Служба святителю Иннокентию, епископу Пензенскому и Саратовскому
Ме́сяца октября́ в 10-й день
Святи́теля Инноке́нтия, епи́скопа Пе́нзенскаго и Сара́товскаго
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 1.
Подо́бен: Нача́ло ны́не поло́жим:
Ны́не вре́мя наста́, о празднолю́бцы,/ во псалме́х и пе́ниих просла́вити/ Бо́га, ди́внаго во святы́х Свои́х,/ воздви́гшаго нам днесь Инноке́нтия пресла́внаго,// моля́щагося те́пле о душа́х на́ших.
Пе́сненными добро́тами/ украша́ется днесь Це́рковь перворо́дных,/ воспева́ющи неви́нности тезоимени́таго,/ святи́теля Пе́нзенскаго и Сара́товскаго,/ я́ко преди́вна своего́ хода́тая// и моли́твенника о душа́х на́ших.
Тро́ицы Пребезнача́льныя служи́теля предо́бра/ и лжему́дрствований посрами́теля изря́дна/ па́мять ны́не нам наста́./ Те́мже у́бо стеце́мся, лю́дие,/ похвали́ти сего́ тща́щеся,/ я́ко вели́ка земли́ на́шея свети́льника// и моли́твенника о душа́х на́ших.
И́ны стихи́ры, глас 4:
Сия́ет, я́ко со́лнце, све́тлостию/ па́мять святи́теля Твоего́, Го́споди, Инноке́нтия,/ обличи́вшаго нече́стие златослове́сными глаго́лы,/ человекоуго́дие и высоковы́йных превозноше́ние посрами́вшаго,/ кро́тких зе́млю дости́гшаго,/ его́же моли́твами да́руй нам грехо́в очище́ние,// я́ко Благ и Человеколю́бец.
Врачу́еши стра́сти и ду́ши просвеща́еши ве́рных,/ притека́ющих ко святе́й ра́це моще́й твои́х,/ А́нгелов собесе́дниче, архиере́ев сопресто́льниче,/ апо́столов единонра́вне, испове́дников равностоя́телю,/ преподо́бных сожи́телю, благове́рия побо́рниче,// предста́телю наш, сла́вне Инноке́нтие.
Мно́гим воздержа́нием, святи́телю, жизнь твою́ украси́в,/ путь, веду́щий в жизнь ве́чную, указа́л еси́/ и ева́нгельским уче́нием ше́ствовал еси́,/ жесто́ким же житие́м плоть твою́ изнуря́я,/ го́рдаго зми́я воздержа́нием победи́л еси́./ Те́мже, на Небесе́х водворя́яся,/ Бо́гови предстои́ши, свя́те Инноке́нтие,/ Его́же моли́ согреше́ний оставле́ние дарова́ти// чту́щим любо́вию святу́ю па́мять твою́.
Сла́ва, глас то́йже:
Ра́дуйся и весели́ся о Го́споде/ богоизбра́нная па́ство святи́теля,/ ны́не пе́сньми венча́емаго,/ я́ко, такова́го свети́льника и отца́ себе́ иму́щи,/ духо́вная ча́да нареко́стеся,/ его́же просла́ви Бог зна́меньми и чудесы́ пресла́вными,/ оби́льно исцеле́ния приходя́щим к нему́ да́рующа./ Те́мже, припа́дающе, ему́ возопии́м:/ о всеблаже́нне Инноке́нтие, о́тче наш,/ непреста́нно моли́ Всесвяту́ю Тро́ицу,// да Небе́снаго Ца́рствия улучи́ти сподо́бимся.
И ны́не, Богоро́дичен: И́же Тебе́ ра́ди:
Вход. Проки́мен дне. И чте́ния три святи́тельская.
На лити́и стихи́ра, глас 4:
Су́етная мудрова́ния отло́жше, блаже́нне,/ Правосла́вия держа́тися неотсту́пно науча́л еси́/ и, стесне́ния ско́рбная претерпева́я,/ восприя́тие бу́дущия ра́дости прови́дел еси́,/ да многотру́дным житие́м и уче́ньми/ исто́чник приснотеку́щий небе́сныя сла́дости// нам, недосто́йным, пока́жеши.
