Служба мученице Агнии Римской
Ме́сяца января́ в 21-й день
Святы́я му́ченицы А́гнии де́вы, Ри́мския
НА ВЕЧЕ́РНИ
На Го́споди, воззва́х: стихи́ры святы́я, глас 4:
Оте́ческих преда́ний храни́тельнице,/ вся су́етная ми́ра сего́ презре́вши,/ о́браз чистоты́ и целому́дрия яви́ла еси́,/ и страда́ния за Христа́ претерпе́ла еси́,/ в селе́ния же го́рняя всели́вшися,/ к му́ченическому ли́ку сопричла́ся еси́,/ сего́ ра́ди чтим святу́ю па́мять твою́,// му́ченице А́гние всехва́льная.
Его́же Ма́ти есть Де́ва,/ Ему́же А́нгелы слу́жат,/ со́лнце и луна́ красоте́ Его́ дивя́тся,/ и повеле́нием Его́ ме́ртвии воскреса́ют,/ прикоснове́нием же боля́щии исцеля́ются,/ То́му еди́ному ве́ру храню́/ и Ему́ всеусе́рдно себе́ вверя́ю,/ Его́же лю́бящи, де́вою пребыва́ю и непоро́чна есмь,// та́ко взыва́ла еси́, отрокови́це А́гние богому́драя.
Пре́лести ми́ра сего́ отве́ргши/ и в ве́ре и́стинней утверди́вшися,/ венце́м му́ченическим украси́лася еси́,/ и нетле́нных благ от Христа́ Бо́га сподо́билася еси́,/ му́ченице А́гние, де́во непоро́чная,/ му́ченических во́инств украше́ние/ и де́вственных лико́в удобре́ние,// моли́ о нас, почита́ющих па́мять твою́.
Сла́ва, и ны́не, Богоро́дичен, глас то́йже:
Влады́чице Богоро́дице,/ на Тя все упова́ние на́ше возлага́ем/ и, я́ко ско́рой Помо́щнице, из глубины́ серде́чныя взыва́ем:/ поми́луй нас, Тебе́ почита́ющих,/ и те́плыми моли́твами к Сы́ну Твоему́ и Бо́гу на́шему/ Ца́рствия Небе́снаго сподо́би,// да ве́чнаго муче́ния избе́гнем.
На стихо́вне стихи́ры, глас 8:
Му́ченице свята́я А́гние,/ а́гнице кро́ткая и чи́стая,/ Пастыренача́льника Христа́ избра́ннице преди́вная,/ житие́м твои́м Бо́гу угоди́ла еси́,// Того́ моли́ спасти́ся душа́м на́шим.
Стих: Ди́вен Бог во святы́х Свои́х,// Бог Изра́илев.
Де́во А́гние всехва́льная,/ в Небе́сный черто́г все́льшися/ и неизрече́нную све́тлость восприи́мши,/ по успе́нии твое́м та́ко глаго́лала еси́:/ ра́дуйтеся, я́ко с де́вами му́дрыми селе́ния вы́шняя восприя́х/ и, Го́спода на земли́ всем се́рдцем возлюби́вши,// Того́ ны́не прославля́ю на Небеси́.
Стих: В це́рквах благослови́те Бо́га,// Го́спода от исто́чник Изра́илевых.
Млада́ ле́ты, но соверше́нна ра́зумом,/ ю́на те́лом, но мудра́ душе́ю,/ красна́ лице́м, красне́йши же ве́рою,/ А́гние свята́я, де́во му́ченице,/ ты, страда́ний не убоя́вшися,/ чистото́ю свое́ю Христу́ уневе́стилася еси́/ и, в ра́йския оби́тели вше́дши,// Того́ ны́не воспева́еши.
Сла́ва, глас 6:
Ду́ха Свята́го росо́ю/ прохлади́ся ми огнь/ и пла́мень раздели́ся,/ сего́ ра́ди благословлю́ тя, Бо́же Препе́тый,/ я́ко и посреде́ пла́мене путь мне к Тебе́ открыва́еши,/ та́ко, свята́я А́гние, Го́спода воспева́ла еси́/ и, мучи́телеву го́рдость низложи́вши,// невреди́ма посреде́ огня́ пребыва́ла еси́.
