Служба Пресвятой Богородице, в честь Ее иконы, именуемой «Страстная»
Ме́сяца а́вгуста в 13-й день
Пра́зднование Пресвяте́й Влады́чице на́шей
Богоро́дице и Присноде́ве Мари́и
ра́ди ико́ны Ея́, имену́емыя «Страстна́я»
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 6:
Пречи́стая Де́ва та́инственно/ Боже́ственнаго Младе́нца ражда́ет/ и в я́слех убо́гих полага́ет// на земли́ не иму́щаго, где главы́ приклони́ти.
Светоно́снаго А́гнца пелена́ми пови́вши,/ чу́дному рожде́нию Де́ва ти́хо дивля́шеся,/ в глубине́ серде́чней славосло́вящи// Сы́на Своего́ и Го́спода.
На ру́ки Преве́чное Сло́во благогове́йне прии́м,/ Симео́н пра́ведный к Пречи́стей Ма́тери Го́спода своего́ возопи́:/ Тебе́ же Саме́й ду́шу про́йдет ору́жие,// я́ко да откры́ются мно́гих серде́ц помышле́ния.
Стра́нным и стра́шным рождество́м Твои́м, Сы́не Мой,/ па́че всех ма́терей возвели́чена бых,/ ны́не же зря́щи Тя на Дре́ве Кре́стнем,/ лю́тою ско́рбию уязвля́юся,// го́рько рыда́ше Пречи́стая.
Сла́ва, и ны́не, глас 2.
Подо́бен: Егда́ от Дре́ва:
Возлю́бленное Свое́ Ча́до/ зря́щи Ма́ти на Кресте́ ви́сяща, глаго́лаше:/ во́лею, Сы́не Мой и Тво́рче Мой,/ лю́тую смерть прие́млеши и на Дре́ве угаса́еши,/ укрепи́ се́рдце Рабы́ Твоея́,/ ору́жием Креста́ Твоего́ пронзе́нное,/ и страда́ньми Твои́ми уя́звленное,/ и го́рькою ско́рбию пали́мое,// не терпя́щее Тя бездыха́нна ви́дети.
Проки́мен дне.
На стихо́вне стихи́ры, глас 3:
В покая́нии вопию́ Ти из глубины́ души́,/ Ма́ти Бо́га Вы́шняго,/ изъя́звленное грехми́ се́рдце исцели́,// еди́на Многоми́лостивая.
Стих: Слы́ши, Дщи, и виждь,// и приклони́ у́хо Твое́.
Я́ко свеща́ Боже́ственнаго Огня́/ и я́ко со́лнце пресве́тлое,/ возсия́ла еси́ в ми́ре гре́шнем, Влады́чице,// приими́ на́ша смире́нная моле́ния ми́лостивно.
Стих: Лицу́ Твоему́ помо́лятся// бога́тии лю́дстии.
Умертви́ нечести́вых е́реси,/ Це́рковь Святу́ю невреди́му сохрани́,/ лю́таго зми́я угрызе́ний ту изба́ви,// Де́во Всепе́тая и Неискусобра́чная.
Сла́ва, и ны́не, глас 4.
Подо́бен: Дал еси́ зна́мение:
С го́рьким пла́чем взыва́ем Ти, Влады́чице:/ моле́ния на́ша сле́зная не пре́зри,/ огнезра́чный лик Свой от смра́да грехо́в на́ших не отврати́,/ малоду́шныя и немощны́я в ве́ре укрепи́,/ скорбя́щая и боле́знующая сердца́ уте́ши,/ же́стоко вражду́ющия примири́,// Ты еси́ еди́на на́ша наде́жда и упова́ние.
Тропа́рь, глас 4: Днесь возсия́ неизрече́нно: пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8.
Покая́нны 3, глас 4:
В рыда́ниих взыва́х Ти, Богоро́дице,/ но вопль мой заглуши́ся от мно́жества грехо́в мои́х,/ иста́я се́рдце мое́ в пла́мени ско́рби,/ нече́стием ослепи́шася о́чи мои́,/ не и́мам ины́я по́мощи, не и́мам ины́я наде́жды,// ра́зве Тебе́, Пречи́стая Влады́чице.