Сла́ва, глас то́йже:
Вся у́бо моги́й о укрепля́ющем тя Христе́,/ боле́зни и не́мощи смире́нно претерпева́я,/ на Бо́га все упова́ние возложи́л еси́,/ мирска́го же пристра́стия гнуша́яся/ и су́щая ми́ра я́ко не су́щая вменя́я,/ чи́стым умо́м и немяте́жным се́рдцем вы́ну Бо́гу послужи́л еси́,/ те́мже, сосу́д Свята́го Ду́ха яви́вся,// моли́, святи́телю Инноке́нтие, поми́ловатися душа́м на́шим.
И ны́не, Богоро́дичен:
Несть душа́м на́шим осла́бы, ниже́ избавле́ния,/ то́кмо моли́твами Твои́ми, Ма́ти Де́во,/ и ми́лостию от Тебе́ Вопло́щшагося Спа́са Христа́,/ к Нему́же взыва́ем,/ на хода́тайство Твое́ наде́жду кре́пку иму́ще,/ да спасе́т и сохрани́т всех нас,// пе́сньми Тя, я́ко Богоро́дицу, велича́ющих.
На стихо́вне стихи́ры, глас 1:
О блаже́нне святи́телю Инноке́нтие,/ егда́ суему́дреннии воста́ша на Це́рковь Бо́жию,/ мече́м обоюдоо́стрым уче́ния и́стиннаго сих посе́кл еси́,/ ве́рныя же щито́м правове́рия огради́л еси́,/ сего́ ра́ди поноше́ния претерпе́л еси́,/ да земли́ Ру́сской яви́шися// но́вое и пресла́вное украше́ние.
Стих: Нога́ моя́ ста на правоте́,// в це́рквах благословлю́ Тя, Го́споди.
О пречу́дне о́тче Инноке́нтие,/ ны́не Це́рковь Ру́сская ублажа́ет тя,/ я́ко тве́рда испове́дника ве́ры,/ чуде́с оби́льных реку́ источа́ющаго,/ и святи́теля всече́стна,/ па́ству твою́ до́бре упа́сшаго,/ мы же, земноро́днии,/ я́ко ча́да ко отцу́, тебе́ вопие́м,// е́же поми́ловатися нам в Де́нь су́дный.
Стих: Суди́ ми, Го́споди,// я́ко аз незло́бою мое́ю ходи́х.
О сла́вне Инноке́нтие,/ егда́ ско́рбная нахожде́ния во смире́нии претерпе́л еси́,/ тогда́ глас Госпо́день пресла́дкий на тебе́ испо́лнися,/ я́ко изгна́ннии пра́вды ра́ди блаже́ни суть,/ сего́ ра́ди, венце́м нетле́нным украси́вся,/ дерзнове́ние ве́лие от Влады́ки прия́л еси́,// е́же моли́тися о душа́х на́ших.
Сла́ва, глас 8:
Земля́ ру́сская, духо́вно процве́тши,/ я́ко крин прекра́сный изно́сит днесь/ святи́теля пречу́дна Инноке́нтия,/ и́же моли́твами свои́ми облагоуха́вый ю́,/ яви́ся нам вели́кий засту́пник// и хода́тай о душа́х на́ших.
И ны́не, Богоро́дичен, глас то́йже: Безневе́стная Де́во:
Тропа́рь, глас 5:
От ю́ности смире́нным нарече́нный,/ во и́ночестве же чистоте́ тезоиме́нный,/ духо́вныя му́дрости люби́тель яви́лся еси́,/ златовеща́нный благоче́стия учи́телю/ и лжи́вых па́губных уче́ний обличи́телю,/ за И́стину нечести́выми гони́мый,/ незло́бие и кро́тость пропове́давый/ и па́ству Пе́нзенскую ре́вностне пасы́й,/ святи́телю всече́стне Инноке́нтие,// моли́ Христа́ Бо́га умудри́ти нас во спасе́ние.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 3:
Челове́цы ликовству́ют духо́вно, обрето́ша бо моли́твенника и предста́теля и, похва́льными венцы́ Инноке́нтия украша́юще, я́ко уго́дника Христо́ва прославля́ют. Его́же моли́твами, Го́споди, от страсте́й и бед изба́ви нас.
