Акафист преподобномученикам Александру Пересвету и Андрею Ослябе Радонежским

Ака́фист преподо́бным Алекса́ндру Пересве́ту
и Андре́ю Осля́бе Ра́донежским

Конда́к 1

Избра́ннии и пресла́внии уго́дницы Христо́вы,/ Се́ргия преподо́бнаго ве́рнии послу́шницы,/ вели́каго кня́зя Дими́трия Донска́го до́блии во́ини,/ изря́днии помо́щницы и моли́твенницы на́ши,/ преподо́бнии Алекса́ндре Пересве́те и Андре́е Осля́бе!/ Моли́твенно велича́юще просла́вльшаго вас Го́спода,/ воспева́ем вам похва́льная./ Вы же, иму́ще ве́лие дерзнове́ние ко Го́споду,/ от вся́ких нас бед и нападе́ний вра́жиих свободи́те, зову́щих:/ Ра́дуйтеся, преподо́бнии Алекса́ндре и Андре́е,// враго́в ви́димых и неви́димых побежда́ющии.

И́кос 1

А́нгелов Творе́ц и тва́ри всея́ Соде́тель яви́ вас Це́ркве Своея́ побо́рники, да просла́вите житие́м и по́двигом ва́шим пречу́дное и́мя Святы́я Тро́ицы, а́нгели бо вои́стину бы́сте на земли́. Мы же, зря́ще по́двиги ва́ша и́ноческия и ра́тныя, со благогове́нием и ра́достию глаго́лем вам сицева́я:

Ра́дуйтеся, Иису́са, Сы́на Бо́жия, до конца́ возлюби́вшии;

ра́дуйтеся, за и́мя Его́ с любо́вию ду́ши своя́ положи́вшии.

Ра́дуйтеся, от утро́бы ма́терни Бо́гом предызбра́ннии;

ра́дуйтеся, благоволе́нием Сы́на Бо́жия от ю́ности призва́ннии.

Ра́дуйтеся, пла́менную любо́вь ко Христу́ яви́вшии;

ра́дуйтеся, богоху́льная уста́ посрами́вшии.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 2

Ви́девше тле́нную суету́ ми́ра сего́ привре́меннаго, преподо́бнии Алекса́ндре и Андре́е, ра́тное де́ло и до́мы роди́телей свои́х оста́вили есте́, и во оби́тели Святы́я Тро́ицы от игу́мена Се́ргия вели́кую схи́му прия́ли есте́, от него́же неуста́нно научи́стеся пе́ти Бо́гу: Аллилу́ия.

И́кос 2

Разуме́вше непостоя́нство ми́ра сего́, богому́дрии Алекса́ндре и Андре́е, че́сти, бога́тства и во́инския сла́вы уклони́лися есте́, и во оби́тели Святы́я Тро́ицы тщали́вии послу́шницы бы́сте, сове́том и наставле́нием а́ввы Се́ргия внима́ющии. Мы же, взира́юще на труды́ ва́ша, зове́м си́це:

Ра́дуйтеся, кро́тцыи Иису́совы после́дователие;

ра́дуйтеся, смире́ннии Христо́вы подража́телие.

Ра́дуйтеся, наставле́ний свята́го а́ввы Се́ргия исполни́телие;

ра́дуйтеся, от преподо́бнаго схи́му вели́кую прия́вшии.

Ра́дуйтеся, во́ини Христо́вы непобеди́мии;

ра́дуйтеся, мече́м моли́твы непреста́нныя вооруже́ннии.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 3

Си́ла Вы́шняго укрепи́ вас на ра́тный по́двиг на по́ли Кулико́ве, блаже́ннии схимона́си во́ини Алекса́ндре и Андре́е, и сподвиго́сте во́ины правосла́вныя упова́ние на еди́наго Бо́га возлага́ти и без стра́ха проти́ву вой иноплеме́нных подвиза́тися, пою́ще Христу́: Аллилу́ия.

И́кос 3

Прие́мый вас благосе́рдно преподо́бный игу́мен Се́ргий к ли́ку и́ночествующих сопричте́, уста́ву мона́шескому наста́ви, и сам бысть вам оте́ц чадолюби́вый и ко спасе́нию вас, боголюби́вии, приведе́. Сего́ ра́ди с ра́достию зове́м вам сицева́я:

Ра́дуйтеся, я́ко му́жие жела́ний есте́ духо́вных, усмотре́ннии;

ра́дуйтеся, ко свято́му содру́жеству приведе́ннии.

