Служба преподобной Александре Дивеевской
Ме́сяца ию́ня в 13-й день
Преподо́бныя Алекса́ндры Диве́евския
НА МА́ЛЕЙ ВЕЧЕ́РНИ
На Го́споди, воззва́х: стихи́ры, глас 2:
Подобен: Ки́ими похва́льными венцы́:
Ка́я духо́вная пе́ния/ принесе́м ти, преподо́бная Алекса́ндро?/ Явле́нием бо тебе́ Цари́цы Небе́сныя/ Диве́ево ди́вно освяти́ся/ и четве́ртый жре́бий Ея́ нарече́ся./ Сего́ ра́ди мо́лим тя// пода́ти нам мир и ве́лию ми́лость.
Ки́ими похва́льными венцы́/ венча́ем тя, преподо́бная Алекса́ндро?/ Ты бо, в многотру́днем житии́/ во́лю Бо́жию усмотри́вши,/ в благодаре́нии Го́споду николи́же оскудева́ла еси́./ Те́мже моли́ Христа́ Бо́га// пода́ти нам мир и ве́лию ми́лость.
Ки́ими благогове́йными усты́/ восхва́лим пресла́вную ма́терь на́шу Алекса́ндру?/ Ми́лостивую покрови́тельницу и ско́рую помо́щницу,/ любо́вию свое́ю нас согрева́ющую,/ кро́тостию и смире́нием вся удивля́ющую/ и прося́щую нам у Христа́ Бо́га// мир и ве́лию ми́лость.
Ки́ими свяще́нными похвала́ми/ просла́вим Алекса́ндру богому́друю?/ Оби́тели Диве́евския украше́ние,/ мона́шествующих и́стинную наста́вницу/ и моли́твенницу те́плую о душа́х на́ших,/ прося́щую нам у Христа́ Бо́га// мир и ве́лию ми́лость.
Сла́ва, глас 4:
Днесь благода́рственная воспои́м/ ди́вному во святы́х Христу́ Бо́гу на́шему,/ дарова́вшему нам ма́терь преподо́бную,/ му́друю и чадолюби́вую наста́вницу,/ церко́вных уста́вов тве́рдую храни́тельницу,/ непоро́чное житие́ соверши́вшую,// ны́не же в ли́це жен святы́х сия́ющую.
И ны́не, Богоро́дичен, глас то́йже: И́же Тебе́ ра́ди:
На стихо́вне стихи́ры, глас 1:
Ве́лия твоя́ по́двиги и труды́,/ преподо́бная Алекса́ндро блаже́нная,/ ка́ко просла́вим, недосто́йнии?/ Ты бо, оби́тель Диве́евскую основа́вши,// и́ноческое житие́ в ней устро́ила еси́.
Стих: Ди́вен Бог во святы́х Свои́х,// Бог Изра́илев.
Вели́кий а́нгельский о́браз восприе́мши/ и послуша́ние Цари́цы Небе́сныя испо́лнивши,/ ду́шу в ру́це Бо́жии вве́рила еси́./ И ны́не с ли́ки жен преподо́бных// чи́сте зри́ши Святу́ю Тро́ицу.
Стих: Честна́ пред Го́сподем// смерть преподо́бных Его́.
Ве́лию благода́ть и дар исцеле́ний,/ еще́ живе́й ти су́щей, стяжа́вши,/ Алекса́ндро преподо́бная,/ ны́не на́ша проше́ния исполня́еши,/ к ра́це святы́х моще́й твои́х// с любо́вию притека́ющих.
Сла́ва, глас 8:
О, пресла́внаго чудесе́!/ Днесь ра́дуется оби́тель Диве́евская,/ исполне́нию прорече́ния преподо́бнаго Серафи́ма дивя́щися:/ се бо мо́щи преподо́бныя Алекса́ндры,/ я́ко многоце́нное сокро́вище,/ в хра́ме Рождества́ Богоро́дицы почива́ют/ и, я́ко крин присноцвету́щий,// благоуха́нием чуде́с всех притека́ющих исполня́ют.
