Служба преподобномученику Феофану (Графову), диакону
Ме́сяца ма́рта в 5-й день
Преподобному́ченика Феофа́на, диа́кона
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 5.
Подо́бен: Ра́дуйся, Живоно́сный Кре́сте:
Ра́дуйся, о́тче Феофа́не сла́вне,/ ты бо, мона́шескаго жития́ взыску́я,/ во оби́тель Борисогле́бскую всели́лся еси́/ и, та́мо во и́ночестве подвиза́вся,/ доброде́тельми и благи́ми нра́вы себе́ украси́л еси́,/ святы́х соприча́стниче и пра́ведных,// моли́ спасти́ся душа́м на́шим.
Ра́дуйся, свя́те Феофа́не преподо́бне,/ ты бо, от ю́ности всем се́рдцем Христа́ возлюби́в,/ стра́хом Бо́жиим себе́ огради́л еси́/ и во оби́тель и́ноческую водвори́лся еси́,/ иде́же, чи́на диа́конскаго удосто́ився,/ Бо́га велегла́сно прославля́л еси́,// Его́же моли́ спасти́ся душа́м на́шим.
Ра́дуйся, страда́льче сла́вне Феофа́не,/ ты бо, терпе́нием тве́рдым и е́же по Бо́зе упова́нием/ му́жественне вооружи́вся,/ ухищре́ния безбо́жных гони́телей сокруши́л еси́/ и ко́зни лжесвиде́телей посрами́л еси́,/ му́чеников ди́вное украше́ние,// моли́ спасти́ся душа́м на́шим.
Ра́дуйся, преподобному́чениче Феофа́не диа́коне,/ ты бо, я́ко зла́то в горни́ле искуше́н быв,/ богобо́рцев нечести́вых не убоя́лся еси́/ и, я́ко во́ин непобеди́мый я́влься,/ вене́ц сла́вы от Бо́га прия́л еси́,/ Ему́же ны́не те́пле моли́ся// дарова́ти душа́м на́шим ве́лию ми́лость.
Сла́ва, глас 6.
Подо́бен: Все отло́жше:
Всю мирску́ю суету́ отри́нул еси́,/ свя́те о́тче Феофа́не,/ и, в преподо́бии че́стне пожи́в,/ диа́конское служе́ние до́бре соверши́л еси́./ Во дни же гоне́ний на Це́рковь Ру́сскую/ тя́жкия рабо́ты и темни́чная заключе́ния/ Христа́ ра́ди претерпе́л еси́,/ И́же венце́м побе́дным тя украси́/ и ра́йския сла́вы сподо́би,/ ея́же ны́не наслажда́яся,/ прославля́еши Отца́ и Сы́на и Свята́го Ду́ха,/ Тро́ицу Живонача́льную и Неразде́льную// во еди́нем Существе́.
И ны́не, Богоро́дичен, глас то́йже: Кто Тебе́ не ублажи́т:
Вход. Проки́мен дне. И чте́ния три му́ченическая.
На лити́и стихи́ра хра́ма.
Сла́ва, свята́го, глас 8.
Подо́бен: О, пресла́внаго чудесе́:
О, пресла́внаго чудесе́!/ О, вели́каго терпе́ния!/ Преподобному́ченик Феофа́н диа́кон/ без вины́ на заключе́ние осужда́ется,/ и темни́чныя у́зы прие́млет,/ и многотру́дныя рабо́ты претерпева́ет,/ оба́че от Христа́ Бо́га побе́дным венце́м венча́ется/ и, я́ко раб благи́й и ве́рный,// Ца́рствия Небе́снаго насле́дник быва́ет.
И ны́не, Богоро́дичен, глас и подо́бен то́йже:
О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.
На стихо́вне стихи́ры, глас 2.
