Служба преподобным Александре, Марфе и Елене Дивеевским
Ме́сяца ию́ня в 14-й день
Собо́р Диве́евских святы́х
Преподо́бных Алекса́ндры, Ма́рфы и Еле́ны Диве́евских
НА МА́ЛЕЙ ВЕЧЕ́РНИ
На Го́споди, воззва́х: стихи́ры на 4, глас 2:
Ка́я духо́вная пе́ния/ принесе́м ти, преподо́бная Алекса́ндро,/ я́ко явле́нием тебе́ Цари́цы Небе́сныя/ ме́сто сие́ освяти́ся/ и жре́бием земны́м Ея́ нарече́ся?/ Ты же, ма́ти первонача́льнице,/ мно́гими труды́ в покая́нии сле́знем/ основа́ние оби́тели Диве́евския положи́ла еси́/ и благода́ть Ду́ха Свята́го стяжа́ла еси́./ Ны́не же в черто́зех Небе́сных лику́ющи,// моли́ся о спасе́нии душ на́ших.
Ки́ими недосто́йными усты́/ восхва́лим вселюбе́зную ма́терь на́шу Ма́рфу,/ чистото́ю, кро́тостию, послуша́нием соверше́нным/ во о́трочестве Бо́гу угоди́вшую,/ ди́вную молча́льницу,/ собесе́дницу вели́каго ста́рца Серафи́ма,/ открове́ния того́ о оби́тели Диве́евстей в та́йне храни́вшую,// ны́не же моля́щуюся о спасе́нии душ на́ших?
Ка́ко по досто́инству воспое́м/ ма́терь на́шу Еле́ну,/ па́че земны́я сла́вы и тле́ннаго бога́тства/ Христа́ всем се́рдцем возлюби́вшую,/ до́брым по́двигом подвиза́вшуюся/ и ди́вно нача́льницею Ме́льничныя деви́ческия оби́тели яви́вшуюся,/ ны́не же во Ца́рствии Небе́снем с му́дрыми де́вами лику́ющую// и моля́щуюся о спасе́нии душ на́ших?
Ки́ими похва́льными венцы́/ увенча́ем преподо́бных Алекса́ндру, Ма́рфу и Еле́ну?/ Ты́я бо на Небеси́ Бо́гу во сла́ве предстоя́т,/ на земли́ же ду́хом любве́ с на́ми пребыва́ют// и мо́лятся о спасе́нии душ на́ших.
Сла́ва, глас 3:
Я́ко зве́зды многосве́тлыя,/ украси́сте оби́тель Диве́евскую,/ всечестны́я ма́тери на́ша Алекса́ндро, Ма́рфо и Еле́но,/ вы бо, сия́нии духо́вными сердца́ ве́рных просвеща́юща,// мо́лите Всеми́лостиваго Бо́га спасти́ся душа́м на́шим.
И ны́не, Богоро́дичен, глас то́йже: Ка́ко не диви́мся:
На стихо́вне стихи́ры, глас 1:
Ве́лия по́двиги твоя́ и труды́,/ преподо́бная Алекса́ндро,/ оби́тели Диве́евския основа́тельнице,/ ка́ко просла́вим мы недосто́йнии?/ Те́мже, дух моли́твы чи́стыя стяжа́вши,// моли́ся о ве́рою призыва́ющих тя.
Стих: Ди́вен Бог во святы́х Свои́х,// Бог Изра́илев.
Вели́кий а́нгельский о́браз восприи́мши/ и в приста́нище боже́ственное устреми́вшися,/ подви́жница сла́вная яви́лася еси́,/ преподо́бная ма́ти на́ша Ма́рфо,// те́мже моли́ся о любо́вию чту́щих тя.
Стих: Честна́ пред Го́сподем// смерть преподо́бных Его́.
Ду́шу свою́ за Христа́ полага́ющи/ и послуша́ние соверше́нное показу́ющи,/ житие́м твои́м Бо́гу угоди́ла еси́,/ преподо́бная Еле́но досточу́дная,// те́мже моли́ся о ве́рою сла́вящих тя.
Сла́ва, глас 3:
Ве́ру и́стинную, наде́жду све́тлую и любо́вь богому́друю,/ сия́ три доброде́тели, я́ко сокро́вища духо́вная,/ принесо́ша в дар всех Соде́телю/ пречестны́я ма́тери на́ша,/ Его́же и ны́не в черто́зех Небе́сных прославля́ют,// воспева́юща Тро́ицу Всесвяту́ю.