Ра́дуйтеся, сожи́тельства с преподо́бными удосто́еннии;

ра́дуйтеся, Госпо́день яре́м и́ноческаго жития́ прие́мшии.

Ра́дуйтеся, в труды́ послуша́ния усе́рдне преда́вшиися;

ра́дуйтеся, воздержа́ния о́пытнии наста́вницы яви́вшиися.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 4

Бу́рю страсте́й и душевре́дных помысло́в утиши́вше моли́твенными слеза́ми, преподо́бнии Алекса́ндре и Андре́е, всем се́рдцем прилепи́стеся Бо́гови, при́сно пою́ще Ему́: Аллилу́ия.

И́кос 4

Слы́шасте о многотру́днем жи́тельстве во оби́тели преподо́бнаго игу́мена Се́ргия, и узре́вше то́е самоли́чне, не устраши́лися есте́ вся́кую скорбь и тесноту́ понести́, те́мже благода́ть терпе́ния вам дарова́ся. Сего́ ра́ди срета́ем вас приве́тствии си́ми:

Ра́дуйтеся, посто́м и бде́нием плоть свою́ умертви́вшии;

ра́дуйтеся, в тре́звеннем житии́ тве́рдо себе́ укрепи́вшии.

Ра́дуйтеся, и́ноков благочести́вых украше́ние;

ра́дуйтеся, враго́в нечести́вых посрамле́ние.

Ра́дуйтеся, плоть свою́ госпо́дству Ду́ха Свята́го покори́вшии;

ра́дуйтеся, иску́с долготерпе́ния безбе́дно проше́дшии.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 5

Боготе́чныя зве́зды, путь спасе́ния указу́ющия, яви́лися есте́, преподо́бнии отцы́ на́ши Алекса́ндре и Андре́е, в непреста́ннем благодаре́нии и славосло́вии Го́спода Бо́га пребыва́вшии и всех нас науча́ющии пе́ти Ему́: Аллилу́ия.

И́кос 5

Ви́дяще бра́тий, во оби́тели Се́ргиевой до́бре подвиза́ющихся, поревнова́сте им в по́двизе и́ночестем, преподо́бнии отцы́ на́ши Алекса́ндре и Андре́е. Те́мже иску́с мона́шеский в терпе́нии и послуша́нии, моли́твами преподо́бнаго Се́ргия, досто́йно проше́дше, слы́шите от всех сицева́я:

Ра́дуйтеся, мы́шцу свою́ утверди́вшии на труды́ послуша́ния и́ноческаго;

ра́дуйтеся, язы́к свой удержа́вшии от вся́каго сло́ва, Бо́гу неуго́днаго.

Ра́дуйтеся, но́зе свои́ ско́ры соде́лавшии к тече́нию на славосло́вие;

ра́дуйтеся, чре́во свое́ умертви́вшии проти́ву сластолю́бия.

Ра́дуйтеся, ве́рнии раби́, во́лю Го́спода Бо́га ве́девшии и испо́лнившии;

ра́дуйтеся, блаже́ннии раби́, прише́ствия Госпо́дня бде́нно ожида́вшии.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 6

Пропове́дует ми́ру житие́ ва́ше равноа́нгельное первопресто́льный и вели́кий град Москва́, иде́же во хра́ме Рождества́ Пресвяты́я Богоро́дицы почива́ют честны́я мо́щи ва́ша, преподо́бнии Алекса́ндре и Андре́е. Мощьми́ у́бо почива́ете на земли́, ду́хом же обрета́етеся на Небеси́, иде́же ра́дующеся пое́те Бо́гу Живо́му: Аллилу́ия.

И́кос 6

Возсия́ свет ра́дости в богоуго́дных душа́х ва́ших, егда́ при А́нгелех Бо́жиих предстоя́щих объя́тия О́тча вам отверзо́шася, вы же из рук духоно́снаго а́ввы Се́ргия схи́мы вели́кия получи́сте. Ви́дяще благочести́вое житие́ ва́ше о Го́споде Бо́зе, ублажа́ем вас си́це:

Ра́дуйтеся, богоглаго́ливым се́рдцем моли́твы приноси́вшии;

ра́дуйтеся, воздержа́нием чувств свои́х А́нгелов удиви́вшии.

