́м подо́бяся,/ и́ноческия обе́ты до конца́ испо́лнил еси́./ Ны́не же с ни́ми ку́пно Бо́га прославля́я,// мо́лишися о душа́х на́ших.
Сла́ва, глaс 2:
Прииди́те, ве́рнии,/ преподо́бных отце́в О́птинских возлюби́вшии,/ припаде́м к моще́м смире́ннаго ста́рца Некта́рия,/ и́же мно́гими доброде́тельми в житии́ просия́./ Ны́не же, со все́ми святы́ми Единосу́щную Тро́ицу прославля́я,// подае́т нам мир и ве́лию ми́лость.
И ны́не, пра́здника, или́ Богоро́дичен.
На стихо́вне стихи́ры преподо́бнаго, глас 4:
Преподо́бне о́тче Некта́рие,/ всего́ себе́ в по́двиг послуша́ния вдав,/ се́рдцем Го́сподеви прилепи́лся еси́,/ бде́нием же, посто́м и моли́твою ре́вностне подвиза́яся,/ стра́сти грехо́вныя препобеди́л еси́/ и, ду́шу свою́ слеза́ми мно́гими очи́стив,/ сосу́д Бо́жия благода́ти досто́ин яви́лся еси́./ Сего́ ра́ди моли́, о́тче преподо́бне,// спасти́ся душа́м на́шим.
Стих: Честна́ пред Го́сподем// смерть преподо́бных Его́.
О́гненных искуше́ний не чужда́яся,/ но смире́нно приобща́яся страсте́м Христо́вым,/ долготерпели́ве о́тче Некта́рие,/ злосло́вимый о и́мени Христо́ве,/ не стыди́лся, но ра́дости исполня́лся еси́,/ да в явле́ние сла́вы Его́/ возвесели́шися ра́достию соверше́нною,// прославля́я Бо́га за вся.
Стих: Блаже́н муж, боя́йся Го́спода,// в за́поведех Его́ восхо́щет зело́.
О ча́дех свои́х до́брое попече́ние име́я,/ богому́дре о́тче Некта́рие,/ в годи́ну лю́тых испыта́ний/ от Це́ркве и́стинныя, а́ще и пору́гана бысть,/ не отлуча́тися наставля́л еси́/ и покланя́тися Го́сподеви в Ду́се и И́стине/ о́бразом жития́ твоего́ поуча́л еси́,// хра́мы нерукотворе́нныя в сердца́х смире́нных прему́дро созида́я.
Сла́ва, глaс 2:
Посети́л ны есть Восто́к с высоты́,/ многоцеле́бныя мо́щи Некта́рия преподо́бнаго,/ я́ко би́сер безце́нный, нам да́руя./ Те́мже с весе́лием притеце́м к ра́це его́/ и с любо́вию поклони́мся,/ песнь псало́мскую вопию́ще:/ ди́вен Бог во святы́х Свои́х, Бог Изра́илев,// да́руяй ми́рови ве́лию ми́лость.
И ны́не, пра́здника, или́ Богоро́дичен, глас то́йже.
Тропа́рь зри на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди, воззвáх: стихи́ры пра́здника, и преподо́бнаго, глас 8:
Кто возмо́жет воспе́ти досто́йно/ труды́ и по́двиги преподо́бнаго Некта́рия О́птинскаго:/ подви́жника смиренному́драго,/ наста́вника любвеоби́льнаго/ и па́стыря до́браго,/ му́жа прозорли́ваго/ и ве́ры правосла́вныя испове́дника тве́рдаго?/ Его́же те́плыя моли́твы о нас/ ми́лостивно приими́, Го́споди,// в воню́ благоуха́ния духо́внаго.
Про́мыслом Бо́жиим направля́емь,/ во оби́тель О́птинскую,/ по́двиги де́лания мона́шескаго сла́вно просия́вшую,/ преподо́бне о́тче Некта́рие, прите́кл еси́,/ иде́же от богому́дрых отце́в/ сугу́бую благода́ть духо́внаго разсужде́ния восприя́л еси́,/ е́юже бли́жним и да́льним усе́рдно послужи́л еси́,/ в тя́жкую годи́ну гоне́ний на Це́рковь Ру́сскую// спасе́ние им устроя́я.
От Нача́льника тишины́/ любо́вь к тишине́ восприе́м,/ о́тче Некта́рие преподо́бне,/ те́лом затвори́лся еси́ от ми́ра бушу́ющаго,/ душе́ю же от попече́ний жите́йских упраздни́лся еси́,/ умо́м потруди́вся взыска́ти ме́сто серде́чное,/ и та́мо обре́т сладча́йшаго Иису́са,// позна́л еси́ тишину́ Боже́ственную.
Безмо́лвия и́стиннаго взыску́я,/ о́тче Некта́рие преподо́бне,/ от ми́ра многомяте́жнаго те́лом и душе́ю затвори́лся еси́,/ умо́м же к де́ланию многотру́дному прилежа́,/ сладча́йшаго Иису́са, я́ко тишины́ Нача́льника, позна́л еси́./ Его́же моли́, блаже́нне,/ воздвиза́емую напа́стьми бу́рю прейти́// и житие́ на́ше в ми́ре и покая́нии сконча́ти.