Изнемо́г от тьмы грехо́вных ран,/ приношу́ нагу́ю и острупле́нную ду́шу мою́/ и, я́ко кровоточи́вая жена́, вопию́ Ти:/ косни́ся се́рдца моего́, Пресвята́я Влады́чице,/ исцели́ еле́ем проще́ния беззако́ния моя́,/ умири́ мяту́щийся дух мой,// я́ко еди́на Всемилосе́рдная.
Непра́вда и беззако́ние потопи́ша зе́млю Твою́,/ нече́стие и блуд объя́ша уде́л Твой, Пречи́стая,/ змиенра́вно и зверообра́зно показу́ется ста́до Твое́,/ смра́дным ве́тром греха́ обурева́емо есть,/ но пощади́ и изба́ви ны, Пренепоро́чная Де́во,// и́миже путьми́ Ты Сама́ ве́си.
И стихи́ры Богоро́дицы, глaс то́йже:
Светоза́рная Цари́це Не́ба и земли́,/ па́дшим всеми́лостивое заступле́ние,/ не отри́ни прибега́ющих к Твоему́ те́плому предста́тельству/ и в покая́нии зову́щих Ти:/ при́зри на моле́ния Твои́х раб, Всенепоро́чная,/ приими́ на плеща́ Своя́ не́мощи на́ша// и покры́й ны благода́тию Твое́ю, Богоро́дице Мари́е.
Твоя́ честна́я ико́на, Богоро́дице,/ стра́шное и та́инственное Предста́тельство,/ возсия́ на Святе́й Афо́нстей горе́,/ укрыва́ющи небе́сным о́блаком оби́тель от наше́ствия иноплеме́нных,/ и сохраня́ющи ю́ от истребле́ния огне́м,// моли́тв ра́ди и́ноков благочести́вых.
Собесе́дник Се́ргия прему́драго,/ преподо́бный и пра́ведный Дими́трий,/ Прилу́цкия оби́тели зижди́тель смире́нный,/ пред о́бразом Де́вы, Страстны́м имену́емым,/ неуста́нно хвалы́ Ма́тери Сло́ва воспева́я,/ дерзнове́ние моли́твенное обре́те// и благода́ти испо́лнися.
Святы́й град Москва́ све́тло ра́дуется,/ зря чудотво́рную ико́ну Твою́, Влады́чице,/ угаси́вшую пла́мя смертоно́сное/ и спа́сшую от сме́рти семе́йство благочести́вое./ Тебе́ пое́м, Тебе́ хва́лим, Ма́ти Безневе́стная,// престо́л та́инственный Бо́га на́шего.
Днесь град Москва́ све́тло пра́зднует/ сре́тение честна́го о́браза Твоего́, Богоро́дице,/ на не́мже огнезра́чнаго Младе́нца рука́ма держи́ши,/ и ору́дия гряду́щия Стра́сти Его́ зри́ши,/ от А́нгела явля́емая./ Прииди́те, Росси́йстии собо́ри,// святы́м Страсте́м Того́ поклони́мся.
Сла́ва, и ны́не, глас 8.
Подо́бен: О, пресла́внаго чудесе́:
Тя, Со́лнце пра́ведное, на Кресте́ заше́дшее,/ зря́щи, Де́ва глаго́лаше:/ дивлю́ся во́льному Твоему́ распя́тию, Сы́не Мой,/ уще́дри, Влады́ко, Тебе́ Ро́ждшую,/ да воспою́ милосе́рдие Твое́, Человеколю́бче,/ да не утаи́тся от Мене́ бе́здна щедро́т Твои́х,/ воскресни́, я́ко Бог Небесе́ и земли́,/ и Воскресе́нием Твои́м, Спа́се,// поми́луй всех нас.
Вход. Проки́мен дне. И чте́ния три Богоро́дичная.
Бытия́ чте́ние (глава́ 28):
Изы́де Иа́ков от студенца́ кля́твеннаго и и́де в Харра́нь./ И обре́те ме́сто и спа та́мо, за́йде бо со́лнце./ И взят от ка́мения ме́ста того́ и положи́ возгла́вие себе́, и спа на ме́сте о́ном,/ и сон ви́де:/ и се ле́ствица утвержде́на на земли́, ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́, и Бог Исаа́ков, не бо́йся;/ земля́, иде́же ты спи́ши на ней, тебе́ дам ю́ и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши,/ и возвращу́ тя в зе́млю сию́, я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́: я́ко стра́шно ме́сто сие́,/ несть сие́, но дом Бо́жий и сия́ врата́ Небе́сная.
