Служба священномученику Павлину, архиепископу Могилевскому
Ме́сяца октября́ в 21-й день
Священному́ченика Павли́на, архиепи́скопа Могиле́вскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 1.
Подо́бен: Небе́сных чино́в:
Смире́н, незло́бив, кро́ток и прост быв,/ священному́чениче Павли́не,/ я́ко а́нгел на земли́ пожи́л еси́/ и, муче́нием путь сконча́в,/ зе́млю кро́тких насле́довал еси́.// Моли́ о душа́х на́ших.
Ве́рою и благоче́стием/ от ма́терних пеле́н обогати́лся еси́/ и, Христа́ всем се́рдцем возлюби́в,/ в Саро́вскую пу́стынь всели́лся еси́,/ иде́же усе́рдно подвиза́яся,/ сама́го себе́ со вся́ким смире́нием ста́рцем подклони́л еси́.// Сего́ ра́ди тя, свя́те Павли́не, ублажа́ем.
Во времена́ гоне́ний лю́тых в земли́ на́шей/ яви́ тя Госпо́дь, преди́вне Павли́не,/ свети́льника пресве́тлаго,/ благоче́стием сия́юща/ и любо́вию ча́да церко́вная согрева́юща.// Сего́ ра́ди тя прославля́ем.
Твоему́ доброде́тельному житию́,/ Павли́не досточу́дне,/ А́нгели удиви́шася,/ в телеси́ бо сый,/ Безпло́тным подража́ти потща́лся еси́/ и, ум твой ко Христу́ возвы́сив,/ прему́дрость боже́ственную измла́да возлюби́л еси́.// Сего́ ра́ди тя почита́ем.
Сла́ва, глас 5.
Подо́бен: Ра́дуйся:
Уподо́бился еси́, Павли́не священному́чениче,/ преподо́бным и богоно́сным отце́м:/ Серафи́му в Диве́еве ди́вному/ и Феодо́сию в Ки́еве достохва́льному,/ от ю́ности бо твоея́ и́го благо́е на ра́мена взем,/ любо́вию Христо́вою распали́лся еси́/ и, я́ко звезда́, на тве́рди церко́вней во дни гоне́ния безбо́жнаго просия́л еси́,/ ве́рныя на путь спасе́ния наста́вляя/ и во благоче́стии утвержда́я./ Последи́ же, от беззако́нник прии́м непра́ведное убие́ние,/ себе́ сама́го в же́ртву живу́ю прине́сл еси́./ Ны́не же предстоя́ престо́лу Царя́ Небе́снаго,// моли́ спасти́ся душа́м наши́м.
И ны́не, Богоро́дичен, глас то́йже:
Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т// и очище́ние мно́гих прегреше́ний, мо́лимся.
На стихо́вне стихи́ры, глас 6.
Подо́бен: Тридне́вен:
О́браз Христо́ва милосе́рдия па́стве твое́й яви́л еси́,/ Павли́не досточу́дне,/ си́рых и вдови́ц быв засту́пник,/ ны́не же во све́тлостех святы́х и нас помяни́,// чту́щих с любо́вию па́мять твою́.
Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.
О́браз злострада́ния и терпе́ния показа́л еси́,/ Павли́не терпеливоду́шне,/ и, я́ко тве́рдый свиде́тель и́стины,/ поруга́ния, изгна́ния и ну́ждную смерть претерпе́л еси́.// Моли́ о душа́х на́ших.
Стих: Честна́ пред Го́сподем// смерть преподо́бных Его́.
О́бразом Креста́ Животворя́щаго/ се́рдце твое́ утверди́в,/ богому́дре Павли́не,/ к страда́нием му́жески вда́лся еси́,/ те́мже дерзнове́ние улучи́в ко Го́споду,// моли́ спасти́ся душа́м на́шим.
Сла́ва, глас и подо́бен то́йже:
О́браз был еси́ твоему́ ста́ду,/ священному́чениче Павли́не,/ сло́вом, житие́м, любо́вию, ду́хом, ве́рою, чистото́ю,/ сего́ ра́ди и́мя до́браго па́стыря стяжа́в,/ Христа́ Пастыренача́льника моли́ о нас,// па́мять твою́ ве́рно соверша́ющих.
И ны́не, Богоро́дичен, глас и подо́бен то́йже:
О́браз Твой святы́й почита́ем,/ Богоро́дице Де́во Пречи́стая,/ и Боже́ственному Младе́нцу,/ во объя́тиих Твои́х су́щу, покланя́емся,// моля́ще о спасе́нии душ на́ших.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 6.
Подо́бен: Все отло́жше:
И́же хо́щет по Мне ити́, глаго́лет Христо́с,/ да во́змет крест и Мне да после́дствует,/ ты же, священному́чениче Павли́не,/ от ю́ности и́го благо́е на ра́мена взем,/ ми́ра отве́рглся еси́,/ те́мже, по достоя́нию святи́тельства са́ном почте́н быв,/ Це́ркви Ру́сской во времена́ гоне́ния безбо́жнаго послужи́л еси́/ и венце́м муче́ния украси́лся еси́.// Сего́ ра́ди тя прославля́ем.