И́ны стихи́ры преподо́бнаго (на обре́тение моще́й), глас 5:
Богоблаже́нне ста́рче Некта́рие,/ свети́льниче ста́рчества О́птинскаго,/ луча́ми благода́ти облиста́й твою́ оби́тель,/ удобри́ доброде́тельми ме́сто упокое́ния твоего́/ и, я́ко смоко́вница до́брая,/ насажде́нная в О́птине пу́стыни,/ ду́ха сла́достными плоды́ напита́й нас,// обре́тение моще́й твои́х че́стно пра́зднующих.
Всепрáзднственная па́мять твоя́, Некта́рие преподо́бне,/ возвесели́ всю зе́млю Ру́сскую,/ и собо́ры мона́шествующих подви́же к похвале́нию:/ блаже́н еси́, Христу́ рабо́тав/ и вра́жию обличи́в си́лу,/ полки́ де́монския прогна́л еси́/ и безбо́жная уста́ загради́л еси́,// венце́м Небе́сным увенча́нный.
О́тче Нектáрие, свеще́ боже́ственная,/ на све́щнице церко́внем поста́влен,/ све́том Христо́вым ве́рныя просвети́л еси́/ и, тьму бесо́вскую и пре́лесть потреби́в,/ нощь безбо́жия разсе́ял еси́./ Те́мже Христа́ Бо́га моли́, блаже́нне,/ обре́тение моще́й твои́х све́тло пра́зднующим,// дарова́ти мир и ве́лию ми́лость.
Сла́ва, глaс 5:
Проро́ческим да́ром укра́шенный,/ я́ко ма́слина плодови́тая процве́л еси́/ и ве́рная ча́да твоя́ пи́щею духо́вною напита́л еси́;/ зло́ба же безбо́жных изгна́нию предаде́ тя,/ иде́же блаже́нно почи́в,/ рая́ Боже́ственнаго дости́гл еси́./ Вре́менем же преше́дшим,/ боголюби́вии лю́дие, обре́тше мо́щи твоя́ честны́я,/ с пе́нием во оби́тель О́птинскую возврати́ша./ Те́мже, богоно́сне о́тче наш Некта́рие,/ посети́ ны́не собо́ры пра́зднующих// и к ра́це моще́й твои́х с ве́рою притека́ющих.
И ны́не, пра́здника, или́ Богоро́дичен, глас то́йже: В Чермне́м мо́ри:
Вход. Проки́мен дне. И чте́ния преподо́бническая.
На лити́и стихи́ра хра́ма, и преподо́бнаго стихи́ры, глас 1:
Не от себе́ проро́чествуя,/ но от Ду́ха Свята́го просвеща́емь,/ богому́дре Некта́рие,/ словеса́ благода́тная глаго́лал еси́,/ и́ноком и миря́ном во́лю Бо́жию возвеща́я/ и на путь спасе́ния всех наставля́я./ И ны́не моли́, преподо́бне о́тче,// о спасе́нии душ на́ших.
Во́ли Бо́жией после́дуя/ и повеле́нию преподо́бных ста́рцев О́птинских,/ чу́дне я́вльшихся, повину́яся,/ во времена́ тя́жких испыта́ний в земли́ на́шей/ столп благоче́стия и му́дрый наста́вник лю́дем яви́лся еси́./ И ны́не, блаже́нне о́тче Некта́рие,/ помина́й ча́да твоя́,// любо́вию тя почита́ющия.
Глaс 2:
А́ще и ненауче́н быв от ю́ности,/ кни́жную прему́дрость возлюби́л еси́/ и, ре́вностне оте́ческому уче́нию внима́я,/ та́же и многообра́зную му́дрость челове́ческую позна́ти потща́лся еси́,/ богому́дре о́тче Некта́рие./ Сего́ ра́ди мно́гия привле́кл еси́ во огра́ду церко́вную,/ бу́йство про́поведи уче́ния Христо́ва// сочетава́я с прему́дростию богодарова́нною.
Сла́ва, глaс 4:
Открове́ния Бо́жия тебе́ я́влена бы́ша,/ богому́дре о́тче Некта́рие,/ бу́дущая бо я́ко настоя́щая созерца́я,/ гряду́щая земли́ Ру́сския и Це́ркве ея́ возвеща́л еси́,/ дре́вним проро́ком подо́бяся,/ и́хже соприча́стника яви́ тя Госпо́дь,// я́ко тайнозри́теля суде́б Бо́жиих.
И ны́не, пра́здника, или́ Богоро́дичен, глас то́йже:
Что ты, сме́рте, вопие́ши?/ Что стене́ши, а́де?/ Притупи́ся жа́ло ва́ше, и побе́да ва́ша исчезе́,/ я́ко Сын Бо́жий, Сын Де́вы быва́ет,/ и от ва́шея вла́сти свобожда́ет// всех ве́рных чад Свои́х.
На стихо́вне стихи́ры, глас 1.