И ны́не, Богоро́дичен, глас то́йже: Без се́мене:
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры на 8, глас 8.
Подо́бен: О, пресла́внаго чудесе́:
О, пресла́внаго чудесе́!/ Небесе́ и земли́ Цари́ца/ омофо́ром Своея́ ми́лости/ оби́тель Диве́евскую покрыва́ет./ О, та́инств Твои́х, Де́во, и чуде́с Твои́х!/ Ка́ко повеле́нием Твои́м уде́л возлю́бленный явля́еши,/ в не́мже ди́вно просла́вишася/ преподо́бныя Алекса́ндра, Ма́рфа и Еле́на,// земли́ Ру́сския похвала́ и украше́ние?
О преподо́бныя Алекса́ндро, Ма́рфо и Еле́но!/ Вы, во оби́тели Бо́жия Ма́тере/ по́двигом до́брым подвиза́вшася/ и усе́рдно Ей послужи́вша,/ любве́ Боже́ственныя испо́лнилися есте́./ Те́мже непреста́нно моли́теся,/ да и мы еди́неми усты́ и еди́нем се́рдцем/ восхва́лим Тро́ицу Единосу́щную и Неразде́льную,// во е́же спасти́ся душа́м на́шим.
Глас 1:
Преподо́бная ма́ти на́ша Алекса́ндро,/ ты, Боже́ственною благода́тию просвети́вшися/ и мяте́ж ми́ра отве́ргши,/ ева́нгельски Христу́ после́довала еси́,/ Его́же и нищету́ возлюби́ла еси́/ и, те́сным путе́м ше́ствовавши,/ к Богоро́дице в моли́твах неуста́нно пребыва́ла еси́./ Тем и оби́тели Ея́ первонача́льница яви́лася еси́,// нам же Небе́сная засту́пница и богому́драя наста́вница.
Любо́вию восхва́лим труды́ твоя́ и боле́зни,/ преподо́бная ма́ти Алекса́ндро,/ я́ко в ке́лии твое́й те́сней пред Кресто́м Спа́совым/ со слеза́ми но́щию усе́рдно моли́лася еси́/ и, на ка́мень главу́ твою́ полага́ющи,/ оде́ждею ве́тхою в сту́жу покрыва́лася еси́./ Те́мже научи́ нас, богоблаже́нная,/ по сло́ву апо́стола жи́ти,/ ве́дуще Еди́наго Христа́ и Сего́ ра́спята,/ в покая́нии и́стиннем житие́ сконча́ти// и Ца́рствия Небе́снаго дости́гнути.
Глас 4:
Преподо́бная ма́ти на́ша Ма́рфо,/ измла́да Го́спода возлюби́вшая/ и Ему́ усе́рдно послужи́вшая,/ непреста́нную моли́тву Иису́сову стяжа́вшая,/ собесе́днице ю́ная и послу́шнице кро́ткая/ преподо́бнаго Серафи́ма, ста́рца Саро́вскаго,/ и́мже нача́льница Небе́снаго Диве́ева нарече́нная./ Ны́не же, моща́ми во оби́тели твое́й почива́ющи,/ исцеле́ние всем источа́еши,/ ве́рою и любо́вию к тебе́ притека́ющим.// Помяни́ и нас во Ца́рствии Небе́снем.
Преподо́бная ма́ти на́ша Ма́рфо,/ ты, благода́тию Свята́го Ду́ха блиста́ющи/ и Жениха́ Христа́ от ю́ности возжеле́вши,/ всю себе́ в же́ртву Тому́ принесла́ еси́./ Ны́не же, на Небесе́х ра́дующися/ и ве́лие дерзнове́ние ко Го́споду име́ющи,/ моли́ся от бед изба́витися// любо́вию тя велича́ющим.
Преподо́бная ма́ти на́ша Еле́но,/ ты, я́ко звезда́ у́тренняя, све́тло просия́вши,/ послуша́нием, смире́нием и моли́твою/ благода́ть Ду́ха Свята́го стяжа́ла еси́/ и да́же до сме́рти во́ли Бо́жией покори́лася еси́./ Те́мже, вся ко́зни диа́вольския победи́вши,/ оби́тели ра́йския пре́жде кончи́ны лицезре́ти сподо́билася еси́/ и, мно́гими венцы́ украше́нная,/ а́нгельскаго чи́на дости́гла еси́.// Моли́ся о спасе́нии душ на́ших.
