Служба преподобноисповеднику Рафаилу Оптинскому
Ме́сяца ию́ня в 6-й день
Преподо́бнаго Рафаи́ла О́птинскаго, испове́дника
НА ВЕЧЕ́РНИ
На Го́споди, воззва́х: стихи́ры, глас 4.
Подо́бен: Я́ко до́бля:
Звезду́ светоза́рную,/ испове́данием Христа́ блиста́ющуюся,/ луча́ми же благода́ти олядене́вшия грехо́м ду́ши согрева́ющую/ и безбо́жия мрак прогоня́ющую,/ неботе́чно зе́млю Ру́сскую проше́дшую/ и в темни́це неудержа́нную,/ в пе́снех вси досто́йно возвели́чим,/ преподо́бнаго Рафаи́ла,/ О́птинскаго ста́рчества кра́сную зарю́// и моли́твенника непреста́ннаго о душа́х на́ших.
Злоключе́ния претерпе́в му́жественне,/ о́тче блаже́нне Рафаи́ле,/ во страда́ниих непрекло́нен был еси́,/ ле́гкое нося́ бре́мя Ева́нгелия/ и повсю́ду се́я сло́во Бо́жие,/ ра́лом Креста́ зе́млю серде́чную возде́лал еси́/ и, се́мя ве́ры до́бре израсти́в,/ клас стори́чествующий Христу́ прине́сл еси́,/ и Правосла́вие утверди́л еси́// во спасе́ние душ на́ших.
В темни́це затворя́емь,/ и гла́дом изнуря́емь,/ и вся́чески злоумышле́нием врага́ притесня́емь был еси́,/ и́же тща́шеся отлучи́ти тя от любве́ Христо́вы;/ оба́че ду́шу ми́лующую име́я,/ всеоби́льныя благода́ти испо́лненную,/ ду́хом к Бо́гу пламене́л еси́/ и, Сы́ну Бо́жию в любви́ подража́я,/ клеветнико́в и оби́дчиков прости́л еси́,// Рафаи́ле преподо́бне.
Сла́ва, глас 8:
И́мя Христо́во пред враги́ беззако́нными до́бре испове́дав,/ и преще́ний му́ками и сме́ртию не убоя́вся,/ ве́рою я́ко адама́нт пребы́л еси́/ и, на изгна́ние во у́зах осужда́емь,/ ско́рби и беды́ благоду́шно претерпе́л еси́,/ песнь Златоу́стову во усте́х нося́:/ сла́ва Тебе́, Бо́же, за вся./ Те́мже ны́не на Небесе́х дерзнове́ние стяжа́в,/ моли́ся о нас, преподо́бне о́тче Рафаи́ле,/ е́же сохрани́тися от пре́лести зми́евы/ и благоуго́дными яви́тися пред лице́ Христо́во// во стра́шное Его́ прише́ствие.
И ны́не, Богоро́дичен, глас то́йже: Царь Небе́сный:
На стихо́вне стихи́ры, глас 2:
Рафаи́ле чу́дне,/ Бо́жия любве́ реко́,/ зе́млю Ру́сскую испове́данием Христа́ наводни́л еси́,/ и безбо́жия му́тныя пото́ки изсуши́л еси́,/ сла́дость воды́ живото́чныя ве́ры иска́пал еси́,/ ю́же от Исто́чника приснотеку́щаго поче́рпл еси́,// Христа́ Бо́га на́шего.
Стих: Испове́мся Тебе́, Го́споди, всем се́рдцем мои́м,// пове́м вся чудеса́ Твоя́.
Рафаи́ле прему́дре,/ врага́ ро́да челове́ческаго посрами́л еси́/ и, во усте́х песнь благокра́снаго испове́дания нося́,/ во искуше́ниих непрекло́нен яви́лся еси́/ и безбо́жных свире́пость обличи́л еси́,/ кро́тостию же свое́ю наказу́я,/ Бо́жию Ева́нгелию покаря́тися призыва́л еси́,/ и́мже спаса́ется вся́кая тварь// и жизнь ра́йскую насле́дствует.