Подо́бен: Небе́сных чино́в:
Доброде́лание вседе́тельное возлюби́в,/ ве́тхое и плотско́е мудрова́ние отве́ргл еси́,/ богоблаже́нне о́тче Некта́рие,/ и в ле́поту Ду́ха вои́стину обле́клся еси́,/ ум Христо́в стяжа́в,/ мона́хов преизря́ден наста́вник был еси́./ Посети́, преподо́бне, тя сла́вящих,// и грехопаде́ний лю́тых изба́ви.
Стих: Честна́ пред Го́сподем// смерть преподо́бных Его́.
Ста́рчества О́птинскаго благово́нный цве́те,/ доброде́тельми, я́ко цве́ты, украси́лся еси́,/ Боже́ственный некта́р сохраня́я в се́рдце твое́м,/ тем напои́л еси́ и́ноков сосло́вия,/ и всем, приходя́щим к ра́це моще́й твои́х,/ исцеле́ния подае́ши оби́льне,/ смрад греха́ отгоня́я, о́тче Некта́рие,// чудоде́йственниче пресла́вный.
Стих: Блаже́н муж, боя́йся Го́спода,// в за́поведех Его́ восхо́щет зело́.
Мона́шествующим удобре́ние,/ ни́щим покро́в и убо́гим заступле́ние,/ ве́рным тве́рдое приста́нище/ и стра́ждущим ми́ро боже́ственное/ яви́ся чудоде́йственная ра́ка моще́й твои́х,/ блаже́нне о́тче Некта́рие./ Те́мже моли́ся Христу́ Бо́гу,// да спасе́т ду́ши на́ша.
Сла́ва, глaс 3:
Что нарече́м тя, Некта́рие богодухнове́нне?/ О́браз ли мона́шескаго де́лания,/ я́ко мно́гим и́ноком пра́вило яви́лся еси́?/ Богому́дра ли отца́ духо́внаго,/ я́ко па́стырь до́брый ча́дом твои́м был еси́?/ Затво́рника, о ми́ре дерзнове́нно моля́щагося,/ я́ко бу́дущая ми́ра прозрева́л еси́?/ Ве́рна ли испове́дника Христо́ва,/ я́ко ско́рби и лише́ния мно́гия претерпе́л еси́?// Моли́ся, преподо́бне о́тче, о душа́х на́ших.
И ны́не, пра́здника, или́ Богоро́дичен, глас то́йже.
Тропáрь, глaс 3:
Чу́днаго Некта́рия в пе́снех духо́вных восхва́лим/ и благоче́стное житие́ того́ ублажи́м,/ я́ко мирско́е мудрова́ние посрами́/ и христолюби́вым лю́дем путь покая́ния показа́./ Сего́ ра́ди ны́не вопие́м:// ра́дуйся, о́тче богому́дре, ве́рным утвержде́ние.
Ин тропа́рь (на обре́тение моще́й), глaс 1:
Твои́х моще́й обре́тение пра́зднующе,/ глас хвале́ния тебе́ прино́сим,/ моли́твенниче наш те́плый и ско́рый помо́щниче,/ богоблаже́нне ста́рче Некта́рие,/ боле́зни исцели́ и ско́рби потреби́,/ ве́лие бо и́маши ко Христу́ дерзнове́ние,/ уго́дниче Того́ изря́дный// и предста́телю за ны ми́лостивый.
НА У́ТРЕНИ
По 1-м стихосло́вии седа́лен, глас 2:
Всесве́тлое торжество́ днесь и печа́ли премене́ние на ра́дость, скорбе́й бо потреби́тель и страсте́й свободи́тель мощьми́ свои́ми возврати́ся на ме́сто нача́льных по́двигов свои́х. Лику́й, пу́стыне О́птина, и наро́ди правосла́внии, весели́теся, я́ко во обре́тении и пренесе́нии моще́й ста́рца Некта́рия дарова́ Госпо́дь лю́дем Свои́м ве́лию ми́лость.
Сла́ва, и ны́не, пра́здника, или́ Богоро́дичен:
Тобо́ю, Ма́ти Де́во, всей вселе́нней возсия́ Свет Боже́ственный, Ты бо Зижди́теля всех родила́ еси́ Бо́га, Его́же моли́, Пречи́стая, низпосла́ти нам ве́лию ми́лость.
По 2-м стихосло́вии седа́лен, глас 6:
Си́лою слове́с твои́х, преподо́бне Некта́рие, суему́дрие нечести́вых обличи́л еси́ и ве́рныя, просвети́в богому́дрыми при́тчами, соу́зом любве́ Боже́ственныя связа́л еси́, и ве́рою и наде́ждою утверди́л еси́. Те́мже сохрани́ от ко́зней вра́жиих невреди́мы па́мять твою́ све́тло пра́зднующих и любо́вию пою́щих по́двиги твоя́.
Сла́ва, и ны́не, пра́здника, или́ Богоро́дичен:
Егда́ време́н исполне́ние прии́дет, и не́бо я́ко сви́ток свие́тся, и вси гре́шнии воспла́чутся, не посрами́ тогда́ мене́, Богома́ти, но Твои́ми мольба́ми сохрани́ от ве́чныя сме́рти.
По полиеле́и седа́лен, глас 6:
Во времена́ гоне́ний восприе́мый благода́ть служе́ния ста́рческаго, бу́йством про́поведи послужи́л еси́ всем ве́рным, прозира́я та́йны сокрове́нныя, и во́лю Бо́жию лю́дем возвеща́я: преподо́бне о́тче наш Некта́рие, моли́ Всеми́лостиваго Иису́са о спасе́нии душ на́ших.