И ны́не, Богоро́дичен, глас то́йже: Безневе́стная Де́во:
Тропа́рь зри на вели́цей вече́рни. Сла́ва, и ны́не, Богоро́дичен, глас 5: Ра́дуйся, две́ре Госпо́дня:
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 6:
Прииди́те, ве́рнии лю́дие,/ во святу́ю оби́тель Диве́евскую,/ я́же четве́ртый жре́бий Бо́жия Ма́тере нарица́ется,/ ублажи́м ве́рную рабу́ Пресвяты́я Богоро́дицы/ Алекса́ндру богому́друю,/ первонача́льницу свята́го ме́ста сего́,/ и, припа́дающе к ея́ честны́м и многоцеле́бным моще́м,/ усе́рдно помо́лимся:/ помяни́ нас, преподо́бная ма́ти на́ша,// во Ца́рствии Небе́снем.
Прииди́те, ве́рнии лю́дие,/ во святу́ю оби́тель Диве́евскую/ просла́вим чу́дную собесе́дницу А́нгелов/ и нужда́ющимся помо́щницу ско́рую,/ всечестну́ю ма́терь Алекса́ндру,/ первонача́льницу свята́го ме́ста сего́:/ та бо, Христа́ всем се́рдцем возлюби́вши,/ многотру́дное житие́ избра́,/ ны́не во сла́ве невече́рней Ему́ предстои́т// и мо́лится о спасе́нии душ на́ших.
О преподо́бная ма́ти на́ша Алекса́ндро,/ Боже́ственною просвети́вшися благода́тию/ и мяте́ж ми́ра отве́ргши,/ ева́нгельски Христу́ после́довала еси́/ и моли́твами Пречи́стей Богоро́дице неуста́нно послужи́ла еси́./ Те́мже, и оби́тели Ея́ первонача́льница су́щи,/ богому́драя наста́вница яви́лася еси́.// Помяни́ нас во Ца́рствии Небе́снем.
Алекса́ндро всеблаже́нная,/ а́нгельский о́браз восприе́мши,/ на земли́ доброде́тельне пожила́ еси́/ и, хра́мы мно́гия воздви́гши,/ си́рыя, ни́щия и в беда́х су́щия николи́же оставля́ла еси́,/ ны́не же, на Небесе́х водвори́вшися,/ чи́сте зри́ши Святу́ю Тро́ицу./ Испроси́ нам, преподо́бная ма́ти, ве́лию ми́лость,// да и мы всегда́ с Го́сподем бу́дем.
Мно́гия по́двиги, труды́ и боле́зни,/ блаже́нная Алекса́ндро, яви́ла еси́,/ егда́ в те́сней ке́лии пред распя́тием Христо́вым,/ на ка́мень главу́ полага́ющи,/ со слеза́ми но́щию усе́рдно моли́лася еси́./ Помози́ и нам в покая́нии и́стиннем житие́ сконча́ти// и Ца́рствия Небе́снаго сподо́битися.
Глас 7:
Наде́ющиися на Го́спода разуме́ют и́стину/ и ве́рнии в любви́ пребу́дут Ему́./ Та́ко и ты, богому́драя Алекса́ндро,/ све́том Ева́нгелия тьму неразу́мия просвети́вши,/ и́стины ве́ры правосла́вныя лю́дем уясня́ла еси́/ и живоно́сныя во́ды любве́ ве́рным источи́ла еси́./ Укрепи́ и нас во благоче́стии и чистоте́ пребыва́ти/ и моли́ Христа́ Бо́га,// да спасе́т ду́ши на́ша.