Стих: За словеса́ усте́н Твои́х// аз сохрани́х пути́ же́стоки.
Рафаи́ле пресве́тле,/ Ду́ха све́тлостию облиста́емь,/ темни́чная заключе́ния до́блественне претерпе́л еси́,/ охладе́вшая сердца́ любо́вию согре́л еси́,/ и в ве́ре малоду́шныя утверди́л еси́,/ всера́достную же благове́стия песнь обнося́,// нощь безбо́жия разсе́ял еси́.
Сла́ва, глас 5:
Сто́лпе церко́вный,/ его́же не поколеба́ бу́ря безбо́жия,/ пра́вило испове́дания,/ и́мже христоно́сец вои́стину яви́ся,/ ста́рцев О́птинских избрáнное ча́до/ и новому́чеников Це́ркве на́шея благово́нный цве́те,/ Рафаи́ле преподо́бне,/ моли́ Изба́вителя всех Иису́са/ зе́млю Ру́сскую изба́вити от обстоя́ний лю́тых// и спасти́ ду́ши на́ша.
И ны́не, Богоро́дичен, глас то́йже: Храм и дверь еси́:
Тропа́рь, глас 4:
Я́ко столп светоза́рный благоче́стия,/ тьму попра́л еси́ безбо́жия и нече́стия/ и, ве́ру правосла́вную нело́жно сохрани́в,/ благосла́вный испове́дник Христа́ яви́лся еси́,/ любве́ же оте́ческия испо́лнен быв,/ венéчник О́птинскаго ста́рчества показа́лся еси́,/ о́тче преподо́бне Рафаи́ле,/ моли́ Христа́ Бо́га,// спасти́ и просвети́ти ду́ши на́ша.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Се́мя ева́нгельское душе́ю восприи́м, преподобноиспове́дниче Рафаи́ле, поще́ние я́ко цвет, и страда́льчество я́ко плод во изгна́ниях прине́сл еси́, и благоуха́ние Христо́во был еси́, те́мже ны́не в вертогра́де Небе́снем со святы́ми сро́дники на́шими ликовству́я, моли́ спасти́ся душа́м на́шим.
Сла́ва, и ны́не, Богоро́дичен:
Еди́на ро́ждшая Творца́ всех, еди́на украси́вшая челове́чество рождество́м Твои́м, Пречи́стая, изба́ви нас сете́й льсти́ваго велиа́ра и наста́ви на стезю́ за́поведей Христо́вых, моля́щи приле́жно спасти́ся душа́м на́шим.
По 2-м стихосло́вии седа́лен, глас 7:
Кто досто́йную похвалу́ принесе́т подвиго́м твои́м, преподо́бне страда́льче Рафаи́ле? Ты бо, ева́нгельски неключи́маго раба́ себе́ почита́я, воздержа́нием и терпе́нием скорбе́й ве́ру правосла́вную в гоне́ниих сохрани́л еси́, и любо́вию ко враго́м Христа́ возвели́чил еси́, Подвигополо́жника новому́ченик на́ших.
Сла́ва, и ны́не, Богоро́дичен:
Стена́ и покро́в еси́, Влады́чице, и приста́нище небу́рное всем, в беда́х су́щим и к Твоему́ заступле́нию с ве́рою притека́ющим, те́мже и мы усе́рдно вопие́м Ти: соблюди́ в Правосла́вии и единомы́слии зе́млю Ру́сскую, Де́во Пречи́стая.
Велича́ние преподо́бническое.
По полиеле́и седа́лен, глас 8:
Па́стырь до́брый ста́ду твоему́ был еси́, о́тче, и свире́лию слове́с твои́х о́вцы Христо́вы упа́сл еси́, доблему́др же боре́ц о пра́вде Христо́вой быв, лесть безбо́жную душегуби́тельных волко́в отгна́л еси́, и о́браз ева́нгельския любве́ ве́рным пода́л еси́, богоно́се и преблаже́нне Рафаи́ле. Моли́ Христа́ Бо́га, грехо́в оставле́ние дарова́ти чту́щим любо́вию святу́ю па́мять твою́.