Подо́бен: Егда́ от Дре́ва:
Егда́ законопресту́пнии лю́дие,/ не́навистию и неве́рием ослепле́ннии,/ оби́тель Борисогле́бскую безче́стию преда́ша/ и, зло́бою ды́шуще, и́ноков ея́ изгна́ша,/ тогда́, преподобному́чениче Феофа́не,/ в зе́млю Ра́донежскую пресели́лся еси́,/ иде́же со тща́нием диа́конское служе́ние соверша́л еси́/ во хра́ме Успе́ния Цари́цы Небе́сныя,// Ю́же моли́ спасти́ся душа́м на́шим.
Стих: Ди́вен Бог во Святы́х Свои́х,// Бог Изра́илев.
Егда́ жесто́кий мучи́тель,/ безбо́жное веле́ние власте́й исполня́я,/ восхоте́ тя обвини́ти/ и в темни́цу мра́чную всади́ти,/ тогда́ ты, добропобе́дный му́чениче Феофа́не,/ терпе́нием кре́пким вооружи́вся,/ лука́выя наве́ты небоя́зненне отве́ргл еси́/ и, на Го́спода упова́ние возлага́я,// жизнь свою́ Тому́ вручи́л еси́.
Стих: Блаже́н муж боя́йся Го́спода,// в за́поведех Его́ восхо́щет зело́.
Егда́ нечести́вии лю́дие,/ ру́ки своя́ на тя возложи́вше,/ в се́верныя преде́лы страны́ на́шея тя сосла́ша/ и темни́чному заключе́нию преда́ша,/ тогда́, терпеливоду́шне му́чениче Феофа́не,/ страда́ния лю́тая претерпева́я,/ о́браз му́жества показа́л еси́/ и, те́лом в безве́стней моги́ле посе́явся,// душе́ю в Ца́рствии Небе́снем процве́л еси́.
Сла́ва, глас 8:
Лю́дие беззако́ннии, ве́ру оте́ческую презре́вшии!/ Почто́ ру́ки своя́ на мя возложи́сте/ и в темни́цу Буты́рскую вверго́сте?/ Почто́ льсти́во оболга́ти восхоте́сте/ и ло́жная свиде́тельства на мя воздвиго́сте?/ Не пови́нен есмь, в не́мже мя осужда́ете,/ си́це преподобному́ченик Феофа́н со дерзнове́нием глаго́лаше,// в ру́це Госпо́дни всего́ себе́ предава́я.
И ны́не, Богоро́дичен: Безневе́стная Де́во:
Тропа́рь, глас 4:
Мирска́го мяте́жа удали́вся,/ во оби́тель и́ноческую всели́лся еси́,/ иде́же, диа́конскаго чи́на удосто́ився,/ по́двигом до́брым подвиза́лся еси́./ Во дни же гоне́ний на Це́рковь Ру́сскую/ темни́чныя у́зы и рабо́ты го́рькия Христа́ ра́ди претерпе́в,/ тве́рдость во испове́дании ве́ры яви́л еси́./ Те́мже ны́не, во оби́телех Небе́сных пребыва́я/ и с ли́ки А́нгельскими Бо́гу предстоя́,/ помина́й нас, любо́вию чту́щих тя,// Феофа́не преподо́бне, о́тче наш.
НА У́ТРЕНИ
По 1-м стихосло́вии седа́лен, глас 6:
Рече́ Госпо́дь: и́же хо́щет по Мне ити́, да отве́ржется себе́, и во́змет крест свой, и по Мне гряде́т. Ты же, преподобному́чениче, Боже́ственная словеса́ сия́ смы́сленне в се́рдце восприи́м, ми́ра отве́рглся еси́ и, страда́ния му́жественне претерпе́в, себе́ сама́го в же́ртву Христу́ прине́сл еси́. Ны́не же Престо́лу Бо́жию предстоя́, моли́ спасти́ся душа́м на́шим.