Глас 8:
Ублажа́ем тя, Алекса́ндро досточу́дная,/ ты бо, о бли́жних попече́ние творя́щи,/ а́лчущих ми́лостивая пита́тельница,/ неве́ст неиму́щих благоукраси́тельница/ и ско́рбных те́плая уте́шительница яви́лася еси́./ Те́мже, припа́дающе к ра́це моще́й твои́х,/ со умиле́нием про́сим тя:/ приими́ моли́твы на́ша/ и предвари́ на по́мощь// ве́рою па́мять твою́ почита́ющим.
Сла́ва, глас 6:
О Алекса́ндро блаже́нная,/ преподо́бный Серафи́м свиде́тельствова о тебе́,/ я́ко ты еси́ ве́лия раба́ Бо́жия,/ смире́ния высота́ и любве́ сокро́вище,/ и о всех те́плая моли́твенница./ Ны́не зрим тя я́ко щит кре́пок оби́тели на́шея/ проти́ву стрел вра́жиих,/ заступле́нием бо твои́м искуше́ния побежда́ются// и ду́ши на́ша очища́ются.
И ны́не, Богоро́дичен, глас 6: Кто Тебе́ не ублажи́т:
Вход. Проки́мен дне. И чте́ния преподо́бническая.
На лити́и стихи́ра собо́ру Диве́евских святы́х, глас 1:
Блаже́нна еси́, чу́дная оби́теле Диве́евская,/ сла́вни вси преде́ли твои́,/ стопа́ми Пресвяты́я Богоро́дицы освяще́ннии/ и по́двиги святы́х просла́вленнии,/ и́хже всехва́льную па́мять соверша́юще,/ славосло́вим Христа́ Бо́га, ди́внаго во святы́х Свои́х,// Ему́же мо́лимся спасти́ся душа́м на́шим.
Сла́ва, и ны́не, глас 4:
Воспои́м неусыпа́ющую в моли́твах Богоро́дицу/ и, притека́юще к Ней с ве́рою серде́чною,/ потщи́мся стяжа́ти милосе́рдие и кро́тость,/ да обря́щем Ея́ заступле́нием// у Христа́ Бо́га ве́лию ми́лость.
На стихо́вне стихи́ры, глас 2.
Подо́бен: Егда́ от Дре́ва:
Егда́ Боже́ственный глас/ дости́же тя, преподо́бная ма́ти Алекса́ндро,/ тогда́, бога́тство и сла́ву,/ и род твой оста́вивши,/ во оби́тель Фло́ровскую всели́лася еси́,/ иде́же, житие́ же́стоко пожи́вши,/ в моли́твах и труде́х Го́сподеви угоди́ла еси́./ Те́мже моли́ся Христу́ Бо́гу// спасти́ и просвети́ти ду́ши на́ша.
Стих: Ди́вен Бог во святы́х Свои́х,// Бог Изра́илев.
Егда́ благода́ть Боже́ственная/ испо́лни се́рдце твое́, преподо́бная ма́ти,/ тогда́ яви́ся ти Пресвята́я Де́ва,/ Цари́ца Небесе́ и земли́,/ повелева́ющи град Ки́ев оста́вити/ и оби́тель но́вую/ во ине́м ме́сте устро́ити,/ да сла́вится в ней и́мя Христа́ Бо́га,// Его́же моли́ спасти́ и просвети́ти ду́ши на́ша.
Стих: Честна́ пред Го́сподем// смерть преподо́бных Его́.
Егда́ Ма́ти Бо́жия яви́ся ти, преподо́бная Алекса́ндро,/ на пути́ в пу́стынь Саро́вскую/ и повеле́ устро́ити в Диве́еве оби́тель чу́дную,/ тогда́, пресла́вныя глаго́лы Ея́/ в се́рдце свое́м слага́ющи/ и повеле́ние исполня́ющи,/ мно́гими труды́ и по́двиги/ оби́тели до́брое нача́ло положи́ла еси́./ Те́мже моли́ся те́пле ко Го́споду// спасти́ и просвети́ти ду́ши на́ша.