Сла́ва, и ны́не, Богоро́дичен:
Недви́жимое утвержде́ние ве́ры и спасе́ние душ на́ших, Богоро́дицу пе́сньми велича́им, ве́рнии: ра́дуйся, Правосла́вия огражде́ние, ра́дуйся, земли́ Ру́сския покро́ве, ра́дуйся, Неве́сто Неневе́стная.
По 50-м псалме́ стихи́ра, глас 6:
Я́ко тве́рдаго страда́льца/ и ве́рнаго Христо́ва служи́теля,/ ста́рцев О́птинских досто́йнаго ученика́/ и Це́ркве Ру́сския кра́сное украше́ние,/ восхва́лим днесь Рафаи́ла терпеливоду́шнаго,/ и́же, гоне́ния и темни́чная заключе́ния до́блественне претерпе́в,/ за зло сугу́бою любо́вию воздава́ше/ и, ве́рным восхо́д к Небеси́ указа́в,/ днесь Престо́лу Бо́жию предстои́т// и прославля́ет Святу́ю Тро́ицу.
Кано́н преподобноиспове́дника, глас 8, его́же краегране́сие: Рафаи́ла почестви́ти сла́достно устна́м.
Песнь 1
Ирмо́с: Внеза́пу дре́вле мо́ре Изра́иль,/ я́ко в пусты́ни, ного́ю пра́шною проше́д, вопия́ше:/ Го́сподеви Бо́гу на́шему, кре́пкому в бра́нех,// пои́м песнь но́вую.
Ре́вностию Ду́ха распали́вся, о́тче Рафаи́ле, житие́ де́ятельное я́ко основа́ние кре́пкое к восхожде́нию у́мному положи́л еси́, те́мже и нас на путь спаси́тельный напра́ви.
А́нгельския си́лы удиви́шася, богоно́се, небоше́ственному житию́ твоему́, ты бо страда́ния теле́сная я́ко безпло́тен претерпе́л еси́.
Филосо́фию и́стинную во Ева́нгелии обре́т, мудрецы́ ми́ра сего́ посрами́л еси́, глаго́ля: бу́и есте́ вси вы, и́же Христа́ отрица́етеся, даю́ща дождь земли́ и со́лнцу повелева́юща свети́ти.
Богоро́дичен: А́нгельскую сла́ву превозшла́ еси́, Богоро́дице, я́ко несказа́нно О́тчее Сло́во родила́ еси́ и Де́ва пребыла́ еси́, Пречи́стая.
Песнь 3
Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// еди́не Человеколю́бче.
И́стиннаго послуша́ния взыску́я, ста́рцем О́птинским преда́л еси́ себе́, блаже́нне Рафаи́ле, и, я́ко воск, растопи́вся тех любо́вию, о́браз благочестному́дрия в души́ запечатле́л еси́.
Любве́ Христо́вы благоуха́ние, я́ко сосу́д, ми́ром испо́лненный, всем источа́л еси́, о́тче преподо́бне, те́мже и злово́ние греха́ от мно́гих отгна́л еси́.
А́ще из оби́тели изгна́н был еси́ и в темни́це мра́чней затворе́н, о́тче блаже́нне, оба́че свобо́дь во Христе́ пребы́л еси́, ду́хом не разлучи́вся со ча́ды свои́ми.
Богоро́дичен: Пое́т Тя, Де́во, сла́дце Рафаи́л, в темни́це затворе́нный, я́ко превы́шшую го́рних Сил, Рождество́м Свои́м тьму а́дова ца́рства попра́вшую.
Седа́лен, глас 8.
Подо́бен: Прему́дрости:
Скорбьми́ обогати́вся, му́дре Рафаи́ле, на земли́ стра́нен яви́лся еси́, и в тесноте́ узи́лищной на простра́нне но́зе твои́ поста́вил еси́, те́мже и вопие́ши лю́бящим тя: потерпи́м Христа́ ра́ди, бра́тие, вся беды́ находя́щия и улучи́м ми́лость в День Су́дный.
