Служба всем святым, в земли Брянской просиявшим
Ме́сяца сентября́ в 20-й день
Всех святы́х, в земли́ Бря́нской просия́вших
НА ВЕЛИ́ЦЕЙ ВЕЧЕ́РНИ
На Го́споди, воззва́х: поста́вим стихо́в 8 и пое́м стихи́ры пра́здника 3 и святы́х стихи́ры, глас 3:
Прииди́те, правосла́вных собо́ри,/ святы́я, просия́вшия в преде́лех Бря́нских, восхва́лим:/ святи́тели и священному́ченики,/ преподо́бныя и кня́зи благове́рныя,/ му́ченики и испове́дники,/ вку́пе имену́емыя и неимену́емыя,/ си́и бо вои́стину де́лы и словесы́ и многови́дным житие́м/ и от Бо́га дарова́нии/ соде́лашася святи́и,/ и́хже и гро́бы Бог чудесы́ просла́ви./ Ны́не же просла́вльшему их Христу́ предстоя́т/ и мо́лятся приле́жно о нас,// любо́вию соверша́ющих све́тлое их торжество́.
Прииди́те, Правосла́вия ревни́телие,/ пе́сньми восхва́лим богому́дрыя святи́тели,/ в земли́ Бря́нской сло́во Христо́вы и́стины пра́во пра́вившия,/ строи́тели та́ин Бо́жиих,/ свяще́нства венцы́, благоче́стия о́бразы,/ Це́ркве Христо́вы столпы́ непоколеби́мыя,/ благове́рным лю́дем те́плыя посо́бники// и моли́твенники о душа́х на́ших.
Кто от земноро́дных изрече́т/ чу́дная ва́ша жития́, преподо́бнии отцы́?/ Кий же язы́к изглаго́лет/ свяще́нныя о Ду́се по́двиги и по́ты ва́ша?/ Вы бо в ми́ре яви́стеся вои́стину, я́коже а́нгели,/ вся нача́ла тьмы и вла́сти лю́тыя/ Бо́жиим вспоможе́нием победи́сте,/ плоть умертви́сте и дух оживи́сте// и зе́млю Бря́нскую не́бо друго́е сотвори́сте.
И́ны стихи́ры, глас 8:
Блаже́ннии богому́дрии кня́зие,/ в преде́лех Бря́нских благове́рно пра́вившии,/ ева́нгельскою му́дростию укра́шеннии,/ све́тлостию доброде́телей блиста́вшии,/ вы ны́не, на Небесе́х предстоя́ще,/ ве́рных сосло́вие озаря́ете/ и тьму бесо́вскую отгоня́ете./ Те́мже вас, я́ко прича́стники невече́рния благода́ти/ и земли́ Бря́нския храни́тели непосты́дныя,// почита́ем, досточу́днии.
Му́ченицы Христо́вы преблаже́ннии,/ земли́ Бря́нския кра́сное воспита́ние,/ страда́ния ни во что́же вмени́сте/ и срамоту́ поноше́ния презре́сте,/ смерть же, я́ко приобре́тение/ жи́зни ве́чныя со Христо́м,/ ра́достно облобыза́сте/ и зе́млю кровьми́ ва́шими напои́сте,/ возду́х же преставле́нием освяти́сте,/ и ны́не на Небесе́х о нас мо́литеся непреста́нно,// богови́дцы.
Сла́ва, глас 1:
Весели́ся о Го́споде, земле́ Бря́нская,/ ра́дуйся и лику́й, ве́рою правосла́вною обогати́вшися,/ телеса́ подви́жников и свиде́телей и́стины/ в не́дрех свои́х иму́щи, я́ко сокро́вище,/ наслади́ся чуде́с, от них истека́ющих,/ и, ви́дящи полк сей святы́й,/ от ви́димых и неви́димых враго́в тя огражда́ющий,/ благода́рне Бо́гу возопи́й:// Го́споди, сла́ва Тебе́.
И ны́не, пра́здника.
Вход. Проки́мен дне. Чте́ния три.