Сла́ва, глас 4:
В честне́м прославле́нии твое́м,/ преподо́бная ма́ти Алекса́ндро,/ ве́рныя благода́тно озаря́еши/ и неду́ги безме́здно врачу́еши./ Те́мже, с любо́вию припа́дающе к ра́це моще́й твои́х,/ уми́льно глаго́лем:/ наста́ви ны ходи́ти путе́м по́двигов твои́х/ и помози́ нам благоугожда́ти Христу́ Бо́гу,// да прича́стницы Небе́снаго Ца́рствия сподо́бимся бы́ти.
И ны́не, Богоро́дичен, глас то́йже: При́зри на моле́ния Твои́х раб, Всенепоро́чная:
Тропа́рь, глас 5:
Преподо́бная ма́ти Алекса́ндро,/ благослове́ние Цари́цы Небе́сныя испо́лнивши,/ оби́тель Диве́евскую основа́ла еси́,/ в не́йже, многотру́дное житие́ соверши́вши,/ о́браз Христо́ва смире́ния яви́ла еси́.// Те́мже помяни́ нас во Ца́рствии Небе́снем.
НА У́ТРЕНИ
По 1-м стихосло́вии седа́лен, глас 4:
Всем се́рдцем твои́м, все́ю душе́ю и мы́слию Бо́га возлюби́вши,/ дар благода́тных слез, ма́ти Алекса́ндро, стяжа́ла еси́/ и пред Кресто́м Христо́вым усе́рдно моли́лася еси́,/ непреста́нно в созерца́нии Го́спода пребыва́ющи./ Те́мже, иску́сная де́лательница моли́твы у́мныя су́щи,/ научи́ и нас при́сно глаго́лати:/ Го́споди, Иису́се Христе́, Сы́не Бо́жий, поми́луй нас гре́шных.
Сла́ва, и ны́не, Богоро́дичен:
Удиви́шася, Чи́стая, ли́цы А́нгельстии,/ ка́ко, Богоро́дица су́щи,/ во юдо́ль скорбе́й челове́ческих низхо́диши,/ и вся́кий вопль моли́твенный слы́шиши,/ и утеше́ние ми́лостивно подае́ши,/ больны́х исцеля́еши и немощны́х заступа́еши,/ Де́во Ма́ти Госпо́дня,/ Сокро́вище неисчерпа́емое благода́ти Боже́ственныя.
По 2-м стихосло́вии седа́лен, глас 8:
Страстоте́рпец царь Никола́й благогове́йно почита́ше па́мять твою́,/ ма́ти Алекса́ндро./ Сего́ ра́ди вопие́м ти, ма́ти преподо́бная:/ моли́ с Ца́рственными страстоте́рпцы Христа́ Бо́га, о е́же спасти́ся нам.
Сла́ва, и ны́не, Богоро́дичен:
О Тебе́ ра́дуется и Тя прославля́ет вся́кая тварь, Де́во Пречи́стая,/ я́ко Невмести́маго вмести́ла еси́,/ Его́же при́сно моли́ о спасе́нии на́шем.
Велича́ние:
Ублажа́ем тя,/ преподо́бная ма́ти на́ша Алекса́ндро,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.
По полиеле́и седа́лен, глас 1:
Егда́ прибли́жися вре́мя преставле́ния твоего́, Алекса́ндро преподо́бная,/ тогда́ ду́хом отше́ствие твое́ ко Го́споду уразуме́ла еси́/ и, моли́тву сугу́бую со слеза́ми о оби́тели твое́й и сестра́х ея́ возне́сши,/ попече́ние о них на преподо́бнаго Серафи́ма возложи́ла еси́.
Сла́ва, и ны́не, Богоро́дичен:
Притеце́м вси, ве́рнии,/ к Небе́сней Цари́це и Ма́тери всех,/ прославля́юще Ея́ снизхожде́ние к ро́ду челове́ческому,/ и источи́м сле́зы умиле́ния,/ любо́вию зову́ще:/ ра́дуйся, Обра́дованная,/ ве́рных Твои́х рабо́в не оставля́ющая.
Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 104.
По 50-м псалме́ стихи́ра, глас 6:
Пред отше́ствием от жития́ сего́ вре́меннаго/ в схи́му вели́кую, преподо́бная Алекса́ндро, облекла́ся еси́/ и, Святы́х Та́ин Христо́вых приобщи́вшися,/ Каза́нскую ико́ну Пресвяты́я Богоро́дицы на пе́рси возложи́ла еси́,/ моли́тву же непреста́нную во усте́х иму́щи,/ ду́шу святу́ю в ру́це Христа́ Бо́га предала́ еси́./ Тому́ моли́ся не лише́нным и нам бы́ти// кончи́ны благи́я и насле́дия Небе́снаго.
Кано́н, глас 8.
Песнь 1
Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,// я́ко Еди́н сла́вно просла́вися.
Преподо́бную уго́дницу и ма́терь на́шу Алекса́ндру,/ первонача́льницу оби́тели Диве́евския,/ Бо́жия Ма́тере рабу́ избра́нную,/ ны́не за ны на Небесе́х моля́щуюся,/ Го́споди, сподо́би воспе́ти разу́мно.
Оби́тели Диве́евския первонача́льница яви́лася еси́, Алекса́ндро сла́вная,/ и, досто́йно послуша́ние Пресвяты́я Богоро́дицы испо́лнивши,/ Небе́сное Ца́рствие унасле́довала еси́./ Помози́ и нам доброде́тель послуша́ния стяжа́ти.
Воздержа́нием ди́вным и покая́нием сле́зным ду́шу твою́ очи́стивши/ и а́нгельскому житию́ поревнова́вши,/ храм Свята́го Ду́ха яви́лася еси́, преподо́бная Алекса́ндро.
Богоро́дичен: Пречи́стая Богоро́дице Де́во,/ па́че естества́ неизрече́нно ро́ждшая Присносу́щное и Пребоже́ственное Сло́во,/ досто́йно в пе́снех велича́ем Тя.
Песнь 3
Ирмо́с: Утвержде́й сло́вом Небеса́/ и зе́млю основа́вый на вода́х мно́гих,// утверди́ мя к пе́нию славосло́вия Твоего́, Го́споди.
Мирска́я и тле́нная возненави́девши,/ плоть свою́ изнури́ла еси́, ма́ти Алекса́ндро,/ те́мже и, моли́тву к Бо́гу при́сно вознося́щи,/ Того́ Еди́наго возлюби́ла еси́.
Просвеще́ние Ду́ха в се́рдце твое́м прие́мши, преподо́бная ма́ти,/ луча́ми доброде́телей страсте́й мглу я́ве отгна́ла еси́./ Помози́ и нам от омраче́ния страсте́й изба́витися.
Твоя́ моли́твы и труды́,/ я́ко кади́ло благово́нное, Влады́це и Богома́тери принесла́ еси́, преподо́бная,/ та́же и мно́ги хра́мы Бо́жия твои́м раче́нием и по́двиги воздви́гла еси́./ Ны́не же вознеси́ моле́ние о благостоя́нии Це́ркве Ру́сския.
Богоро́дичен: Утвержде́ние, покро́в и прибе́жище/ бу́ди с ве́рою к Тебе́ прибега́ющим, Де́во Богороди́тельнице,/ и Бо́жию Ма́терь Тя испове́дающим.
Седа́лен, глас 3.
Подо́бен: Красоте́ де́вства:
Бога́тство тле́нное и сла́ву мимотеку́щую в млады́х ле́тех оста́вивши,/ Небе́сное бога́тство и сла́ву ве́чную восприя́ла еси́, преподо́бная Алекса́ндро./ Те́мже блажи́м свято́е твое́ преставле́ние и уми́льно вопие́м:/ помяни́ нас у Престо́ла Бо́жия, ма́ти честна́я.
