Служба преподобному Поликарпу Брянскому
Ме́сяца февраля́ в 23-й день
Преподо́бнаго Полика́рпа Бря́нскаго
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры на 8, глас 5.
Подо́бен: Ра́дуйся, Живоно́сный Кре́сте:
Приспе́ све́тлая па́мять/ преподо́бнаго отца́ на́шего Полика́рпа,/ да пра́зднуем у́бо, бра́тие, воспева́юще того́,/ я́ко оте́чества на́шего сла́ву,/ земли́ Бря́нской украше́ние,/ и́ноком му́драго наста́вника,/ печа́льным ми́лостиваго уте́шителя,/ боля́щим ско́раго цели́теля// и всем ве́рным те́плаго моли́твенника.
Преподо́бне о́тче Полика́рпе,/ уго́дниче Христо́в усе́рдный,/ ты, безмо́лвия взыску́я,/ от мирска́го мяте́жа изше́л еси́/ и, а́нгельский о́браз восприе́м,/ оби́тель и́ноком во гра́де Бря́нске основа́л еси́./ Ны́не во оби́телех Небе́сных с ли́ки святы́х водворя́яся,// моли́ спасти́ся душа́м на́шим.
Ра́дуйся, преподо́бне Полика́рпе,/ о́тче наш богому́дрый,/ кро́тости и смире́ния о́бразе,/ незло́бия и терпе́ния учи́телю,/ о́бщаго и́ноческаго жития́ рачи́телю,/ ми́лости исто́чниче, ору́жниче Царя́ Небе́снаго,/ Ему́же моли́ся/ оте́честву на́шему побе́ды на враги́ дарова́ти// и душа́м на́шим ве́лию ми́лость.
Сла́ва, глас 8:
Преподо́бне о́тче Полика́рпе,/ во всеору́жие Бо́жие обле́кся,/ ми́рови и страсте́м себе́ умертви́л еси́/ и, трудолю́бне подвиза́яся,/ и́ноков мно́жество ко Христу́ приве́л еси́,/ Его́же моли́ грехо́в оставле́ние дарова́ти// чту́щим любо́вию святу́ю па́мять твою́.
И ны́не, Богоро́дичен.
Вход. Проки́мен дне. Чте́ния три преподо́бническая.
На лити́и стихи́ры, глас 2:
Преподо́бне о́тче Полика́рпе,/ ты, прему́дрости Боже́ственныя измла́да рачи́тель быв,/ в напа́стех мирски́х перст Бо́жий уразуме́л еси́/ и, соверше́н хотя́ быти,/ привре́менная бла́га оста́вил еси́,/ ева́нгельски же Христу́ после́довав,/ посто́м, бде́нием и моли́твами Тому́ угоди́л еси́// и Небе́сных благ сподо́бился еси́.
Сла́ва, глас 6:
Бо́жиим Ду́хом подвиза́емь,/ оби́тель Спа́су Христу́ воздви́гл еси́,/ блаже́нне Полика́рпе,/ и мно́гия ученики́, житию́ твоему́ ревну́ющия, собра́л еси́,/ ду́шу же твою́, воздержа́нием кре́пким/ и сле́зными то́ки очи́стив,/ в жили́ще Святы́я Тро́ицы угото́вал еси́,// Ю́же моли́ спасти́ся душа́м на́шим.
И ны́не, Богоро́дичен:
Возвели́чим вси Пренепоро́чную Ма́терь Бо́га на́шего,/ Ю́же освяти́ Дух Пресвяты́й,/ и со умиле́нием Той возопии́м:/ о Пречи́стая Де́во Богоро́дице,/ ору́жие на́ше и стено́/ и оте́чества на́шего Засту́пнице,/ изба́ви от бед рабы́ Твоя́// и спаси́ ду́ши на́ша.
На стихо́вне стихи́ры, глас 2.
Подо́бен: До́ме Евфра́фов:
В сла́внем гра́де Бря́нске/ ве́рою Правосла́вною/ и по́двиги и́ноческими/ просия́л еси́, о́тче Полика́рпе,// моли́твенниче о душа́х на́ших.
Стих: Честна́ пред Го́сподем// смерть преподо́бных Его́.