А́нгельский о́браз восприи́мши,/ всено́щно в моли́твах пребыва́ла еси́,/ и в хра́ме Рождества́ Богоро́дицы/ по за́поведи преподо́бнаго Серафи́ма/ псалмы́ неуста́нно воспева́ла еси́,/ и пресве́тлый храм Ду́ха Свята́го/ ду́шу твою́, ма́ти Еле́но, сотвори́ла еси́./ Те́мже усе́рдно моли́ Христа́ Бо́га,/ е́же просвети́тися нам све́том Боже́ственныя благода́ти// и спасти́ся душа́м на́шим.
Сла́ва, глас 6:
Прииди́те, ве́рнии лю́дие,/ во святу́ю оби́тель Диве́евскую,/ я́же земны́й жре́бий Бо́жия Ма́тере нарица́ется,/ ублажи́м избра́нницы Пресвяты́я Влады́чицы Богоро́дицы,/ Алекса́ндру, Ма́рфу и Еле́ну,/ нача́льницы свята́го ме́ста сего́,/ и, припа́дающе к их честны́м и многоцеле́бным моще́м,/ усе́рдно возопии́м:// помяни́те нас, ма́тери на́ша, во Ца́рствии Небе́снем.
И ны́не, Богоро́дичен, глас то́йже: Кто Тебе́ не ублажи́т:
Вход. Проки́мен дне. И чте́ния три му́ченическая.
На стихо́вне стихи́ры, глас 4:
Прииди́те, мона́хов мно́жество,/ единоду́шно просла́вим преподо́бных Алекса́ндру, Ма́рфу и Еле́ну/ и к ним те́пле возопии́м:/ во Христа́, всехва́льныя, обле́кшася,/ духо́вною благода́тию просвеща́емыя,/ я́ко зве́зды многосве́тлыя,/ в ми́ре просия́ли есте́,/ те́мже моли́те Тро́ицу Единосу́щную// о спасе́нии душ на́ших.
Стих: Ди́вен Бог во святы́х Свои́х,// Бог Изра́илев.
Е́же люби́ти Бога и бли́жняго,/ весь зако́н исполня́ется, рече́ Христо́с./ Вы же, преподо́бныя, Творца́ всех возлюби́вша,/ за́поведь сию́ испо́лнили есте́./ Та́ко и нам помози́те в любви́ Бо́жией утверди́тися// и улучи́ти спасе́ние душ на́ших.
Стих: Честна́ пред Го́сподем// сме́рть преподо́бных Его́.
Прииди́те, вси лю́дие,/ просла́вим преподо́бных ма́терей Диве́евских,/ многоцеле́бныя мо́щи тех обстоя́ще, любе́зно облобыза́им/ и, я́ко цве́ты, пе́сньми увязе́м, реку́ще:/ о тепле́йшия на́ша предста́тельницы,/ моли́те Тро́ицу Святу́ю// о спасе́нии душ на́ших.
Сла́ва, глас 3:
Алекса́ндру ди́вную восхва́лим,/ Ма́рфу кро́ткую и Еле́ну сла́вную воспои́м,/ собо́р жен Диве́евских предначина́ющих,/ и, сих по́двиги и труды́ прославля́юще,/ доброде́телем поревну́им, Христу́ взыва́юще:/ Го́споди, моли́твами обру́чниц Твои́х,// Ца́рствия Твоего́ прича́стники нас сотвори́.
И ны́не, Богоро́дичен, глас то́йже: Без се́мене:
Тропа́рь, глас 4:
Яви́лися есте́ земли́ Ру́сския украше́ние,/ нача́льницы оби́тели Диве́евския,/ преподо́бныя ма́тери на́ша Алекса́ндро, Ма́рфо и Еле́но,/ благослове́ние Цари́цы Небе́сныя испо́лнившия/ и дерзнове́ние ко Го́споду стяжа́вшия,/ моли́теся у Престо́ла Пресвяты́я Тро́ицы// о спасе́нии душ на́ших.