Ин седа́лен преподо́бнаго (на обре́тение моще́й), глас то́йже:
Ско́ро притеце́м, о бра́тие, и со умиле́нием припаде́м к ра́це ди́внаго и смире́ннаго ста́рца, преподо́бнаго и богоно́снаго Некта́рия, той бо и ны́не источа́ет да́ры благода́тныя от свои́х многоцеле́бных моще́й и любо́вию объе́млет чад свои́х, ве́рою к нему́ притека́ющих.
Сла́ва, и ны́не, пра́здника, или́ Богоро́дичен:
Луча́ми Твоего́ све́та, Пречи́стая, ду́шу мою́, лежа́щую в ро́ве поги́бельнем, просвети́, и враги́ сокруши́, ко греху́ мя влеку́щия, да, огради́вся преподо́бнаго Некта́рия моли́твами и покро́вом Твои́м, Богоро́дице, пою́ Сы́на Твоего́ держа́ву.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Ми́ра мяте́ж возненави́дев,/ преподо́бне о́тче Некта́рие,/ того́ со тща́нием удали́лся еси́,/ повеле́нием же Госпо́дним/ отвори́л еси́ ми́ру две́ри ке́лии мона́шеския,/ я́же не вмеща́ше приходя́щих к тебе́,/ оба́че в се́рдце твое́м, любо́вию отве́рстом,/ не те́сно им бя́ше./ Сего́ ра́ди зове́м ти:/ ра́дуйся, благоуха́ние ра́йское,// моли́твенниче о душа́х на́ших.
Кано́н преподо́бнаго, его́же краегране́сие: Некта́р Боже́ственный обре́тше, ра́достно воспои́м. Глас 8.
Песнь 1
Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:// пои́м Тебе́ еди́ному Влады́це.
Некта́рие о́тче, го́речь отыми́ страсте́й и Боже́ственную сла́дость усто́м пода́ждь, пе́сненно воспе́ти твое́ всечестно́е преставле́ние.
Ева́нгельскою лозо́ю процве́л еси́, о́тче, и, то́ки чуде́с источи́в, умиле́нием напои́л еси́ ча́да твоя́, приснопа́мятне.
Красне́йшее твое́ торжество́ вся собра́ во оби́тель тебе́ любе́зную по́чести тебе́ возда́ти пе́сненно, Христо́в уго́дниче Некта́рие.
Терпя́ потерпе́л еси́ ско́рби и озлобле́ние врага́ и во изгна́нии му́жественно подвиза́лся еси́. Сего́ ра́ди внят Госпо́дь моли́тве твое́й и по сме́рти свободи́ тя от плене́ния.
Богоро́дичен: А́нгелов песнь еси́ и земны́х хвале́ние, бесо́в посрамле́ние и ве́рных вене́ц, Мари́е Де́во, Тя сла́вящия спаса́й.
Песнь 3
Ирмо́с: Сочини́ мя, Го́споди,/ си́льным люде́й Твои́х,/ опоясу́я си́лою,/ и лу́ки ра́тников сокруши́,// и нищеты́ моея́ рог возвы́си.
Раче́нием всесвяты́м распала́емь, раче́ния греха́ отврати́лся еси́ и, тьму страсте́й разгна́в и де́монскую зло́бу посрами́в, запина́тель зми́я яви́лся еси́, всему́дре Некта́рие.
Боже́ственное любому́дрие возлюби́л еси́ и му́дрость ми́ра пости́гл еси́, венце́м смиренному́дрия увенча́вся, Некта́рие богому́дре.
О́птинский небосво́д озари́л еси́, я́ко звезда́ в нощи́, и мощьми́ твои́ми, о́тче преподо́бне, я́ко о́блаком све́тлым, осени́л еси́ собра́ние ве́рных.
Жела́нием в го́рняя ум впери́л еси́ и земна́я преоби́дел еси́, блаже́нне, в по́двизех не пощади́в те́ло, ни ду́шу твою́, сего́ ра́ди, живоно́сную ме́ртвость стяжа́в, то́ю живи́ши ме́ртвыя душе́ю.
Богоро́дичен: Е́ва разреша́ется кля́твы, и враг закля́тый связу́ется, Рождество́м бо Твои́м, Влады́чице Чи́стая, жи́знь ве́чная возсия́, тля потреби́ся и ве́рным отра́да дарова́ся.
Конда́к и и́кос пра́здника.
Ин конда́к преподо́бнаго (на обре́тение моще́й), глас 4:
Обре́тение святы́х моще́й твои́х пра́зднуем днесь,/ богоблаже́нне ста́рче Некта́рие:/ утоли́ боле́зни на́ша, мо́лим тя,/ и печа́ли мглу грехо́вную разве́й,/ благомо́щными твои́ми моли́твами,/ у Христа́ Бо́га испроси́в нам мир// и ве́лию ми́лость.