И ны́не, Богоро́дичен, глас то́йже:
Прославля́ем Тя, Пречи́стая,/ я́ко и́стинную Ма́терь Христа́ Бо́га на́шего,/ и си́це Тебе́ вопие́м:/ не пре́зри моле́ний на́ших,/ да Твои́м предста́тельством сподо́бимся/ вни́ти в Небе́сныя оби́тели Сы́на Твоего́,/ и та́мо со все́ми святы́ми// возвели́чим Святу́ю Тро́ицу.
Тропа́рь, глас 4:
Му́ченических лико́в украше́ние,/ Це́ркве христиа́нския похвало́,/ гра́да Ри́ма сла́вное прозябе́ние,/ чистоте́ А́гнца Христа́ тезоимени́тая,/ А́гние свята́я, де́во му́ченице,/ о́браз чистоты́ и целому́дрия яви́ла еси́/ и, лю́тая страда́ния претерпе́вши,/ багряни́цею ца́рскою оде́ялася еси́./ Ны́не же во сла́ве Престо́лу Бо́жию предстоя́щи,/ моли́ Пресвяту́ю Тро́ицу,// спасти́ся душа́м на́шим.
НА У́ТРЕНИ
По 1-м стихосло́вии седáлен, глас 2:
Глас Христа́ Бо́га: прииди́те ко Мне, вси тружда́ющиися и обремене́ннии, и Аз упоко́ю вы, услы́шавши, блаже́нная А́гние, невозвра́тно Тому́ после́довала еси́. Его́же моли́ спасти́ ду́ши на́ша.
Сла́ва, и ны́не, Богоро́дичен:
Пречи́стая Влады́чице Богоро́дице, Предста́тельнице всеси́льная, умягчи́ сердца́ на́ша и изба́ви мра́ка грехо́внаго, Ты бо еси́ ро́да христиа́нскаго утеше́ние и спасе́ние душ на́ших.
По 2-м стихосло́вии седáлен, глас 4:
Устраше́ний мучи́теля не убоя́вшися, и страда́ния лю́тая претерпе́вши, дерзнове́ние стяжа́ла еси́ ко Спа́су, Христу́ Бо́гу на́шему. Его́же моли́ о почита́ющих па́мять твою́, му́ченице А́гние сла́вная.
Сла́ва, и ны́не, Богоро́дичен:
Ма́ти Све́та, Пречи́стая Богоро́дице, добро́то неизрече́нная, к Тебе́ се́рдцем благода́рным припа́дающе, мо́лим: покры́й нас ми́лостию Твое́ю от вся́ких наве́тов вра́жиих.
Кано́н, глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.
Любо́вию к Сладча́йшему Го́споду Иису́су уя́звлена бы́вши, му́ченице А́гние сла́вная, де́вство твое́ и ве́ру чи́стую Тому́ принесла́ еси́, и за Него́ пострада́ти изво́лила еси́. Его́же моли́ о нас, да утверди́мся во благоче́стии.
Гони́телей не убоя́вшися, му́жественно Животода́вцу после́довала еси́, всехва́льная, и, сме́ртию вре́менною блаже́нство неконча́емое обре́тши, просла́влена от Го́спода яви́лася еси́.
Сосу́де благода́ти Бо́жия, гра́да Ри́ма сла́вная о́трасле, А́гние де́во му́ченице, ты, земна́я презре́вши, Небе́сная возлюби́ла еси́ и с му́дрыми де́вами в черто́г ве́чный всели́лася еси́. Те́мже тя ны́не ублажа́ем.
Богоро́дичен: Всеблага́я Предста́тельнице на́ша, те́плая Засту́пнице, Ма́ти Бо́га Вы́шняго! О Тебе́ ра́дуется А́нгельский собо́р и челове́ческий род! Сподо́би и нас хвале́бными пе́сньми Тя прославля́ти.
Песнь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.
Ду́хом Святы́м наставля́ема, бога́тство тле́нное отри́нула еси́, и еди́ное на потре́бу возлюби́ла еси́, мучи́телей же кре́пость низложи́вши, вене́ц пра́вды на Небеси́ прия́ла еси́, му́ченице А́гние добропобе́дная.
Бога́тыя да́ры нечести́ваго ю́ноши отмета́я, свята́я де́во А́гние, глаго́лаше себе́ бы́ти обруче́ну красне́йшему Жениху́ Христу́, И́же вы́шняго Ца́рствия, и бога́тства некра́домаго, и пра́ведных наслажде́ния тя сподо́би.
Еди́ному Го́споду уневе́стившися, любо́вию и ве́рою, моли́твою и посто́м Тому́ послужи́ла еси́, и в же́ртву чи́сту себе́ приугото́вила еси́, отрокови́це богоблаже́нная.