Проро́чества Иезеки́илева чте́ние (главы́ 43 и 44):
Та́ко глаго́лет Госпо́дь:/ бу́дет от дне осма́го и про́чее, сотворя́т иере́и на олтари́ всесожже́ния ва́шего,/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко Игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.
При́тчей чте́ние (глава́ 9):
Прему́дрость созда́ себе́ дом и утверди́ столпо́в седмь./ Закла́ своя́ же́ртвенная и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко мне./ И тре́бующим ума́ рече́:/ прииди́те, яди́те мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие:/ облича́яй же нечести́ваго, опоро́чит себе́,/ обличе́ния бо нечести́вому, ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости — страх Госпо́день, и сове́т святы́х — ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На лити́и стихи́ры, глас 5:
Ра́дуйся, звездо́ блиста́ющая,/ престо́ле непоро́чный Со́лнца Пра́вды,/ свеще́ непристу́пнаго Све́та,/ неизрече́нно Бо́га Сло́ва ро́ждшая,/ моле́ний на́ших к Тебе́ не пре́зри,// да́руй нам мир и ве́лию ми́лость.
Ра́дуйся, Це́ркве Ру́сския сла́во,/ земли́ на́шея необори́мое огражде́ние,/ Ма́ти незаходи́маго Све́та,/ Всенепоро́чная, пресве́тлая Неве́сто,/ в моли́твах о нас неусыпа́ющая Влады́чице,// защити́ и спаси́ ны, с ве́рою зову́щия Ти.
Ра́дуйся, исто́чниче Жи́зни ве́чныя,/ Сло́во О́тчее безсе́менно ро́ждшая,/ из Тебе́ бо Свет И́стины возсия́,/ Его́же умоли́, я́ко Сы́на Своего́ и Бо́га на́шего,/ да поми́лует ны, грехми́ отягче́нныя,// и изба́вит от бед лю́ди правосла́вныя.
Сла́ва, и ны́не, глас то́йже:
Ра́дуйся, держа́вный гра́де Москво́,/ срета́яй чу́дный о́браз Бо́жия Ма́тере,/ Я́же Стра́сти Сы́на Своего́ зря́щи,/ в боле́знех и ско́рбех нас всеми́лостивно укрепля́ет,/ те́мже возопии́м, ве́рнии, Влады́чице на́шей,// да умо́лит Христа́ пра́ведный гнев преложи́ти на ми́лость.
На стихо́вне стихи́ры, глас 6:
Свеще́ та́инственная,/ боже́ственное сокро́вище нам дарова́вшая,/ светосия́нную ико́ну, Страстна́я нарица́емую,/ от бед и напа́стей нас огражда́ющую,/ из пла́мене страсте́й избавля́ющую,/ в ско́рбех тя́жких ми́лующую,/ посли́ нам, в покая́нии зову́щим Ти,// мир и ве́лию ми́лость.
Стих: Слы́ши, Дщи, и виждь,// и приклони́ у́хо Твое́.
Не наде́йтеся на кня́зи, на сы́ны челове́ческия,/ в ни́хже несть спасе́ния,/ но принеси́те же́ртву нетле́нную Пречи́стей Богоро́дице:/ душ сокруше́нных неуста́нная моле́ния,/ неизсяка́емыя покая́нных слез струи́,/ да не оста́вит Цари́ца Небе́сная ми́лостию Свое́ю// изсо́хшая без любве́ сердца́ на́ша.
Стих: Лицу́ Твоему́ помо́лятся// бога́тии лю́дстии.
Вдевши Сы́на и Го́спода Своего́/ на Дре́ве кре́стнем ви́сяща,/ лю́тую смерть гре́шников ра́ди подъе́мшаго,/ Де́ва рыда́ющи глаго́лаше:/ Сы́не и Тво́рче Мой,/ исцели́ му́ку нестерпи́мую се́рдца Моего́// и святы́м Воскресе́нием Твои́м поми́луй Мя.
Сла́ва, и ны́не, глас 1.