Блаже́нне о́тче Полика́рпе,/ и́ноческими труды́ твои́ми/ благода́ть чуде́с восприя́л еси́,/ неду́ги исцеля́ти// и проше́ния на́ша исполня́ти.
Стих: Блаже́н муж боя́йся Го́спода,// в за́поведех Его́ восхо́щет зело́.
Преподо́бне о́тче Полика́рпе,/ приими́ пе́ние чад твои́х/ и пода́ждь нам кре́пость и си́лу/ на неви́димыя и ви́димыя враги́ на́ша// благода́тными твои́ми к Бо́гу моли́твами.
Сла́ва, глас и подо́бен то́йже:
Дом доброде́телей быв,/ привре́менная бла́га отри́нул еси́,/ о́тче преподо́бне Полика́рпе,/ и, в хра́ме Бо́жии примета́тися изво́лив,// оби́тели Спа́са Христа́ игу́мен му́дрый яви́лся еси́.
И ны́не, Богоро́дичен, глас и подо́бен то́йже:
Де́во Ма́ти Пречи́стая,/ предстоя́щи пред Бо́гом,/ моли́ о нас гре́шных,/ с преподо́бным Полика́рпом,// о спасе́нии душ на́ших.
Тропа́рь, глас 1:
Ветри́лом креста́ душе́вный кора́бль окорми́в,/ жите́йская кра́сная оста́вил еси́/ и, от мирска́го мяте́жа изше́д,/ плотски́я по́хоти воздержа́нием мно́гим, о́тче, умертви́л еси́,/ пощением же и слеза́ми, моли́твами и пе́сньми непреста́нно прилепля́яся Бо́гу,/ жили́ще досто́йное Ду́ха Пресвята́го показа́лся еси́./ Моли́, Полика́рпе преподо́бне, Христа́ Бо́га,// оставле́ние прегреше́ний дарова́ти нам и ве́лию ми́лость.
НА У́ТРЕНИ
По 1-м стихосло́вии седа́лен, глас 8:
Непреста́нно исхо́д от вре́меннаго сего́ жития́ помышля́я, и о усо́пших бра́тиях неуста́нно псало́мский глас вознося́, богоно́сне о́тче Полика́рпе, на моли́твенней стра́жи бо́дренно предстоя́л еси́, те́мже и в час кончи́ны твоея́ бдя́ща обре́те тя Христо́с Бог. Мы же о тебе́ вопие́м: честна́ пред Го́сподем смерть преподо́бных Его́.
Сла́ва, и ны́не, Богоро́дичен:
Помышля́ю суд и испыта́ния стра́шная, трепе́щу и ужаса́юся мук, и огня́ боле́зни, и тьмы же и та́ртара. Увы́, что сотворю́? Студ ка́ко претерплю́, егда́ кни́ги разгну́тся и дея́ния облича́тся? Сего́ ра́ди припа́даю Ти, Богоро́дице Пречи́стая: тогда́ предста́ни ми, ну́жды о́ныя изыма́ющи, Тебе́ бо и́мам прибе́жище, Влады́чице.
По 2-м стихосло́вии седа́лен, глас 4:
Те́сным и приско́рбным путе́м ше́ствуя и злострада́ния кро́тко претерпева́я, труды́ ве́лия подъя́л еси́ и, о спасе́нии бли́жних боле́знуя, в Ца́рствие Небе́сное у́зкими враты́ вшел еси́, богому́дре о́тче Полика́рпе, ве́рных утвержде́ние, преподо́бных похвало́ и земли́ Бря́нския засту́пниче.
Сла́ва, и ны́не, Богоро́дичен:
Стена́ непобеди́мая христиа́ном еси́, Богоро́дице Де́во, к Тебе́ бо прибега́юще невреди́ми пребыва́ем, и па́ки согреша́юще и́мамы Тя Моли́твенницу. Те́мже благодаря́ще вопие́м Ти: ра́дуйся, Обра́дованная, Госпо́дь с Тобо́ю.
Велича́ние:
Ублажа́ем тя,/ преподо́бне о́тче Полика́рпе,/ и чтим святу́ю па́мять твою́,/ наста́вниче мона́хов// и собесе́дниче А́нгелов.