Богоро́дичен: Ма́ти Человеколюби́ваго Бо́га, Пречи́стая Де́во, ра́досте и предста́тельство на́ше, ве́рою велича́ем и с любо́вию Тебе́ покланя́емся, зову́ще: исцели́ Твои́ми мольба́ми боле́зни душ и теле́с на́ших.
Седа́лен, глас 4:
Благода́ть Свята́го Ду́ха стяжа́ла еси́, му́ченице прехва́льная А́гние, прешла́ бо еси́ невре́дно мук пучи́ну, и в Небе́сныя оби́тели всели́лася еси́. Моли́ спасти́ся нам, воспева́ющим святу́ю па́мять твою́.
Сла́ва, и ны́не, Богоро́дичен:
Ра́дуйся, престо́ле Бо́жий, Чи́стая, Препросла́вленная; ра́дуйся, пала́то простра́нная; ра́дуйся, покро́ве ве́рою взыска́ющих Тя; ра́дуйся, цве́те ве́ры; ра́дуйся, Всечу́дная.
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.
Я́ко же́ртву благово́нную, ду́шу твою́ чи́стую на олта́рь Го́спода Христа́ принесла́ еси́, отрокови́це непоро́чная А́гние, сподо́би и нас, почита́ющих тя, досто́йно пред Го́сподем предста́ти.
Епа́рх нечести́вый суди́щу непра́ведному предста́ви тя, свята́я А́гние, и пе́рвее ласка́нием, последи́ же преще́нием понужда́ше Христа́ отврати́тися, ты же ве́рна То́му да́же до сме́рти пребыла́ еси́.
Преще́ний мучи́телей не убоя́вшися, любве́ ра́ди Христо́вы огне́м попале́ние и мече́м посече́ние претерпе́ла еси́, де́во му́ченице, ны́не же в неизрече́нней сла́ве с ли́ки святы́х Престо́лу Бо́жию предстои́ши.
Богоро́дичен: Де́во Влады́чице, на Тя всю наде́жду возлага́ем и вопие́м: да́руй нам, Всеблага́я, сокруше́ние серде́чное, сле́зы покая́ния и соверше́нное грехо́в оставле́ние.
Песнь 5
Ирмо́с: Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.
Его́же еди́наго возжеле́ла еси́, Тому́ от ю́ности прилепи́лася еси́ и всю себе́ в же́ртву чи́стую принесла́ еси́, глаго́лющи: возлюблю́ Тя, Го́споди, кре́посте моя́, Защи́тителю мой и Засту́пниче.
Ви́дя Симфро́ний епа́рх таково́е твое́ му́жество, де́во А́гние, увеща́ше роди́тели твоя́, да пону́дят тя бра́ку сочета́тися. Ти́и же, ве́дяще твою́ тве́рдость, глаго́лаху: изде́тска све́мы во́лю ея́ и не возмо́жем увеща́ти, николи́же бо своего́ си преста́нет.
Любо́вию Христо́вою уязвля́ема, свята́я му́ченице А́гние, жре́ти и́долом отрекла́ся еси́ и беззако́нному мучи́телю со дерзнове́нием рекла́ еси́: бого́м твои́м не пожру́ и де́вство мое́ нерастле́нно сохраню́, и́мам бо храни́теля себе́ А́нгела Бо́жия.
Богоро́дичен: Влады́чице Богоро́дице, прибе́жище на́ше, упова́ние и си́ло! Помози́ нам, недосто́йным рабо́м Твои́м, душе́вную красоту́ обрести́, грехо́в изба́витися и во святы́ню безстра́стия облещи́ся.
Песнь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.
Благодарю́ тя, Го́споди мой Иису́се Христе́, я́ко вчини́л мя еси́ в ли́це рабы́нь Твои́х, та́ко взыва́ше свята́я де́ва А́гния. Ея́же моли́твами, Го́споди, и нас научи́ твори́ти во́лю Твою́.
Хотя́ нечести́вый мучи́тель поруга́нию тя преда́ти, де́во А́гние, повеле́ в дом безче́стия тя привести́, ты же, Бо́гом храни́ма, диа́вольских ко́зней избе́гла еси́ и си́лу Госпо́дню беззако́нником уясни́ла еси́.