Сла́ва, и ны́не, Богоро́дичен:
Изба́ви нас моли́твами Твои́ми, Влады́чице, согреше́ний бе́здны, де́монскаго озлобле́ния, язы́ческаго плене́ния и злонра́вных лука́внейшаго вре́да, да Тя, я́ко Изба́вительницу на́шу, велича́ем.
По 2-м стихосло́вии седа́лен, глас 4:
Страда́ния за и́стину подъе́м, святи́телю, те́ми ду́шу твою́ очи́стил еси́, ны́не же Христа́ Бо́га моли́, да в доброде́лании нас укрепи́т, грехо́в очище́ние пода́ст и спасе́т ду́ши на́ша.
Сла́ва, и ны́не, Богоро́дичен:
Наста́ви ны на путь покая́ния, уклоня́ющияся при́сно в безпу́тие зол и Преблага́го прогне́вавшия Го́спода, Неискусобра́чная Благослове́нная Мари́е, Засту́пнице усе́рдная рода христиа́нскаго.
По полиеле́и седа́лен, глас 2:
Отре́бие ми́ру, погружа́ему в пучи́не лжеуче́ния, вмени́лся еси́, свя́те Инноке́нтие, но оба́че не возмо́же тя разлучи́ти от любве́ Бо́жия, я́же о Христе́ Иису́се, Го́споде на́шем, ни скорбь, ни теснота́, ни са́мая смерть.
Сла́ва, и ны́не, Богоро́дичен:
Воста́ни, Пречи́стая Ма́ти, и воздежи́ ру́це Твои́ моле́бне к Сы́ну Твоему́ и Бо́гу ку́пно со святи́телем Инноке́нтием, да избу́дем мно́гих бед и зол, при́сно по грехо́м на́шим обурева́емии.
Степе́нна, 1-й антифо́н 4-го гла́са. Проки́мен, глас 4: Свяще́нницы Твои́ облеку́тся в пра́вду,// и преподо́бнии Твои́ возра́дуются. Стих: Блаже́н муж, боя́йся Го́спода, в за́поведех Его́ восхо́щет зело́. Вся́кое дыха́ние: Ева́нгелие от Луки́, зача́ло 64.
По 50-м псалме́ стихи́ра, глас 6:
Святи́телю о́тче Инноке́нтие,/ тобо́ю мно́зи гра́ди и оби́тели хва́лятся,/ Моско́вския бо земли́ сла́вное прозябе́ние яви́лся еси́,/ град же свята́го Петра́ и Нова́града честна́я оби́тель Ю́рьевская/ по́стническими по́двиги твои́ми украша́ются,/ земля́ Пе́нзенская и преде́ли Сара́товстии процвето́ша,/ словесы́ твои́ми напая́еми,/ ны́не же, во Гра́де Небе́снем вселя́яся,// помина́й нас, чту́щих па́мять твою́.
Кано́н, глас 2, его́же краегране́сие: Нищету́ духо́вную стяжа́ти сподо́би, о́тче.
Песнь 1
Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися.
Небе́сный Царю́, смире́нную ду́шу мою́ от скверн очи́сти и сло́ва благода́ть низпосли́, да возмогу́ досто́йно воспе́ти уго́дника Твоего́, пресла́внаго Инноке́нтия.
Припе́в: Святи́телю о́тче Инноке́нтие, моли́ Бо́га о нас.
Иму́щих тя предста́теля до́бра к ще́дрому Бо́гу, нас, напа́стьми и обстоя́нии ско́рбными одержи́мых, укрепи́, подая́ ру́ку спасе́ния, святи́телю ми́лостиве Инноке́нтие.