Седа́лен, глас 6:
Внима́я словесе́м Госпо́дним, преподо́бне, кро́тости и смире́нию се́рдца научи́лся еси́ и, ничи́мже смуща́емый, поко́й в души́ твое́й обре́л еси́, те́мже и, отроча́ти ма́лому подо́бяся, согреша́ющих исправля́л еси́ ду́хом кро́тости и бли́жняго с любо́вию наставля́л еси́. Сего́ ра́ди моли́ся, блаже́нне, и подража́ющим ти простоты́ и незло́бия дости́гнути.
Ин седа́лен преподо́бнаго (на обре́тение моще́й), глас 4:
Предыди́те, лю́дие, с весе́лием и возра́дуйтеся, се бо ди́вный ковче́г гряде́т, одушевле́н доброде́телию, мо́щи блаже́ннаго ста́рца Некта́рия, и́же те́плыми свои́ми моли́твами к Бо́гу утеше́ние подае́т пра́зднующим сие́ торжество́.
Сла́ва, и ны́не, пра́здника, или́ Богоро́дичен:
Ты еди́на во всех ро́дех, Де́во Пречи́стая, Ма́ти яви́лася еси́ Бо́жия. Ты Божеству́ была́ еси́ Жили́ще, Всенепоро́чная, не опа́льшися Огне́м непристу́пнаго Све́та. Те́мже Тя вси ублажа́ем и мо́лим, Мари́е Богоневе́сто: сотвори́ ны жили́ща Ду́ха Свята́го.
Песнь 4
Ирмо́с: Богоно́сный Ду́хом Святы́м просвети́вся проро́к Авваку́м,/ в после́дняя Твое́ прише́ствие прови́дев, вопия́ше:/ внегда́ прибли́житися ле́том, позна́ешися:/ внегда́ приити́ вре́мени, яви́шися.// Сла́ва си́ле Твое́й, Го́споди.
Светоно́сная ра́ка твоя́, я́ко ка́мень драги́й, сия́ет чудесы́ и благода́тных исцеле́ний испуща́ет лучи́, всебога́те Некта́рие, с ве́рою к тебе́ притека́ющим.
Треволне́ния страсте́й уставля́еши и тишину́ Иису́сову подае́ши, о́тче Некта́рие преподо́бне, я́ко Того́ ве́рный раб быв и благода́ти сосу́д испо́лненный.
Внегда́ прибли́жишася ле́та, позна́лся еси́, уго́дниче Бо́жий Некта́рие, из-под спу́да возсия́в мощьми́ благода́тными, и тьму неве́рия разори́л еси́ кре́постию Го́спода твоего́.
Е́ллинское мудрова́ние посрами́л еси́ и, юро́дством благослове́нным прикры́вся, вне Христа́ и́щущих му́дрость обличи́л еси́, небе́сный у́ме, Некта́рие, тайнове́дче блаже́нный.
Богоро́дичен: На река́х ско́рби пла́кахом и избавле́ния ча́яхом, Всеми́лостивая Ма́ти Спа́са, внегда́ прии́де по́мощь Твоя́, я́же стра́стнаго плене́ния свободи́ ны.
Песнь 5
Ирмо́с: Мрак души́ моея́/ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,// да у́тренюя сла́влю Тя.
На тебе́ показа́ ми́лость Свою́ Госпо́дь и вся хоте́ния Своя́ в тебе́ испо́лни, ты бо муж пра́ведный яви́лся еси́, богому́дре о́тче, се́рдце чи́сто стяжа́в, многоразли́чными дарова́нии испо́лнено.
Испо́лни ра́дости собра́ние ве́рных, обстоя́щих ра́ку моще́й твои́х, преиспо́лнену благода́ти, свя́те Некта́рие, и осла́бу пода́ждь, и избавле́ние от лю́тых грехопаде́ний на́ших.
Иде́же упоко́ися те́ло твое́, столп благода́ти осиява́ет ве́рныя, и о́блак моли́тв твои́х, преподо́бне, ороша́ет всех притека́ющих и любо́вию мо́щи твоя́ лобыза́ющих.
О́птинская ра́дость ты еси́, о́тче Некта́рие, и приснопребыва́ющее ста́рцев весе́лие, вся печа́ли жите́йския моли́твою разве́явый и в смех претвори́вый де́монская нападе́ния.
Богоро́дичен: Боле́зни утоли́, Влады́чице Де́во, Врача́ челове́ком ро́ждшая, и огнь любосла́стный угаси́ одожде́нием цельбоно́сных моли́тв Твои́х, Всеще́драя, да́рующи лю́дем Твои́м ве́лию ми́лость.
Песнь 6
Ирмо́с: Во Исаа́це страсть прописа́вый,/ и во Ио́не погребе́ние прообразова́вый,/ и воскресе́ние всем подая́й,/ Тебе́ вопие́м с проро́ком:// от тли нас возведи́, Благоутро́бне Го́споди.
Ра́дости неизглаго́ланныя испо́лнил еси́, о́тче, оби́тель твою́ честны́х моще́й возвраще́нием, те́мже и чад твои́х немо́лчныя гла́сы приими́, вы́ну пою́щих твое́ из земны́х недр обре́тение.
Еже́ по о́бразу Христо́ву послуша́нию вда́лся еси́ и, всеме́рный иску́с проше́д и доброде́телию воскре́с, стра́сти погре́бл еси́, сла́вою ста́рчества украси́вся, Некта́рие.