Вше́дшу ти в дом безче́стия, де́во А́гние, А́нгела храни́теля своего́ узре́ла еси́, и́же оде́ждею бе́лою, не челове́ки истка́ною, оде́я тя. Помози́ и нам, свята́я му́ченице, во оде́жду спасе́ния облещи́ся.
Богоро́дичен: Всеми́лостивая Богоро́дице, Всесла́вная Госпоже́, вы́шшая Небе́с, апо́столов похвало́, му́чеников сла́во, преподо́бных ра́досте, покры́й и сохрани́ нас от вся́каго зла благоприя́тными Твоими́ моли́твами.
Конда́к, глас 8:
На па́житех зла́чных А́гнца Бо́жия упа́сшися,/ Ду́ха Свята́го благода́ть стяжа́ла еси́,/ терпе́нием и кро́тостию Христу́ подража́ющи,/ всем се́рдцем Того́, я́ко Жениха́ твоего́, возлюби́ла еси́,/ Его́же ра́ди страда́ния лю́тая претерпе́вши,/ в же́ртву чи́сту и непоро́чну себе́ принесла́ еси́,/ свята́я му́ченице, де́во А́гние,/ чистоте́ и целому́дрию научи́ нас,// и моли́ спасти́ся душа́м на́шим.
Песнь 7
Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.
Я́коже Авраа́мстии о́троцы в Перси́де, в пещи́ искуше́ний су́щи, прославля́ла еси́ Бо́га, му́ченице добропобе́дная, зову́щи: сла́влю Тя, О́тче Небесе́ и земли́, посла́вшаго А́нгела Своего́ оде́яти мя оде́ждею милосе́рдия и храни́ти чи́сту ду́шу мою́.
Си́лою Бо́жиею умерщвле́н бысть ю́ноша безсту́дный, егда́ восхоте́ прикосну́тися телеси́ твоему́, свята́я де́во А́гние, ты же моли́твою воскреси́ его́ и научи́ взыва́ти: еди́н есть Госпо́дь Небесе́ и земли́, Бог христиа́нский.
Сему́ чудеси́ дивя́щеся, мно́зи от наро́да просла́виша ве́ру твою́, свята́я му́ченице, и, нече́стие язы́ческое отри́нувше, восприя́ша свято́е Креще́ние, и да́же до сме́рти пострада́ша, зову́ще: благослове́н еси́ в хра́ме сла́вы Твоея́, Го́споди.
Богоро́дичен: Испо́лни уста́ на́ша благода́тию Твое́ю, Ма́ти Све́та, и помози́ нам со дерзнове́нием взыва́ти: благослове́н еси́ в хра́ме сла́вы Твоея́, Го́споди.
Песнь 8
Ирмо́с: Ру́це распросте́р Дании́л,/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.
Вве́рженней ти во огнь, свята́я му́ченице, раздели́ся на дво́е пла́мень, дая́ ме́сто посреде́ себе́ простра́нно и прохла́дно. Ты же, доброде́тельми сия́ющи, взыва́ла еси́: благослови́те, вся дела́ Госпо́дня, Го́спода.
А́ще и повеле́ безу́мный мучи́тель вонзи́ти меч в горта́нь твой, му́ченице Христо́ва А́гние, и сме́рти тя преда́ти, оба́че, обагри́вшися кро́вию, востекла́ еси́ во оби́тели Жениха́ Безсме́ртнаго, взыва́ющи: благослови́те, вся дела́ Госпо́дня, Го́спода.
Я́ко чи́стая голуби́ца, к Бо́гу возлете́ла еси́, свята́я А́гние, и, златотка́нными оде́ждами сия́ющи, ны́не неизрече́нныя сла́вы наслажда́ешися и предстои́ши А́гнцу Бо́жию, в ра́дости зову́щи: благослови́те, вся дела́ Госпо́дня, Го́спода.
Богоро́дичен: Ми́лостивая Ма́ти Человеколюби́ваго и Ми́лостиваго Бо́га! Услы́ши смире́нное моле́ние на́ше и на Стра́шном Суде́ яви́ся нам Хода́таица и Засту́пница, да взыва́ем: благослове́нна Ты в жена́х, Всенепоро́чная Влады́чице.
Песнь 9
Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́.// Тем веселя́щеся, Тя, Богоро́дице, велича́ем.
Ве́лие дерзнове́ние иму́щи ко Христу́ Бо́гу, дщерь царе́ву, зело́ боля́щу те́лом и стру́пием обложе́ну су́щу, от боле́зни лю́тыя моли́твою твое́ю исцели́ла еси́, му́ченице А́гние. Подава́й здра́вие и нам, чту́щим святу́ю па́мять твою́.