Щедр и незло́бив па́стве свое́й яви́лся еси́, о́тче Инноке́нтие, те́мже, Ду́ха Бо́жия испо́лненный, ума́ моего́ омраче́ние отжени́, страсте́й бу́рю утиши́, к безстра́стия приста́нищу упра́ви и от злых усте́н защити́ твои́х моли́тв покро́вом.
Богоро́дичен: Егда́ Бо́жиим повеле́нием от вре́менныя жи́зни отыти́ хощу́, Пречи́стая, бесо́вския руки́ мя свободи́, А́нгелы в спу́тники пода́ждь и рая́ вкуси́ти сподо́би, иде́же Инноке́нтий святи́тель с безпло́тными ли́ки сла́дости боже́ственныя наслажда́ется.
Песнь 3
Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,// и несть пра́веден, па́че Тебе́, Го́споди.
Тя, смире́нне Инноке́нтие, всесве́тла свети́льника, не под спу́дом, но на высоте́ све́щника Це́ркве Христо́вы поста́влена, усе́рдно мо́лим: светоно́сными луча́ми глубо́кую тьму греха́ отжени́, неве́рных к позна́нию И́стины наста́ви, шата́ния умо́в низложи́, нас же во Правосла́вии укрепи́.
Уста́вил еси́, прему́дре Инноке́нтие, струя́ми твоего́ богоглаго́ливаго язы́ка ло́жныя то́ки суему́дренных, и́же, я́ко безси́льнии, не возмого́ша му́тными вода́ми лжеуче́ния потопи́ти ны. Те́мже вопие́м ти: то́ки страсте́й на́ших изсуши́ и ко благоче́стию наста́ви.
Ду́ха Бо́жия испо́лнився, злово́ния ве́ка сего́ низложи́л еси́, кади́льнице благово́нная, Инноке́нтие блаже́нне, и па́ству твою́ уче́нием Правосла́вныя Це́ркве облагоуха́л еси́. Те́мже тя, я́ко наста́вника предо́бра, ве́рно восхваля́ем.
Богоро́дичен: Упова́ние и стена́ и ти́хое приста́нище еси́ лю́дем Твои́м, Пресвята́я Де́во, Всесвята́го Сы́на Твоего́ умоли́ спасе́ние нам улучи́ти, да непреста́нно в невече́рнем све́те сла́ву Триеди́ному Бо́гу воспева́ем.
Ин конда́к, глас 3.
Подо́бен: Де́ва днесь:
Днесь святи́тель Христо́в Инноке́нтий/ предстои́т Престо́лу Бо́жию/ и с ли́ки святы́х за ны мо́лится Бо́гу,/ ему́же ны́не со умиле́нием покланя́емся/ и во псалме́х и пе́ниих велича́ем,// обрето́хом бо моли́твенника ко Преве́чному Бо́гу.
Седа́лен, глас 3:
О, неизрече́нныя бла́гости Бо́жия! О, неизглаго́ланнаго Его́ смотре́ния! Честны́я мо́щи святи́теля Инноке́нтия ны́не обрето́шася, ду́ши ве́рных утеша́юще и на брань проти́ву ко́зней лука́ваго укрепля́юще. К ни́мже припа́дающе, усе́рдно вопие́м: уще́дри нас моли́твами твои́ми, святи́телю Бо́га Всеще́драго.
Сла́ва, и ны́не, Богоро́дичен:
И́же Отцу́ Сопресто́льный Сын на земли́ вопло́щся, я́ко Челове́к, из утро́бы Твоея́, Чи́стая, про́йде, порфи́рою крове́й Твои́х в на́ше оболки́йся естество́, да па́дшия ны челове́ки возста́вит и Небе́снаго Сио́на гра́жданы яви́т.
Песнь 4
Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,// непостижи́мую Твою́ си́лу.
Храм Всесвята́го Ду́ха, доброде́тельми сия́яй, ми́рови яви́лся еси́, святи́телю честны́й, науче́ние кни́жное приле́жно стяжа́в, та́йны неизрече́нныя суде́б Бо́жиих пости́гл еси́, и списа́нием дел време́н мину́вших ве́рныя прему́дро во благоче́стии да́же доны́не наставля́еши, да зове́м благода́рне: сла́ва си́ле Твое́й, Го́споди.