Ра́дуйтеся, доброде́телей и́ноческих тве́рдии охрани́телие;

ра́дуйтеся, любве́ христиа́нския усе́рднии ревни́телие.

Ра́дуйтеся, бо́дрии во́ини Христо́вы, в броню́ ве́ры и любве́ оболче́ннии;

ра́дуйтеся, та́ин зри́телие, врага́ те́мнаго наве́ты благомо́щно отража́вшии.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 7

Хотя́ще ненасы́тимою любо́вию Сладча́йшему Иису́су порабо́тати, потща́лися есте́ го́рьким путе́м ску́дости и мироотрече́ния поити́. Мно́гия труды́ и боле́зни подъя́ли есте́, утонча́юще плоть свою́ посто́м и молча́нием, зе́млю же души́ своея́ утучня́юще пото́ками слез. Те́мже от дре́ва жи́зни вкуша́ете ны́не во Ца́рствии, ра́достно пою́ще песнь А́нгельскую: Аллилу́ия.

И́кос 7

Но́вии лю́дие Оте́чества на́шего призыва́ют вас в по́мощь, святи́и Алекса́ндре и Андре́е, да утвердите́ ве́ру во всех нас, я́коже дре́внии му́ченицы по всей вселе́нней свои́ми страда́нии догма́ты утверди́ша, да николи́же ко́зни инове́рныя не поколе́блют нас, ве́рно взыва́ющих вам:

Ра́дуйтеся, суету́ вре́менную премени́вшии на стяжа́ние ве́чное;

ра́дуйтеся, вме́сто земны́х благ возлюби́вшии Небе́сная.

Ра́дуйтеся, многоце́нный би́сер ве́ры яви́вшии;

ра́дуйтеся, да́нныя вам от Бо́га тала́нты преумно́жившии.

Ра́дуйтеся, лучи́ све́тлыя, избавля́ющия от лука́ваго прельще́ния;

ра́дуйтеся, столпи́ тве́рдии, и́миже красу́ется Це́рковь Правосла́вная.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 8

Стра́нницы есмы́ на земли́, и при́сно враг ны искуша́ет, я́ко да не дости́гнем Оте́чествия Небе́снаго. Но вы, святи́и схимона́си во́ини, преподо́бнии Алекса́ндре и Андре́е, сокруши́вшии того́ ухищре́ния, помози́те нам, сла́вное житие́ и кончи́ну ва́шу помина́ющим. Даде́ся бо вам благода́ть враги́ потребля́ти и де́монския ко́зни низлага́ти, и вы́ну бы́ти с призыва́ющими вас и Бо́гу пою́щими: Аллилу́ия.

И́кос 8

Все житие́ на́ше на земли́ печа́ли и ско́рби по́лно есть, искуше́ния же и паде́ния ужаса́ют ны, но вы, преподо́бнии Алекса́ндре и Андре́е, помози́те нам, да благода́рственне зове́м вам:

Ра́дуйтеся, тве́рдо в беда́х на Го́спода Бо́га упова́вшии;

ра́дуйтеся, враги́, тща́вшияся вас погуби́ти, безси́льны соде́лавшии.

Ра́дуйтеся, о́браз а́нгельский досто́йно восприя́вшии;

ра́дуйтеся, безобра́зных бесо́в прираже́ния, я́ко дым, разсе́явшии.

Ра́дуйтеся, Иерусали́ма Небе́снаго гра́ждане почте́ннии;

ра́дуйтеся, страны́ на́шея сла́во и украше́ние.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 9

Вся́кия беды́ и ско́рби, огня́, меча́ и наше́ствия иноплеме́нник изба́вите нас, преподо́бнии Алекса́ндре и Андре́е, ва́шими те́плыми к Бо́гу моли́твами, и испроси́те нам вся благопотре́бная, да сподо́бимся в ми́ре го́рняго Иерусали́ма дости́гнути и ку́пно с ва́ми Бо́гу воспева́ти: Аллилу́ия.