Сла́ва, и ны́не, Богоро́дичен, глас то́йже: Е́же от ве́ка утае́ное:
НА У́ТРЕНИ
По 1-м стихосло́вии седа́лен, глас 1:
Возсия́вши я́ко звезда́ у́тренняя, па́мять честны́х жен Диве́евских просвеща́ет, я́ко со́лнце све́тлое, жи́тельствующих на ме́сте сем и согрева́ет сердца́ мона́шествующих, я́же житию́ их по́стническому подража́ют.
Сла́ва, и ны́не, Богоро́дичен:
Я́ко пти́ца своя́ птенцы́ собира́ет и покрыва́ет ма́терски, та́ко Ты, Пречи́стая, покры́й крило́ма Твои́ма вся, во оби́тели Твое́й жи́тельствующих, и изба́ви от вся́ких бед и скорбе́й, и возведи́ во град Небе́сный моли́твами Твои́ми.
По 2-м стихосло́вии, седа́лен, глас 1:
Осия́емы ны́не непреста́нною сла́вою Пресвяты́я Тро́ицы и боже́ственнаго весе́лия и ра́дости исполня́емы, богоблаже́нныя ма́тери, о нас моли́теся приле́жно, изба́витися нам му́ки ве́чныя.
Сла́ва, и ны́не, Богоро́дичен:
Благодари́м Тя, Преблагослове́нная Де́во, при́сное промышле́ние о жре́бии Твое́м земне́м иму́щую, я́ко безбе́дны храни́ши зде живу́щия, и вся я́же к по́льзе и спасе́нию нам устроя́еши, подаю́щи мир и ве́лию ми́лость.
Велича́ние:
Ублажа́ем вас,/ преподо́бныя ма́тери на́ша Алекса́ндро, Ма́рфо и Еле́но,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.
Псало́м избра́нный: Терпя́ потерпе́х Го́спода:
По полиеле́и седа́лен, глас 1:
Неве́сты прекра́сныя черто́га Ца́рскаго, преподо́бныя Алекса́ндро, Ма́рфо и Еле́но, вы, послуша́нию, воздержа́нию и моли́тве навы́кша, во оби́тели Диве́евстей просия́ли есте́ и ми́лость от Го́спода улучи́ли есте́. Те́мже моли́теся приле́жно о спасе́нии душ на́ших.
Сла́ва, и ны́не, Богоро́дичен:
Мно́гими содержи́ми напа́стьми, во вся́кой ско́рби и обстоя́нии к Тебе́ прибега́ем, Пресвята́я Богоро́дице, моле́бное пе́ние Тебе́, по за́поведи преподо́бнаго Серафи́ма, принося́ще: О Ма́ти Сло́ва и Де́во, от тя́жких и лю́тых нас спаси́!
Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 104.
По 50-м псалме́ стихи́ра, глас 6:
Пе́сни духо́вныя принося́ще,/ днесь умиле́нно вопие́м вам,/ уго́дницы Христо́вы Алекса́ндро, Ма́рфо и Еле́но,/ земли́ на́шея похвало́/ и оби́тели Диве́евския украше́ние,/ моли́теся о нас, любо́вию вас почита́ющих,// да насле́дницы бу́дем Ца́рствия Небе́снаго.
Кано́н, глас 8.
Песнь 1
Ирмо́с: Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре:/ Изра́иля же беглеца́, пешехо́дца спасе́,// песнь Бо́гови воспева́юща.
Припе́в: Преподо́бныя ма́тери на́ша Алекса́ндро, Ма́рфо и Еле́но, моли́те Бо́га о нас.
Пода́ждь ми, Го́споди, словесе́ дар, да в пе́снех просла́влю жен честны́х, во́лю Твою́ соблю́дших и во уде́ле Ма́тере Твоея́ во благоче́стии просия́вших.
Диве́евских жен свято́е собра́ние пе́сньми почти́м, благослове́ние Пресвяты́я Де́вы испо́лнивших, я́же ны́не суть на́ша те́плыя предста́тельницы и моли́твенницы непреста́нныя о спасе́нии душ на́ших.
Возсия́вша я́ко со́лнце, мона́шеским житие́м украси́сте подви́жническая мно́жества, преподо́бныя ма́тери на́ша. Те́мже с ни́ми прославля́етеся, наслажда́ющася сла́вы Боже́ственныя и моля́щася о спасе́нии душ на́ших.