Твои́х доброде́телей, о́тче Павли́не,/ па́мять ны́не ве́рных сердца́ весели́т,/ ты бо, в безме́рнем смире́нии нището́ю обогати́вся,/ мно́гими по́двиги просия́л еси́/ и, Христа́ всем се́рдцем возлюби́в,/ и́стинный па́стырь Бо́га Вы́шняго яви́лся еси́,/ те́мже святи́тельства оде́ждею по достоя́нию укра́шен,/ кро́вию му́чения сию́ обагри́л еси́.// Моли́ о душа́х на́ших.
Егда́ боже́ственное раче́ние на́йде на тя, богому́дре,/ тогда́ плотско́е мудрова́ние ду́ху покори́л еси́/ и, во оби́тель Саро́вскую всели́вся,/ мно́гия труды́ поне́сл еси́,/ дара́ми же духо́вными украси́вся,/ я́ко свети́льник пресве́тлый на све́щнице церко́внем поста́влен был еси́/ и, во святи́тельстве досточе́стно пожи́в,/ муче́нием путь сконча́л еси́.// Моли́ спасти́ся душа́м на́шим.
Лю́ты ско́рби, но сла́док рай,/ боле́зненны труды́, но блаже́нно восприя́тие,/ си́це глаго́лал еси́, терпеливоду́шне Павли́не,/ егда́ от ме́ста на место́ от беззако́нных гони́мь быва́ше/ и па́ствы твоея́ разлуча́шеся,/ те́мже и, в хла́дней земли́ Сиби́рстей путь твой сконча́в,/ убие́ние от непра́ведных прия́л еси́,/ оба́че теплоту́ блаже́нства ве́чнаго обре́л еси́.// Моли́ и нам черто́га Христо́ва сподо́битися.
Сла́ва, глас 8:
Ра́дуйся, пу́стынь Саро́вская благознамени́тая,/ ра́дуйтеся, преде́лы Костромсти́и и Яросла́встии,/ ра́дуйся, Москво́ первопресто́льная и честна́я оби́тель Новоспа́сская,/ я́ко воспита́ли есте́ граждани́на Ца́рства Небе́снаго,/ но́ваго священному́ченика, блаже́ннаго Павли́на,/ му́жа избра́нна и соверше́нна,/ и́же, любо́вию, прему́дростию и благоче́стием просия́в,/ по́двиги свои́ми Це́рковь Ру́сскую украси́л есть./ Те́мже, ве́рнии, с любо́вию тому́ возопии́м:/ о́тче всеблаже́нне, моли́ся о нас,// всечестну́ю твою́ па́мять соверша́ющих.
И ны́не, Богоро́дичен, глас то́йже: Царь Небе́сный:
Вход. Проки́мен дне. И чте́ния.
Дея́ний святы́х апо́стол чте́ние (глава́ 4):
Во дни о́ны, глаго́лющим апо́столом к лю́дем,/ наидо́ша на ни́х свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки, и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пя́ть./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам.
Дея́ний святы́х апо́стол чте́ние (глава́ 4):
Во дни о́ны, ви́дяще иуде́и Петро́во дерзнове́ние и Иоа́нново и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га?/ Суди́те: не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я́,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния.
Дея́ний святы́х апо́стол чте́ние (глава́ 4):
Во дни о́ны, отпуще́на бы́вша апо́стола приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же усты́ Дави́да, о́трока Твоего́, рече́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.
На лити́и стихи́ра хра́ма, и свята́го, глас 2.
Подо́бен: Ки́ими похва́льными венцы́:
Ки́ими похва́льными венцы́/ увязе́м Павли́на священному́ченика,/ мона́хов похвалу́,/ святи́телей добро́ту,/ ве́ры столпа́ непреобори́маго,/ от ю́ности прему́дрость возлюби́вшаго/ и во благоче́стии неле́ностно потруди́вшагося?/ Сего́ бо вои́стину досто́йно/ безсме́ртныя сла́вы венце́м/ венча́ет Христо́с Бог наш,// име́яй ве́лию мило́сть.
Ки́ими духо́вными пе́сньми/ ублажи́м достосла́внаго Павли́на,/ страда́льца тверде́йшаго,/ Правосла́вия побо́рника,/ в после́дняя ле́та нам дарова́ннаго,/ благоче́стия учи́теля,/ покая́ния пропове́дника,/ на путь спасе́ния наставля́ющаго?/ Его́же моли́твами/ враго́в шата́ния, Христе́, низложи́,// име́яй ве́лию ми́лость.
Ки́ими пе́сненными добро́тами/ воспое́м Христо́ва уго́дника,/ сиро́т пита́теля,/ ю́ных наста́вника,/ в милосе́рдии Небе́сному Отцу́ подража́вшаго,/ кла́дязь любве́ неисчерпа́емый,/ ми́лостыни реку́ незави́стну,/ Це́рковь Ру́сскую веселя́щую тече́ньми слове́с свои́х?/ Его́же моли́твами и предста́тельством/ спаси́ оте́чество на́ше, Христе́ Бо́же,// име́яй ве́лию ми́лость.