И́кос 9

Вети́и многовеща́ннии недоуме́ют досто́йно восхвали́ти вас, преподо́бнии Алекса́ндре и Андре́е: кто бо дово́лен разуме́ти вся боре́ния ва́ша с миродержи́тели тьмы ве́ка сего́? Или́ кто изочте́т труды́, боле́зни и во́инския по́двиги ва́ша? Оба́че мы, любо́вию ва́шею побежда́еми, благода́рно вам зове́м:

Ра́дуйтеся, адама́нта терпе́нием тверде́йшии;

ра́дуйтеся, би́сера чистото́ю честне́йшии.

Ра́дуйтеся, я́списа богове́дением светле́йшии;

ра́дуйтеся, халколива́на ре́вностию тепле́йшии.

Ра́дуйтеся, а́гнцев кро́тостию тиша́йшии;

ра́дуйтеся, сла́виев славосло́вием усе́рднейшии.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 10

Спасти́ся хотя́ще от разли́чных бед и напа́стей ми́ра сего́, вас те́плыя предста́тели и моли́твенники к Бо́гу предлага́ем, преподо́бнии Алекса́ндре и Андре́е. Не тще́тну сотвори́те на́шу наде́жду на моли́твы и засту́пничество ва́ше, но хода́тайством ва́шим изба́вите нас от искуше́ний и скорбе́й, да несмуще́нно от избы́тка серде́ц на́ших глаго́лем при́сно Бо́гу: Аллилу́ия.

И́кос 10

Сте́ну вас тве́рду и неуста́нныя моли́твенники стяжа́вши, оби́тель Святы́я Тро́ицы и все Оте́чество на́ше заступле́нием ва́шим досто́йно хва́лится. Те́мже и мы гре́шнии, к вам притека́юще, я́ко ча́да моли́м, заступи́те и сохрани́те нас моли́твами ва́шими, да взыва́ем вам ра́достно:

Ра́дуйтеся, дру́гу Бо́жию преподо́бному игу́мену Се́ргию единонра́внии;

ра́дуйтеся, гра́да Москвы́ украше́ния многоце́нная.

Ра́дуйтеся, в труде́х и воздержа́нии отце́м подража́тели ре́вностнейшии;

ра́дуйтеся, огражде́ние и прибе́жище усе́рдно Бо́гу рабо́тающих.

Ра́дуйтеся, к ли́ку друго́в Бо́жиих на Небеса́ пресели́вшиися;

ра́дуйтеся, наде́ждо и тишино́ в мо́ри жития́ сего́ пла́вающих.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 11

Пе́ние благодаре́ния принося́ще вам, преподо́бнии Алекса́ндре и Андре́е, про́сим вас мы недосто́йнии, уязви́те сердца́ на́ша к любви́ пресла́дцей и го́рней, да чи́стым се́рдцем и нескве́рными усты́ воспое́м Го́споду Бо́гу на́шему во Святе́й Тро́ице: Аллилу́ия.

И́кос 11

Светопода́тельныя свети́льники вас ве́мы, святи́и, Престо́лу Бо́жию предстоя́щия и мрак страсте́й на́ших луча́ми святы́х моли́тв разгоня́ющия. Озари́те у́бо с го́рних высо́т и на́ша сердца́, всеблаже́ннии, да досточе́стно вопие́м вам си́це:

Ра́дуйтеся, благода́ти Бо́жия досто́йная вмести́лища;

ра́дуйтеся, Ду́ха Свята́го чи́стая обита́лища.

Ра́дуйтеся, хра́ма, в не́мже мощьми́ почива́ете, храни́телие;

ра́дуйтеся, от нападе́ний вра́жиих приснобо́дрствующии оберега́телие.

Ра́дуйтеся, о благоде́нствии Оте́чества на́шего ко Го́споду моли́твенницы;

ра́дуйтеся, бра́тии ва́шей и во́ином правосла́вным спобо́рницы.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 12

Благода́ть зря́ще, да́нную вам от Го́спода Сил, мо́лим вас, святи́и Алекса́ндре и Андре́е, испроси́те у Него́ мир и спасе́ние гра́ду на́шему, сердца́м тишину́ и душа́м ве́лию ми́лость, да воспева́ем Бо́гу отце́в на́ших песнь побе́дную: Аллилу́ия.

