Служба преподобноисповеднику Агапиту Оптинскому
Ме́сяца ию́ля в 5-й день
Преподобноиспове́дника Ага́пита О́птинскаго
НА ВЕЧЕ́РНИ
На Го́споди, воззва́х: стихи́ры, глас 4.
Подо́бен: Свы́ше зван:
Свы́ше провиде́нием Всеви́дца/ уловле́н был еси́, свя́те Агáпите,/ и, прише́д во оби́тель О́птинскую,/ от безбо́жных разоря́ему,/ храни́ти писа́ния святооте́ческая поста́влен был еси́,/ из ни́хже спаси́тельную сла́дость Христо́ва уче́ния позна́в,/ в весе́лии Человеколю́бцу Бо́гу возопи́л еси́:// сла́ва Тебе́, показа́вшему нам свет.
Су́етная мудрова́ния совопро́сников ве́ка сего́ оста́вил еси́,/ и я́ко ветр отмета́ет ли́ствия с древе́с,/ та́ко ты, свя́те Агáпите,/ пристра́стия мирска́я оттря́сл еси́,/ ве́трилом же Ду́ха Свята́го направля́емь,/ приста́нища и́ноческаго зва́ния дости́гл еси́,/ в не́мже благоче́стно пожи́в,// кончи́ны испове́дническия сподо́бился еси́.
Тве́рдым ра́зумом твои́м, блаже́нне Агáпите,/ власте́м богобо́рческим противуста́л еси́,/ му́дростию же и му́жеством укра́шен,/ тщету́ неве́рия обличи́л еси́,/ и, я́ко и́стинный сын Це́ркве Ру́сския,/ ве́ры ра́ди пострада́ти восхоте́л еси́,/ и Христо́в подо́бник яви́лся еси́,// Его́же моли́ спасти́ и просвети́ти ду́ши на́ша.
Сла́ва, преподо́бнаго Се́ргия.
И ны́не, догма́тик.
На стихо́вне стихи́ры преподо́бнаго Се́ргия.
Сла́ва, преподобноиспове́дника Ага́пита, глас 6:
Я́ко кни́жник богому́дрый,/ му́дростию ве́тхою обогаще́н,/ му́дрости но́выя взыска́л еси́,/ в не́йже Прему́дрость Ипоста́сную, Христа́ Бо́га на́шего, обре́л еси́,/ Его́же пред безбо́жными испове́дал еси́,/ сего́ ра́ди темни́чная заключе́ния и изгна́ния претерпе́в,/ венце́м испове́дническим венча́лся еси́,/ преподо́бне Агáпите,// моли́ о душа́х на́ших.
И ны́не, Богоро́дичен, глас то́йже: Творе́ц и Изба́витель мой, Пречи́стая:
Тропа́рь, глас 2:
Возгоре́вся любо́вию ко Христу́ Бо́гу,/ ве́ру правосла́вную пред безбо́жными испове́дал еси́,/ преподобноиспове́дниче Агáпите,/ и, гоне́ние великоду́шне претерпе́в,/ прича́стник светоно́снаго со́нма О́птинскаго соде́лался еси́,// с ни́миже моли́ся о душа́х на́ших.
НА У́ТРЕНИ
По 1-м стихосло́вии седа́лен, глас 8.
Подо́бен: Прему́дрости:
Житие́ твое́ преподо́бно бысть и сло́во прему́дрости испо́лнено, Агáпите доблему́дре, ты бо, нрав кро́ток и незло́бие име́я, щито́м ве́ры вооружи́лся еси́ и, богобо́рцев не убоя́вся, венце́м испове́дническим от Христа́ Бо́га венча́лся еси́. Его́же моли́ от прегреше́ний и бед изба́вити чту́щих святу́ю па́мять твою́.
Сла́ва, и ны́не, Богоро́дичен:
Я́ко Де́ву и еди́ну в жена́х, Тя без се́мене ро́ждшую Бо́га пло́тию, вси ублажа́ем ро́ди челове́честии: огнь бо всели́ся в Тя Божества́, и я́ко Младе́нца пита́еши Зижди́теля и Го́спода. Тем А́нгельский собо́р и челове́ческий род досто́йно сла́вим пресвято́е Рождество́ Твое́, и согла́сно вопие́м Ти: моли́ Христа́ Бо́га, прегреше́ний оставле́ние дарова́ти, досто́йно пою́щим сла́ву Твою́.