Сла́ва, глас 6:
Мно́ги ско́рби претерпе́л еси́,/ достоблаже́нне Павли́не священному́чениче,/ те́мже по достоя́нию вшел еси́ в Ца́рство Небе́сное,/ иде́же в ли́це новому́ченик Це́ркве Ру́сския,/ сла́вою го́рнею озаря́емь,/ по́честь побе́ды твоего́ страда́ния прие́млеши.// Моли́ спасти́ся душа́м на́шим.
И ны́не, Богоро́дичен, глас тойже: Богоро́дице, Ты еси́ Лоза́ и́стинная:
На стихо́вне стихи́ры, глас 2.
Подо́бен: Егда́ от Дре́ва:
Святи́тельства престо́л украша́я доброде́тельми,/ во времена́ лю́тая в земли́ на́шей,/ богохрани́мому гра́ду Ку́рску посыла́ешися/ я́ко ми́рный а́нгел, Павли́не всече́стне,/ е́же кро́тостию и любо́вию лю́дем послужи́ти,/ ча́да церко́вная сло́вом Бо́жиим наста́вити/ и еле́ем милосе́рдия духо́вныя я́звы их исцели́ти.// Уврачу́й и на́ша стру́пы грехо́вныя, цели́телю изря́дный.
Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.
Щито́м ве́ры, Павли́не многострада́льне,/ разли́чная ухищре́ния богобо́рцев отрази́л еси́/ и, темни́чныя у́зы претерпе́в,/ Пе́рмския земли́ архипа́стырь наре́клся еси́,/ насле́дник священнострада́льца Андрони́ка быв./ Те́мже па́ству расточе́нную/ ти́хим гла́сом любве́ собра́в,/ по достоя́нию нарече́ние до́браго па́стыря прие́млеши,/ и нас во еди́но ста́до Христо́во собери́,// моли́твами твои́ми, священному́чениче пресла́вне.
Стих: Честна́ пред Го́сподем// смерть преподо́бных Его́.
Спасе́ния души́ взыску́я,/ восле́д Христу́ смире́нно после́довал еси́,/ И́же и поста́ви тя архипа́стыря гра́да Калу́ги,/ священному́чениче Павли́не пресла́вне,/ моли́твы чи́стое зерца́ло,/ ми́лостыни усе́рдный пода́телю/ и пе́ний церко́вных изря́дный люби́телю!/ Ты же, Боже́ственныя Та́йны всеблагогове́йне соверша́я,/ ве́рныя лю́ди со Христо́м соединя́л еси́/ и заблу́ждшия на путь и́стинный наставля́л еси́./ Те́мже лико́м Небе́сным совокупи́вся,// моли́ спасти́ся душа́м на́шим.
Сла́ва, глас 8:
Нището́ю духо́вною обога́тився,/ себе́ сама́го Бо́гу соверше́нно пре́дал еси́,/ доброхва́льне святи́телю Павли́не,/ и, я́ко звезда́ пресве́тлая,/ от восто́ка земли́ на́шея к за́паду дости́гл еси́./ Оба́че, на престо́ле Могиле́встем доброде́тельми просия́в,/ па́ки сове́том безбо́жных на восто́к гони́мь быва́ше,/ иде́же в преде́лех Сиби́рских луче́й твои́х сия́ние за́йде./ Освяти́ и на́ша ду́ши// све́том страда́ний твои́х, достосла́вне.
И ны́не, Богоро́дичен, глас то́йже: Безневе́стная Де́во:
Тропа́рь, глас 4:
От ю́ности жела́ние к Бо́гу возложи́в,/ на па́житех мона́шеских упа́слся еси́/ и, мно́гия доброде́тели стяжа́в,/ архипа́стырь слове́сных ове́ц яви́лся еси́,/ и́хже до́бре упа́с,/ мно́гия ско́рби от богобо́рцев претерпе́л еси́/ и, муче́нием путь сконча́в,/ Ца́рствие Небе́сное насле́довал еси́,/ священному́чениче Павли́не,/ моли́ Христа́ Бо́га// спасти́ся душа́м на́шим.
Ин тропа́рь, глас 2:
Ве́ры правосла́вныя непоро́чный блюсти́телю/ и за́поведей Христо́вых усе́рдный исполни́телю,/ священному́чениче Павли́не,/ па́ству твою́ до́бре упа́сл еси́,/ и в хла́дней Сиби́ри му́ченическую смерть прия́л еси́./ Ны́не же в ве́чней сла́ве пребыва́я,// моли́ спасти́ся душа́м на́шим.
НА У́ТРЕНИ
На Бог Госпо́дь: тропа́рь священному́ченика, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 7:
Гоне́ния лю́тая претерпева́я, си́це безбо́жным глаго́лал еси́, священному́чениче Павли́не: путь наш кре́стный есть, оба́че стра́ха ва́шего и са́мыя сме́рти не убои́мся, я́ко Кресто́м упова́ем дости́гнути Небе́снаго Ца́рствия, его́же обеща́ Христо́с всем лю́бящим Его́. Два́жды.