И́кос 12

Пою́ще Ва́ше прославле́ние, ублажа́ем вас, преподо́бнии, я́ко многомо́щных моли́твенников о нас пред Го́сподем, уте́шителей и засту́пников, и с любо́вию и моли́твою возглаша́ем вам си́це:

Ра́дуйтеся, Це́ркве Правосла́вныя похвало́ и украше́ние;

ра́дуйтеся, Оте́чествию на́шему щит и огражде́ние.

Ра́дуйтеся, защи́тницы на́ши и покрови́тели пра́веднии;

ра́дуйтеся, вели́каго кня́зя Дими́трия сора́тницы ве́лии.

Ра́дуйтеся, си́лою Бо́жиею враго́в Христо́вых на по́ли Кулико́ве потреби́вшии;

ра́дуйтеся, живо́т свой за Оте́чество и ве́ру правосла́вную полага́вшии.

Ра́дуйтеся, преподо́бнии Алекса́ндре и Андре́е, враго́в ви́димых и неви́димых побежда́ющии.

Конда́к 13

О всехва́льнии и блаже́ннии преподо́бнии Алекса́ндре и Андре́е, приими́те на́ше сие́ хвале́бное пе́ние и изба́вите нас от вся́каго зла и вра́жия нападе́ния ва́шими те́плыми к Бо́гу моли́твами, да с ва́ми воспева́ем Ему́: Аллилу́ия.

Сей конда́к глаго́лется три́жды.
И па́ки чте́тся и́кос 1-й, и конда́к 1-й.

Моли́тва

О пресла́внии и всехва́льнии уго́дницы Бо́жии, преподо́бнии Алекса́ндре Пересве́те и Андре́е Осля́бе, боголюби́вая дво́ице! Ны́не соверша́юще свяще́нную и всепра́зднственную па́мять ва́шу, велича́ем возвели́чившаго вас Христа́ Бо́га на́шего, Ему́же ве́рою и любо́вию, бде́нием и поще́нием, во́инскими по́двиги и всем житие́м ва́шим до́бре послужи́сте, и угоди́сте Ему́, и сла́вно Его́ просла́висте. Це́рковь на́ша свя́тостию жития́ ва́шего зело́ украша́ется и укрепля́ется, ве́ра правосла́вная в во́инех утвержда́ется и все Оте́чество на́ше освяща́ется. Вы на по́ли Кулико́ве в по́двизе ра́тном ду́ши ва́ша за дру́ги своя́ полага́сте, сим за́поведь Христо́ву испо́лнисте, Бо́гу благоприя́тную же́ртву принесо́сте и от Него́ венцы́ нетле́нныя прия́сте. Припа́дающе к честно́му о́бразу [и свято́му гро́бу] ва́шему, мо́лим вас в ду́се сокруше́ния и смире́ния: вознеси́те своя́ усе́рдныя моли́твы ко Всеми́лостивому Спа́су на́шему, да пода́ст нам, чту́щим святу́ю па́мять ва́шу, вели́кия и бога́тыя ми́лости, Це́рковь Свою́ святу́ю да соблюде́т в це́лости от ересе́й и раско́лов, и в ве́рных ча́дех ея́ да укрепи́т дух пра́выя ве́ры и Боже́ственныя любве́, дух ве́дения и благоче́стия, во́ином же правосла́вным кре́пость и побе́ду на супоста́тов да пода́ст, да да́рует нам вся я́же в жи́зни вре́менней поле́зная и я́же к жи́зни ве́чней потре́бная. Огради́те нас святы́ми моли́твами от братоненавиде́ния и братоуби́йственныя войны́ и вся́каго искуше́ния вра́жия. О преподо́бнии Алекса́ндре и Андре́е, изба́вите страну́ на́шу от враг ви́димых и неви́димых, от огня́, меча́, наше́ствия иноплеме́нник и смертоно́сныя я́звы, от вся́ческих бед и напа́стей. Умоли́те, святи́и схимона́си во́ини, Го́спода на́шего дарова́ти и́ноком дух послуша́ния, целому́дрия и нестяжа́ния, и всем вся я́же ко спасе́нию благопотре́бная, да бу́дет Ему́ от всех земны́х и Небе́сных сла́ва, честь и поклоне́ние, со Безнача́льным Его́ Отце́м, со Пресвяты́м, и Благи́м, и Животворя́щим Его́ Ду́хом, ны́не и при́сно, и в безконе́чныя ве́ки. Ами́нь.