По 2-м стихосло́вии седа́лен, глас 4.
Подо́бен: Яви́лся еси́:
В поще́нии иску́сен быв, во испове́дании же непоколеби́м, ве́рныя твои́ми по́двиги укрепи́л еси́, преподо́бне Агáпите, те́мже тя вси согла́сно ублажа́ем.
Сла́ва, и ны́не, Богоро́дичен:
Наде́ждо непосты́дная наде́ющихся на Тя, Богома́ти, еди́на ро́ждшая па́че естества́ пло́тию Христа́ Бо́га на́шего. Того́ со святы́ми преподобному́ченики моли́, пода́ти Оте́честву на́шему в ве́ре правосла́вней утвержде́ние, и всем нам пре́жде конца́ жития́ исправле́ние.
Кано́н, глас 1,
его́же краегране́сие: Любви́ тезоимени́тому песнь прино́сится.
Песнь 1
Ирмо́с: Пои́м песнь но́вую Бо́гу,/ от рабо́ты фарао́новы/ изба́вльшему сы́ны Изра́илевы,/ и в пусты́ни ты́я препита́вшему,// я́ко сла́вно просла́вися.
Лучи́ твоея́ любве́ низпосли́ мне, Агáпите, твоя́ до́блести начина́ющу пе́ти, и возгре́й се́рдце мое́ теплото́ю Ду́ха, да ра́дуяся сла́влю тя.
Ю́ность твою́, свя́те Агáпите, уче́нию вдав, бога́тство зна́ния, я́ко вене́ц, на чело́ восприя́л еси́, оба́че Прему́дростию Бо́жиею привле́кся, мона́шеское любому́дрие избра́л еси́.
Бо́льши сея́ любве́ никто́же и́мать, да кто ду́шу свою́ положи́т за дру́ги своя́. Сия́ глаго́лы Госпо́дня услы́шав, свя́те Агáпите, де́лом испо́лнил еси́ и Ца́рствия Небе́снаго дости́гл еси́.
Богоро́дичен: Во́инство земно́е оста́вив, во́инству и́ноческому сопричта́лся еси́, Агáпите, и, пра́выми стезя́ми святы́х оте́ц ше́ствуя, Бо́га просла́вил еси́, от Де́вы ро́ждшагося на спасе́ние на́ше.
Песнь 3
Ирмо́с: Утверди́ мене́, Христе́,/ на недви́жимом ка́мени за́поведей Твои́х,/ и просвети́ мя све́том лица́ Твоего́:/ несть бо свят па́че Тебе́,// Человеколю́бче.
И́стое се́мя ева́нгельское бразда́ми душе́вными прии́м, ра́лом поста́ и моли́твы сия́ возде́лал еси́, блаже́нне Агáпите, и клас стори́чествующий прозя́бл еси́.
Тре́звый ум, душе́вное благоро́дие, нрав смире́нный, любо́вь неотпа́дающую и ве́ру непоколеби́мую трудолю́бне в житии́ стяжа́в, Агáпите, сия́ я́ко духо́вное бога́тство Христу́ прине́сл еси́.
Его́же возлюби́л еси́, Его́же вожделе́л еси́, Сего́ в гоне́ниих и ско́рбех ве́ры ра́ди обре́л еси́, Христа́ Жизнода́вца и Спа́са душ на́ших.
Богоро́дичен: Зако́н и проро́цы преднапису́ют боговмести́мую Твою́ утро́бу, Пречи́стая Де́во, я́ко скрижа́ли и ста́мну, и дверь запеча́тану, и кади́льницу злату́ю, и купину́, огне́м Божества́ неопа́льную.
Седа́лен, глас 8.
Подо́бен: Прему́дрости:
Жите́йскую му́дрость пости́гнув и в зва́нии во́инстем до́бре Оте́честву послужи́в, к све́ту ева́нгельскому прини́кл еси́ и, собла́зны ми́ра сего́ отри́нув, полку́ О́птинских отце́в вво́инился еси́, богому́дре Агáпите. С ни́миже ны́не Престо́лу Бо́жию предстоя́, моли́ грехо́в проще́ние дарова́ти нам, пра́зднующим любо́вию святу́ю па́мять твою́.