Сла́ва, и ны́не, Богоро́дичен, глас то́йже:
Ны́не ли́цы новому́ченик со А́нгелы славосло́вят Тя, Влады́чице, све́тлостей со́лнечных превы́шшую, похвалу́ всея́ вселе́нныя, Сло́во Бо́жие во чре́ве прии́мшую и ра́дость ми́ру роди́вшую. С ни́миже и мы вопие́м: ра́дуйся, спасе́ния на́шего Хода́таице.
По 2-м стихосло́вии седа́лен, глас 5:
Изгна́ния, узи́лища и безве́стную кончи́ну прови́дев, блаже́нне Павли́не, ко Подвигополо́жнику Христу́ со упова́нием кре́пким взыва́л еси́, да в терпе́нии путь твой испра́вит, сове́ты нечести́вых разори́т, Це́рковь же святу́ю во благоче́стии сохрани́т. Те́мже моли́ спасти́ся душа́м на́шим. Два́жды.
Сла́ва, и ны́не, Богоро́дичен, глас то́йже:
Милосе́рдия твоего́ пучи́ну кто испове́сть, Де́во Пренепоро́чная, Засту́пнице на́ша и упова́ние, непосты́дная наде́ждо христиа́н, скорбя́щих Ра́досте и всех су́щих на земли́ пресве́тлая добрόто? Покры́й нас боже́ственным предста́тельством Твои́м, Пречи́стая Богоро́дице Влады́чице.
Велича́ние:
Велича́ем тя,/ священному́чениче Павли́не,/ и чтим честна́я страда́ния твоя́,/ я́же за Христа́// претерпе́л еси́.
И́но велича́ние:
Велича́ем тя,/ священному́чениче Павли́не,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.
Псало́м избра́нный:
Бог нам прибе́жище и сила́.
Го́споди, воздви́гни си́лу Твою́, и прииди́ во е́же спасти́ ны.
Глаго́лах о свиде́ниих Твои́х пред цари́ и не стыдя́хся.
Вси язы́цы обыдо́ша мя, и и́менем Госпо́дним противля́хся им.
Тебе́ ра́ди умерщвля́емся весь день, вмени́хомся я́ко о́вцы заколе́ния.
Кре́пость моя́ и пе́ние мое́ Госпо́дь, и бысть мне во спасе́ние.
По полиеле́и седа́лен, глас 8:
Егда́ богобо́рцы, я́ко во́лцы лю́тии, на Це́рковь Христо́ву в Ру́сстей земли́ воста́ша, тогда́, священному́чениче Павли́не, я́ко па́стырь до́брый, ду́шу твою́ за о́вцы слове́сныя положи́л еси́. И ны́не моли́ Христа́ Пастыренача́льника, да спасе́т ста́до Свое́ от волко́в, губя́щих е́. Два́жды.
Сла́ва, и ны́не, Богоро́дичен, глас то́йже:
Безневе́стная Ма́ти, Пречи́стая Госпоже́, Де́во Богоро́дице! Моли́ся Сы́ну Твоему́ и Бо́гу на́шему, да не отврати́т от нас ли́ка Своего́, но да просвети́т сердца́ на́ша, омраче́нная страстьми́, и поми́лует нас по вели́цей Свое́й ми́лости.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зача́ло 67.
По 50-м псалме́ стихи́ра, глас 6:
Прииди́те, мучениколю́бцы,/ днесь духо́вне возвесели́мся,/ па́мять соверша́юще сла́внаго Павли́на,/ но́ваго священнострада́льца,/ сей бо, зе́млю Ру́сскую доброде́тельми просвети́в,/ я́ко благово́нное приноше́ние Го́сподеви возложи́лся есть:/ ве́ру Христо́ву пред нечести́выми власти́тели испове́да/ и ду́шу свою́ за па́ству положи́,/ ны́не же престо́лу Святы́я Тро́ицы предстои́т// и мо́лится о душа́х на́ших.
Кано́н Пресвяты́я Богоро́дицы со ирмосо́м на 6, и священому́ченика на 8, глас 3.
Песнь 1
Ирмо́с: Фарао́ни колесни́цы глубино́ю покры́в, Го́споди,/ мо́ре разве́ргл еси́,/ и спасл еси́ пе́сньми пою́щия Тя,// лю́ди изра́ильтеския.
Сло́ва служи́теля и свиде́теля, Павли́на сла́внаго, жити́я кра́сная исправле́ния и честна́я страда́ния пода́ждь ми, Сло́ве, в пе́снех досто́йно восхвали́ти.
Твои́ми моли́твами, священному́чениче, напра́ви ум мой, мно́гими по́мыслы расточе́нный, да просла́влю тя, мно́гими скорбьми́ во Ца́рствие Небе́сное вше́дша.
Роди́телей благоче́стивых до́брый и избра́нный плод яви́вся, блаже́нне Павли́не, от ю́ности всем се́рдцем твои́м и помышле́нием Бо́га возлюби́л еси́.