Псало́м избра́нный: Терпя́ потерпе́х Го́спода:
По полиеле́и седа́лен, глас 3:
Отложи́в земно́е попече́ние и от мирска́го мяте́жа изше́д, ева́нгельски Христу́ после́довал еси, блаже́нне Полика́рпе. Ны́не же с безпло́тными во́инствы водворя́яся, помина́й нас, чту́щих святу́ю па́мять твою́, да ра́достно воспева́ем Го́спода Человеколю́бца, дарова́вшаго тебе́ благода́ть исцеле́ний.
Сла́ва, и ны́не, Богоро́дичен:
Небе́сная веселя́хуся и земна́я с тре́петом ужаса́хуся, егда́ Пречи́стый глас на́йде на Тя, Богоро́дице, еди́но бо торжество́ обои́м возсия́, егда́ Безпло́тный ра́дость Тебе́ принесе́. Те́мже со А́нгелом Тебе́ вопие́м: ра́дуйся, Обра́дованная.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Я́ко со́лнце ра́ннее зе́млю оживля́ет,/ та́ко о́браз по́двигов твои́х вре́мя по́стное услажда́ет,/ о́тче наш Полика́рпе./ Моли́ся, преподо́бне, Христу́ Бо́гу,/ Це́рковь Ру́сскую в Правосла́вии невреди́му соблюсти́,/ оте́чество на́ше ми́ром огради́ти// и спасти́ ду́ши на́ша.
Кано́н свята́го, глас 8,
его́же краегране́сие: Преподо́бнаго Полика́рпа пое́м любо́вию.
Песнь 1
Ирмо́с: Во́ду проше́д я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.
Просвети́ ми ум, и озари́ моя́ чу́вства, Христе́ Бо́же, и согреше́ний мрак от души́ моея́ отгони́, да воспою́ уго́дника Твоего́, Полика́рпа блаже́ннаго.
Ре́вность по Бо́зе от ю́ности с благоро́дием души́ сочета́в, доброде́тельным житие́м мо́ре жите́йское преити́ тща́лся еси́.
Егда́ суету́ мирска́го мяте́жа позна́л еси́, о́тче Полика́рпе, тогда́ ми́ра сего́ кра́сная Христа́ ра́ди во уме́ты вмени́л еси́.
Богоро́дичен: Пренепоро́чная Отрокови́це, Богома́ти Влады́чице, при́зри на рабы́ Твоя́ и моли́ Сы́на Твоего́ от вся́ких бед изба́вити нас.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,// и пое́т Тя дух мой.
Отложи́в попече́ния су́етная, преподо́бне Полика́рпе, цве́ты доброде́телей благоуха́л еси́.
Дар Бо́жий земли́ Бря́нской яви́лся еси́, о́бразом жития́ твоего́ и чуде́с дарова́нием благове́рие утвержда́я.
О Ца́рствии Небе́снем непреста́нно помышля́я, вся земна́я оста́вил еси́ и над страстьми́ ца́рствовал еси́, богому́дре.
Богоро́дичен: Богома́терь Чи́стую воспои́м, ро́ждшую Свет непристу́пный, И́же весь мир просвеща́ет заря́ми Своего́ Божества́.
Седа́лен, глас 8:
Ско́рый в беда́х уте́шитель и в боле́знех цели́тель, мона́хов наста́вник и всех ве́рных покрови́тель, та́же и уста́вов церко́вных усе́рдный храни́тель яви́лся еси́, преподо́бне о́тче Полика́рпе, гра́да Бря́нска похвало́ и оте́чества на́шего сла́во и украше́ние.
Сла́ва, и ны́не, Богоро́дичен:
Те́плая Предста́тельнице и усе́рдная Засту́пнице, упова́ние христиа́н непосты́дное, стено́ и покро́ве, и приста́нище прибега́ющих к Тебе́, земны́х и Небе́сных Влады́чице, Сы́на Твоего́ и Бо́га на́шего моли́ дарова́ти ми́рови умире́ние, и спасе́ние, и ве́лию ми́лость.
Песнь 4
Ирмо́с: Услы́шах Го́споди,/ смотре́ния Твоего́ та́инство:/ разуме́х дела́ Твоя́,// и просла́вих Твое́ Божество́.