Подо́бен: О, ди́вное чу́до:
О, ди́вное чу́до!/ Пречи́стая Де́ва/ светоза́рный о́браз нам явля́ет/ и ми́лостивно от лю́тых скорбе́й заступа́ет,/ смертоно́сное пла́мя страсте́й угаша́ет/ и окамене́нная сердца́ животвори́т,/ те́мже, Ма́ти Милосе́рдная,/ умягчи́ и на́ша зла́я сердца́,/ Христа́ Царя́ моля́щи/ преложи́ти гнев Свой,/ подая́ ми́рови// Тобо́ю ве́лию ми́лость.
Тропа́рь, глас 4:
Днесь возсия́ неизрече́нно ца́рствующему гра́ду на́шему Москве́/ ико́на Богома́тере,/ и, я́ко светоза́рным со́лнцем, прише́ствием тоя́ озари́ся весь мир,/ Небе́сныя Си́лы и ду́ши пра́ведных мы́сленно торжеству́ют ра́дующеся,/ мы же, на ню́ взира́юще, к Богоро́дице со слеза́ми вопие́м:/ о Всеми́лостивая Госпоже́ Влады́чице Богоро́дице,/ моли́ся из Тебе́ воплоще́нному Христу́ Бо́гу на́шему,/ да пода́ст мир и здра́вие всем христиа́ном// по вели́цей и неизрече́нней Свое́й ми́лости.
Ин тропа́рь, глас то́йже:
Животворя́щия Прему́дрости исто́чник чуде́с/ яви́ся честны́й о́браз Твой, Богоро́дице Де́во,/ те́мже к нему́ с ве́рою и любо́вию усе́рдно притека́юще,/ из глубины́ души́ взыва́ем:/ утверди́, Влады́чице, Це́рковь Ру́сскую,/ сохрани́ от бед зе́млю на́шу,/ и вся лю́ди, чту́щия Тя, соблюди́,/ да хвале́бными пе́сньми Тя, я́ко Ма́терь Бо́жию, велича́ют и си́це вопию́т:// ра́дуйся, Пречи́стая Де́во, правосла́вных христиа́н похвало́.
НА У́ТРЕНИ
По 1-м стихосло́вии седа́лен, глас 4:
Пред свяще́нным о́бразом Твои́м, Страстны́м нарица́емым, со умиле́нием предстои́м, и к Тебе́, Всецари́це, взыва́ем си́це: угаси́ пла́мень страсте́й, попаля́ющий ны, и спаси́ лю́ди отча́янныя.
Сла́ва, и ны́не, глас то́йже:
Днесь, ве́рнии лю́дие, духо́вно торжеству́ем, прославля́юще Бо́жию Ма́терь я́ко звезду́ пресве́тлую, и мо́лимся пред святы́м о́бразом Ея́, приле́жно взыва́юще: услы́ши на́ша проше́ния, Де́во Всеблаже́нная и Пренепоро́чная.
По 2-м стихосло́вии седа́лен, глас 1:
Пред свято́ю ико́ною Твое́ю, Цари́це Всемилосе́рдная, со умиле́нием и тре́петом предстои́м, и с любо́вию вопие́м Ти: покры́й нас гре́шных святы́м покро́вом Твои́м.
Сла́ва, и ны́не, глас то́йже:
К Богоро́дице ны́не притеце́м, с ве́рою зову́ще из глубины́ души́: услы́ши моле́ния на́ша, Де́во Чи́стая, Всепе́тая и Преми́лостивая.
Велича́ние:
Досто́йно есть/ велича́ти Тя, Богоро́дице,/ честне́йшую Херуви́м// и сла́внейшую без сравне́ния Серафи́м.
И́но велича́ние:
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния// всем, с ве́рою притека́ющим.
По полиеле́и седа́лен, глас 5:
Ра́дуйся, звездо́ у́тренняя, красу́йся, заре́ невече́рняя, Преблаже́нная и Пренепоро́чная Де́во! Лику́й, земле́ Ру́сская, весели́теся и вы, правосла́внии христиа́не, взира́юще на светоли́тие святы́я ико́ны Бо́жия Ма́тере.
Сла́ва, и ны́не, то́йже.
Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́// во вся́ком ро́де и ро́де. Стих: Отры́гну се́рдце мое́ сло́во бла́го, глаго́лю аз дела́ моя́ Царе́ви. Вся́кое дыха́ние: Ева́нгелие от Луки́, зача́ло 4.