Проро́чества Иса́иина чте́ние (глава́ 49):
Та́ко глаго́лет Госпо́дь:/ во вре́мя прия́тное послу́шах тя/ и в день спасе́ния помого́х тебе́./ И созда́х тя и дах тя в заве́т язы́ков,/ е́же устро́ити зе́млю и насле́дити насле́дие пусты́ни,/ глаго́люща су́щим во у́зах: изыди́те,/ и су́щим во тьме: откры́йтеся./ На всех путе́х пасти́ся бу́дут,/ и на всех стезя́х па́жить их./ Не вза́лчут, ниже́ вжа́ждут,/ ниже́ порази́т их зной, ниже́ со́лнце,/ но Ми́луяй их уте́шит я́/ и сквозе́ исто́чники вод проведе́т я́./ И положу́ вся́кую го́ру в путь/ и вся́кую стезю́ в па́ству их./ Се си́и издале́ча прии́дут,/ си́и от се́вера и мо́ря, ини́и же от земли́ Пе́рсския./ Да веселя́тся Небеса́, и ра́дуется земля́,/ да отры́гнут го́ры весе́лие и хо́лми пра́вду,/ я́ко поми́лова Бог лю́ди Своя́/ и смире́нныя люде́й уте́ши./ Рече́ же Сио́н:/ оста́ви мя Госпо́дь, и Бог забы́ мя./ Еда́ забу́дет жена́ отроча́ свое́?/ или́ не поми́лует изча́дия чре́ва своего́?/ А́ще ли же и сих забу́дет жена́,/ но Аз не забу́ду тебе́, – глаго́лет Госпо́дь.
Прему́дрости Иису́са, сы́на Сира́хова, чте́ние (глава́ 44):
Восхва́лим у́бо му́жи сла́вны и отцы́ на́ша в бытии́./ Мно́гу сла́ву созда́ Госпо́дь в них вели́чием Свои́м от ве́ка./ Госпо́дствующе во ца́рствиих свои́х/ и му́жие, имени́ти си́лою, сове́тующе ра́зумом свои́м,/ провеща́вшии во проро́чествах;/ старе́йшины люди́й в сове́тех/ и в ра́зуме писа́ния люди́й./ Прему́драя словеса́ в наказа́нии их;/ и́щуще гла́са мусики́йска и пове́дающе по́вести во писа́ниих,/ му́жи бога́тии, обдарова́ни кре́постию,/ ми́рно живу́ще в жили́щих свои́х./ Вси си́и в ро́дех просла́влени бы́ша,/ и во днех их похвала́./ Суть от них и́же оста́виша и́мя, е́же пове́дати хвалы́./ И суть, и́хже несть па́мяти, и погибо́ша, я́ко не су́щии,/ и бы́ша я́ко не бы́вше, и ча́да их по них./ Но си́и му́жие ми́лостивии,/ и́хже пра́вды не забве́ны бы́ша,/ с се́менем их пребу́дет до́брое насле́дие,/ изча́дия их в заве́тех./ Оста́ся се́мя их и ча́да их по них,/ до ве́ка пребу́дет се́мя их,/ и сла́ва их не потреби́тся./ Телеса́ их в ми́ре погребе́на бы́ша,/ а имена́ их живу́т в ро́ды./ Прему́дрость их пове́дят лю́дие,/ и похвалу́ их испове́сть Це́рковь.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти./ И вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле наказа́ни бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́,/ и во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину,/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ра пра́здника и святы́х стихи́ры, глас 8:
Сра́дуйтеся с на́ми, вси ли́цы святы́х/ и вся А́нгельская чинонача́лия,/ духо́вне совоку́пльшеся,/ прии́дем и воспои́м благода́рную песнь Христу́ Бо́гу:/ се бо безчи́сленный сонм сро́дников на́ших/ предстои́т Царю́ Сла́вы/ и моле́бне хода́тайствует о нас./ Си́и суть столпи́ и красота́ ве́ры правосла́вныя;/ си́и уче́нии, и де́лы, и крове́й излия́нии/ Це́рковь Бо́жию просла́виша;/ си́и от всех преде́л земли́ на́шея возсия́ша,/ и ве́ру правосла́вную в ней/ чудесы́ и зна́мении утверди́ша,/ и во ины́я страны́ пронесо́ша,/ апо́стольски ревну́юще;/ ини́и же пусты́ни и гра́ды земли́ Бря́нския оби́тельми святы́ми украси́ша,/ а́нгельское житие́ показу́юще;/ мно́зи руга́нии, и ра́нами, и лю́тою сме́ртию/ от сыно́в ве́ка сего́ искуси́шася,/ мно́зи же и ине́ми ви́ды,/ во вся́цем чи́не подвиза́вшеся,/ нам терпе́ния и злострада́ния о́браз пода́ша,/ и вси вку́пе мо́лят ны́не Го́спода/ от бед изба́витися Оте́честву на́шему// и всем нам спасти́ся.
Глас 1.
Подо́бен: О, ди́вное чу́до:
О, ди́вное чу́до!/ Исто́чницы благоче́стия/ в преде́лех Бря́нских явля́ются/ и путеводи́телие к Небеси́ святи́и сро́дницы нам быва́ют./ Весели́ся, земле́ Бря́нская,/ сих оте́чество земно́е./ Возопии́м, ве́рнии,/ таковы́я иму́ще в беда́х засту́пники:/ блаже́ннии и святи́и,/ Бо́га не преста́йте о нас моли́ти,// подаю́щаго ва́ми земли́ на́шей ве́лию ми́лость.