Сла́ва, и ны́не, Богоро́дичен:
В напа́сти многоплете́нныя впад от враг ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно, моли́ся приле́жно о всех рабе́х Твои́х, непреста́нно моля́щихся Ти, Богоро́дице Пречи́стая, моля́щи Его́ при́сно, согреше́ний оставле́ние дарова́ти воспева́ющим досто́йно сла́ву Твою́.
Песнь 4
Ирмо́с: Слух Твой, Го́споди, услы́шах, и убоя́хся,/ дела́ Твоя́ разуме́х, и ужасо́хся:/ я́ко Бог, пре́жде век Сый,// от Де́вы рожде́йся, бысть Челове́к.
О́птинскаго вертогра́да страж неусы́пный в пе́снех да похва́лится днесь, Ага́пит испове́дник велему́дрый, сей бо, плоды́ благоче́стия собра́в, наде́ждею благо́ю обогати́лся есть.
Изгна́ние и го́рькия рабо́ты Христа́ ра́ди претерпе́в, страда́ний вре́менных не убоя́лся еси́, преподо́бне Агáпите, и Христа́ пред мучи́тели дерзнове́нно испове́дал еси́.
Мирску́ю ле́поту ни во что́же вмени́л еси́, блаже́нне Агáпите, егда́ Украси́теля всех Бо́га позна́л еси́, и Того́ велеле́пных дел провозве́стник богому́дрый яви́лся еси́.
Богоро́дичен: Ели́цы во Христа́ крести́шася, покро́в ми́лостей Твои́х восприя́ша, Богома́ти, сего́ ра́ди Арха́нгельский глас вопие́м Ти, Чи́стая: ра́дуйся, Благода́тная, Госпо́дь с Тобо́ю.
Песнь 5
Ирмо́с: Свет Твой, Го́споди, и и́стину Твою́ низпосли́,/ е́же наста́вити нас на повеле́ния Твоя́,// и да́руй нам мир Твой, Человеколю́бче.
Наста́вники себе́ избра́л еси́ ста́рцы О́птинския, и́хже житию́ после́дуя, в гоне́ниих и ско́рбех ве́ру сохрани́л еси́, и Христа́ просла́вил еси́.
И́ноческия обе́ты до́бре соблюда́я, с наста́вником твои́м преподо́бным Ни́коном изгна́ние, ско́рби и лише́ния му́жественне поне́сл еси́, Агáпите, воспева́я Го́спода Человеколю́бца.
Тве́рдость во испове́дании правосла́вныя ве́ры пред безбо́жными яви́л еси́, страда́льче Агáпите, сего́ ра́ди ти́и на изгна́ние осуди́ша тя и в темни́цу затвори́ша.
Богоро́дичен: От зе́млена у́бо существа́ Ада́мова я́ко ветвь возросла́ еси́, Богома́ти, Цвет же, Христа́ Го́спода, кроме́ земноро́дна де́лателя прозябла́ еси́. Сего́ ра́ди вси в пе́снех Тя велича́ем.
Песнь 6
Ирмо́с: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния./ Спаси́ лю́ди Твоя́, Бо́же наш:// Ты бо кре́пость немощству́ющих и исправле́ние.
Мона́шеския оде́жды я́ко бра́чную ри́зу наде́л еси́, Агáпите, егда́ яви́шася к тебе́ безбо́жнии, и в темни́цу я́ко на бра́чный пир поше́л еси́, испове́дуя Го́спода Человеколю́бца.
У́зы темни́чныя, глад и хлад безро́потно терпя́, Христа́ я́ко и́стиннаго Бо́га испове́дал еси́, Той бо кре́пость есть немощству́ющим и исправле́ние.
Претерпе́л еси́ изгна́ние от оби́тели, тобо́ю возлю́бленныя, Агáпите, и с духо́вным отце́м твои́м ско́рби мно́гия поне́сл еси́, Христу́ подража́я, Той бо кре́пость есть немощству́ющим и исправле́ние.
Богоро́дичен: Единоро́днаго Сы́на О́тчаго без се́мене де́вственною Твое́ю утро́бою родила́ еси́, еди́на Чи́стая и Благослове́нная. Тем Тя вси ро́ди велича́ем.
Конда́к, глас 2.