Сла́ва, и ны́не, Богоро́дичен:
Я́ко ми́лости бе́здну ро́ждшая, поми́луй нас, неключи́мых рабо́в Твои́х, Де́во Влады́чице, и изба́ви Суда́ и му́ки, и Ца́рствия Небе́снаго сподо́би, да любо́вию велича́ем Тя.
По 2-м стихосло́вии седа́лен, глас 8:
Ка́ко возмо́жем досто́йную похвалу́ принести́ подвиго́м твои́м, преподобному́чениче Феофа́не? Ты бо, и́ноческаго жития́ вожделе́в, во оби́тель Борисогле́бскую всели́лся еси́, иде́же, диа́конское служе́ние усе́рдне соверша́я, Бо́га прославля́л еси́. По́слежде же в преде́лы се́верныя изгна́н быв, рабо́ты тя́жкия претерпе́л еси́ и му́ченический вене́ц от Христа́ прия́л еси́, Его́же моли́ спасти́ся душа́м на́шим.
Сла́ва, и ны́не, Богоро́дичен:
Прибе́жище ми́ра, христиа́н похвало́, наде́ждо всех, на Тя упова́ющих, Влады́чице Пречи́стая! Не пре́зри нас, моля́щихся Тебе́, но умоли́ Сы́на Твоего́, Христа́ Бо́га на́шего, спасти́ся душа́м на́шим.
Велича́ние:
Велича́ем тя,/ преподобному́чениче Феофа́не,/ и чтим по́двиги и страда́ния твоя́,/ я́же за Христа́// претерпе́л еси́. Псало́м избра́нный:
Весть Госпо́дь путь пра́ведных, и путь нечести́вых поги́бнет.
Рабо́тайте Го́сподеви со стра́хом, и ра́дуйтеся Ему́ с тре́петом.
Ты же, Го́споди, Засту́пник мой еси́, сла́ва моя́, и вознося́й главу́ мою́.
Поми́луй мя, Го́споди, я́ко не́мощен е́смь: исцели́ мя, Го́споди, я́ко смято́шася ко́сти моя́.
Отступи́те от мене́, вси де́лающии беззако́ние, я́ко услы́ша Госпо́дь глас пла́ча моего́.
Го́споди Бо́же мой, на Тя упова́х, спаси́ мя от всех гоня́щих мя, и изба́ви мя.
По́мощь моя́ от Бо́га, спаса́ющаго пра́выя се́рдцем.
Да упова́ют на Тя зна́ющии и́мя Твое́, я́ко не оста́вил еси́ взыска́ющих Тя, Го́споди.
По полиеле́и седа́лен, глас 1:
Благогове́йне в хра́ме Бо́жием слу́жбу соверша́я, Го́спода прославля́л еси́, преподобному́чениче Феофа́не диа́коне, и Пречи́стую Влады́чицу Богоро́дицу в пе́снех велича́ти призыва́л еси́. Ны́не Престо́лу Бо́жию предстоя́ и со все́ми новому́ченики Це́ркве Ру́сския Тро́ицу Святу́ю прославля́я, моли́ся о душа́х на́ших.
Сла́ва, и ны́не, Богоро́дичен:
Еди́ну Тя по Бо́зе наде́жду непосты́дную и предста́тельство тве́рдое и́мамы, Пречи́стая Ма́ти Де́во, те́мже вопие́м: изба́ви нас враг ви́димых и неви́димых, вре́да и искуше́ний, да Тя непреста́нно велича́ем.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Ма́рка, зача́ло 37.
По 50-м псалме́ стихи́ра, глас 6:
Прииди́те, ве́рнии,/ почти́м па́мять диа́кона сла́внаго,/ преподобному́ченика Феофа́на,/ и́же, преще́ний гони́телей безбо́жных не убоя́вся,/ во испыта́ниих ве́рность Христу́ сохрани́/ и в рабо́тах го́рьких смерть прия́т./ Те́мже к нему́ возопии́м:/ моли́ся Го́сподеви, страда́льче до́блий,// поми́ловатися душа́м на́шим.