Богоро́дичен: Ра́дуйся, Пресвята́я Госпоже́, освяти́вшая весь Диве́евскую Твои́м прише́ствием; ра́дуйся, насади́вшая ве́ру и́стинную. Ра́дуйся, собра́вшая мона́шествующих мно́жество.
Песнь 3
Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.
Оби́тели первонача́льницу в пе́снех воспои́м, Алекса́ндру сла́вную, да́вшую мона́шествующим о́браз и начерта́ние во бде́ниих и моли́твах.
Подоба́ет по достоя́нию восхвали́ти преподо́бную Ма́рфу, отрокови́цу непоро́чную и досточу́дную, Небе́снаго Диве́ева нача́льницу.
Да почти́м днесь и преподо́бную Еле́ну, де́вственными добро́тами просвети́вшуюся и Жениху́ Небе́сному уневе́стившуюся!
Богоро́дичен: Ра́дуйся, во уде́л Себе́ Диве́ево избра́вшая; ра́дуйся, ве́рным, пребыва́ющим зде, Пода́тельнице благ земны́х. Ра́дуйся, Спору́чнице ве́чнаго спасе́ния.
Седа́лен, глас 6:
О преподо́бныя жены́! Кто́ изочте́т по́двиги ва́ша? Кто испове́сть моли́твы ва́ша и воздыха́ния, терпе́ние, кро́тость и смире́ние, ми́ра и пло́ти отверже́ние, и к Бо́гу соверше́нную любо́вь? Недоуме́ем бо благохвали́ти вас по достоя́нию, оба́че, пе́ние сие́ принося́ще, к вам припа́даем и вопие́м: Христа́ Бо́га усе́рдно моли́те низпосла́ти душа́м на́шим мир и ве́лию ми́лость.
Сла́ва, и ны́не, Богоро́дичен:
Спаси́ от бед рабы́ Твоя́, Богоро́дице, я́ко вси по Бо́зе к Тебе́ прибега́ем, я́ко неруши́мей стене́ и предста́тельству.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.
Преподо́бная Алекса́ндро, ты, бога́тство и сла́ву ми́ра сего́ отве́ргши, путе́м ско́рбным ко спасе́нию потекла́ еси́, ве́лию любо́вь ко Го́споду явля́ющи.
Преподо́бная Ма́рфо, собесе́днице до́брая и послу́шнице смире́нная ста́рца Серафи́ма, ты, посто́м и моли́твою стра́сти умертви́вши, в безстра́стных све́тлостех водвори́лася еси́, смире́ние соверше́нное показу́ющи.
Преподо́бная Еле́но, благоче́стием украси́вшися, благослове́ние ста́рца Серафи́ма на жи́тельство во оби́тели терпели́во ожида́ла еси́, терпе́нием твои́м всех удивля́ющи.
Богоро́дичен: Ра́дуйся, те́плая Хода́таице о подвиза́ющихся во оби́тели Твое́й; ра́дуйся, ми́лость Сы́на Твоего́ до сконча́ния ве́ка нам обеща́вшая. Ра́дуйся, Засту́пнице ро́да христиа́нскаго.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма окая́ннаго?/ Но обрати́ мя, и к све́ту за́поведей Твои́х// пути́ моя́ напра́ви, молю́ся.
Богоро́дицу очи́ма твои́ма ви́девши и обетова́ния о оби́тели Диве́евстей услы́шати от Нея́ сподо́бившися, бога́тыми да́ры Ду́ха Свята́го просия́ла еси́, Алекса́ндро богоблаже́нная, по́двиг моли́твы непреста́нныя соверша́ющи.
Измла́да Го́спода возлюби́вши, во оби́тели изря́дно потруди́лася еси́ и в молча́нии непреста́нно пребыва́ла еси́, Ма́рфо досточу́дная, открове́ния бу́дущаго благоде́нствия оби́тели Диве́евския в та́йне сохраня́ющи.
В послуша́нии церко́внем пребыва́ющи, вся запове́данная ти преподо́бным Серафи́мом ре́вностно соблюда́ла еси, Еле́но достохва́льная.