Ору́жием му́дрости боже́ственныя препре́л еси́ нечести́вых, испове́дниче честны́й. Поноше́ния и гоне́ния за и́стину благоду́шне претерпева́я, земну́ю му́дрость ни во что́же вменя́я, непреста́нно взыва́л еси́: сла́ва си́ле Твое́й, Го́споди.
В Небе́сныя черто́ги А́нгели Бо́жии вознесо́ша чи́стую ду́шу твою́, блаже́нне, иде́же со святи́тели и испове́дники Престо́лу Всевы́шняго предстои́ши, укре́пльшаго тя на по́двиги ве́лия, непреста́нно взыва́я: сла́ва си́ле Твое́й, Го́споди.
Богоро́дичен: Недви́жимое утвержде́ние ве́ры и я́ко многоце́нный дар душа́м на́шим, Богоро́дицу во псалме́х и пе́ниих духо́вных восхва́лим, ве́рнии, да изба́вит от мук вопию́щих к Ро́ждшемуся из Нея́: сла́ва си́ле Твое́й, Го́споди.
Песнь 5
Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:// ра́зве бо Тебе́, и́ного бо́га не зна́ем.
Укрепля́емь си́лою Тро́ическою, преблаже́нне, пропове́дник велегла́сный па́стве Сара́товской яви́лся еси́, вопия́: возвели́чите Го́спода со мно́ю, и вознесе́м и́мя Его́ вку́пе. Те́мже и мы Влады́ку Небесе́ и земли́ велича́ем: ина́го бо ра́зве Тебе́ бо́га не зна́ем.
Ю́ность свою́ посто́м и моли́твою благоукраси́л еси́, му́дре, и свяще́нства благода́ть непоро́чно стяжа́ти сподо́бился еси́. И ны́не, Престо́лу Вседержи́теля предстоя́, моли́ся, сла́вне Инноке́нтие, да от язы́ка лука́ваго и озлобле́ния свободи́мся и огня́ ве́чнаго изба́вимся.
Святи́телей удобре́ние и испове́дников похвало́, чуде́с исто́чниче, умоли́ Зижди́теля, Его́же прише́ствие при две́рех есть, обрести́ нам грехо́в оставле́ние.
Твои́х слове́с наставле́ния, е́же Правосла́вие в чистоте́ всем содержа́ти, чужезе́мным же лжеуче́нием ника́коже прилепля́тися, объя́ша всю зе́млю Ру́сскую, ты бо Вы́шнему вы́ну взыва́л еси́: ина́го бо ра́зве Тебе́ бо́га не зна́ем.
Богоро́дичен: Я́же ми́рови мир пода́вшая и Нача́льника тишины́ ро́ждшая, укроти́ волне́ние страсте́й мои́х, Чи́стая, и на ка́мени безстра́стия мя утверди́, Сы́ну Твоему́ взыва́юща: ина́го бо ра́зве Тебе́ бо́га не зна́ем.
Песнь 6
Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да, я́ко Изба́вителю, во гла́се хвале́ния// и́стины же Ду́хом пожру́ Тебе́.
Житие́м твои́м, а не то́кмо ли́ком, святи́телю Дими́трию Росто́вскому подо́бяся, ду́шу твою́, блаже́нне, я́ко рай богонасажде́нный сотвори́л еси́; безу́мнии же я́ко сор отри́нуша тя, не терпя́ще си́лы слове́с твои́х. Те́мже, о́тче, и нас те́мных паде́ний грехо́вных изба́ви.
Архиере́й чу́ден и нра́вов испра́витель и душ устрои́тель показа́лся еси́, ре́вностне о лю́дех твои́х пеки́йся, мирски́м же нача́льником противуста́л еси́, злокова́рство и лихои́мство тех облича́я, свя́те Инноке́нтие.
Ту́не есть тща́ние на́ше досто́йное пе́ние тебе́ сотвори́ти, Инноке́нтие преди́вне, но я́ко Христо́с прия́т вдови́цы две ле́пте, та́ко и ты не возгнуша́йся похва́льных слове́с на́ших и ма́лый сей труд приими́, в похвалу́ тебе́ приноси́мый.