Богоро́дичен: А́нгелов Влады́чице, пресве́тлая похвало́ и де́вственная сла́во! На Тя наде́ющеся, при́сно зове́м: ра́дуйся, Неве́сто Неневе́стная!
Песнь 3
Ирмо́с: Непло́дная душе́ и безча́дная,/ стяжи́ плод благосла́вный,/ веселя́щися возопи́й:/ утверди́хся Тобо́ю, Бо́же,/ несть свят, несть пра́веден// па́че Тебе́, Го́споди.
Жела́нием кра́йним влеко́мь, дом роди́тельский оста́вити потща́лся еси́, боголю́бче, сего́ ра́ди, о́трок сый, в дому́ Бо́жии водвори́лся еси́, при́сно поя́: несть свят, несть пра́веден па́че Тебе́, Го́споди.
А́нгел земны́й и Небе́сный челове́к яви́лся еси́, богому́дре, те́мже оби́тели Саро́вския дости́г, в служе́ние бра́тии сам себе́ пре́дал еси́, ра́дуяся и воспева́я: несть свят, несть пра́веден па́че Тебе́, Го́споди.
Лука́ваго ко́зни постиго́ша тя, до́бре послу́шниче, ты же, на гро́бе преподо́бнаго Серафи́ма сле́зы пролия́в, во смире́нии Бо́гу возопи́л еси́: несть свят, несть пра́веден па́че Тебе́, Го́споди.
Богоро́дичен: Честне́йшую Херуви́м и сла́внейшую су́щи Серафи́м, Де́ву Пречи́стую воспои́м и Ро́ждшемуся из Нея́ возопии́м: несть свят, несть пра́веден па́че Тебе́, Го́споди.
Седа́лен, глас 8:
Мно́гими доброде́тельми обогати́лся еси́, свя́те Павли́не: кро́тостию, смире́нием и любо́вию, нищелю́бием и долготерпе́нием, си́ми же да́нный тебе́ тала́нт стори́цею умножи́в, Боже́ственных Та́ин непоро́чный служи́тель яви́лся еси́, те́мже врата́ Небе́сная отверзо́шася тебе́, и в ра́дость вшел еси́ Го́спода Твоего́. Его́же моли́ и нас Ца́рствия Небе́снаго сподо́бити. Два́жды.
Сла́ва, и ны́не, Богоро́дичен, глас то́йже:
Во гла́сех пе́ний вопие́м Ти, Влады́чице А́нгелов: непреста́нно моли́ся о нас, стихи́ями ми́ра се́го одержи́мых и грехо́м порабо́тившихся; да воста́нем от паде́ния и в покая́нии к Сы́ну Твоему́ припаде́м, вопию́ще: помяни́ нас, Го́споди, во Ца́рствии Твое́м.
Песнь 4
Ирмо́с: Положи́л еси́ к нам тве́рдую любо́вь, Го́споди,/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:// сла́ва си́ле Твое́й, Го́споди.
Па́жити мона́шеския, я́ко пчела́ трудолю́бная, облете́л еси́, о́тче Павли́не, иде́же мед духо́вный собра́в, со́ты души́ твоея́ ра́зумом просвеще́нным, я́ко некта́ром, испо́лнил еси́, по́я: сла́ва си́ле Твое́й, Го́споди.
Влады́це Христу́ сам себе́ пре́дал еси́, Павли́не блаже́нне, и, да́нный ти тала́нт трудолю́бно умно́жив, во оби́телех Костромски́х и Яросла́вских до́бре пожи́л еси́, благода́рственно воспева́я: сла́ва си́ле Твое́й, Го́споди.
И́ноческаго жития́ ревни́телю, свя́те Павли́не! Ты, мал нарече́н быв, ве́рен Бо́гови пребы́л еси́, те́мже и над мно́гими поста́влен, во смире́нии вели́чие яви́л еси́, глаго́ля: сла́ва си́ле Твое́й, Го́споди.
Богоро́дичен: Еди́на Чи́стая и Пречи́стая Ма́ти Де́во! Моли́твы на́ша приими́ и Сы́на Твоего́ умоли́ пода́ти нам прегреше́ний проще́ние, непреста́нно вопию́щим: сла́ва си́ле Твое́й, Го́споди.
Песнь 5
Ирмо́с: К Тебе́ у́тренюю всех Творцу́,/ преиму́щему всяк ум ми́рови,/ зане́ свет повеле́ния Твоя́,// в ни́хже наста́ви мя.
Новоспа́сская оби́тель вельми́ тобо́ю хва́лится, Павли́не всече́стне, ты бо в той, я́ко свети́льник на све́щнице, посреде́ сто́льнаго гра́да доброде́тельми просия́л еси́.
Му́дростию украше́н, я́ко седи́ною, во мла́дости твое́й кро́ток и смире́н пребы́л еси́, достохва́льне Павли́не. Те́мже, богосло́вия уче́нию навы́к, Прему́дрости Ипоста́сней служи́тель изря́ден яви́лся еси́.
Че́стен и чист в житии́ твое́м был еси́, свя́те Павли́не, сего́ ра́ди, свяще́нства са́ном по достоя́нию украси́вся, па́стве моско́встей па́стырь до́брый яви́лся еси́ и наста́вник ю́ношам преизя́щен.