Кано́н, глас 8.
Песнь 1
Ирмо́с: Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в,/ и раздели́в мо́ре,/ Изра́иля же беглеца́, пешехо́дца спасе́,// песнь Бо́гови воспева́юща.
Припе́в: Святы́й преподобному́чениче Феофа́не диа́коне, моли́ Бо́га о нас.
Царю́ Небе́сный, Уте́шительный Ду́ше, даждь ми ра́зум досто́йно воспе́ти по́двиги и страда́ния уго́дника Твоего́, Феофа́на сла́внаго.
От ю́ности Христа́ всем се́рдцем возлюби́в, во оби́тель и́ноческую стопы́ твоя́ напра́вил еси́, преподобному́чениче сла́вне, иде́же, послуша́нию прилежа́в, во́ли своея́ отве́рглся еси́.
Пятьле́тне во оби́тели Борисогле́бстей усе́рдно подвиза́яся, обе́ты и́ноческия Бо́гу прине́сл еси́, преподо́бне, и в по́стризе Феофа́н нарече́н был еси́, е́же есть богоявле́ние.
Богоро́дичен: Сло́во Бо́жие, преесте́ственно вопло́щшееся от Тебе́, Пречи́стая Де́во, родила́ еси́, те́мже Тя, я́ко Ма́терь Бо́жию, вси чтим и по до́лгу ублажа́ем.
Песнь 3
Ирмо́с: Утвержде́й в нача́ле Небеса́ ра́зумом,/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят па́че Тебе́,// Еди́не Человеколю́бче.
На ка́мени за́поведей Госпо́дних утверди́в се́рдце твое́, блаже́нне, са́на диа́конскаго досто́ин яви́лся еси́ и, благогове́йне слу́жбу соверша́я, взыва́л еси́: несть свят па́че Тебе́, Еди́не Человеколю́бче.
О ми́ре всего́ ми́ра, благостоя́нии Святы́х Бо́жиих Церкве́й, о держа́ве Росси́йстей, власте́х и во́инстве ея́ моле́ния Бо́гу велегла́сно возноси́л еси́, свя́те диа́коне, да позна́ют лю́дие: я́ко несть свят па́че Тебе́, Еди́не Человеколю́бче.
Я́ко благогове́йный сослужи́тель Боже́ственных Та́ин, о предложе́нных честны́х Даре́х Го́сподеви моли́лся еси́ и, крестообра́зне ру́це слага́я, святы́й ди́скос и святы́й поти́р горе́ возноси́л еси́.
Богоро́дичен: Пода́ждь отпуще́ние грехо́в нам, Пречи́стая Богоро́дице, зако́на Влады́ку ро́ждшая, стра́сти нас ра́ди претерпе́вшаго и спасе́ние нам дарова́вшаго.
Седа́лен, глас 8:
Преподобному́чениче Феофа́не блаже́нне, ты, диа́конское служе́ние соверша́я, усе́рдно о лю́дех моли́лся еси́, да ти́хое и безмо́лвное житие́ во благоче́стии и чистоте́ поживу́т и, А́нгела ми́рна, Храни́теля душ и теле́с обре́тше, христиа́нския кончи́ны живота́ сподо́бятся и до́брый отве́т на Стра́шнем Суди́щи Христу́ Бо́гу воздаду́т. Помози́ и нам богоуго́дне житие́ сконча́ти и в День стра́шнаго воздая́ния ми́лость улучи́ти.
Сла́ва, и ны́не, Богоро́дичен:
О Всепе́тая Богоро́дице Влады́чице, преподо́бных похвало́, му́чеников сла́во, А́нгелы восхваля́емая и челове́ки воспева́емая, и всего́ ми́ра кре́пкая Помо́щнице! Изба́ви Це́рковь Ру́сскую вся́каго обстоя́ния, Еди́на Благослове́нная.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.