Сла́ва, святы́х, глас 6.
Подо́бен: Все отло́жше:
О, коль красно́ собра́ние ва́ше,/ ли́че святоизбра́нный,/ дру́зи Христо́ви,/ Бо́га рачи́тельнии уго́дницы,/ святи́и вси, в земли́ Бря́нской просия́вшии,/ зна́емии ку́пно и безыме́ннии,/ прииди́те и ста́ните посреде́ нас неви́димо,/ предна́чинающе торжество́ и пе́ние/ и сподобля́юще даро́в невеще́ственных// ваш пра́здник соверша́ющих светоле́пно.
И ны́не, пра́здника.
На стихо́вне стихи́ры святы́х, глас 5.
Подо́бен: Ра́дуйся:
Ра́дуйся, земле́ Бря́нская,/ я́же дре́вле бе неве́рна,/ ны́не же ве́рою правосла́вною сия́ющая,/ про́поведию свята́го Ку́кши со ученико́м его́ Ни́коном просвеще́нная,/ тех па́мять усе́рдно сохраня́й,/ ча́да твоя́ подвиза́ющи/ подража́ти ве́ре их,/ в мудрова́ния же стра́нна и ло́жна не уклоня́тися,// но благода́тию утвержда́ти сердца́.
Стих: Го́споди, Госпо́дь наш,// я́ко чу́дно и́мя Твое́ по всей земли́.
Ра́дуйся, земле́ Бря́нская,/ гра́жданы Небе́снаго Ца́рства воспита́вшая/ и соверше́нныя му́жи Го́сподеви показа́вшая,/ и́же свети́ла душа́м на́шим яви́шася,/ я́ко уче́нии, де́лы и чуде́с заре́ю просия́ша./ Сих до́блести с любо́вию прославля́юще,/ поревну́им доброде́телем их,/ моля́щеся приле́жно ко Го́споду// дарова́ти нам ве́лию ми́лость.
Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.
Прииди́те, Небе́снии предста́телие на́ши к нам,/ ва́шего тре́бующим ми́лостиваго посеще́ния/ и сердца́ на́ша ра́дости испо́лните/ ва́шими к Бо́гу моли́твами,/ чуде́с исто́чницы,/ любве́ орга́ни благозву́чнии,/ доброде́тельми укра́шеннии./ О собо́ре святы́й/ и по́лче боже́ственный,/ земли́ Бря́нския утвержде́ние// вы есте́ вои́стину.
Сла́ва, святы́х, глас 2.
Подо́бен: Ки́ими похва́льными:
Ки́ими похва́льными венцы́ увенча́ем засту́пники на́ша?/ Престо́лу Бо́жию ны́не предстоя́щия/ и чи́сте тех лю́бящих духо́вно посеща́ющия,/ всех ско́рбных уте́шители/ и су́щих в беда́х прибе́жище,/ земли́ Бря́нския храни́тели,/ ве́ры и́стинныя в ней утвержде́ние,/ Правосла́вия побо́рники,/ и́хже ра́ди возноше́ние враго́в на́ших Христо́с низложи́,// име́яй ве́лию ми́лость.
И ны́не, пра́здника.
На благослове́нии хле́бов тропа́рь святы́х, два́жды, и пра́здника, еди́ножды.
Тропа́рь святы́х, глас 4:
Днесь ра́достно лику́ет земля́ Бря́нская,/ прославля́ющи ча́да своя́, Бо́гу угоди́вшия,/ святи́тели и иере́и,/ преподо́бныя отцы́ и ма́тери,/ благове́рныя кня́зи и княги́ни,/ му́ченики и испове́дники,/ к ни́мже с любо́вию возопии́м:/ о собо́ре святы́й и по́лче боже́ственный,// земли́ на́шея утвержде́ние вы есте́ вои́стину.
НА У́ТРЕНИ
На Бог Госпо́дь: тропа́рь пра́здника, два́жды. Сла́ва, святы́х. И ны́не, пра́здника.
По 1-м стихосло́вии седа́лен святы́х, глас 2:
К ми́лости Исто́чнику, Го́споду Иису́су, моле́ние те́плое принеси́те, прехва́льнии,/ о земли́ Бря́нской моля́щеся,/ и от бед изба́вите нас,/ ско́рое поможе́ние подаю́ще.
Сла́ва, и ны́не, пра́здника.
По 2-м стихосло́вии седа́лен святы́х, глас 6:
Днесь Небеса́ ра́дуются и земля́ Бря́нская весели́тся,/ па́мять святы́х Твои́х, Го́споди, пра́зднующе,/ тех моли́твами поми́луй нас.