Богоро́дичен: Никто́же притека́яй к Тебе́ посра́млен от Тебе́, Де́во, исхо́дит, но про́сит заступле́ния, и благода́ть прие́млет незави́стно.
Песнь 6
Ирмо́с: Возведи́ от тли мя, Го́споди Бо́же мой,/ Ио́на вопия́ше,/ и аз вопию́ Ти:/ из глубины́ изба́ви мя, Спа́се, мно́гих мои́х зол,// и к Све́ту Твоему́, молю́ся, наста́ви.
Челове́че Бо́жий и служи́телю ве́рный, свя́те Павли́не! Ты, я́ко преподо́бен, незло́бив и безскве́рнен, во́лею Бо́жиею гра́ду Ку́рску архипа́стырь посыла́ешися, да упасе́ши о́вцы слове́сныя па́жити Христо́вы.
Вменя́я вся уме́ты бы́ти, да Христа́ приобря́щеши, наипа́че же па́ству твою́ усво́иши Христу́, трудолю́бен де́латель, о́тче Павли́не, яви́лся еси́, Боже́ственная соверша́я, и пропове́дуя, и моля́ся на всяк час Бо́гу.
Жажда́ти пра́вды Бо́жия не преста́л еси́, блаже́нне Павли́не, те́мже, а́ки еле́нь на исто́чники водны́я, во святы́я оби́тели гра́да Пути́вля прите́кл еси́, и́ноческаго жития́ и́стинный люби́телю.
Богоро́дичен: О Ма́ти Преблага́я, сла́вныя оби́тели Гли́нския похвало́! Моли́твами Твои́ми не преста́й покрыва́ти вся ве́рныя от вра́жия наве́та и озлобле́ния.
Конда́к, глас 3:
Апо́столов насле́дниче/ и святи́телей украше́ние,/ Павли́не досточу́дне,/ ны́не Це́рковь Ру́сская тя досто́йно воспева́ет,/ ты бо глаго́лы жи́зни ве́чныя небоя́зненно возвеща́л еси́/ и, Христа́ пред отсту́пники че́стне испове́дав,/ кро́вию твое́ю во Свята́я Святы́х вшел еси́.// Моли́ спасти́ся душа́м на́шим.
И́кос:
Многообра́зни по́двизи и приско́рбно житие́ твое́ бысть, священному́чениче: от ю́ности бо крест на ра́мена взем, Христу́ после́довал еси́, И́же, ви́дев твое́ благо́е изволе́ние, па́стыря слове́сным овца́м тя поста́ви. Егда́ же прии́де о́гненнаго испыта́ния час и во́лцы лю́тии ста́до Христо́во обступи́ша, ты, преще́ний мучи́телей не убоя́вся, я́ко па́стырь до́брый ду́шу за па́ству положи́л еси́. Сего́ ра́ди воспева́ем тя си́це: ра́дуйся, от ю́ности всего́ себе́ Го́сподеви всеце́ло возложи́вый; ра́дуйся, благослове́ние ма́тере твоея́ восприе́мый. Ра́дуйся, мона́шества ру́сскаго розго́ добропло́дная; ра́дуйся, послуша́ния цве́те неувяда́емый. Ра́дуйся, прему́дрости боже́ственныя стяжа́телю; ра́дуйся, просвеще́ния духо́внаго насади́телю. Ра́дуйся, ста́да Христо́ва па́стырю до́брый; ра́дуйся, архиере́ю всечестны́й. Ра́дуйся, Це́ркви Ру́сстей в гоне́ниих послужи́вый; ра́дуйся, за ве́ру Христо́ву да́же до кро́ве пострада́вый. Ра́дуйся, вдов и сиро́т пита́телю; ра́дуйся, благоче́стия ревни́телю. Ра́дуйся, Павли́не, па́стырю до́брый и му́чениче пресла́вный.
Песнь 7
Ирмо́с: Тебе́ во огни́ ороси́вшаго о́троки богосло́вившия,/ и в Де́ву нетле́нну все́льшагося,/ Бо́га Сло́ва пои́м,/ благоче́стно пою́ще:// благослове́н Бог оте́ц на́ших.
Преще́ний богобо́рцев не убоя́вся, непрекло́нен пребы́л еси́, о́тче Павли́не, те́мже во узи́лище непра́ведно влеко́мь и заключа́емь, се́рдцем умиле́нным вопия́л еси́: благослове́н Бог оте́ц на́ших.
Утверди́л еси́ но́зе твои́, терпеливоду́шне Павли́не, на ка́мени за́поведей Христо́вых, сего́ ра́ди не убоя́лся еси́, егда́ власти́телие нечести́вии ополчи́шася на тя, оба́че глаго́лал еси́: благослове́н Бог оте́ц на́ших.
Моли́твою, покая́нием и посто́м укрепля́емь, в темни́це а́ки в затво́ре пребы́л еси́, и сию́ духо́вную наста́вницу наре́кл еси́; крест же из хле́ба себе́ сотвори́в, со упова́нием на него́ взира́л еси́, вопия́: благослове́н Бог оте́ц на́ших.