Сла́ва, и ны́не, Богоро́дичен, глас то́йже:
Преве́чный Бог, от крове́й Твои́х, Чи́стая, плоть прие́м, те́плую Предста́тельницу Тя показа́ челове́ком, сего́ ра́ди вопие́м: изба́ви нас от сете́й лука́ваго врага́, вся́ких бед и лю́тых обстоя́ний.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.
Оби́тель О́птинская, я́ко твердь небе́сная звезда́ми, отцы́ преподо́бными укра́шенная, днесь в ли́це их тя, о́тче Рафаи́ле, велича́ет, я́ко наста́вником твои́м единосла́вна.
Честны́м житие́м твои́м, Рафаи́ле преблаже́нне, мона́шествующих утверди́л еси́, и страда́нии подъя́тыми ве́рным о́браз испове́дания Христа́ пода́л еси́.
Ева́нгельски на земли́ пожи́в, Небе́сныя ра́дости сподо́бился еси́, о́тче Рафаи́ле, ны́не же моли́твами твои́ми всем, лю́бящим тя, утеше́ние в ско́рбех и терпе́ние во искуше́ниих подае́ши.
Богоро́дичен: Си́лою Боже́ственною в гоне́ниих укрепля́емь, преподобноиспове́дник Рафаи́л по Бо́зе все упова́ние на Тя возложи́, Богоро́дице, я́ко честне́йшую Херуви́м и превы́шшую всея́ тва́ри велича́я.
Песнь 5
Ирмо́с: Вску́ю мя отри́нул ecи́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя, и к све́ту за́поведей Твои́х// пути́ моя́ напра́ви, молю́ся.
Тече́ние жития́ твоего́ небоя́зненно соверша́я, Рафаи́ле терпеливоду́шне, лю́дем о Христе́ свиде́тельствовал еси́, те́мже и сердца́ хла́дная ве́рою воспламени́л еси́, и сове́ты лука́выя враго́в ве́ры обличи́л еси́.
Ве́сну Христо́ву всю́ду пропове́дал еси́, о́тче блаже́нне, вертогра́д ра́йский иму́щ в души́ твое́й всажде́н, в не́мже цве́ты послуша́ния, моли́твы и смиренному́дрия процвето́ша, и любы́, я́ко исто́чник воды́ живы́я, напоя́ше вся.
Испусти́л еси́ слове́с твои́х реку́, сла́вне Рафаи́ле, и, безбо́жных я́рость погаси́в, сердца́ ве́рных вода́ми богове́дения напои́л еси́, жа́жду же сострада́льцев твои́х утоли́л еси́.
Богоро́дичен: Терпеливоду́шно пещь гоне́ний проше́л еси́, о́тче Рафаи́ле, росо́ю моли́тв непреста́нных ороша́емь, в ни́хже к Богоро́дице со умиле́нием взыва́л еси́: ра́дуйся, Благода́тная, Госпо́дь с Тобо́ю.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.
Иска́паша сла́дость уста́ твоя́ всем, в ско́рби су́щим, о́тче преподо́бне, оба́че го́речь неутоли́мая сло́во твое́ безбо́жным бысть. Сего́ ра́ди я́ко и́стинна Христо́ва свиде́теля тя велича́ем.
Слове́сный ра́тник Христо́в да похва́лится днесь, неумо́лчный в темни́цах пропове́дник, тьму потреби́вый безбо́жия и возвести́вый день Христо́в, Рафаи́л, испове́дник О́птинский.
Льсти́вых ловле́ньми не уловле́н был еси́, Рафаи́ле му́дре. Ниже́ бо ти́и, ниже́ и́на ка́я тварь, ниже́ гоне́ние, ниже́ хлад, ниже́ глад, ниже́ страх сме́ртный возмого́ша разлучи́ти тя от любве́ Христо́вы.