Подо́бен: Вы́шних ища́:
Сокрове́нною жи́знию во Христе́ пожи́л еси́,/ преподо́бне Агáпите досточу́дне,/ и, мно́гая страда́ния му́жественне претерпе́в,/ тве́рдым испове́данием ве́ры о́браз благоче́стия яви́л еси́./ Ны́не же Престо́лу Бо́жию предстоя́,/ моли́ Всеблага́го Бо́га,/ Оте́честву на́шему в Правосла́вии утверди́тися// и спасти́ся душа́м на́шим.
И́кос:
Ангелоподо́бными нра́вы украси́вся, мирску́ю му́дрость презре́л еси́, преподо́бне Агáпите, те́мже и по́двиги мона́шеския подъе́м, в нощи́ безбо́жия путь ве́рным указа́л еси́. Мы же, зря́ще тя на высоту́ Небе́сную восте́кшаго, си́це вопие́м: ра́дуйся, терпеливоду́шный испове́дниче; ра́дуйся, благопослушли́вый учениче́. Ра́дуйся, вертогра́да О́птинскаго неусы́пный стра́же; ра́дуйся, преподо́бнаго Ни́кона ве́рный дру́же. Ра́дуйся, блаже́нств Христо́вых прича́стниче; ра́дуйся, Ца́рствия Небе́снаго насле́дниче. Ра́дуйся, ве́ры правосла́вныя побо́рниче; ра́дуйся, новому́чеников Росси́йских самови́дче. Ра́дуйся, преподобноиспове́дниче Агáпите, ве́рный сы́не Це́ркве Ру́сския.
Песнь 7
Ирмо́с: Пещь, Спа́се, ороша́шеся,/ о́троцы же лику́юще поя́ху:// отце́в Бо́же, благослове́н еси́.
Све́том ве́ры твоея́ тьму неве́рия потреби́л еси́, Агáпите, ве́рных же утверди́л еси́ воспева́ти: отце́в Бо́же, благослове́н еси́.
Неразлу́чне с преподо́бным Ни́коном во изгна́ниих пребыва́я, по́двиги испове́дническия вку́пе с ним поне́сл еси́, воспева́я: отце́в Бо́же, благослове́н еси́.
Претерпе́л еси́ Христа́ ра́ди глад и хлад, доблему́дре Агáпите, и ве́ру и́стинную да́же до сме́рти соблю́л еси́, воспева́я: отце́в Бо́же, благослове́н еси́.
Богоро́дичен: Ра́дуйся, Све́та Непристу́пнаго черто́же Боже́ственный, ра́дуйся, Бо́га Всесвята́го жили́ще, ра́дуйся, земноро́дных предста́тельство, ра́дуйся, Де́во Пречи́стая.
Песнь 8
Ирмо́с: Пою́т Тя во́и А́нгельстии, сла́вит Тя род челове́ческий,/ свяще́нницы и раби́ и ду́ши пра́ведных,// я́ко Творца́ и Го́спода всех во ве́ки.
Испове́дание твое́, приснопа́мятне Агáпите, ве́рныя укрепи́ во благоче́стии со А́нгелы пе́ти и превозноси́ти Христа́ во вся ве́ки.
Нището́ю во́льною и страда́ньми тя́жкими очи́стився, свя́те Агáпите, днесь вку́пе со А́нгелы лику́еши и Христа́, я́ко Творца́ и Го́спода, воспева́еши.
О́птинскаго страда́льца днесь восхва́лим, Ага́пита, любве́ тезоиме́ннаго, и́же Тро́ицу Единосу́щную и Неразде́льную испове́да и житие́м свои́м просла́ви.
Богоро́дичен: Светоно́сное селе́ние Бо́жие яви́лася еси́, Богоро́дице, и престо́л огнезра́чен нестерпи́маго Бо́жия Существа́. Тем Тя воспева́ем, ве́рнии, и сла́вим во ве́ки.
Песнь 9
Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л,/ и вознесе́ смире́нныя Бог Изра́илев./ В ни́хже посети́ нас Восто́к с высоты́,// и напра́вил ны есть на путь ми́ра.
И́стину рекл еси́ усты́ твои́ми, се́рдцем же ве́ровал еси́ в пра́вду, и житие́м о́браз до́браго испове́дания начерта́л еси́, тем тя вси, Агáпите, велича́ем.