Егда́ попусти́ Госпо́дь гоне́ние на Це́рковь Ру́сскую, и разори́ша безбо́жнии оби́тель, иде́же ты подвиза́лся еси́, свя́те Феофа́не, тогда́, ве́рою укрепля́емь, ду́хом не поколеба́лся еси́, но моли́твенне взыва́л еси́: си́ле Твое́й сла́ва, Человеколю́бче.
Испо́лнися на тебе́, преподобному́чениче, глаго́л Госпо́день: а́ще Мене́ изгна́ша, и вас иждену́т. Ты же, угото́вав ду́шу свою́ ко искуше́нию, небоя́зненне Христу́ после́довал еси́, вопия́: си́ле Твое́й сла́ва, Человеколю́бче.
Во́ли Бо́жией послушли́в быв, со смире́нием крест изгна́ния восприя́л еси́, до́блий страда́льче, и, во град Се́ргиев стопы́ твоя́ напра́вив, наде́жду на Го́спода возложи́л еси́, взыва́я: си́ле Твое́й сла́ва, Человеколю́бче.
Богоро́дичен: Стена́ необори́мая и покро́в всемо́щный новому́чеником и испове́дником Це́ркве Ру́сския яви́лася еси́, Пресвята́я Де́во, те́мже Тя велича́ем.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чу́ждая тьма, окая́ннаго?/ Но обрати́ мя, и к све́ту за́поведей Твои́х// пути́ мо́я напра́ви, молю́ся.
Игу́мена земли́ Ру́сския на по́мощь призыва́я, в зе́млю Ра́донежскую пресели́лся еси́, преподо́бне Феофа́не, и, близ Тро́ицкия оби́тели приста́нище обре́т, во хра́ме Успе́ния Пресвяты́я Богоро́дицы диа́конское служе́ние со тща́нием соверша́л еси́.
Егда́ прии́де испыта́ние ве́ры твоея́, преподобному́чениче, и безбо́жнии в темни́цу тя всади́ша, тогда́, преще́ний их не убоя́вся, все упова́ние на Цари́цу Небе́сную возложи́л еси́, и ве́рность Го́споду да́же до сме́рти соблю́л еси́.
Христа́ всем се́рдцем возлюби́в, Тому́ Еди́ному сла́ву воздава́л еси́, преподо́бне Феофа́не диа́коне, сего́ ра́ди и Той терпе́ние в страда́ниих тебе́ дарова́, и неувяда́емым венце́м сла́вы украси́, и ли́ку святы́х новому́чеников Це́ркве Ру́сския сочета́.
Богоро́дичен: Пое́м Тя, Предста́тельнице те́плая и Засту́пнице христиа́н, Богоро́дице Всепе́тая, я́ко со все́ми святы́ми земли́ Ру́сския мо́лиши Сы́на Твоего́ и Бо́га на́шего обрести́ нам ве́лию ми́лость.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.
Помина́я сло́во Госпо́дне: а́ще Мене́ изгна́ша и вас иждену́т, преще́ний лю́таго гони́теля не убоя́лся еси́, му́чениче добропобе́дне, но, во́ли Бо́жией повину́яся, триле́тное темни́чное заключе́ние со смире́нием восприя́л еси́.
В заточе́нии сый и го́рькия рабо́ты претерпева́я, глад и хлад ни во что́же вменя́л еси́, преподобному́чениче Христо́в Феофа́не, оба́че, любо́вию к Бо́гу пламене́я, взыва́л еси́: очи́сти мя, Спа́се, и из глубины́ зол возведи́ мя.
Гони́телей лука́вое безбо́жие не возмо́же поколеба́ти тве́рдости души́ твоея́, преподобному́чениче сла́вне, те́мже, я́ко име́яй дерзнове́ние ко Го́споду, моли́ грехо́внаго пле́на нам избе́гнути и досто́йныя плоды́ покая́ния принести́.