Богоро́дичен: А́ще и в темни́цу мра́чную затворе́н был еси́, богоблаже́нне Рафаи́ле, оба́че утеше́нием в нощны́х виде́ниих Ма́терь Све́та име́л еси́, Я́же николи́же тя оставля́ла есть, я́ко ве́рнаго Своего́ песнопе́вца.
Конда́к, глас 2.
Подо́бен: Вы́шних ища́:
Крест на ра́мо взем,/ путе́м многоско́рбным поте́кл еси́/ и, любо́вию враги́ побежда́я,/ Христо́в подо́бник яви́лся еси́/ и дерзнове́ние непосты́дное обре́л еси́,/ те́мже моли́ся о всех, любо́вию пою́щих тя,// я́ко да улуча́т ми́лость в День Су́дный.
И́кос:
Дре́во Кре́стное я́ко дре́во жи́зни обре́т, плоды́ его́ сла́достными и неоскудева́ющими в гоне́ниих и темни́цах напита́н был еси́, Рафаи́ле преподо́бне, те́мже и ны́не и́стее тех причаща́ешися в невече́рнем дни Ца́рствия Бо́жия, иде́же мо́лишися неуста́нно, во е́же Це́ркви Ру́сстей в чистоте́ и свя́тости Правосла́вие соблюсти́, и ве́рным лю́дем ея́ улучи́ти ми́лость в День Су́дный.
Песнь 7
Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:// благослове́н ecи́, Бо́же оте́ц на́ших.
До́бльственне страда́ния претерпева́я, во изгна́ниих Оте́чество Небе́сное обре́л еси́, христолю́бче, и, я́ко трубо́ю во́инскою, разсе́янныя во́ины Христо́вы сло́вом и́стины на брань духо́вную воздви́гл еси́.
О́птинский страда́лец в пе́снех да почти́тся днесь, Рафаи́л, Ни́кона сла́внаго сорабо́тник неле́ностный, и́хже му́жеству и страда́нию дивя́щеся, при́сно воспева́ем: благослове́н Бог оте́ц на́ших.
Ско́рбное житие́ возлюби́в, богому́дре Рафаи́ле, си́лою Ду́ха Свята́го си́лу безбо́жных низложи́л еси́, те́мже и вопия́л еси́ при́сно: сла́ва Промышля́ющему та́ко о мне, еди́ному Благослове́нному.
Богоро́дичен: Тебе́ у́треннюет в пе́снех, Богоро́дице Де́во, Рафаи́л многомоли́твенный, с ни́мже и мы Тебе́ взыва́ем: благослове́н Плод чре́ва Твоего́, Пречи́стая.
Песнь 8
Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:// благослови́те, вся дела́ Госпо́дня, Го́спода.
На брань ополчи́лся еси́, я́ко доблему́др во́ин Христо́в, и, в броню́ ве́ры оде́явся, сло́во Бо́жие я́ко меч духо́вный прия́л еси́, и змие́в лжеучени́я посе́кл еси́.
Обвеселя́ет па́мять Твоя́ и́ноческия полки́, в ве́ре же утвержда́ет все церко́вное собра́ние, я́ко любо́вь нело́жную ко враго́м яви́л еси́, и Го́спода по́двиги твои́ми просла́вил еси́.
Ужасо́шася врази́ ре́вности твое́й по Бо́зе, свя́те Рафаи́ле, оба́че о́гненная любы́ твоя́ хла́дная сердца́ растопи́, благоуха́нный же еле́й слове́с твои́х скорбя́щим утеше́ние и мир дарова́.
Богоро́дичен: Сы́на О́тчаго Пренепоро́чную Ма́терь в пе́снех единому́дренно, ве́рнии, восхва́лим, я́ко проро́ческую дверь, я́ко Ааро́нов прозя́бший жезл и несеко́мую го́ру Дании́лову, я́ко купину́ несгара́емую, вку́пе же и Дщерь Дави́дову.
Песнь 9
Ирмо́с: Та́ин ecи́, Богоро́дице, рай,/ невозде́ланно возрасти́вший Христа́,/ И́мже Кре́стное Живоно́сное на земли́ насади́ся Дре́во;/ тем, ны́не возноси́му,// покланя́ющеся Ему́, Тя велича́ем.