Сла́ва, и ны́не, пра́здника.
Велича́ние:
Велича́ем вас,/ вси святи́и, в земли́ Бря́нской просия́вшии,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.
И́но велича́ние:
Ублажа́ем вас,/ чудотво́рцы на́ши сла́внии,/ зе́млю Бря́нскую доброде́тельми ва́шими озари́вшии/ и нам о́браз спасе́ния// светоявле́нно показа́вшии.
Псало́м избра́нный:
1 лик: Воскли́кните Го́сподеви, вся земля́, по́йте же и́мени Его́, дади́те сла́ву хвале́ Его́.
2 лик: Род и род восхва́лят дела́ Твоя́ и си́лу Твою́ возвестя́т.
1 лик: Я́ко благоволи́т Госпо́дь в лю́дех Свои́х и вознесе́т кро́ткия во спасе́ние.
2 лик: Сей род и́щущих Го́спода, и́щущих Лице́ Бо́га Иа́ковля.
1 лик: Мне же зело́ че́стни бы́ша дру́зи Твои́, Бо́же, зело́ утверди́шася влады́чествия их.
2 лик: Изочту́ их, и па́че песка́ умно́жатся.
1 лик: По́йте Бо́гу на́шему, я́ко Царь всея́ земли́ Бог, по́йте разу́мно.
2 лик: И испо́лнится сла́вы Его́ вся земля́, бу́ди, бу́ди.
По полиеле́и седа́лен, глас 3:
Ра́достию соверша́юще днесь све́тлое торжество́,/ восхва́лим уго́дники Бо́жия, зе́млю Бря́нскую Ева́нгельским благове́стием огласи́вшия,/ ти́и бо, я́коже дре́вле пра́отцем на́шим, та́ко и нам взыва́ют ны́не:/ прииди́те, обрето́хом Спа́са душ на́ших.
Сла́ва, и ны́не, пра́здника.
Степе́нна, 1-й антифо́н 4-го гла́са. Проки́мен, глас 4: Ра́дуйтеся, праведнии, о Господе,// пра́вым подоба́ет похвала́. Стих: Бу́ди, Го́споди, ми́лость Твоя́ на нас, я́коже упова́хом на Тя. Вся́кое дыха́ние: Ева́нгелие от Матфе́я, зача́ло 10.
По 50-м псалме́ стихи́ра, глас 6.
Подо́бен: Отча́янная:
(Творе́ние святи́теля Афана́сия, епи́скопа Ковро́вскаго:)
Отча́янни есмы́/ жития́ ра́ди/ и не и́мамы нра́ва доброде́тельна,/ я́ко ми́ро, прино́сим Ти, Го́споди,/ моли́твы святы́х сро́дников на́ших./ Не отве́ржи Русь издре́вле Святу́ю,/ ны́не же грехо́в на́ших ра́ди лю́те стра́ждущую./ Не пре́зри сле́зы ве́рных сыно́в,/ коле́н свои́х пред Ваа́лом не преклоня́вших/ и и́хже не порази́л еси́, согреша́ющих./ Приими́ нас ка́ющихся, Бо́же,// святы́х Твои́х мольба́ми.
Кано́н пра́здника, глас 8. И святы́х кано́н, его́же краегране́сие: Засту́пники земли́ Бря́нския ве́рою чтим. Глас 4.
Песнь 1
Ирмо́с: Мо́ря че́рмную пу́чину/ невла́жными стопа́ми,/ дре́вний пешеше́ствовав Изра́иль,/ крестообра́зныма Моисе́овыма рука́ма,// Амали́кову си́лу в пусты́ни победи́л есть.
Земли́ Бря́нския прозябе́ния, Це́рковию Правосла́вною воспита́нныя,/ во благоче́стии просия́вшия боже́ственныя отцы́ и ма́тери на́ша/ в пе́снех духо́вных согла́сно воспои́м.
Священному́ченика Ку́кшу со ученико́м его́ Ни́коном восхва́лим,/ зе́млю Бря́нскую про́поведию Ева́нгелия просвети́вшия/ и ны́не ку́пно Святе́й Тро́ице предстоя́щия.
Сла́ву княже́ния и оте́чество Христа́ ра́ди оста́вив,/ преподо́бне о́тче наш Нико́ло, Свято́ша имену́емый,/ ве́чное Ца́рство и сла́ву на Небеси́ прия́л еси́,/ иде́же, лику́я, помина́й ве́рою чту́щих тя.
Богоро́дичен: Ты еси́, Богоро́дице, ору́жие на́ше и стена́, и Святе́й Руси́ Засту́пница,/ к Тебе́ ны́не прибега́ем, Тя на моли́тву призыва́ем,/ да изба́виши нас от враго́в на́ших.