Сла́ва, и ны́не, Богоро́дичен:
Я́же ра́дости прие́мшая исполне́ние,/ приими́ от нас, рабо́в Твои́х, целова́ние Арха́нгелово:/ ра́дуйся, Ра́дость ми́ру ро́ждшая,/ ра́дуйся, Ма́нно Небе́сная, Хле́бом жи́зни нас напита́вшая,/ ра́дуйся, Цари́це, в жена́х благослове́нная.
Песнь 4
Ирмо́с: Та́йно проро́к предзря́ от Де́вы Тя, Сло́ве, воплоща́ема,/ пе́сненно вопия́ше:// сла́ва си́ле Твое́й, Го́споди.
Огне́м любве́ Бо́жия те́рние страсте́й попали́вши,/ глаго́лы ди́вныя Пресвяты́я Богоро́дицы о четве́ртом Ея́ жре́бии во вселе́нней услы́шати сподо́билася еси́./ Те́мже и оби́тель Диве́евскую воздви́гла еси́.
Насажде́на в дому́ Бо́жия Ма́тере бы́вши,/ я́ко цве́ты кра́сныя, мно́гия доброде́тели израсти́ла еси́/ и, во основа́ние оби́тели ка́мень ве́ры положи́вши,/ мно́гим и́нокиням путь во оби́тели Небе́сныя указа́ла еси́.
Жезло́м доброде́тельныя твоея́ жи́зни/ мно́гия ду́ши в Ца́рствие Небе́сное упра́вила еси́, ма́ти Алекса́ндро,/ помози́ и нам доброде́тели ева́нгельския стяжа́ти/ и жи́зни блаже́нныя вку́пе со все́ми святы́ми дости́гнути.
Богоро́дичен: Ты еси́, Блага́я, ве́рным утвержде́ние,/ от лю́тых избавле́ние и просвеще́ние душ на́ших,/ и оби́тели Диве́евской стена́ и огражде́ние.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́, ино́го не ве́мы.
Те́сный путь па́че простра́ннаго предпочла́ еси́/ и, ра́дующися, мно́гия труды́ и боле́зни претерпе́ла еси́, преподо́бная Алекса́ндро./ Укре́пи и ны во обстоя́ниих жите́йских моли́твами твои́ми.
В пе́ниих и поще́ниих, моли́твах же и бде́ниих пожи́вши, преподо́бная,/ Христу́ уневе́стилася еси́/ и о́браз и́ноческаго жития́/ сестра́м оби́тели Диве́евския яви́ла еси́.
Житие́ твое́ пра́ведно и преподо́бно бысть, Алекса́ндро блаже́нная,/ те́мже, сугу́баго по́двига взыску́ющи,/ вели́кую схи́му пред кончи́ною прия́ти сподо́билася еси́.
Богоро́дичен: От вся́каго прило́га проти́вна и ско́рби,/ и от враг лю́тых рабы́ Твоя́ свободи́, Всенепоро́чная,/ Тя бо держа́вное Предста́тельство стяжа́хом.
Песнь 6
Ирмо́с: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве Христе́ Бо́же наш.
Сла́ву ро́да твоего́ презре́вши/ и за́поведи ева́нгельския ре́вностне испо́лнивши, преподо́бная,/ Христа́ ра́ди обнища́ла еси́/ и мно́гими доброде́тельми обогати́лася еси́.
Вели́каго подви́жника Саро́вскаго/ в ю́нем иеродиа́коне Серафи́ме предузре́ла еси́, Алекса́ндро му́драя,/ и попече́ние о оби́тели Диве́евской на него́ возложи́ла еси́./ Помози́те и нам, святи́и уго́дницы, насле́дники Ца́рствия Небе́снаго бы́ти.
По вся дни и но́щи Бо́гу благоугожда́ющи,/ в час кончи́ны твоея́ Святы́я Та́йны Христо́вы восприя́ла еси́./ Вознеси́, преподо́бная ма́ти, те́плыя моли́твы и о нас ко Го́споду,/ да христиа́нскую кончи́ну улучи́ти сподо́бимся.