Терпе́ние Анато́лиево и любо́вь Амвро́сиеву стяжа́в, кро́тости же и смире́нию Ио́сифа и Варсоно́фия до́блести подража́я, вся дарова́ния отце́в вмести́л еси́, преподо́бне.
Ше́ствуя неукло́нно святооте́ческою стезе́ю, прему́дре а́вво, го́рних оби́телей дости́гл еси́, оба́че и ны́не не оставля́еши моли́твами твои́ми бра́тию земны́я оби́тели твоея́, иде́же нача́ло подвиго́м полага́л еси́.
Богоро́дичен: Е́вино преслуша́ние испра́вила еси́, Пречи́стая Де́во Влады́чице, Арха́нгелова гла́са послу́шавши, се Раба́ Госпо́дня есмь, рекла́ еси́, и кля́тва прама́терня потреби́ся.
Конда́к, глас 8:
От ста́рцев смире́нных и богому́дрых, Амвро́сия и Анато́лия,/ от сея́ лучеза́рныя дво́ицы,/ восприя́л еси́ благода́ть окормле́ния ста́рческаго, благоуха́нне о́тче Некта́рие:/ сый свобо́ден от всех, всем себе́ порабо́тил еси́,/ тяготы́ мона́хов и миря́н поне́сл еси́,/ до конца́ испо́лнивый зако́н Христо́в,// от Него́же прия́л еси́ вене́ц нетле́нный.
И́кос:
Я́ко Елиссе́й от Илии́ чрез ми́лоть сугу́бую благода́ть улучи́, та́ко ты, богому́дре о́тче Некта́рие, чрез свои́х боже́ственных наста́вников свы́ше дар ста́рческаго служе́ния восприя́л еси́ и в тя́жкое вре́мя гоне́ний на ве́ру Христо́ву ученико́м свои́м и всем, и́щущим духо́внаго наставле́ния, усе́рдно послужи́л еси́, с ни́миже досто́йно тя восхваля́ем: Ра́дуйся, смире́нный носи́телю ста́рческия благода́ти; ра́дуйся, па́стырю до́брый слове́сных ове́ц. Ра́дуйся, учи́телю кро́тости и незло́бия; ра́дуйся, кре́пкий испове́дниче Христо́в. Ра́дуйся, малоду́шныя наста́вивый ко спасе́нию кре́стным сло́вом; ра́дуйся, неутвержде́нныя отврати́вый от ересе́й и раско́лов. Ра́дуйся, бу́йством про́поведи му́дрость ми́ра сего́ посрами́вый; ра́дуйся, в не́мощи ди́вную си́лу Бо́жию яви́вый. Ра́дуйся, свети́льниче, во тьме горя́й и светя́й; ра́дуйся, сто́лпе ве́ры правосла́вныя. Ра́дуйся, оте́ческих преда́ний храни́телю; ра́дуйся, сотаи́нниче собо́ра ста́рцев благода́тных. Ра́дуйся, ста́рче Некта́рие, О́птинская похвало́.
Песнь 7
Ирмо́с: Бо́жия снизхожде́ния/ огнь устыде́ся в вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:// благослове́н еси́, Бо́же оте́ц на́ших.
Радостотво́рный пра́здник днесь, и печа́ли прогна́ние, и скорбя́щим утеше́ние и отра́да: мо́щи блаже́ннаго Некта́рия с на́ми пребыва́ют, те́мже да́руется всем оби́льно весе́лие.
Ад челюстьми́ свои́ми тя не сокруши́, а́ще и сокры́то бысть под земле́ю честно́е те́ло твое́, оба́че уста́ на́ша испо́лнишася песнопе́ний, егда́ благовре́менне, ста́рче Некта́рие, из недр земны́х мо́щи святы́я яви́л еси́.
Да́же до после́дних земли́ простре́ся сла́ва твоя́, преподо́бне, те́мже от се́вера и ю́га, за́пада и восто́ка ча́да твоя́ прихо́дят поклони́тися моще́м, вопи́юще: благослове́н еси́, Бо́же оте́ц на́ших.
О́птинский столп ты еси́, и сла́вы ста́рчества вене́ц благоуха́нный, во оби́тель твою́ возврати́лся еси́, и приложи́вся ко отце́м, возвесели́л еси́ небе́сных, Некта́рие, и земноро́дных обра́довал еси́, вопию́щих: благослове́н еси́, Бо́же оте́ц на́ших.
Богоро́дичен: Све́щнице Свещи́ Боже́ственныя, я́же есть Сын Твой, прише́дый пло́тию в мир, мрак плотска́го мудрова́ния потреби́, Пресвята́я, и Ду́ха огнь в сердца́ земноро́дных всели́, благослове́н еси́, А́вво О́тче, вопию́щих.
Песнь 8
Ирмо́с: Мусики́йским орга́ном согласу́ющим,/ и лю́дем безчи́сленным покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху,// и славосло́вяху во вся ве́ки.
Тро́ицы уго́дниче всеблаги́й, пе́сненныя приими́ венцы́, я́же ча́да твоя́ сплето́ша тебе́ усе́рдием, и небе́сных венце́в сподо́би нас, любо́вию воспева́ющих тя.