Песнь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.
Уби́йц жестосе́рдых, незло́биво му́ки претерпе́в,/ победи́тель яви́лся еси́, кня́же И́горю,/ те́мже благода́ть стяжа́л еси́ от междоусо́бныя бра́ни избавля́ти.
Прииди́те, воспои́м му́ченика Михаи́ла, кня́зя Черни́говскаго,/ с боля́рином ве́рным Фео́дором,/ испове́дания венцы́ украси́вшихся.
Небе́сное Ца́рство восприи́м труда́ми и моли́твами,/ Фео́доре, кня́же Смоле́нский,/ ору́жием моли́тв твои́х и ны́не Оте́чество на́ше охраня́й.
Богоро́дичен: И́мамы о́браз Твой, Блага́я Одиги́трие, в Чу́бковичах сия́ющий,/ зна́мение ми́лости Твоея́ и в ско́рбех утеше́ние,/ и чуде́с исто́чник, Пречи́стая.
Конда́к и и́кос пра́здника.
Седа́лен святы́х, глас 7:
Нощне́й тьме огустева́ющей, умножа́ется зве́здное блиста́ние,/ и к тому́ о́чи заблу́ждших ра́достно возво́дятся./ Та́ко и умно́жившейся на земли́ тьме грехо́вней,/ возведе́м горе́ о́чи на́ши, бра́тие,/ и, сия́ние духо́вных звезд, зе́млю на́шу озаря́ющих, узре́вше,/ к Небе́сному Оте́честву потщи́мся,/ его́же да не лиши́т Госпо́дь нас гре́шных, моли́твами святы́х Свои́х.
Сла́ва, и ны́не, пра́здника.
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не Свое́м,/ досто́йно взыва́ющи:// сла́ва си́ле Твое́й, Го́споди.
Ки́ими словесы́ просла́вим кня́зи благове́рныя, и́же, благоче́стием и ве́рою просия́вше, зе́млю Бря́нскую до́бре упра́виша и оби́тельми и́ноческими украси́ша.
Изше́л еси́, я́ко во́ин Христо́в, на враги́ неви́димыя, преподо́бне кня́же Оле́же,/ и во оби́тели, тобо́ю созда́нней, до́бре подвиза́вся,/ нам мо́щи твоя́ святы́я оста́вил еси́.
Звезду́ Су́ждальскую, от Черни́гова возсия́вшую,/ неве́сту Христо́ву, и́нокиням наста́вницу,/ Евфроси́нию преподо́бную любо́вию да ублажи́м.
Богоро́дичен: Егда́ обыдо́ша град Брянск супоста́ты,/ тогда́ благода́тию Све́нскаго Твоего́ о́браза, Пречи́стая, тех вспять обрати́ла еси́/ и мно́гая и́на чудеса́ от ико́ны Своея́ яви́ла еси́.
Песнь 5
Ирмо́с: Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.
Моли́ Бо́га о нас, святи́телю Феогно́сте, Моско́вский чудотво́рче,/ му́дрость со благоче́стием в житии́ сочета́вый и благослове́ние свое́ земли́ Бря́нской дарова́вый.
Любве́ и смире́ния сокро́вище,/ по́двигов и́ноческих зерца́ло,/ пра́вило ве́ры и благоче́стия яви́лся еси́, святи́телю Феодо́сие Черни́говский,/ те́мже Бог тя ди́вным нетле́нием и чудесы́ моще́й твои́х просла́ви.
Иоа́нна, святи́теля Тобо́льскаго, усе́рдно воспои́м,/ той бо, от Све́нския оби́тели изше́д,/ Сиби́рския страны́ свети́льник яви́ся/ и апо́стольскою ре́вностию и милосе́рдием к стра́ждущим просла́вися.
Богоро́дичен: Балы́кинскою и Мо́лченскою, и Чо́лнскою ико́нами Твои́ми преде́лы Бря́нския освяща́еши, Пречи́стая,/ и по́мощь неоску́дную притека́ющим к ним при́сно источа́еши.
Песнь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости из ребр Твои́х// исте́кшею Кро́вию.
Ра́тниче дерзнове́нный бра́ни Кулико́вския,/ игу́мена земли́ Ру́сския послу́шниче смире́нный,/ Алекса́ндре Пересве́те, страда́льче му́жественный,/ Бря́нскую зе́млю, оте́чество твое́, заступа́й.
Я́ко свети́льник ди́вный в де́бри Бря́нской яви́лся еси́, преподо́бне Полика́рпе,/ мудрова́ние бо и сла́ву мирску́ю презре́в,/ Боже́ственным за́поведем неле́ностне после́довал еси́.