Богоро́дичен: Пала́та Царя́ Сла́вы и Престо́л огнезра́чный была́ еси́, Де́во,/ Херуви́м превы́шши и Серафи́м сла́внейши,/ те́мже вся́кое дыха́ние сла́вит Тя,/ я́ко Ма́терь Христа́, Бо́га на́шего.
Конда́к, глас 3:
Воспои́м днесь, ве́рнии,/ преподо́бную ма́терь на́шу Алекса́ндру,/ ди́внаго уде́ла Пресвяты́я Богоро́дицы первонача́льницу,/ да ея́ моли́твами и предста́тельством Пречи́стыя Де́вы// Госпо́дь пода́ст нам грехо́в проще́ние и ве́лию ми́лость.
И́кос:
Кто дово́лен досто́йно воспе́ти труды́ и боле́зни,/ по́двиги и поще́ния твоя́, преподо́бная ма́ти Алекса́ндро?/ Оба́че благоприя́тными твои́ми к Бо́гу моли́твами/ пода́ждь нам ны́не благода́ть Свята́го Ду́ха,/ да просла́вим терпе́ние и смире́ние твоя́/ и любо́вь нелицеме́рную воспое́м,/ и́миже врага́ всезло́бнаго посрами́ла еси́./ Те́мже моли́ся ко Го́споду/ дарова́ти нам грехо́в проще́ние и ве́лию ми́лость.
Песнь 7
Ирмо́с: В нача́ле зе́млю основа́вый/ и Небеса́ Сло́вом утверди́вый,// благослове́н еси́ во ве́ки, Го́споди Бо́же оте́ц на́ших.
Путе́м ше́ствующи, вводя́щим в Боже́ственный поко́й,/ уклони́лася еси́ се́тей де́монских, блаже́нная./ Те́мже, Боже́ственною благода́тию покрыва́ема, вопия́ла еси́:/ благослове́н еси́, Бо́же оте́ц на́ших.
Повеле́ние Цари́цы Небе́сныя исполня́ющи/ и чу́дную оби́тель Ея́ созида́ющи,/ вы́ну в моли́тве пребыва́ла еси́, вопию́щи:/ благослове́н еси́, Бо́же оте́ц на́ших.
Ка́мень под главу́ твою́ полага́ющи и слез то́ки пролива́ющи,/ жесто́кое житие́ провожда́ла еси́, преподо́бная,/ и в ра́дости духо́вней воспева́ла еси́:/ благослове́н еси́, Го́споди Бо́же оте́ц на́ших.
Богоро́дичен: Вся светоно́сна еси́, Де́во, Свет незаходи́мый прие́мши,/ и просвеща́еши, Чи́стая, ве́рою Тебе́ вопию́щих:/ благослове́н, Пречи́стая, Плод чре́ва Твоего́.
Песнь 8
Ирмо́с: Безнача́льнаго Царя́ сла́вы,/ Его́же трепе́щут Небе́сныя си́лы,/ по́йте, свяще́нницы,// лю́дие, превозноси́те во вся ве́ки.
Му́ченице цари́це Алекса́ндре поревнова́ла еси́, богому́драя,/ и жизнь твою́ в ру́це Бо́жии предала́ еси́,/ то́чию Еди́наго Христа́ ве́дущи и Сего́ ра́спята,/ пою́щи Его́ во вся ве́ки.
Дар моли́твы чи́стыя, смире́ние и любо́вь соверше́нную име́ла еси́, богоблаже́нная./ Моли́ся и нам в доброде́тели сия́ облещи́ся/ и Го́спода воспева́ти во вся ве́ки.