Науче́н быв Боже́ственным за́поведем, я́коже А́нгел на земли́ преизя́ществовал еси́ пло́тию, моли́твою и посто́м стра́сти грехо́вныя обуздава́я.
А́лчуща и жа́ждуща Христо́вы пра́вды зрим тя, преподо́бне Полика́рпе, во́льною нището́ю дарова́ния духо́вная стяжа́вшаго.
Го́рдаго зми́я послуша́нием и смире́нием попра́л еси́, блаже́нне, и ча́да духо́вная богоугожде́нию научи́л еси́.
Богоро́дичен: О Пречи́стая, души́ моея́ стра́сти исцели́ и печа́ли недоуме́ния победи́, Я́же Бо́га ро́ждшая на спасе́ние челове́ком.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.
Престо́лу Всеще́драго Бо́га ны́не предстоя́, о́тче Полика́рпе, не преста́й молити́ся о нас и оте́честве на́шем, е́же в ми́ре ему́ пребыва́ти.
О́тче преподо́бне Полика́рпе, основа́телю и первонача́льниче Бря́нския оби́тели Спа́са Христа́, град твой помина́й и возрожде́нию оби́тели твоея́ посо́бствуй.
Ликостоя́нием Небе́сным причаща́яся, при́зри на не́мощная и гре́шная ча́да твоя́, исцеле́ния душа́м и телесе́м да́руя.
Богоро́дичен: Изба́вителя и Спа́са на́шего родила́ еси́, Всенепоро́чная Де́во, Сего́ у́бо моли́ чту́щим Тя прегреше́ний оставле́ние дарова́ти.
Песнь 6
Ирмо́с: Ри́зу мне пода́ждь све́тлу,/ одея́йся све́том я́ко ри́зою,// Многоми́лостиве Христе́ Бо́же наш.
Кре́пкое заступле́ние бу́ди всем, притека́ющим к твое́й по́мощи в неду́зех и печа́лех, преподо́бне о́тче Полика́рпе, те́плый наш моли́твенниче.
А́нгелом на земли́ подража́я, моли́тву непреста́нную Бо́гу возноси́л еси́ и всего́ себе́ в же́ртву Ему́ приноси́л еси́.
Ратобо́рец на ви́димыя и неви́димыя враги́ бу́ди нам и щит несокруши́мый оте́честву на́шему, от бед и напа́стей его́ избавля́я.
Богоро́дичен: Призре́ Госпо́дь на смире́ние Твое́, Пречи́стая, и Тобо́ю посеще́ние сотвори́ удали́вшимся от Него́, я́ко Многоми́лостив.
Конда́к, глас 4:
До́лу влеку́щее мудрова́ние умертви́в/ и суету́ мирску́ю презре́в,/ Боже́ственным зако́ном после́довал еси́/ и о́браз благонра́внаго жития́ и́ноком яви́л еси́./ Мы же, восхваля́юще по́двиги твоя́,/ со умиле́нием и ве́рою вопие́м ти:/ преподо́бне о́тче Полика́рпе,/ моли́ Христа́ Бо́га// спасти́ и просвети́ти ду́ши на́ша.
И́кос:
Преподо́бне о́тче Полика́рпе, богоуго́дное житие́ твое́ ду́ши ве́рных возвыша́ет и к подража́нию тебе́ подвиза́ет: ты бо, обе́тов и́ноческих изря́дный храни́тель быв, кро́тостию зло́бу победи́л еси́ и, в ско́рбех упова́нием на Бо́га терпе́ние неистощи́мое яви́в, дре́внему иера́рху Сми́рнскому подо́бник изря́дный показа́лся еси́. Те́мже, восхваля́юще честну́ю па́мять твою́, зове́м ти: моли́ Христа́ Бо́га спасти́ и просвети́ти ду́ши на́ша.
Песнь 7
Ирмо́с: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.
А́нгельскую ре́вность о спасе́нии Бо́гом вруче́ннаго ти слове́снаго ста́да явля́я, наста́вниче неусы́пный, о́тче преподо́бне, во́лю Пастыренача́льника Христа́ твори́ти науча́л еси́.