Богоро́дичен: Изба́вльшеся Тобо́ю от бед и скорбе́й, Ма́ти Безневе́стная, и Тебе́ ра́ди ра́дость получи́вше, Тя, я́ко Пода́тельницу благу́ю и Засту́пницу ве́рную, вси велича́ем.
Конда́к, глас 8:
Свяще́ннаго и боговеща́ннаго пропове́дника/ и ди́внаго прему́дрости учи́теля/ вчини́л еси́, Го́споди, в наслажде́ние благи́х Твои́х и поко́й,/ труды́ бо о́наго и блаже́нную кончи́ну/ па́че вся́каго всепло́дия прие́м,// еди́не Прославля́яй святы́я Своя́.
И́кос:
Житие́ непоро́чное яви́л еси́, святи́телю Инноке́нтие, неви́нности тезоиме́нный, и, ве́ры ра́ди ско́рбных нахожде́ния претерпе́в, чи́стою душе́ю к Престо́лу Госпо́дню прите́кл еси́, прехва́льне. Ны́не же, ра́йския пи́щи наслажда́яся, о и́же на земли́ пою́щих тя Влады́ку Христа́ умоли́, зна́меньми и чудесы́ Прославля́ющаго святы́я Своя́.
Песнь 7
Ирмо́с: О́бразу злато́му, на по́ли Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:// благослове́н еси́, Бо́же оте́ц на́ших.
Ско́рбная искуше́ния и лю́тая обстоя́ния смире́нием попра́л еси́, тех и нас моли́твами твои́ми изба́ви, блаже́нне, вопию́щих: благослове́н еси́, Бо́же оте́ц на́ших.
Пе́ние псало́мское воспе́ша лю́дие, и при словесе́х: аз же, Го́споди, упова́ю на Тя, душа́ твоя́ свята́я от те́ла разлучи́ся. Нас же, на всемо́щныя моли́твы твоя́ наде́ющихся, утверди́ непреста́нно взыва́ти: благослове́н еси́, Бо́же оте́ц на́ших.
О нас ми́лостивныя твоя́ дла́ни ко Влады́це моле́бне простира́й, свя́те Инноке́нтие, и, собла́знов избавля́я, неотлу́чно с на́ми ду́хом пребыва́й, о́тче преподо́бне, наставля́я в моли́тве зва́ти Творцу́: благослове́н еси́, Бо́же оте́ц на́ших.
Богоро́дичен: Да челове́ки па́дшия обожи́т, яви́ся Сын Твой, Влады́чице, соверше́н Челове́к. Сего́ у́бо моли́ прича́стники Божества́ сотвори́ти пою́щия: благослове́н еси́, Бо́же оте́ц на́ших.
Песнь 8
Ирмо́с: В пещь о́гненную ко о́троком евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,// и превозноси́те во вся ве́ки.
О всесла́внем прославле́нии твое́м, святи́телю, лю́дие ру́сстии возвесели́шася, яви́лся бо еси́ чудотво́рец изя́щный и хода́тай пред Бо́гом преди́вный, Того́ умоля́я о вопию́щих: по́йте, дела́, я́ко Го́спода, и превозноси́те во вся ве́ки.
Бо́жиим Про́мыслом сохране́ны бы́ша от поруга́ния святы́я мо́щи твоя́, святи́телю Инноке́нтие, а́ще и храм, иде́же погребе́но бысть те́ло твое́, от безбо́жных разори́ся. Ны́не же це́лы яви́шася и, я́ко звезда́ пресве́тлая, просвеща́ют всех притека́ющих к ним и Бо́гу зову́щих: по́йте, дела́, я́ко Го́спода, и превозноси́те во вся ве́ки.
Изба́ви нас, святи́телю Христо́в, сете́й вра́жиих моли́твами твои́ми и окорми́ живо́т наш си́лою Всеще́драго Бо́га, Ему́же с тобо́ю покланя́емся, велегла́сно вопию́ще: да благослови́т тварь вся Го́спода и превозно́сит во вся ве́ки.