Богоро́дичен: Ра́дуйся, Де́во, я́ко благослове́нием Твои́м осени́ Диве́ево си́ла Вы́шняго; ра́дуйся, я́ко оби́тель Твоя́ напо́лнися подвиза́ющимися. Ра́дуйся, я́ко просия́ зде мно́жество преподо́бных, моля́щихся о спасе́нии душ на́ших.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.
Смире́ние соверше́нное иму́щи, и любо́вь нелицеме́рную, и слез исто́чник непреста́нный, се́рдце твое́ оби́тель Ду́ха Свята́го соде́лала еси́, ма́ти Алекса́ндро. Те́мже и нам помози́ очи́ститися от скве́рны грехо́вныя.
Преподо́бнаго Серафи́ма воспита́ние, безпло́тная во пло́ти Ма́рфо досточу́дная, огнь Боже́ственныя любве́ в души́ свое́й иму́щи, Небе́сному Жениху́ уневе́стилася еси́.
Го́спода лицезре́ти сподо́билася еси́, преподо́бная Еле́но, ви́девши Его́, я́ко огнь неизсле́димый, и Небе́сныя оби́тели пре́жде кончи́ны твоея́ Пресвята́я Де́ва неизрече́нно ти показа́.
Богоро́дичен: Ра́дуйся, я́ко насле́дие Твое́ при́сно призира́еши; ра́дуйся, я́ко благода́ти и ми́лости Своея́ нас сподобля́еши. Ра́дуйся, благослове́ние Сы́на Твоего́ на нас низводя́щая.
Конда́к, глас 8:
Диве́евстии свети́льницы всесве́тлии,/ преподо́бныя ма́тери на́ша Алекса́ндро, Ма́рфо и Еле́но,/ вы в посте́, бде́нии и моли́тве до́бре подвиза́стеся,/ по кончи́не же ва́шей источе́нием чуде́с/ к вам прибега́ющих освяща́ете и исцеля́ете./ Моли́теся ко Го́споду грехо́в оставле́ние дарова́ти// любо́вию чту́щим святу́ю па́мять ва́шу.
И́кос:
О, коль добро́ соедине́ние ва́ше, ма́тери богому́дрыя! О, коль красе́н и сла́док сей о́бщий ваш пра́здник, в не́мже вы, в Диве́евстей оби́тели просия́вшия, о́бщее хвале́ние прие́млете! Подоба́ет бо во еди́нем ме́сте Го́сподеви угоди́вшим во еди́н день пра́здновати! Сего́ ра́ди и мы, мона́си и мирсти́и, по до́лгу вас ублажа́ем, вопию́ще: ме́сто сие́, в не́мже пожи́сте, и всю Ру́сскую зе́млю от вся́каго зла спаса́йте и моли́теся ко Го́споду грехо́в оставле́ние дарова́ти любо́вию чту́щим святу́ю па́мять ва́шу.
Песнь 7
Ирмо́с: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.
Вели́кую схи́му пред кончи́ною восприи́мши, Алекса́ндра нарече́на бысть, преподо́бная ма́ти, е́же защи́тница имену́ется. Вои́стину бо во́инство де́монское победи́ла еси́ и по́честь побе́ды прия́ла еси́, пою́щи: благослове́н еси́, Го́споди Бо́же, во ве́ки.
Вели́кий о́браз а́нгельский от руку́ ста́рца Серафи́ма прия́ла еси́, Ма́рфо досточу́дная, Еди́наго Жениха́ Небе́снаго всем се́рдцем возлюби́ла еси́, воспева́ющи: благослове́н еси́, Го́споди Бо́же, во ве́ки.
Жела́ние ве́лие к житию́ мона́шескому име́ла еси́, преподо́бная ма́ти Еле́но, те́мже, во и́ночество облече́нная, по́двиги твоя́ усугу́била еси́, пою́щи: благослове́н еси́, Го́споди Бо́же, во ве́ки.
Богоро́дичен: Ра́дуйся, оби́льных даро́в рабо́м Твои́м Всеще́драя Пода́тельнице; ра́дуйся, в боле́знех и труде́х их премилосе́рдая Уте́шительнице. Ра́дуйся, наде́ждо и спасе́ние душ на́ших.
Песнь 8
Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.