Несумне́нно вся кра́сная ми́ра сего́ оста́вил еси́, преподо́бне Полика́рпе,/ поще́нием и слеза́ми, моли́твами и пе́сньми устремля́яся к Бо́гу,/ и оби́тель и́ноческую во и́мя Спа́са на́шего во гра́де Бря́нске созда́л еси́.
Богоро́дичен: Спору́чнице гре́шных, Всепе́тая Влады́чице,/ ико́ну Твою́ в О́дриной оби́тели чудесы́ просла́вившая,/ я́ко Ма́ти Бо́жия, умоли́ Твои́ми моли́твами Изба́вителя всех,/ да спасе́т ду́ши на́ша.
Конда́к, глас 2:
Засту́пницы те́плии Бря́нския земли́,/ святи́и сро́дницы на́ши,/ ку́пно с Пресвято́ю Богоро́дицею и все́ми святы́ми/ Престо́лу Бо́жию ны́не предстоя́ще,/ моли́твами ва́шими Правосла́вие утверди́те,/ е́реси и раско́лы разори́те,/ Оте́честву на́шему мир// и душа́м на́шим поле́зная испроси́те.
И́кос:
Еде́мскаго рая́ древеса́ добропло́дная и кра́сная яви́шася, святи́и,/ цве́ты благово́нныя уче́ний и плоды́ дел творя́щии,/ от ни́хже ду́ши на́ша пита́ются и глад наш духо́вный утоля́ется,/ прииди́те у́бо, притеце́м под сень их и ублажи́м,/ я́ко земли́ Бря́нския отра́ду и украше́ние, о́браз жития́ и начерта́ние,/ и к ним с любо́вию возопии́м:/ о блаже́ннии сро́дницы на́ши,/ моли́твами ва́шими Правосла́вие утверди́те,/ е́реси и раско́лы разори́те,/ Оте́честву на́шему мир/ и душа́м на́шим поле́зная испроси́те.
Песнь 7
Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми взыва́ху:// благослове́н еси́ в хра́ме сла́вы Твоея́, Го́споди.
Крести́телю Иоа́нну ре́вностию уподо́бился еси́, Фео́доре преподо́бне,/ от ю́ности Бо́гу угоди́в и ско́рби Его́ ра́ди претерпе́в,/ оби́тели Площа́нския воспита́ние и Санакса́рскаго вертогра́да и́ноческаго похвало́,/ моли́ спасти́ся нам.
И́мамы преподо́бных Васили́ска Сиби́рскаго и ученика́ его́ Зоси́му Верхо́вскаго,/ в Бря́нских де́брех нача́ло по́двигов положи́вших,/ я́ко о́браз послуша́ния и пустыннолю́бия,/ и о спасе́нии бли́жних попече́ния.
Яви́стеся наро́да Бо́жия печа́льницы до́блии,/ преподо́бнии ста́рцы О́птинстии Льве, Мака́рие и Моисе́е,/ в оби́телех Бря́нских подвиза́вшиися,/ и нас на путь покая́ния, смире́ния и терпе́ния наста́вите.
Богоро́дичен: Влады́чице Богоро́дице,/ цельбоно́сною Твое́ю ико́ною, Троеру́чицею имену́емою,/ Пу́стынь Белобере́жскую украси́вшая,/ простри́ всемо́щную Твою́ ру́ку на по́мощь правосла́вно Тя велича́ющим.
Песнь 8
Ирмо́с: Ру́це распросте́р Дании́л,/ львов зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.
Его́же носи́л еси́ в се́рдце твое́м, Сло́ва Христа́ Бо́га,/ моли́ за ны, святи́телю Игна́тие богому́дре,/ Правосла́вия побо́рниче, покая́ния и моли́твы наста́вниче,/ архиере́ев украше́ние и мона́шествующих похвало́.
Ра́дуйтеся, священному́ченицы сла́внии Алекса́ндре, Иоа́нне, Митрофа́не, Алекси́е и Корни́лие, во дни гоне́ний безбо́жных ве́ру соблю́дшии и да́же до кро́ве Христа́ ра́ди пострада́вшии.
Архипа́стыри земли́ Орло́вския, му́ченическою кро́вию укра́шенныя, согла́сно воспои́м:/ Серафи́ма митрополи́та, прославле́нию Саро́вскаго чудотво́рца послужи́вшаго,/ и друга́го Серафи́ма добропобе́днаго,/ и до́бляго Мака́рия.
Богоро́дичен: Ю́же воспева́ют А́нгели, просла́вим ны́не Засту́пницу Усе́рдную,/ ико́ну Свою́ оби́тели Площа́нской и всей земли́ Бря́нской в покро́в и огражде́ние дарова́вшую.