Тече́ние благове́стника соверши́л еси́, и Христа́ ра́ди тя́жкия боле́зни во страда́ниих претерпе́л еси́, сего́ ра́ди к Небе́сным селе́нием возше́л еси́, Агáпите блаже́нне.
Светоно́сная твоя́ па́мять, преподобноиспове́дниче Агáпите, собра́ние ве́рных просвеща́ет и к доброде́тельному житию́ подвиза́ет, тем тя вси благоче́стно велича́ем.
Богоро́дичен: Я́ко превы́шши Херуви́мов и Серафи́мов су́щи, Всенепоро́чная Де́во, Бо́га пло́тию родила́ еси́, Того́ моли́ изба́вити нас страсте́й и бед, Чи́стую Богоро́дицу Тя сла́вящих.
Свети́лен:
Све́том Христо́вым просвети́вся, све́та невече́рняго сподо́бился еси́, Агáпите приснопа́мятне, те́мже от сна грехо́внаго возбуди́ тебе́ моля́щихся и почита́ющих твою́ всечестну́ю па́мять.
Сла́ва, и ны́не, Богоро́дичен:
Из утро́бы Твоея́, Всесвята́я Де́во, я́ко от горы́ приосене́нныя, мы́сленное нам возсия́ Со́лнце и просвети́ ми́ра концы́ све́том богоразу́мия. Те́мже от тьмы страсте́й свободи́ ду́ши на́ша, да в ра́дости зове́м Ти: ра́дуйся, горо́ свята́я.
На хвали́тех стихи́ры, глас 2.
Подо́бен: Егда́ от Дре́ва:
Егда́ оскуде́ ве́ра в земли́ на́шей/ и лю́дие беззако́ннии воста́ша на Це́рковь Ру́сскую,/ тогда́, преподо́бне Агáпите испове́дниче,/ Про́мыслом Бо́жиим направля́емь,/ во оби́тель О́птину прише́л еси́,/ иде́же, святооте́ческая писа́ния позна́в,/ любо́вию ко и́ноческому житию́ возгоре́лся еси́,/ в не́мже благоче́стно пожи́в и страда́ния претерпе́в,// Бо́гу в ми́ре ду́шу пре́дал еси́.
Егда́ лю́тии гони́телие/ тя, ве́ры кре́пкаго адама́нта,/ темни́цею устраши́ти восхоте́ша/ и суд беззако́нный соста́виша,/ тогда́ ты, терпеливоду́шне Агáпите,/ в оде́жды мона́шеския оде́явся,/ за Христа́ пострада́ти восхоте́л еси́/ и ра́дуяся возопи́л еси́:// сла́ва таково́му смотре́нию Твоему́, Человеколю́бче.
Егда́ безбо́жницы оби́тель О́птинскую разори́ша,/ и тя с наста́вником твои́м преподо́бным Ни́коном/ дале́че в страну́ се́верную изгна́ша,/ и рабо́там тя́жким преда́ша,/ тогда́ ты, добропобе́дне Агáпите,/ кро́тостию и му́жеством вооружи́вся,/ соу́зником до́бре послужи́л еси́/ и ве́ры пла́мень неугаше́н сохрани́л еси́.// Сего́ ра́ди достодо́лжно тя почита́ем.
Сла́ва, глас 6:
Все жите́йское отложи́в попече́ние/ и Небе́снаго Оте́чества возжеле́в,/ в преподо́бии и пра́вде усе́рдно подвиза́лся еси́,/ и пра́вило благоче́стия ча́дом Це́ркве Ру́сския яви́л еси́,/ Агáпите преподобноиспове́дниче./ Те́мже святу́ю па́мять твою́ соверша́юще,/ усе́рдно мо́лим тя,/ испроси́ нам проще́ние грехо́в// и спасе́ние душ на́ших.
И ны́не, Богоро́дичен, глас то́йже:
Богоро́дице, Ты еси́ Лоза́ и́стинная,/ возрасти́вшая нам Плод живота́./ Тебе́ мо́лимся: моли́ся, Влады́чице,/ со святы́ми апо́столы// поми́ловатися душа́м на́шим.
Славосло́вие вели́кое, и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник, от слу́ха зла не убои́тся.