Нечести́выя сове́ты разори́л еси́, ми́ра посрами́в плотско́е мудрова́ние; благоче́стие же возвести́л еси́, преподо́бне, и богому́дренно утверди́л еси́, в простоте́ Христо́ве и благода́ти.
О тебе́ хва́лимся, и о тебе́ пое́м, я́ко оте́ц еси́ наш чадолюби́вый, не оста́вил еси́ нас си́рых, ниже́ оби́тель твою́, но возврати́лся еси́ в ню мощьми́, Некта́рие преподо́бне.
Вели́ка обре́те тя помо́щника в беда́х земля́ Ру́сская и оби́тель О́птинская, в не́йже по́двигом многообра́зным подвиза́вся, и юро́дства и́го подъе́м, Некта́рие ста́рче, врага́ обличи́л еси́, и малоду́шныя утверди́л еси́.
Богоро́дичен: О́блаче све́тлый, Со́лнце Христа́ нося́й, Всепе́тая и Пречи́стая Де́во, мглу греха́ разве́й мольба́ми твои́ми, да озаря́еми луча́ми Сы́на Твоего́, воспое́м Тя и ублажи́м во вся ве́ки.
Песнь 9
Ирмо́с: Благослове́н Госпо́дь Бог Изра́илев,/ воздви́гнувый рог спасе́ния нам,/ в дому́ Дави́дове о́трока своего́:/ в ни́хже посети́ нас восто́к с высоты́,// и напра́вил ны есть на путь ми́ра.
Сла́достно благоуха́ют мо́щи твоя́, присноблаже́нне ста́рче Некта́рие, по́двигом бо всему́дрым подвиза́вся, в ме́ру отце́в твои́х дости́гл еси́, и сочета́лся еси́ с ни́ми в духо́вный соу́з, сего́ ра́ди тя велича́ем.
Посети́л еси́ нас, из юдо́ли подзе́мныя светоявле́нно возвы́сився, те́мже от но́щи страсте́й изба́ви, блаже́нне, притека́ющия к ра́це моще́й твои́х, и благоче́стно ти покланя́ющияся.
О, возвраще́ния твоего́ к нам! Нищету́ обогати́л еси́ на́шу многоце́нным би́сером, моще́й твои́х предложе́нием, и ку́плю спасе́ния де́яти помога́еши, тя велича́ющим, прему́дре Некта́рие.
И ду́хом пребу́ди с на́ми, Некта́рие, те́лом благоуха́нным почти́вый О́птину, и пресла́достным одари́ утеше́нием пра́зднующих собра́ние, де́монов же прогони́ и стра́сти вся́ческия отжени́ жезло́м твои́м па́стырским.
Богоро́дичен: Мари́е Де́во, А́нгелы све́тлы посли́, умири́ти мир и в душа́х смяте́ние, и мра́чныя полки́ бесо́вския потреби́, Богора́дованная, Ты бо еси́ Небе́сных и земны́х Цари́ца Всепобеди́тельная.
Свети́лен:
Заверши́л еси́ чреду́ ста́рцев ди́вных из среды́ оби́тели О́птинския, преподо́бне ста́рче Некта́рие, преукра́шенный доброде́тельми мона́шескими, те́мже украси́л еси́ не́бо О́птины, я́ко при исхо́де ве́чера, егда́ не́бо украша́ется свети́лом нощны́м.
Ин свети́лен (на обре́тение моще́й):
Светолу́чное принесе́ние твои́х моще́й, я́ко обре́тение би́сера драгоце́ннаго, удивля́ет и весели́т собра́ние ве́рных, и безбо́жных помрача́ет собо́рища, озаря́юще смы́слы нас пою́щих тя, Некта́рие.
Сла́ва, и ны́не, пра́здника, или́ Богоро́дичен:
Украша́яй исхо́ды у́тра и ве́чера, ду́шу Твою́, Де́во, украси́ ле́потою неизъясни́мою, сего́ ра́ди во утро́бу Твою́ всели́ся Кра́сный добро́тою па́че сыно́в челове́ческих, и еле́ем ра́дости Тя пома́за па́че всех земноро́дных.
На хвали́тех стихи́ры пра́здника. И преподо́бнаго стихи́ры, глас 6:
Не скры́л еси́ в зе́млю/ сребра́ Господи́на твоего́,/ ниже́ истощи́л еси́ на земна́я попече́ния/ ще́дро ти да́нныя Бо́гом тала́нты,/ но те́ми приобре́л еси́/ сокро́вище многоце́нное,/ его́же тля не тлит, и не снеда́ет ржа,/ ниже́ подко́пывают та́тие,/ оба́че в живо́т ве́чный простира́ется,/ и весе́лием неоскудева́емым/ весели́т благо́е се́рдце// о Бо́зе Спа́се свое́м.
По обе́ту мона́шескому,/ нищету́ сохрани́в, преподо́бне,/ мно́гия обогати́л еси́:/ а́лчущия пита́я сло́вом и́стины,/ жа́ждущия напая́я вода́ми благода́ти,/ стра́нныя наставля́я на путь спасе́ния,/ наги́я покрыва́я любо́вию,/ больны́я исцеля́я от язв душе́вных и теле́сных,/ ю́зники изводя́ из темни́цы страсте́й./ Сего́ ра́ди унасле́довал еси́, Некта́рие,/ Ца́рствие, ве́рным угото́ванное// от сложе́ния ми́ра.