Богоро́дичен: Оте́ческия сла́вы не отсту́пль, во́лею к на́шей ху́дости снизше́л еси́, Сладча́йший Иису́се, и от Де́вы плоть прия́л еси́. Ея́же моли́твами изба́ви рабы́ Твоя́ от бед и скорбе́й.
Песнь 9
Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная.// Тем Всепе́тую Богоро́дицу велича́ем.
Те́ло твое́ честно́е, свяще́нне Инноке́нтие, с ве́рою приступа́ющим исцеле́ния источа́ет, страсте́й разли́чных тьму отгоня́ет и све́том невече́рним просвеща́ет всех, хва́лящих тя.
Чистоту́ ума́ стяжа́в, Ду́ха Свята́го жили́ще был еси́, богоблаже́нне, благода́ть же святи́тельства прие́м, пропове́дник изя́щный и учи́тель иску́сный показа́лся еси́, науча́я лю́ди правосла́вно испове́дати в Тро́ице Еди́наго Бо́га.
Еди́не Бла́же, Христе́ Многоми́лостиве, в моли́тву Тебе́ ны́не приво́дим уго́дника Твоего́ Инноке́нтия. Не пре́зри хода́тайства его́ грех на́ших ра́ди, но поми́луй нас, ве́рою взыва́ющих: засту́пничеством святи́теля на́шего, Го́споди, поми́луй нас.
Тро́ичен: Тебе́ непристу́пному Бо́гу и Сла́вы Царю́ Трисо́лнечному, Строи́телю и Промысли́телю вся́ческих, Еди́ному Благо́му и Су́щему, Божества́ держа́ву иму́щему, песнь Трисвяту́ю воспева́юще, покланя́емся при́сно и непреста́нно велича́ем.
Богоро́дичен: Отрокови́це Всенепоро́чная, Ма́ти, Де́во Пречи́стая, Сы́на и Бо́га Твоего́ ми́лостива сотвори́ нам и страсте́й лю́тых изба́ви.
Свети́лен:
Весели́тся ны́не земля́ Сара́товская, лю́дие же Пе́нзенстии тебе́ покланя́ются и Христа́ велича́ют, обрето́ша бо вели́кое сокро́вище.
Сла́ва, и ны́не, Богоро́дичен:
Влады́чице Всеми́лостивая, просвеще́ние помраче́нных душ на́ших, Свет и́стинный ми́ру ро́ждшая, со святи́телем пречу́дным Инноке́нтием Сы́на Твоего́ и Бо́га умоли́ о всех нас.
На хвали́тех стихи́ры, глас 4:
Жи́тельство на́ше есть на Небесе́х,/ си́це боже́ственный Па́вел рече́,/ ты же, свя́те Инноке́нтие,/ весь ум твой к Го́рним возвы́сив,/ прекра́снаго о́наго рая́, еще́ в телеси́ сый, вкуси́ти сподо́бился еси́./ Те́мже ны́не, с Го́рними ли́ки водворя́яся,/ нас, еще́ до́лу су́щих,// моли́твами твои́ми при́сно огражда́й.
Си́ла Бо́жия в не́мощи соверша́ется,/ та́ко глаго́лет Госпо́дь,/ ны́не зрим слов сих на тебе́ пресла́вное сбытие́,/ я́ко не́мощен пло́тию,/ Ду́ха усе́рдный ратобо́рец показа́лся еси́,/ лжеиме́нных уче́ний усе́рдный обличи́тель и до́блестный отгна́тель./ Испроси́ и нам, о́тче Инноке́нтие,/ от Подвигополо́жника Христа́ му́жества дар,/ во е́же противоста́ти ду́ху ми́ра сего́,// и моли́твами твои́ми нас при́сно огражда́й.
И́ны стихи́ры, глас 2.