Богоро́дичен: Де́ву Пренепоро́чную, всечестны́й Крест слеза́ми омочи́вшую, во страда́ниих твои́х за Христа́ призва́в, свя́те Павли́не, взыва́л еси́: благослове́нна Ты в жена́х, Всенепоро́чная Влады́чице.
Песнь 8
Ирмо́с: На престо́ле Херуви́мсте Носи́маго,/ свяще́нницы, по́йте,// лю́дие, превозноси́те во вся ве́ки.
Любве́ твоея́, я́же ко Христу́, ни скорбь, ни теснота́, ни гоне́ние, ни глад, ни са́мая смерть, свя́те Павли́не, угаси́ша. Сего́ ра́ди возглаша́л еси́: свяще́нницы, по́йте Го́сподеви, лю́дие, превозноси́те Его́ во вся ве́ки.
Испове́данием и́стинным, о́тче Павли́не, украси́л еси́ престо́л святи́тельский Пе́рмския земли́, иде́же безбо́жною руко́ю убие́н бысть пламенноре́вностный святи́тель Андрони́к, небоя́зненно глаго́лавый: свяще́нницы, по́йте Го́сподеви, лю́дие, превозноси́те Его́ во вся ве́ки.
Вся подаде́ тебе́ Дух Святы́й, Его́же де́йствие бога́тно во свяще́нней хирото́нии прия́л еси́, о́тче Павли́не, те́мже гра́ду Калу́зе я́ко ми́рный а́нгел в лю́тая времена́ яви́лся еси́, ве́рных воздвиза́я пе́ти: превозноси́те Го́спода во вся ве́ки.
Богоро́дичен: Вели́чия Твоя́, Де́во, кто испове́сть? Кий язы́к изочте́т мно́жество щедро́т Твои́х? Оба́че дерза́юще, во смире́нии глаго́лем: Богоро́дицу по́йте, и превозноси́те во вся ве́ки.
Песнь 9
Ирмо́с: Тя Неискусобра́чную Богоро́дицу/ в па́мяти святы́х велича́ем,// я́ко ро́ждшую Спасе́ние душ на́ших.
Па́влу апо́столу подо́бяся, кова́рствия беззако́ннующих претерпе́л еси́, свя́те Павли́не, и от Ура́льских гор да́же до Бе́лыя Руси́ проше́л еси́, иде́же нечести́вых сове́том па́ки во у́зы заключе́н бысть, за е́же зва́ти тебе́: Христе́, Ты еси́ спасе́ние душ на́ших.
Безве́стную свою́ кончи́ну прови́дел еси́, священному́чениче Павли́не, и гроб твой неве́домь досе́ле пребы́сть. Оба́че Бо́гу пути́ твоя́ и сконча́ние ве́доми, Ему́же Еди́ному от ю́ности твоея́ служи́л еси́, взыва́я: Христе́, Ты еси́ спасе́ние душ на́ших.
Стра́нен быв на земли́, и в хла́дней земли́ Сиби́рстей путь сконча́в, Небе́снаго Оте́чества дости́гл еси́, блаже́нне Павли́не, иде́же ве́чную сла́ву восприи́м, при́сно глаго́леши: Христе́, Ты еси́ спасе́ние душ на́ших.
Богоро́дичен: Тьму разори́ страсте́й мои́х, Преблага́я Влады́чице, к Тебе́ бо, прибега́я, молю́ся и велича́ю, я́ко ро́ждшую Христа́, спасе́ние душ на́ших.
Свети́лен:
Егда́ над оте́чеством на́шим тьма огусте́ и о́блацы безбо́жия скры́ша Со́лнце пра́вды, ты, святи́телю Павли́не, лю́ди ру́сския небоя́зненно сло́вом и́стины просвеща́л еси́ и, страда́ния подъе́м, Све́та невече́рняго дости́гл еси́. Низпосли́ лучи́ благода́ти твоея́ и нам, во тьме страсте́й седя́щим.
Сла́ва, и ны́не, Богоро́дичен:
Све́тлая и пресве́тлая Присноде́во Влады́чице! Осия́й нас све́том от светле́йшаго ли́ка Твоего́, да исцели́мся от неду́гов на́ших и страсте́й, и сла́вим Тя, я́ко всея́ тва́ри Превы́шшую.
На хвали́тех стихи́ры, глас 8.
Подо́бен: Что вас нарече́м:
Что тя нарече́м, Павли́не?/ А́нгела ли, зане́ от ю́ности избра́л еси́ чи́стое житие́?/ Христолю́бца ли, я́ко крест подъя́л еси́ на ра́мена своя́?/ Во́ина ли, я́ко на мир сей и диа́вола вооружи́лся еси́?/ Страда́льца ли, я́ко кровь за Христа́ излия́л еси́?/ Мно́гая твоя́ имена́ и бо́льшая дарова́ния.// Моли́ спасти́ся душа́м на́шим.