Песнь 9
Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся, Христо́с,/ совокупи́вый разстоя́щаяся естества́,// тем, веселя́щеся, Тя, Богоро́дице, велича́ем.
Честны́я иера́рхи, Староду́ба сла́ву,/ Дамаскина́ ре́вностнаго, за Христа́ смерть прие́мшаго,/ и кро́ткаго Никола́я, в Каза́хской земли́ испове́днический путь сконча́вшаго,/ моли́твенники о нас ко Спа́су приво́дим.
Тве́рдо правосла́вную ве́ру я́ко щит держа́ще, святи́и страстоте́рпцы земли́ Бря́нския,/ зло́бу лю́тых отсту́пников и безбо́жных на́глое неи́стовство препобеди́ли есте́/ и нам о́браз терпе́ния и злострада́ния яви́ли есте́.
Именова́ннии и безыме́ннии, явле́ннии и неявле́ннии, святи́и сро́дницы на́ши,/ сла́ву мно́гу от Бо́га прии́мшии,/ утвержде́ние в Правосла́вии и мир Оте́честву на́шему испроси́те/ и спасе́ние душа́м на́шим.
Богоро́дичен: Ма́ти Бо́жия Пречи́стая,/ гра́ды и ве́си земли́ Бря́нския честна́го ли́ка Твоего́ изображе́нии ми́лостивно обогати́вшая,/ благодаре́ние на́ше приими́/ и от вся́каго зла покры́й Оте́чество на́ше.
Свети́лен святы́х:
В пе́снех восхва́лим свети́ла незаходи́мая Бря́нския земли́,/ таи́нники Боже́ственнаго Сло́ва,/ Христа́ сла́вяще, сих просвети́вшаго и возлю́бившаго,/ и помо́щники нам в ско́рбех дарова́вшаго.
Сла́ва, и ны́не, пра́здника.
На хвали́тех стихи́ры пра́здника и святы́х стихи́ры, глас 4.
Подо́бен: Дал еси́ зна́мение:
Дал еси́ зна́мение/ святы́м, боя́щимся Тебе́, Го́споди,/ Крест Твой Честны́й,/ и́мже ти́и, посрами́вше нача́ла и вла́сти тьмы,/ на Бря́нской земли́ Правосла́вие утверди́ша./ Те́мже Твое́ человеколю́бное смотре́ние сла́вим,/ Иису́се Всеси́льне,// Спа́се душ на́ших.
Дал еси́ нам, я́ко о́браз му́жества и терпе́ния,/ святы́я вся земли́ на́шея,/ благоугоди́вшия Тебе́, Господи,/ благи́я и ве́рныя рабы́ Твоя́,/ и́хже слеза́ми, по́двиги и по́ты,/ кровьми́ и уче́нии/ Оте́чество на́ше утверди́ся./ Тех моли́твами,/ Иису́се Всеси́льне,// спаси́ ду́ши на́ша.
От Боже́ственныя благода́ти подви́гшеся,/ честны́я отцы́ на́ша/ сыноле́пно да восхва́лим,/ ти́и бо безстра́стием души́ и ума́ чистото́ю,/ нра́вом кро́тким и благоче́стием/ да́же до кро́ве и сме́рти мучи́телем противоста́ша/ и Христу́ присво́ишася,// Спа́су душ на́ших.
Сла́ва, святы́х, глас 8.
Подо́бен: О, пресла́внаго чудесе́:
Благода́рным се́рдцем и усты́/ хва́лим Тя, Многоми́лостиве Го́споди,/ ди́вен бо яви́лся еси́ во святы́х Твои́х,/ в земли́ Бря́нской богоуго́дне подвиза́вшихся,/ и́хже предста́тели нам дарова́л еси́/ и в ну́ждах засту́пники./ Тем, ны́не соверша́юще па́мять их,/ покланя́емся держа́ве Твое́й, пою́ще:// Тро́ице Свята́я, сла́ва Тебе́!
И ны́не, пра́здника.
Славосло́вие ве́ликое. И отпу́ст.
НА ЛИТУРГИ́И
Блаже́нны от кано́на пра́здника, песнь 8-я, на 4, и святы́х, на 4. Проки́мен, глас 4: Святы́м, и́же суть на земли́ Его́,// удиви́ Госпо́дь вся хоте́ния Своя́ в них. Стих: Сохрани́ мя, Го́споди, я́ко на Тя упова́х. Апо́стол ко Евре́ем, зача́ло 330. Аллилу́ия, глас 4: Бо́же, уши́ма на́шима услы́шахом, и отцы́ на́ши возвести́ша нам. Стих: Спасл еси́ нас от стужа́ющих нам и ненави́дящих нас посрами́л еси́. Ева́нгелие от Матфе́я, зача́ло 11. Прича́стен: Благоволи́т Госпо́дь в лю́дех Свои́х и вознесе́т кро́ткия во спасе́ние.