Пресвята́я Де́ва Богоро́дица ди́вно упра́ви отше́ствие твое́ от жития́ сего́ вре́меннаго, преподо́бная Алекса́ндро, ты бо, в час кончи́ны Святы́х Христо́вых Та́ин приобщи́вшися и Каза́нскую ико́ну на пе́рси возложи́вши, ду́шу святу́ю в ру́це Бо́жии предала́ еси́, зову́щи: благослови́те Го́спода во ве́ки.
Пла́каше преподо́бный Серафи́м, кончи́ну блаже́нныя Ма́рфы ду́хом предуве́девый, до́ндеже узре́ ду́шу ея́ во Ца́рствии Небе́снем, воспева́ющую: благослови́те Го́спода во ве́ки.
Ду́шу свою́ за Христа́ положи́вши и послуша́ние да́же до сме́рти испо́лнивши, в ю́ных ле́тех преста́вилася еси́, преподо́бная Еле́но, песнь побе́дную вопию́щи: благосло́вите Го́спода во ве́ки.
Богоро́дичен: Ра́дуйся, Храни́тельнице на́ша в настоя́щем ве́це; ра́дуйся, Предста́тельнице и непосты́дное упова́ние в бу́дущем. Ра́дуйся, прило́г вся́каго зла от уде́ла Своего́ земна́го отража́ющая.
Песнь 9
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.
Преподо́бныя ма́тери на́ша, Цари́цы Небе́сныя и́стинныя послу́шницы, вы, нача́ла тьмы посо́бием Ея́ победи́вша, плоть умертви́вша и дух оживи́вша, благода́ти Боже́ственное де́йство прия́ли есте́. Не преста́йте моля́щася за ны ко Го́споду, поми́ловатися душа́м на́шим.
Ра́дуйся, оби́теле Диве́евская, покрови́тельниц таковы́х на Небеси́ иму́щи, я́же моща́ми свои́ми в хра́ме Пресвяты́я Богоро́дицы почива́ют и исцеле́ний благода́ть источа́ют в моли́тве к ним прибега́ющим.
Лику́й ны́не, земле́ Нижегоро́дская, и весели́ся, се бо ча́да твоя́ Христу́ приведо́шася, я́же суть моли́твенницы непреста́нныя о нас ко Го́споду.
Тро́ичен: Приими́, Всесвята́я Тро́ице, и́хже Диве́евская оби́тель прино́сит Ти, я́ко нача́тки, же́ртвы избра́нныя, преподо́бныя Алекса́ндру, Ма́рфу и Еле́ну, и моли́твами их от вся́каго зла всех нас сохрани́.
Богоро́дичен: Пе́сни благода́рственныя прино́сим Ти, Ма́ти Бо́жия, я́ко спаса́еши нас при́сно от вся́ких бед и скорбе́й и любо́вию врачу́еши не́мощи на́ша.
Свети́лен:
Ра́дуйся, сла́вная оби́теле Диве́евская, моли́твенницы иму́щи в тебе́ просия́вшия, преподо́бныя ма́тери на́ша Алекса́ндру, Ма́рфу и Еле́ну, днесь моля́щияся приле́жно, о е́же изба́витися нам от вся́кия ну́жды и печа́ли.
Сла́ва, и ны́не, Богоро́дичен:
Ра́дуйся, Присноде́во, прорече́ние Твое́, я́ко ме́сто сие́ свя́то бу́дет, ви́дим днесь исполня́емо, подвиза́вшияся бо в ней преподо́бныя ма́тери на́ша, и́хже днесь почита́ем, яви́шася вои́стину свя́ты и, я́ко невеще́ственнии а́нгели на земли́ пожи́вша, Ца́рствие Небе́сное улучи́ша.
На хвали́тех стихи́ры на 4, глас 5.
Подо́бен: Ра́дуйся, Живоно́сный Кре́сте:
Ра́дуйся, пресла́вная оби́теле Диве́евская,/ процве́тшая доброде́тельми моли́твенниц усе́рдных,/ преподо́бных Алекса́ндры, Ма́рфы и Еле́ны,/ к ни́мже припа́даем, те́пле взыва́юще:/ ра́дуйтеся, красото́ю любве́ сердца́ на́ша украша́ющия,/ к долготерпе́нию и му́жеству призыва́ющия,/ уверя́юща, я́ко ничто́же возмо́жет разлучи́ти ны от любве́ Бо́жия./ И ны́не, ве́чныя ра́дости и весе́лия сподо́бльшияся,/ свети́льницы свои́ возже́гша, с му́дрыми де́вами ра́дуетеся./ Дади́те же и нам от еле́я ва́шего, ма́тери на́ша,/ во е́же не себе́ люби́ти,/ но бли́жним свои́м послужи́ти// во спасе́ние душ на́ших.