А́ще и в не́мощех и боле́знех/ изнемога́л еси́, о́тче Некта́рие,/ оба́че в гоне́ниих и ско́рбех/ со креста́ служе́ния ста́рческаго не сшел еси́,/ Распе́ншемуся за всех земноро́дных подража́я;/ кроме́ утеше́ния и наставле́ния не оста́вил еси́/ ве́рных чад твои́х, преподо́бне,/ я́ко си́ла Бо́жия// в не́мощи соверша́ется.
Плоть распя́в со страстьми́ и похотьми́,/ потща́лся еси́, о́тче Некта́рие,/ до конца́ испо́лнити во́лю Бо́жию;/ те́мже ны́не, го́рния трапе́зы наслажда́яся,/ с преподо́бными сотаи́нники О́птинскими/ пие́ши пи́во но́вое,// исполня́ющее сердца́ ва́ша весе́лием ве́чным.
И́ны стихи́ры преподо́бнаго (на обре́тение моще́й), глас 2:
Заря́ гряде́т духо́вная,/ стецы́теся, празднолю́бцы,/ свети́льники возжига́йте душе́вныя,/ еле́ем братолю́бия наполня́юще,/ угото́вайте и фимиа́м хвалы́:/ се бо мощьми́ свои́ми Некта́рий блаже́нный во оби́тель О́птинскую возвраща́ется/ и в го́рнем мо́лит приле́жно Бо́га// о спасе́нии душ на́ших.
О, чу́до пресла́вное!/ Сла́ву мудреца́ юро́д прие́млет,/ и мра́чный гроб а́ки престо́л ца́рский быва́ет,/ сме́ртное же те́ло я́ко пала́та нетле́ния,/ и разоре́нная оби́тель па́ки востае́т,/ во е́же ду́ши челове́ческия к Бо́гу призыва́ти:/ та́ко устроя́ет Дух Святы́й,// во Святы́х свои́х почива́яй.
Некта́рие, ста́рче благи́й,/ духо́вный пир сотвори́л еси́/ во обре́тении моще́й твои́х, пресла́вне;/ то́ки благода́ти и струи́ исцеле́ний источа́еши/ и вино́ умиле́ния, ду́ши веселя́щее,/ и ду́хом свои́м сопрису́тствуеши нам,/ вся возвыша́я к высоте́ духо́вней,// е́же Христа́ прославля́ти.
Сла́ва, преподо́бнаго, глас 7:
От земли́ возвыша́яй убо́га,/ от гно́ища возставля́яй ни́ща,/ Святы́й Изра́илев, Христо́с Бог наш, посрами́ прему́дрость ми́ра сего́/ и избра́ в насле́дие ве́чное/ худоро́дная и уничиже́нная,/ да обличи́т греха́ студ,/ чудоде́йствуя во избра́нных Свои́х/ и посыла́я их, я́ко проро́ки, в мир,/ наста́вити лю́ди на путь святы́х,// е́же есть смиренному́дрие.
И ны́не, пра́здника, или́ Богоро́дичен, глас то́йже.
НА ЛИТУРГИ́И
Блаже́нна пра́здника, и от кано́на преподо́бнаго, песнь 6-я. Проки́мен пра́здника, и преподо́бнаго, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия пра́здника, и преподо́бнаго, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен пра́здника, и преподо́бнаго: В па́мять ве́чную бу́дет пра́ведник, от слу́ха зла не убои́тся.
Моли́тва
О преподо́бне и богоблаже́нне о́тче Некта́рие, присносве́тлый свети́льниче ста́рчества О́птинскаго! Юро́дство подъе́мый и безу́мие ми́ра обличи́вый, от богобо́рных злоключе́ния до́бльственне претерпе́вый и блаже́нства изгна́нных ра́ди Го́спода Иису́са вкуси́вый. При́зри ны́не с Небесе́ и от ра́йскаго са́да к нам прини́кни. Возвы́си на́ше мудрова́ние от земны́х попече́ний и о Небе́снем жи́тельстве помышля́ти научи́. Я́ко боже́ственными доброде́тельми себе́ украси́вый и от плодо́в ра́йских сла́дости насы́тивыйся, треволне́ния страсте́й исхити́ и го́рькаго грехолю́бия нас изба́ви всеизря́дным твои́м предста́тельством. В ве́ре правосла́вней до после́дняго издыха́ния утверди́ ны стоя́ти и по оте́ческим стопа́м умудри́ нас ходи́ти. Го́спода Бо́га умоли́, богому́дре о́тче, от кова́рных сете́й гряду́щаго анти́христа нас изба́вити, да ми́рное и благоче́стное житие́ в ве́це сем сконча́ем и ра́йских селе́ний по твои́м моли́твам насле́дити сподо́бимся, иде́же ку́пно с тобо́ю и со все́ми ста́рцы О́птинскими воспое́м и просла́вим Безнача́льную и Неразде́льную и Единосу́щную Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.