По 50-м псалме́ стихи́ра, глас 6:
На Дре́ве ви́дящи Сы́на Своего́ пове́шена,/ Пречи́стая Де́ва глаго́лаше:/ растерза́юся, Влады́ко, утро́бою,/ ору́жие се́рдце Мое́ про́йде,/ я́коже дре́вле Симео́н Мне прорече́,/ но воста́ни и спросла́ви, Безсме́ртне,// Ма́терь и Рабу́ Твою́, молю́ся.
Кано́н, глас 4,
его́же краестро́чие: Пречи́стая, спаси́ зе́млю Ру́сскую, защити́ лю́ди Твоя́.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́ ра́дуяся Тоя́ чудеса́.
Припе́в: Пресвята́я Богоро́дице, спаси́ нас.
Пречи́стая Богоро́дице, и́ноков тве́рдое заступле́ние, упова́ние христиа́ном, приими́ ско́рбная моле́ния на́ша, еди́на Чи́стая и Пренепоро́чная.
Ра́дуйся, горо́ Афо́нская, красу́йся, оби́теле Кутлуму́шская, прие́млющи святы́й о́браз Бо́жия Ма́тере я́ко богода́нный покро́в твой и чу́дное предста́тельство.
Еди́на Всесвята́я, а́ще не Ты восхо́щеши спасти́ ны гре́шныя, кто, ра́зве Тебе́, защити́т лю́ди Твоя́ от наше́ствия иноплеме́нных и наси́лия инове́рных?
Чу́дная защи́та и́ноков, стра́шное и гро́зное предста́тельство ве́рующих в заступле́ние Твое́, от враг ви́димых и неви́димых покры́й нас честны́м покро́вом Твои́м.
И рыда́ю, и взыва́ю к Тебе́, Пречи́стая, ве́лий мрак воцари́ся в уде́ле Твое́м, не отри́ни покая́ннаго пла́ча моего́, моле́ний сле́зных не пре́зри, и спаси́ от ги́бели лю́ди Твоя́.
Катава́сия по уста́ву.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.
Собесе́дниче преподо́бнаго Се́ргия, свя́те о́тче Дими́трие, я́ко те́плое заступле́ние и покро́в обре́л еси́ о́браз Бо́жия Ма́тере, Страстны́й нарица́емый.
Тя, преподо́бне, я́ко избра́нника Бо́жия Ма́тере, призва́ бы́ти духо́вным отце́м сы́ну своему́ благове́рный Моско́вский князь Дими́трий, Донско́й нарица́емый, защи́тник ве́рный Ру́сския земли́.
Аз из ти́ны грехо́вныя со сто́ном и стра́хом вопию́ Ти: заступи́ па́дшия лю́ди Твоя́, Цари́це огнезра́чная, моли́твами святы́х Ру́сския земли́.
Я́ко звезда́ светолу́чная, сия́ет ико́на Твоя́ свята́я, Ты бо еси́ наде́жда пресве́тлая, исто́чник Жи́зни и Засту́пница на́ша усе́рдная.
Страстны́й о́браз Твой, Всесвята́я Де́во, возсия́ в преде́лех се́верных, укрепля́я преподо́бнаго Дими́трия в моли́твах усе́рдных к Спа́су Всеми́лостивому.
Седа́лен, глас 6:
О Всеми́лостивая Госпоже́, Де́во Пренепоро́чная, не отри́ни моле́ний на́ших, но приклони́ слух Твой к нам недосто́йным, и от лю́тых бед и вра́жиих напа́стей свободи́, да неосужде́нно воззове́м Ти: Ты еси́ еди́но на́ше наде́яние и утеше́ние.
Сла́ва, и ны́не, глас то́йже:
Прише́л еси́, Го́споди, на Страсть во́льную, возсия́в на Дре́ве кре́стнем, и дарова́л еси́ нам Засту́пницу усе́рдную, в моли́твах неусыпа́ющую о ро́де челове́честем, Пресвяту́ю, Пречи́стую Ма́терь Свою́.
Песнь 4
Ирмо́с: Седя́й в сла́ве, на Престо́ле Божества́,/ во о́блаце ле́гце,/ прии́де Иису́с Пребоже́ственный,/ нетле́нною дла́нию, и спасе́ зову́щия:// сла́ва, Христе́, си́ле Твое́й.