При́зри на нас, чад твои́х, преподо́бне Полика́рпе, предстоя́щих твоему́ честно́му о́бразу, и пода́ждь оте́ческая твоя́ дая́ния, да пое́м: благослове́н еси́, Бо́же оте́ц на́ших.
Оста́вив вре́менная и избра́в ве́чная, изво́лил еси́ усе́рдне храни́ти за́поведи Госпо́дни и, я́ко сотвори́вый и научи́вый, ве́лий в Ца́рствии Небе́снем наре́клся еси́.
Богоро́дичен: Е́ва у́бо неду́гом преслуша́ния кля́тву всели́, Ты же, Де́во Богоро́дице, прозябе́нием чревоноше́ния Благослове́ние ми́рови изнесла́ еси́.
Песнь 8
Ирмо́с: Богоглаго́ливии о́троцы в пещи́/ со огне́м пла́мень попира́юще, поя́ху:// благослови́те, дела́ Госпо́дня, Го́спода.
Мо́лим тя, преподо́бне Полика́рпе, утоли́ на́ша боле́зни и ско́рби, и в правосла́вней ве́ре утверди́, да превозно́сим Го́спода во ве́ки.
Любве́ Бо́жия пла́менный рачи́телю, е́же пита́ти ча́да твоя́, напита́й и нас пи́щею духо́вною, да прича́стницы жи́зни ве́чныя бу́дем.
Юдо́ль плаче́вная томи́т нас, отве́ргших Ду́ха благода́ть, преподо́бне о́тче, оба́че моли́твами твои́ми возвесели́ нас, ка́ющихся Го́споду.
Богоро́дичен: Безле́тный из Тебе́ воплоти́ся боголе́пне, Его́же моли́, Де́во, стра́сти пло́ти моея́ умертви́ти, и оживи́ти ду́шу мою́.
Песнь 9
Ирмо́с: Чи́стую сла́вно почти́м,/ лю́дие, Богоро́дицу,/ огнь Божества́ прии́мшую во чре́ве неопа́льно,// пе́сньми велича́ем.
О, мно́гаго твоего́ дерзнове́ния, и́мже ко Влады́це всех обогати́лся еси́, о́тче преподо́бне, в се́рдце Ему́, я́коже дру́гу, собесе́дуя.
Вем, я́ко недоуме́ет язы́к восхвали́ти тя по достоя́нию, оба́че от любве́ приноси́мыя тебе́ похвалы́ сия́ приими́, я́ко оте́ц чадолюби́вый.
Изба́ви нас хода́тайством твои́м от мук ве́чных, преподо́бне Полика́рпе, и десна́го стоя́ния на Стра́шнем Суде́ сподо́би.
Богоро́дичен: Ю́же дре́вле предвозвести́ проро́ческое сосло́вие, ста́мну, и жезл, и скрижа́ль, и несеко́мую го́ру, Богоро́дицу Де́ву, ве́рнии, да восхва́лим.
Свети́лен:
Благоле́пною простото́ю удобре́нный, о́тче Полика́рпе, доброде́телей небовосхо́дными кри́лы, я́ко мы́сленный оре́л, сете́й кня́зя ми́ра сего́ избе́гл еси́ и от земны́я оби́тели к Небе́сней восте́кл еси́, отону́дуже осиява́й попече́нием твои́м град Брянск, и зе́млю Ру́сскую, и всех, любо́вию тя почита́ющих.
Сла́ва, и ны́не, Богоро́дичен:
Всю наде́жду спасе́ния на́шего на Тя возлага́ем, Богома́ти Неискусобра́чная, и на по́мощь при́сно Тя призыва́ем: от напа́сти врага́ и печа́ли спаси́ нас, грехо́вныя плени́цы зол на́ших разреша́ющи, и ве́чнаго огня́ исхити́, да Тя, Предста́тельницу ро́да на́шего, при́сно велича́ем.
На хвали́тех стихи́ры, глас 1.
Подо́бен: Небе́сных чино́в ра́дование:
Равноа́нгельным житие́м твои́м/ тече́ние до́бре соверша́я/ и те́ло, изнуре́нное посто́м и бде́нием,/ непреста́нно вери́гами тя́жкими сокруша́я,/ в ничто́же по́двиги твоя́ вменя́л еси́, о́тче Полика́рпе.// Те́мже тя с любо́вию ублажа́ем.