Богоро́дичен: Испо́лнися на Тебе́ проро́чество Симео́ново, и ору́жие про́йде ду́шу Твою́, Богома́ти Пречи́стая, те́мже му́чеником стена́ необори́мая и по́мощь тве́рдая при́сно быва́еши.
Конда́к, глас 5:
Вы́шняго блаже́нства взыску́я,/ преподобному́чениче Феофа́не диа́коне,/ по́двигом до́брым подвиза́лся еси́,/ в годи́ну же лю́тых гоне́ний/ любо́вь и ве́рность Христу́ сохрани́в,/ в ра́дость Го́спода твоего́ вшел еси́./ Сего́ ра́ди приле́жно мо́лим тя:/ испроси́ у Го́спода Це́ркви Ру́сстей благостоя́ние,/ Оте́честву на́шему мир// и душа́м на́шим ве́лию ми́лость.
И́кос:
Восхва́лим днесь, ве́рнии лю́дие, преподобному́ченика Феофа́на, диа́кона благогове́йнейшаго, ду́хом му́жественнаго и страда́льца сла́внаго, и́же, благода́ти Ду́ха Свята́го взыску́я, и́ноческия по́двиги подъя́т и, благо́ю наде́ждою себе́ обогати́в, за Христа́ пострада́ти сподо́бися. Те́мже к нему́ с любо́вию возопии́м: о ве́рный ра́бе и во́ине Христо́в добропобе́дный, испроси́ у Го́спода Це́ркви Ру́сстей благостоя́ние, Оте́честву на́шему мир и душа́м на́шим ве́лию ми́лость.
Песнь 7
Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:// благослове́н еси́, Бо́же оте́ц на́ших.
Страх муче́ния отложи́в, и все упова́ние на Бо́га возложи́в, Феофа́не преподо́бне, к по́двигу страда́ния за Христа́ устреми́лся еси́, Ему́же ны́не пое́ши: благослове́н еси́, Бо́же оте́ц на́ших.
Не возмого́ша безбо́жнии гони́тели разуме́ти по́двиг страда́ния твоего́ за Христа́, те́мже и осуди́шася. Ты же, свя́те Феофа́не, ны́не на Небеси́ Ему́ предстои́ши и побе́дно взыва́еши: благослове́н еси́, Бо́же оте́ц на́ших.
Просла́вим, ве́рнии, Феофа́на му́ченика, и́же за́поведьми блаже́нств, я́ко ле́ствицею небовосхо́дною, Ца́рствия Бо́жия дости́же и мзду обеща́нную от Го́спода прия́т, Ему́же днесь взыва́ет: благослове́н еси́, Бо́же оте́ц на́ших.
Богоро́дичен: Еди́ней Богоблаже́нней, во объя́тиих нося́щей Сы́на Своего́, ли́цы новому́чеников Це́ркве Ру́сския вопию́т: благослове́нна Ты в жена́х, и благослове́н Плод чре́ва Твоего́, Де́во Пречи́стая.
Песнь 8
Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.
Егда́ ло́жными глаго́лы оклевета́н был еси́, в се́рдце свое́м зла на преда́вшаго тя ника́коже име́л еси́, свя́те, но, злоде́йства вра́жия му́жественне претерпева́я, все упова́ние на Бо́га возложи́л еси́.
Преще́ний зла́го гони́теля не убоя́вся, преподобному́чениче, па́ки осужде́ние непра́ведное прия́л еси́, и смерть, я́ко приобре́тение жи́зни ве́чныя со Христо́м, досто́йно в земли́ Каргопо́льстей сре́тил еси́.
Зако́н Христо́в испо́лнив и ве́ру сохрани́в, тече́ние земно́е сконча́л еси́ и Ца́рствие Небе́сное насле́довал еси́. Те́мже не забу́ди нас, почита́ющих тя, о́тче Феофа́не, и моли́ся Всеми́лостивому Бо́гу, да спасе́т ду́ши на́ша.