Что тя, Павли́не, возымену́ем?/ Отца́ ли преподо́бнаго, я́ко до́бре подвиза́лся еси́?/ Сокро́вище ли Ду́ха, я́ко стяжа́л еси́ Прему́дрость?/ Свети́льника ли, я́ко просвети́л еси́ лю́ди ру́сския?/ Свиде́теля ли и́стины, я́ко пред безбо́жными Христа́ испове́дал еси́?/ Ны́не с новому́ченики Це́ркве на́шея Престо́лу Бо́жию предстои́ши.// Моли́ спасти́ся душа́м на́шим.
Ка́ко тя, Павли́не, просла́вим?/ Па́стыря ли до́браго, я́ко положи́л еси́ ду́шу за о́вцы своя́?/ Апо́стола ли, я́ко благове́рию па́ству учи́л еси́?/ Служи́теля ли Та́ин Боже́ственных, я́ко да́нный тебе́ зало́г сохрани́л еси́?/ Испове́дника ли тве́рда, я́ко поноше́ния и изгна́ния подъя́л еси́?/ Сего́ ра́ди блаже́нство ве́чное восприе́млеши.// Мо́ли спасти́ся душа́м на́шим.
Ка́ко тя, Павли́не, воспое́м?/ Челове́ка ли Бо́жия, зане́ я́ко стра́нник пожи́л еси́?/ Нищелю́бца ли, я́ко вдов и сиро́т препита́л еси́?/ Благове́стника ли, я́ко Христа́ пропове́дал еси́?/ Миротво́рца ли, я́ко па́ству братолю́бию поуча́л еси́?/ Ны́не на Небесе́х в ли́це сыно́в Бо́жиих ра́дуешися.// Помина́й нас, ве́рою чту́щих всечестну́ю па́мять твою́.
Сла́ва, глас 2:
Егда́ в земли́ на́шей безу́мнии гони́телие,/ братоуби́йством и зло́бою ды́шуще,/ на Це́рковь Христо́ву воста́ша,/ ты, священному́чениче Павли́не,/ кро́ткими словесы́ па́ству увеща́л еси́,/ Бо́га всем се́рдцем возлюби́ти/ и бли́жним любо́вию послужи́ти,/ нечести́вых же сове́тов отбега́ти/ и вся́ко злым не прилепля́тися./ Те́мже во изгна́ние и узи́лища по́слан быв,/ страда́ния и ну́ждную смерть претерпе́л еси́,/ ны́не же Престо́лу Бо́жию предстоя́,// моли́ спасти́ся душа́м на́шим.
И ны́не, Богоро́дичен, глас то́йже:
Все упова́ние на́ше на Тя возлага́ем,/ Де́во Богороди́тельнице,/ с новому́ченики и испове́дники Це́ркве Ру́сския// моли́, во е́же спасти́ся нам.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 334. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Блаже́н муж боя́йся Го́спода, в за́поведех Его́ восхо́щет зело́. Ева́нгелие от Иоа́нна, зача́ло 36. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О священному́чениче Христо́в Павли́не! Услы́ши сле́зныя моли́твы и воздыха́ния наша, в сокруше́нии се́рдца и смире́нии ду́ха тебе́ приноси́мыя. Се бо беззако́нии омрачи́хомся, и сего́ ра́ди беда́ми, я́ко ту́чами, обложи́хомся. Ты же, я́ко си́льный, понеси́ не́мощи на́ша, не отлуча́йся от нас ду́хом, да не разлучи́мся и мы от любве́ Бо́жия, я́же при́сно в се́рдце твое́м живя́ше. При́зри ми́лостиво на лю́ди, предстоя́щия и моля́щияся пред свято́ю ико́ною твое́ю, и проше́ния коего́ждо, я́же ко спасе́нию, испо́лни. Ве́руем бо, я́ко ты, за Це́рковь Христо́ву во оте́честве на́шем пострада́вый, ве́лие дерзнове́ние и́маши ко Го́споду. Умоли́ бла́гость Его́, да укрепи́т ны в единомы́слии, наипа́че же в непоколеби́мом испове́дании Христа́ Иису́са, Сы́на Бо́жия, во пло́ти прише́дшаго, распя́тие и смерть претерпе́вшаго, погребе́ннаго и воскре́сшаго, ко Отцу́ возше́дшаго и па́ки гряду́щаго со сла́вою суди́ти живы́м и ме́ртвым. Мо́лим тя, свя́те: предста́тельствуй пред Бо́гом за ны и за вся правосла́вныя христиа́ны, да соблюде́т Госпо́дь зе́млю Ру́сскую в ми́ре и благоде́нствии, архипа́стырем и па́стырем пода́ст духо́вное трезве́ние и ре́вность о спасе́нии вруче́нныя им па́ствы, прави́телем суд и пра́вду, и всем нам братолю́бие и любо́вь. О ми́лостиве страда́льче! Испроси́ у Бо́га Ми́лостиваго боля́щим исцеле́ние, скорбя́щим утеше́ние, оби́димым заступле́ние, оби́дящим ми́рное устрое́ние. Да, твое́ю по́мощию спаса́еми, восхва́лим вси Подвигополо́жника Христа́, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и Всесвяты́м, Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