Смире́ние и кро́тость/ с тве́рдостию ду́ха сочетава́я,/ беды́ от лжебра́тий и злых челове́к поноше́ния/ Христа́ ра́ди претерпе́л еси́,/ отра́ду изнемога́ющей души́ твое́й// в моли́тве у преподо́бных ла́вры Пече́рския обрета́я.
В ке́лии убо́зей и ри́зах раздра́ных/ бога́тством доброде́телей возсия́л еси́, преподо́бне,/ себе́ сама́го о́браз ста́ду твоему́ подава́я,/ благоуве́тливый же глас слове́с твои́х,/ си́лою ду́ха и любо́вию растворе́нный,// к Бо́гу сердца́ ве́рных обраща́ше.
Тече́ние скончава́я поще́ния твоего́,/ преподо́бне о́тче Полика́рпе,/ при пра́зе церко́внем погребсти́/ многотру́дное те́ло твое́ завеща́л еси́,/ оба́че весть Госпо́дь сла́вящия Его́ прославля́ти.// Те́мже и тя по кончи́не да́ром чуде́с обогати́.
Сла́ва, глас 8.
Подо́бен: О, пресла́внаго чудесе́:
О уго́дниче Бо́жий,/ о́тче наш Полика́рпе,/ гра́да Бря́нска покрови́телю,/ и Ру́сския земли́ засту́пниче,/ правосла́вныя ве́ры побо́рниче,/ ве́рным утвержде́ние и во́ином посо́бниче,/ Безпло́тных подража́телю и преподо́бных сожи́телю,/ и всем стра́ждущим помо́щниче,// моли́ спасти́ся душа́м на́шим.
И ны́не, Богоро́дичен, глас и подо́бен то́йже:
О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ доны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.
НА ЛИТУРГИ́И
Блаже́нны от кано́на свята́го, песнь 3-я и 6-я, на 4. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О па́стырю до́брый, наста́вниче неусы́пный, преподо́бне о́тче Полика́рпе! Ты, от мяте́жа ми́ра сего́ изше́д, отверже́нием благ преходя́щих ева́нгельски Христу́ после́довал еси́ и, равноа́нгельное житие́ пожи́в, Безпло́тных по́чести сподоби́лся еси́. Сего́ ра́ди, любо́вь твою́ к лю́дем па́мятующе, я́ко ча́да ко отцу́, к тебе́ прибега́ем и со умиле́нием мо́лимся: о преподо́бне уго́дниче Бо́жий, изба́ви от вся́каго наве́та вра́жия гра́ды и ве́си земли́ на́шея, и не оста́ви заступле́нием твои́м нас немощны́х, грехми́ и скорбьми́ мно́гими обремене́нных. Умоли́ Христа́ Бо́га на́шего дарова́ти нам помысло́в мир, от па́губных страсте́й и вся́кия скве́рны воздержа́ние, братолю́бие долготерпели́вное, благоче́стие же нелицеме́рное, да не во зло обрати́м блага́я, нам свы́ше при́сно посыла́емая. Моли́ся, преблаже́нне, да озари́тся ум наш све́том лица́ Бо́жия, да укрепи́тся благода́тию Госпо́днею произволе́ние на́ше, да, в зако́не Христо́ве утверди́вшеся, неле́ностно по пути́ за́поведей святы́х потече́м. Осени́ го́рним твои́м благослове́нием нас и всех, в ско́рбех су́щих, боле́зньми душе́вными и теле́сными одержи́мых, исцеле́ние, утеше́ние и избавле́ние тем да́руя; над все́ми же си́ми испроси́ нам свы́ше дух кро́тости и смиренному́дрия, дух терпе́ния и покая́ния, да про́чее вре́мя жития́ на́шего в ве́ре и сокруше́нии серде́чнем поживе́м, и та́ко в час сконча́ния на́шего благода́рне восхва́лим просла́вльшаго тя Го́спода, Безнача́льнаго Отца́, Единоро́днаго Его́ Сы́на и Единосу́щнаго Всеблага́го Ду́ха, Тро́ицу Неразде́льную, во ве́ки веко́в. Ами́нь.