Терни́стый и у́зкий путь избра́в, Рафаи́ле богоблаже́нне, гоне́ния, уничиже́ния и заточе́ния Христа́ ра́ди претерпе́л еси́, и ра́дость неизглаго́ланную обре́л еси́, те́мже посети́ велича́ющия тя и в ско́рбех отра́ду пода́ждь.
На высоту́ по́двига испове́дническаго восте́кл еси́ и, дар сыноположе́ния во Оте́честве Небе́снем восприе́м, во оби́тель твою́ земну́ю мощьми́ возврати́лся еси́, и́мже покланя́ющеся, тя велича́ем.
А́ще страда́ния и ско́рби пред собо́ю зрел еси́, оба́че во изгна́ние, ра́дуяся, поте́кл еси́ и, я́ко Сын Челове́ческий на земли́, не име́л еси́ где главу́ подклони́ти. Ны́не же во оби́телех го́рних пребыва́еши.
Богоро́дичен: Му́ченичестии ли́цы Тя, Отрокови́це, хва́лят, го́рнии умы́ сла́достную песнь воспева́ют, Не́бо и земля́ веселя́тся, я́ко Богоро́дицу и Ма́терь Све́та Тя велича́юще.
Свети́лен:
Све́том Христо́вым просвеща́емь, вла́сти тьмы не убоя́лся еси́, и путе́м у́зким непреткнове́нно к Све́ту Невече́рнему возше́л еси́, Рафаи́ле богоблаже́нне.
Сла́ва, и ны́не, Богоро́дичен:
Отве́рзи, Богоро́дице, две́ри Небе́снаго Ца́рствия ве́рою испове́дающим Тя, я́ко еди́ну от ве́ка избра́нную Пречи́стую всех Бо́га Ма́терь.
На хвали́тех стихи́ры, глас 4.
Подо́бен: Дал еси́ зна́мение:
Дал еси́ зна́мение/ боя́щимся Тебе́, Го́споди,/ Рафаи́лово любому́дрие,/ и́же, враго́в свои́х до конца́ возлюби́в/ и сокро́вище благосты́ни в души́ показа́в,/ о́браз Твой ве́рным яви́,/ Иису́се Всеси́льне,// Спа́се душ на́ших. Два́жды.
Дал еси́ в назида́ние/ испове́днику Твоему́, Го́споди,/ любому́дрие ста́рцев О́птинских,/ е́же ду́шу за ча́да положи́ти науча́ет/ и за ве́ру до сме́рти стоя́ти помога́ет,/ в Небеса́ показу́ет моли́твенный восхо́д,/ к Тебе́, Иису́се Всеми́лостиве,// Спа́се душ на́ших.
Дал еси́ зна́мение,/ твое́, Рафаи́ле, к Бо́гу подража́ние/ и любве́ кре́стныя воспламене́ние,/ е́юже де́монскую зло́бу испепели́в,/ А́нгельских лико́в дости́гл еси́,/ дерзнове́нно испове́данием возгреме́в:/ сла́ва Бо́гу Всеси́льному,// Спа́су душ на́ших.
Сла́ва, глас 6:
Испове́дают Небеса́ чудеса́ Твоя́, Го́споди,/ я́ко ве́рнии раби́ Твои́,/ Кресто́м огражда́еми,/ стра́ха сме́ртнаго не убоя́шася/ и со дерзнове́нием испове́даша си́лы Твоя́./ С ни́миже Рафаи́л чу́дный,/ днесь на́ми прославля́емый,/ созыва́ет собо́р церко́вный/ и мона́шеская ликостоя́ния/ во ору́жия ве́ры оде́ятися,/ во е́же не да́ти на попра́ние враго́м Оте́чества на́шего,/ но утверди́ти в нем Правосла́вие// до сконча́ния ве́ка.
И ны́не, Богоро́дичен.
Славосло́вие вели́кое, и отпу́ст.
На Литурги́и слу́жба вся преподо́бническая.