Моли́тва
О всеблаже́ннии и богому́дрии уго́дницы Бо́жии, по́двиги свои́ми зе́млю Бря́нскую освяти́вшии и телеса́ своя́, я́ко се́мена ве́ры, в ней оста́вльшии, душа́ми же свои́ми Престо́лу Бо́жию предстоя́щии и непреста́нно о ней моля́щиися! Се ны́не, в день о́бщаго ва́шего торжества́, мы гре́шнии, земни́и сро́дницы ва́ши, дерза́ем приноси́ти вам сие́ хвале́бное пе́ние. Велича́ем ва́ша вели́кия по́двиги, духо́внии во́ини Христо́ви, терпе́нием и му́жеством до конца́ врага́ низложи́вшии и нас от пре́лести и ко́зней его́ избавля́ющии. Ублажа́ем ва́ше свято́е житие́, свети́льницы боже́ственнии, све́том ве́ры и доброде́телей светя́щиися и на́ша умы́ и сердца́ богому́дренно озаря́ющии. Прославля́ем ва́ша вели́кая чудеса́, цве́ти ра́йстии, в стране́ на́шей прекра́сне процве́тшии и арома́ты дарова́ний и чуде́с повсю́ду благоуха́ющии. Восхваля́ем ва́шу богоподража́тельную любо́вь, предста́телие на́ши и покрови́телие, и, упова́юще на по́мощь ва́шу, припа́даем к вам и вопие́м: просвети́телие на́ши! Споспешеству́йте лю́дем Бря́нския земли́ завеща́нную ва́ми ве́ру правосла́вную тве́рдо содержа́ти, да спаси́тельное се́мя, ва́ми все́янное, не изсуше́но бу́дет зно́ем неве́рия, но, дожде́м благода́ти Бо́жия напое́нное, плод изоби́льный да принесе́т. Святи́телие Христо́ви! Моли́твами ва́шими утверди́те Це́рковь Ру́сскую, е́реси, раско́лы и нестрое́ния в ней потреби́те, расточе́нныя о́вцы во еди́но собери́те и от вся́ких волко́в, во оде́жди о́вчей в ста́до Христо́во входя́щих, огради́те. Преподо́бнии отцы́! Сохрани́те нас от пре́лестей ми́ра сего́ лука́ваго, да, отве́ргшеся себе́ и взе́мше крест свой, после́дуем Христу́, распина́юще плоть свою́ со страстьми́ и похотьми́, нося́ще тяготы́ друг дру́га. Благове́рнии кня́зие! Воззри́те ми́лостивно на земно́е оте́чество ва́ше и вся нече́стия и собла́зны, в нем ны́не су́щия, ору́жием моли́тв ва́ших потреби́те, да я́коже дре́вле, та́ко и ны́не и в гряду́щее вре́мя, прославля́ется на святе́й земли́ на́шей и́мя Госпо́дне. Страстоте́рпцы пресла́внии! Укрепи́те нас в му́жественнем стоя́нии да́же до кро́ве за ве́ру правосла́вную и обы́чаи отече́ския, да ни скорбь, ни теснота́, ни гоне́ния, ни глад, ни нагота́, ни беда́, ни меч возмо́гут нас разлучи́ти от любве́ Бо́жия, я́же о Христе́ Иису́се, Го́споде на́шем. Богому́дрыя жены́, в немощне́м естестве́ по́двиги ве́лия яви́вшия! Моли́теся, да дух ва́шея любве́ ко Го́споду и ре́вность о угожде́нии Ему́ и о свое́м и бли́жняго спасе́нии не оскуде́ет в нас. Вси святи́и сро́дницы на́ши, от лет дре́вних просия́вшии и в после́дния дни подвиза́вшиися, явле́ннии и неявле́ннии, ве́домии и неве́домии! Посети́те на́шу не́мощь и уничиже́ние и моли́твами ва́шими испроси́те у Христа́ Бо́га на́шего, да и мы, безбе́дно преплы́вше пучи́ну жите́йскую и невреди́мо соблю́дше сокро́вище правосла́вныя ве́ры, приста́нища ве́чнаго спасе́ния дости́гнем и в блаже́нных оби́телех Го́рняго Оте́чества вку́пе с ва́ми и со все́ми угоди́вшими Ему́ от ве́ка святы́ми водвори́мся благода́тию и человеколю́бием Спаси́теля на́шего Го́спода Иису́са Христа́, Ему́же со Преве́чным Отце́м и Пресвяты́м Ду́хом подоба́ет непреста́нное славосло́вие и поклоне́ние от всех ве́рных во ве́ки веко́в. Ами́нь.