Ра́дуйтеся, нача́льницы оби́тели Диве́евския:/ преподо́бная ма́ти Алекса́ндро, первонача́льнице,/ повеле́ние Преблагослове́нныя Влады́чицы испо́лнившая/ о святе́й Ея́ оби́тели основа́нии;/ и ты, Ма́рфо, отрокови́це чу́дная,/ Серафи́мовых сиро́т госпоже́ в Диве́еве Небе́снем;/ и ты, Еле́но всехва́льная,/ Ме́льничныя общи́ны ди́вная нача́льнице./ На земли́ сою́зом любве́ связу́емыя,/ на Небесе́х Боже́ственныя све́тлости сподо́бистеся,/ иде́же моли́теся Пресвяте́й Тро́ице,/ дарова́ти душа́м на́шим// мир и ве́лию ми́лость.
Прииди́те, Святы́я Тро́ицы ве́рнии служи́телие,/ земну́ю тро́ицу преподо́бных жен Диве́евских восхва́лим,/ све́том Боже́ственным просвеще́нных,/ и́хже пе́сньми почти́м, си́це взыва́юще:/ ра́дуйтеся, оби́тели на́шея покрови́тельницы,/ дев Диве́евских красото́ и благоле́пие,/ скорбя́щих сла́дкое утеше́ние,/ в беда́х су́щих ско́рое заступле́ние,/ в боле́знех лю́тых врачество́ преизоби́льное,/ и́ноком ти́хое приста́нище./ Ра́дуйтеся, Богоро́дицею избра́нныя,/ не преста́йте о нас моли́тися,// вы бо есте́ засту́пницы на́ша.
Сла́ва, глас 8:
Диве́ево ди́вное,/ укра́шенное моща́ми преподо́бнаго Серафи́ма/ и сотаи́нниц его́, преподо́бных Алекса́ндры, Ма́рфы и Еле́ны,/ уде́л избра́нный Богоро́дицы,/ днесь красу́ется и лику́ет,/ и благода́рне Христу́ Бо́гу вопие́т:// Ты еси́ преподо́бных похва́ла, Всеси́льне.
И ны́не, Богоро́дичен, глас то́йже:
Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.
НА ЛИТУРГИ́И
Блаже́нны от кано́на, пе́сни 3-я и 6-я, на 4. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 208. Аллилу́ия, глас 1: Терпя́ потерпе́х Го́спода, и внят ми, и услы́ша моли́тву мою́. Ева́нгелие от Луки́, зача́ло 33. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О преподо́бныя Алекса́ндро, Ма́рфо и Еле́но, подви́жницы Христо́вы, и́нокинь Диве́евских наста́вницы и всех прибега́ющих к вам ско́рыя помо́щницы! Вы, от ю́ности Бо́га возлюби́вша, и́ноческаго жития́ возжела́ли есте́ и моли́твами и наставле́нии преподо́бнаго Серафи́ма Саро́вскаго оби́тель Диве́евскую устро́или есте́. В не́йже усе́рдно потруди́вшася, моли́твою, посто́м и бде́нием сердца́ очи́стили есте́ и о́браз благонра́внаго жития́ показа́ли есте́. Те́мже, я́ко име́юща дерзнове́ние ко Всеми́лостивому Спа́су и Преблагослове́нней Влады́чице Богоро́дице, И́же и ме́сто сие́ благослови́ша, не оста́вите оби́тель сию́ святу́ю и и́нокинь, ча́ющих ва́шея по́мощи и заступле́ния. Сохрани́те оте́чество на́ше земно́е от вся́ких бед и напа́стей, междоусо́бныя бра́ни и наше́ствия иноплеме́нников. Нам же, почита́ющим вас любо́вию, да́руйте мир и единомы́слие, да, ва́шими моли́твами соблюда́еми и сохраня́еми, испове́дуем Святу́ю Тро́ицу, Отца́, и Сы́на, и Свята́го Ду́ха. Ами́нь.