Подо́бен: Егда́ от Дре́ва:
Егда́ душа́ твоя́ разлуча́шеся/ от тле́ннаго сего́ жития́,/ тогда́ псалмопе́вца слы́шати сладча́йший глас,/ е́же упова́ние твое́ на Го́спода есть,/ сподо́бился еси́, преди́вне Инноке́нтие./ Ны́не же, в раи́ сла́дости вчиня́яся,/ уже́ не в се́нех и гада́ниих,/ но лице́м к лицу́ зри́ши Го́спода// и прославля́еши Святу́ю Тро́ицу.
Егда́ страда́ния за и́стину претерпева́л еси́,/ тогда́ во отре́бие и уме́ты себе́ сама́го вмени́л еси́,/ святи́телю смире́нне, о́тче Инноке́нтие,/ Бог же, зряй вся та́йная,/ на све́щнице святи́тельства тебе́ уста́ви/ и вене́ц нетле́нный тебе́ подаде́./ Днесь же, небе́сными и земны́ми гла́сы ублажа́емь,/ Го́сподеви помоли́ся, испове́дниче,// от вся́ких лю́тых нам изба́витися.
Сла́ва, глас 5:
Еди́ному то́кмо Бо́гу на́шему/ вся́кую сла́ву, честь и поклоне́ние/ в ду́се и и́стине приноси́ти ве́рно подоба́ет,/ та́ко от Це́ркве Бо́жия науче́ни есмы́,/ но, я́ко подо́бие Его́ в себе́ возрасти́вшии,/ да почту́тся от нас святи́и Его́,/ я́ко при́снии Бо́жии дру́зи и до́блии вене́чницы,/ в и́хже со́нме, я́ко пресве́тлая звезда́,/ Инноке́нтий святи́тель нам возсия́./ Мы же к нему́ днесь те́пле вопие́м:/ я́ко дерзнове́ние стяжа́вый ко Спа́су на́шему,// от вся́ких лю́тых моли́твами твои́ми нас огражда́й.
И ны́не, Богоро́дичен:
Земля́ Ру́сская,/ дом Пречи́стыя Богоро́дицы от лет дре́вних нарече́нная,/ мно́гия ми́лости Ея́ улучи́,/ те́мже и мы с ве́рою и упова́нием си́це вопие́м:/ не преста́й заступа́ти нас, Цари́це и Влады́чице,/ пучи́ны грехо́вныя избавля́ющи// и спасе́ние душа́м на́шим подаю́щи.
Славосло́вие вели́кое, ектении́ и отпу́ст.
НА ЛИТУРГИ́И
Блаже́нна от кано́на, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость,// и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней. Апо́стол ко Ефесе́ем, зача́ло 233. Аллилу́ия, глас 4: Уста́ пра́веднаго поуча́тся прему́дрости. Стих: Язы́к его́ возглаго́лет суд. Ева́нгелие от Иоа́нна, зача́ло 36. Прича́стен: В па́мять ве́чную бу́дет пра́ведник:
Моли́тва
О уго́дниче Бо́жий, святи́телю Христо́в Инноке́нтие! При́зри от сла́вы твоея́ го́рния и приими́ моли́твы нас, гре́шных и недосто́йных рабо́в твои́х, зде пред о́бразом твои́м честны́м [или́: святы́ми мощьми́ твои́ми] припа́дающих и те́пле моля́щихся, и принеси́ я́ ко Престо́лу вся содержа́щаго в руце́ Свое́й Бо́га, Ему́же ты во вся дни жи́зни твоея́ усе́рдно послужи́л еси́. Моли́, уго́дниче Бо́жий, Всеми́лостиваго Спа́са Христа́ за богода́нную па́ству твою́, отжени́ от земна́го оте́чества твоего́ вся собла́зны, раздо́ры и нестрое́ния, Це́рковь Христо́ву и град наш святы́ми твои́ми моли́твами от раско́лов, прельще́ния инове́рием и наве́тов злых челове́к огради́. Всех же нас в единомы́слии и любви́ друг ко дру́гу соедини́, да еди́неми усты́ и еди́нем се́рдцем воспое́м всесвято́е и единодержа́вное и́мя Отца́, и Сы́на, и Свята́го Ду́ха, во ве́ки веко́в. Ами́нь.