Богоро́дичен: Зря́щи Сы́на Твоего́, Пречи́стая, в земли́ на́шей поруга́ема от безбо́жников, не оста́вила еси́ хода́тайством Твои́м Це́рковь Ру́сскую, досто́йно взыва́ющу: ра́дуйся, Благода́тная, Госпо́дь с Тобо́ю.
Песнь 9
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.
Даде́ся ти благода́ть, преподобному́чениче Феофа́не, не то́кмо и́ноческия по́двиги подъя́ти и в чи́не диа́констем Бо́гу послужи́ти, но и во испове́дании ве́ры за Христа́ пострада́ти, Его́же моли́ спасти́ся душа́м на́шим.
Преподобному́чениче Феофа́не сла́вне! Ты, все упова́ние на Бо́га возложи́в, страда́ния вре́менная ни во что́же вмени́л еси́, и ве́чная бла́га в Ца́рствии Небе́снем восприя́л еси́, и́хже и нам у Го́спода испроси́ моли́твами твои́ми.
Приими́, преподобному́чениче Феофа́не, сие́ ма́лое моле́ние, в похвалу́ тебе́ приноси́мое, и испроси́ у Го́спода Бо́га и Пречи́стыя Его́ Ма́тере оставле́ния всех на́ших грехо́в, да изба́вимся ве́чнаго осужде́ния и прича́стницы Небе́снаго Ца́рствия яви́мся.
Богоро́дичен: Вои́стину превы́шши всея́ тва́ри яви́лася еси́, Влады́чице, Бо́га бо всех пло́тию родила́ еси́. Те́мже Тя Предста́тельницу и́мамы, и сте́ну тве́рду, и наде́жду изве́стну.
Свети́лен:
Богоявле́нию тезоимени́тый, преподобному́чениче Феофа́не, Бо́га, я́вльшагося во пло́ти, в житии́ твое́м прославля́л еси́ и, страда́ния тя́жкая за Него́ претерпе́в, све́тлым венце́м украси́лся еси́. Те́мже во све́тлостех святы́х почива́я, моли́ спасти́ и просвети́ти ду́ши на́ша.
Сла́ва, и ны́не, Богоро́дичен:
Пречи́стая Ма́ти Де́во! Отжени́ тьму грехо́вную душ на́ших и к све́ту заповедей Христо́вых напра́ви, да, покая́нием очи́стившеся, в ра́дости просла́вим свет нам Показа́вшаго.
На хвали́тех стихи́ры, глас 5.
Подо́бен: Ра́дуйся:
Ра́дуйся, Феофа́не преподо́бне/ и му́чениче Христо́в добропобе́дный!/ Ты, ева́нгельская словеса́ душе́ю восприи́м,/ жите́йское попече́ние отри́нул еси́/ и, Небе́снаго Оте́чества взыску́я,/ во оби́тель Борисогле́бскую всели́лся еси́,/ иде́же, диа́конскаго са́на удосто́ився,/ усе́рдно Го́сподеви послужи́л еси́./ Ны́не Престо́лу Бо́жию во сла́ве предстоя́,/ помина́й нас, любо́вию чту́щих тя,// во е́же спасти́ся душа́м на́шим.
Ра́дуйся, земле́ Росто́вская,/ торжеству́й и лику́й, гра́де Се́ргиев,/ в па́мяти преподобному́ченика Феофа́на диа́кона,/ и́же в годи́ну безбо́жнаго гоне́ния,/ ло́жныя наве́ты отри́нув/ и вра́жеския ко́зни низложи́в,/ претерпе́ страда́ния мно́гая/ и препобеди́ страх сме́ртный./ Ны́не, я́ко граждани́н Небе́снаго Оте́чества,/ с ли́ки новому́чеников Бо́гу предстои́т// и мо́лится о е́же спасти́ся душа́м на́шим.