Прие́млет, ра́дуяся и лику́я, Бар град святы́й о́браз Твой, Одиги́трие, на не́мже Ты, о Пресвята́я, взира́еши на Стра́сти Сы́на Своего́ и мо́лишися приле́жно за лю́ди отча́янныя.
А́гница ми́лостивая, на рука́х держа́щая све́тлаго А́гнца, к закла́нию угото́ваннаго, взыва́ет к жи́телем гра́да Ри́мскаго: взыску́йте еди́ну И́стину, лю́дие христиа́нстии, пи́йте вси от чи́стаго Исто́чника жи́зни на́шея.
Свята́я ико́на Бо́жия Ма́тере дре́вний Капернау́м освяща́ет, и благослове́ние Бо́жие возвеща́ет ти́хой о́бласти земли́ Галиле́йския, прие́мшей с ра́достию сло́во И́стины.
Итали́йская и гре́ческая земля́, и вся вселе́нная хва́лится, прославля́ющи ди́вный о́браз Богоро́дицы, Страстны́й имену́емый, и́мже то́чатся ве́рным исцеле́ния.
Земле́ сла́вная Ру́сская, красу́йся и лику́й, срета́ющи сия́ющую ико́ну Де́вы Чи́стыя, Стра́сти Христо́вы от А́нгела явля́емыя зря́щия, и Свой уде́л от смертоно́сных скорбе́й огражда́ющия.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ Безле́тнаго Сы́на,/ всем воспева́ющим Тя// мир подава́ющая.
Егда́ огнь всепожира́ющий град сто́льный Москву́ объя́т, тогда́ о́браз Твой чу́дный, Влады́чице Пречи́стая, до́му благочести́вому спасе́ние бысть.
Моско́встии лю́дие правосла́внии, поклони́мся чу́дней ико́не Бо́жия Ма́тере, и со слеза́ми пред не́ю возопии́м: Преми́лостивая Цари́це, спаси́ от лю́тыя сме́рти наро́д Свой.
Любве́ и наде́жды на милосе́рдие Твое́, Пречи́стая, испо́лнени, возно́сим моле́ния на́ша к светолу́чному о́бразу Твоему́ и вопие́м: о Засту́пнице усе́рдная, спаси́ от ги́бели наро́д Свой.
Ю́ноты избра́ннии, прему́дрии старе́йшины, воево́ды сла́внии и прости́и лю́дие да восхва́лят Тя, защи́ту гра́да на́шего, и вознесу́т сла́вное и́мя Твое́.
Русь Свята́я, ра́дуйся, прие́млющи о́браз светоза́рный, и́же, пра́ведный и гро́зный гнев Госпо́день умягча́я, храни́т тя от мра́ка грехо́внаго и пла́мене испепеля́ющаго.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те рука́ми воспле́щим,// от Нея́ ро́ждшагося Бо́га сла́вим.
Услы́шавши повеле́ние гро́зное Пречи́стыя Богома́тере, со смире́нием жена́ благочести́вая притече́ в преде́лы Нижегоро́дския земли́, да обря́щет чу́дный о́браз Преми́лостивыя.
Сле́зы го́рькия, Влады́чице, я́ко во́ду, излива́ет неду́гующее се́рдце мое́, моле́ний го́рестных мои́х не пре́зри, и не преда́ждь в ру́ки враг мои́х, но бу́ди заступле́ние ве́рное.
Светоди́вный лик Твой, Чи́стая Де́во и Цари́це, я́ко еле́й, умягча́ет се́рдце мое́ зло́бное, просвеща́ет потемне́вший окая́нный ум и омыва́ет ду́шу спаси́тельным пла́чем покая́ния.
Ка́ко досто́йно воспою́ сла́вное прише́ствие в держа́вный град Москву́ светоле́пныя ико́ны Твоея́, Де́во, Страстны́я нарица́емыя, на поклоне́ние, и спасе́ния ра́ди душ на́ших?
Услы́ши на́ше сле́зное моле́ние, из глубины́ серде́ц излива́емое, о Пренепоро́чная Де́во, и вознеси́ е́ к Сы́ну Твоему́ и Всеми́лостивому Бо́гу на́шему.