Весели́тся днесь Це́рковь Христо́ва и ра́дуется, иму́щи в себе́ святы́я мо́щи му́ченицы А́гнии, от ни́хже неду́жнии исцеля́ются, неве́рнии ве́ру и́стинную обрета́ют и вси моля́щиися от бед избавля́ются.
О му́ченице добропобе́дная, свята́я де́во А́гние! Ты, я́ко а́гница нескве́рная, всю себе́ в же́ртву А́гнцу, взе́млющему грехи́ ми́ра, принесла́ еси́. Того́ моли́ мир вселе́нней дарова́ти, и душа́м на́шим ве́лию ми́лость.
Богоро́дичен: О Ма́ти Христа́, Сы́на Бо́га Жива́го, Цари́це Небесе́ и земли́! Вонми́ моли́твенному славосло́вию на́шему, из глубины́ серде́чныя Тебе́ возсыла́емому, и спаси́ ду́ши на́ша, я́ко Милосе́рда.
Свети́лен:
Ко Исто́чнику воды́ живы́я, Христу́ Бо́гу притекла́ еси́, свята́я му́ченице А́гние, и, от Него́ оби́льно напои́вшися, струи́ исцеле́ния неду́жным источи́ла еси́, и мно́гия лю́ди све́том и́стинныя ве́ры просвети́ла еси́. Ея́же моли́твами, Светода́вче, и нас све́том Твои́м озари́ и на путь и́стины наста́ви.
Сла́ва, и ны́не, Богоро́дичен:
Богоро́дице и Ма́ти Све́та! Лик святы́х жен в Ца́рстве Сы́на Твоего́ воспевае́т Тя, я́ко честне́йшую Херуви́м и сла́внейшую без сравне́ния Серафи́м. Те́мже и му́ченица добропобе́дная А́гния, во след Сы́на Твоего́ поте́кши, ублажа́ет Тя, Пречи́стая Де́во.
На хвали́тех стихи́ры, глас 5:
А́ще тща́ся нечести́вый гони́тель/ угро́зами и ле́стию притво́рною/ тече́ние твое́ ко спасе́нию разори́ти,/ оба́че моле́бнеи твои́ ру́це к Бо́гу воздева́ющи,/ кре́пость мучи́теля победи́ла еси́/ и, еди́ному Го́споду уневе́стившися,/ в же́ртву чи́сту себе́ приугото́вала еси́,// му́ченице А́гние многострада́льная.
Душе́вную чистоту́ и целому́дрие храня́щи,/ сия́ во основа́ние ве́ры серде́чныя положи́ла еси́,/ сего́ ра́ди со дерзнове́нием и́стину испове́дающи,/ злочести́выя и́долы и служи́тели обличи́ла еси́,/ муче́ний же лю́тых не устраши́вшися,/ попале́ние огне́м и посече́ние мече́м претерпе́ла еси́,// му́ченице А́гние добропобе́дная.
Еди́наго Го́спода Иису́са ра́спята и воскре́сша/ пред собо́ю вы́ну зре́ла еси́,/ му́ченице де́во А́гние,/ на всяк день со апо́столом взыва́ющи:/ мне бо е́же жи́ти, Христо́с,/ и е́же умре́ти, приобре́тение есть,/ Его́же ра́ди стражду́,/ Ему́ еди́ному служу́ и покланя́юся,/ я́ко и́стинному и живо́му Бо́гу,// от бед мя избавля́ющему.
Сла́ва, глас 6:
Украси́вши ду́шу твою́ смире́нием и кро́тостию,/ уста́ же испове́данием ве́ры освяти́вши,/ Красне́йшему добро́тою па́че сыно́в челове́ческих,/ в Небе́снем Ца́рствии предста́ла еси́./ Ему́же моли́ся о нас, му́ченице свята́я,/ да ми́лостив нам бу́дет// и спасе́т ду́ши на́ша.
И ны́не, Богоро́дичен, глас то́йже:
Тебе́, Де́во Чи́стая,/ еди́ну Засту́пницу тве́рду вси ве́рнии стяжа́хом,/ Ты бо родила́ еси́ Бо́га,/ сего́ ра́ди хвала́ми и пе́сньми// Тя ублажа́ем, по глаго́лу Твоему́.
Вели́кое славосло́вие. И отпу́ст.