Ра́дуйся, земле́ Арха́нгельская,/ ди́вно укра́шенная кровьми́ и по́двиги новому́чеников на́ших,/ от ни́хже и преподо́бный Феофа́н диа́кон,/ я́ко и́стинный сын Це́ркве Ру́сския,/ незло́бием Христо́вым вооружи́вся,/ зло́бу и неи́стовство мучи́телей победи́,/ лише́ния и тя́жкия рабо́ты претерпева́я,/ о́браз му́жества нам яви́,/ те́лом же в безве́стней моги́ле посе́явся,/ душе́ю в Ца́рствии Небе́снем процвете́,// иде́же мо́лится спасти́ся душа́м на́шим.
Ра́дуйтеся и весели́теся, христоимени́тии лю́дие,/ духо́вное торжество́ све́тло соверша́юще/ в па́мяти преподобному́ченика Феофа́на,/ и́же, преще́ния мучи́телей отри́нув/ и неи́стовства лжесвиде́телей не убоя́вся,/ изгна́ние и уничиже́ние Христа́ ра́ди претерпе́/ и о́браз благоче́стия нам яви́./ Ны́не же ра́йския сла́дости наслажда́яся,/ я́ко и́стинный сын земли́ на́шея си́це вопие́т:/ Русь Свята́я, храни́ ве́ру Правосла́вную,// в не́йже тебе́ утвержде́ние.
Сла́ва, глас 8:
Весели́ся днесь, Це́рковь Ру́сская,/ прославля́ющи Христо́ва уго́дника,/ преподобному́ченика Феофа́на диа́кона!/ И мы, ве́рнии, такова́го иму́ще моли́твенника,/ с ве́рою и любо́вию возопии́м:/ ра́дуйся, страда́льче Христо́в добропобе́дный/ и Оте́чества на́шего сы́не ве́рный,/ хода́тай те́плый ко Го́споду о нас бу́ди// и моли́ спасти́ся душа́м на́шим.
И ны́не, Богоро́дичен, глас то́йже:
Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.
Славосло́вие вели́кое. Ектении́. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву, хвале́ние Его́ в Це́ркви преподо́бных. Апо́стол к Тимофе́ю, зача́ло 291. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 36. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О святы́й преподобному́чениче Феофа́не приснопа́мятне, во́ине Христо́в добропобе́дный, Це́ркве Ру́сския ве́рный сы́не! Ты, пе́рвее труды́ по́стническими ду́шу твою́ жела́я очи́стити, во оби́тель Борисогле́бскую всели́лся еси́, иде́же, диа́конскаго чи́на удосто́ився, усе́рдно подвиза́лся еси́. В годи́ну же гоне́ний безбо́жных терпе́нием му́жески вооружи́вся, и мно́гая страда́ния и лише́ния претерпе́в, я́ко благи́й раб и ве́рный в ра́дость Го́спода твоего́ вшел еси́. О преподо́бне и достохва́льне страда́льче! Моли́ те́пле Всеблага́го Го́спода на́шего Иису́са Христа́, да утверди́т правосла́вную ве́ру во Оте́честве на́шем, да помо́жет и́ноком обе́ты мона́шеския усе́рдне исполня́ти, христоимени́тым же лю́дем по́двигом до́брым подвиза́тися. Нам же, любо́вию тя почита́ющим и к заступле́нию твоему́ прибега́ющим, испроси́ покая́ние и проще́ние грехо́в, терпе́ние в ско́рбех и боле́знех, да во вся́ком чи́не и зва́нии Го́сподеви благоугоди́м, и во всех обстоя́ниих на Него́ Еди́наго наде́жду возложи́м. Ему́же подоба́ет вся́кая сла́ва, честь и поклоне́ние, со Отце́м и Святы́м Ду́хом, ны́не и при́сно, и во ве́ки веко́в. Ами́нь.