Конда́к, глас 3:
Благода́ть прия́хом спаси́тельнаго Твоего́ целе́ния,/ ю́же дарова́ла еси́ нам честны́м Твои́м о́бразом, Богоро́дице Де́во,/ те́мже уми́льно моля́щеся, со слеза́ми вопие́м:/ о Пресвята́я Влады́чице,/ ско́рое заступле́ние и по́мощь нам яви́,/ от вся́кия ско́рби изба́ви,/ зе́млю на́шу в ми́ре сохрани́/ и вся лю́ди, на Тя упова́ющия, покро́вом Твои́м защити́,/ да зле не поги́бнем раби́ Твои́,/ но со умиле́нием да зове́м:// ра́дуйся, Неве́сто Неневе́стная.
И́кос:
Я́ко исто́чник Жи́зни неизсяка́емыя и неувяда́емый цвет чистоты́ иму́ще Тя, Богоро́дице Де́во, днесь к чудотво́рному о́бразу Твоему́ притека́ем и со умиле́нием взыва́ем си́це: ра́дуйся, Богоро́дице, поги́бших взыска́ние; ра́дуйся, Преми́лостивая гре́шных Спору́чнице. Ра́дуйся, свети́льниче неугаса́емый; ра́дуйся, приста́нище жите́йских пла́ваний. Ра́дуйся, Одиги́трие, прибе́жище всех и утвержде́ние; ра́дуйся, земли́ Нижегоро́дския благослове́ние. Ра́дуйся, гра́да на́шего защище́ние; ра́дуйся, в неду́зех ско́рое облегче́ние. Ра́дуйся, в тя́жких ско́рбех утеше́ние; ра́дуйся, ожесточе́нных серде́ц умиле́ние. Ра́дуйся, кре́пкое от бед огражде́ние; ра́дуйся, благода́тное от бед избавле́ние. Ра́дуйся, Неве́сто Неневе́стная.
Песнь 7
Ирмо́с: Не послужи́ша тва́ри богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.
Юдо́ль плаче́вную, мир су́етный, страсте́й пучи́ну те́мную и грехо́вную осиява́ет лучеза́рный лик Твой, Де́во Чи́стая, свети́льниче огнезра́чный Ру́сския земли́.
Звездо́ светолу́чная, и́нокинь смире́нных Храни́тельнице, преподо́бных отце́в ти́хое утеше́ние, в волна́х жите́йскаго мо́ря нам Путеводи́тельнице ве́рная, моли́ся Сы́ну Твоему́ и Го́споду о спасе́нии всех пою́щих Тя.
А́нгельский собо́р на Небеси́ и челове́цы на земли́ усе́рдно сла́вят Тя, Влады́чице, вся́кая тварь, весе́лия исполня́ющися, приле́жно воспева́ет Тя.
Щит кре́пкий Моско́вския земли́ и Засту́пница оби́тели Алекса́ндровския, Ты всем, прибега́ющим к ди́вному о́бразу Твоему́, то́чиши ско́рая исцеле́ния, в ско́рбех же и неча́янных напа́стех избавле́ние.
Иде́же хо́щет Госпо́дь, побежда́ется естества́ чин. Те́мже, Цари́це и Влады́чице, всеси́льным предста́тельством Твои́м моровы́я я́звы врачу́ются и неду́гующии исцеля́ются.
Песнь 8
Ирмо́с: О́троки благочести́выя в пещи́,/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.
Торжеству́й, земле́ Коло́менская, иму́щи сокро́вище неизсяка́емое, свети́льник неугаса́емый, исто́чник исцеле́ний неисчерпа́емый, о́браз преди́вный Богоро́дицы, Страстны́й нарица́емый.
Изя́щная и пречу́дная ико́на Де́вы Чи́стыя Арте́мовскую весь освяща́ет и благода́тию ту напая́ет; ра́дуйтеся, лю́дие правосла́внии, прие́млюще о́браз Засту́пницы Моско́вския земли́.
Любо́вию покры́ла еси́ о́бласть Ма́вринскую, просия́вши, я́ко звезда́ у́тренняя, и яви́ла еси́ о́браз Сво́й в древе́сных ве́твех, спаса́ющи от мо́ра лю́таго лю́ди стра́ждущия и приле́жно к Богоро́дице моля́щияся.
Ю́ноши и де́вы благочести́выя с ве́рою прибега́ют к цельбоно́сней ико́не Богома́тере, усе́рдно взыва́юще, да умо́лит Де́ва Чи́стая Сы́на Своего́, преложи́ти на ми́лость пра́ведный суд Свой.
Дерзнове́ние ве́лие обрела́ еси́ у Христа́ Бо́га, Сы́на Своего́, Пречи́стая, те́мже при́зри на моле́ния Твои́х раб и покры́й ве́си Пехо́рския честны́м Твои́м омофо́ром.
Песнь 9
Ирмо́с: Всяк земноро́дный/ да взыгра́ется Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.
Ими́лость несказа́нная, и неизрече́нная любы́ Твоя́, Богоро́дице, и Матери́нское Твое́ о нас попече́ние да возста́вят нас, лени́вых и гре́шных, от тя́жкаго сна грехо́внаго и обратя́т нас к покая́нию.
Ты еси́ непрело́жное упова́ние земли́ Ли́пецкия и Орло́вския, Всеблаже́нная Всецари́це, не отри́ни моле́ний на́ших в ско́рбех, и умягчи́ ожесточе́нная сердца́ покая́нием.
Весели́ся, держа́вный гра́де Москво́, ра́дуйтеся, вся ве́си Моско́вския, иму́ща заступле́ние всемо́щное, чу́дную ико́ну Богома́тере, Страстна́я имену́емую.
О Пресве́тлая Небе́сная Цари́це, Спа́са ми́ру ро́ждшая и вся концы́ тем осия́вшая! Ты яви́ла еси́ Ру́сстей земли́ пресла́вный о́браз Свой, к нему́же мы ны́не прибега́ем и с наде́ждею мо́лимся о спасе́нии душ на́ших.
Яви́лася еси́, Пренепоро́чная Влады́чице, спасе́ние и заступле́ние Ру́сския земли́, Предста́тельница ро́да христиа́нскаго и неусыпа́ющая Моли́твенница к Сы́ну Своему́ и Го́споду, те́мже Тя ублажа́ем.
Свети́лен:
Ору́жие обоюдоо́строе ду́шу Твою́ про́йде, егда́ узре́ла еси́ Стра́сти возлю́бленнаго Сы́на Твоего́, но пощади́ и поми́луй нас, гре́шных и недосто́йных рабо́в Твои́х, всегда́ грехми́ на́шими Го́спода распина́ющих, и приведи́ к покая́нию серде́чному.
На хвали́тех стихи́ры, глас 5:
Преблагослове́нная Богоро́дице,/ земли́ Ру́сския кре́пкий щи́те и огражде́ние,/ несокруши́мая на́ша наде́ждо и утвержде́ние,/ приими́ на́ша приле́жныя моли́твы, Де́во Чи́стая,/ умягчи́ на́ша зла́я сердца́, Всеблаже́нная,/ просвети́ ум, помраче́нный грехми́,// не и́мамы бо ины́я по́мощи, ра́зве Тебе́, Влады́чице.
Свети́льниче, осия́вый зе́млю Ру́сскую,/ горо́ несеко́мая и купино́ неопали́мая,/ ро́ждшая све́тлое Пра́вды Со́лнце,/ Ты еси́ звезда́ огнеза́рная,/ Ты еси́ цвет чистоты́,/ к Тебе́, прекло́ньше коле́на, со слеза́ми мо́лимся:// поми́луй рабы́ Твоя́.
Цари́це моя́ преблага́я,/ наде́ждо моя́, Богоро́дице,/ неизрече́нная чи́стая ле́ствице,/ Е́юже Бог на зе́млю сни́де,/ помози́ гре́шным рабо́м Твои́м/ от плене́ния страсте́й свободи́тися,// Ты бо еси́ Предста́тельница Всеми́лостивая.
Сла́ва, и ны́не, глас то́йже:
О Всеми́лостивая Влады́чице,/ гре́шных и па́дших Спору́чнице,/ да́руй нам сле́зы покая́нныя,/ примири́ лю́ди отча́янныя,/ согре́й моли́твами те́плыми сердца́ охладе́вшая,/ обо́дри ду́ши уныва́ющия// и изба́ви нас от вся́кия ну́жды и печа́ли.
Славосло́вие вели́кое. И отпу́ст.