За́поведем Христо́вым поревнова́вши,/ ни́щия, си́рыя и младе́нцы николи́же в беде́ оставля́ла еси́, досточу́дная,/ те́мже всели́лася еси́ во оби́тели Небе́сныя,/ иде́же с ли́ки жен честны́х Го́спода прославля́еши во вся ве́ки.
Богоро́дичен: Все упова́ние мое́ на Тя возложи́х, Влады́чице,/ не и́мам бо ины́я по́мощи ра́зве Тебе́./ Те́мже пода́ждь ми бога́тую Твою́ ми́лость.
Песнь 9
Ирмо́с: Неви́димаго зра́ком Боже́ственным прие́мшая,/ Неискусобра́чная Де́во и Ма́ти,// пе́сньми Рождество́ Твое́ велича́ем.
Я́ко ве́лию в жена́х и избра́нницу Ма́тере Бо́жия,/ откры́ тя Бог преподо́бному Серафи́му,/ и́же и яви́ сугу́бое попече́ние о оби́тели Диве́евской./ Те́мже ку́пно с ним моли́ся о ча́дех твои́х, блаже́нная.
Пред кончи́ною твое́ю, ма́ти преподо́бная,/ о́браз Каза́нския ико́ны Пресвяты́я Богоро́дицы на пе́рси твоя́ возложи́ла еси́/ и та́ко с ми́ром ду́шу твою́ Бо́гу предала́ еси́.
Моли́ ми́лостиваго Бо́га, преподо́бная ма́ти на́ша Алекса́ндро,/ я́ко дерзнове́ние к Нему́ иму́щая,/ да и мы с тобо́ю сподо́бимся сла́вити Его́ во Ца́рствии Небе́снем.
Богоро́дичен: Спаси́, Пречи́стая Влады́чице, к Тебе́ прибега́ющия от беды́ и напа́стей,/ от греха́ и бу́ри страсте́й плотски́х,/ от волне́ний и обстоя́ний жите́йских,/ и бу́дущаго осужде́ния.
Свети́лен:
Егда́ у́бо честны́я мо́щи твоя́, преподо́бная ма́ти Алекса́ндро, обрето́шася,/ тогда́ благоуха́ние из гро́ба твоего́ изы́де и благода́ть ве́лия яви́ся,/ неду́ги исцеля́ющи и ду́хи лука́выя отгоня́ющи.
Сла́ва, и ны́не, Богоро́дичен:
Сла́во вселе́нныя, Пресла́вная Де́во,/ Бо́га Пресла́внаго сла́вно ро́ждшая,/ сла́вы сподо́би Боже́ственныя,/ я́ко Богоро́дицу при́сно Тя сла́вящия.
На хвали́тех стихи́ры, глас 5.
Подо́бен: Ра́дуйся, Живоно́сный Кре́сте:
Ра́дуйся, ма́ти Алекса́ндро,/ звездо́ пресве́тлая от Диве́ева возсия́вшая/ и Росси́йскую страну́ благода́тно озари́вшая!/ Ра́дуйся, сла́вная подви́жнице,/ дре́вним богоно́сным отце́м уподо́бившаяся,/ ду́шу твою́ дом Ду́ха Свята́го соде́лавшая,/ хра́мы Бо́жия и оби́тель и́нокиням воздви́гшая!/ Моли́ся мир ми́рови дарова́ти// и душа́м на́шим ве́лию ми́лость.
Ра́дуйся, предста́тельнице на́ша,/ преподо́бная ма́ти Алекса́ндро!/ Ускори́ на по́мощь нам, немощны́м и си́рым,/ и вознеси́ святы́я моли́твы твоя́ ко Го́споду,/ да́нною же ти от Него́ благода́тию/ неду́ги на́ша душе́вныя и теле́сныя исцели́,/ ми́рови мир дарова́ти испроси́// и душа́м на́шим ве́лию ми́лость.
Ра́дуйся, преподо́бная ма́ти Алекса́ндро!/ Первонача́льнице оби́тели Диве́евския,/ сосу́де благода́ти Бо́жия/ и избра́ннице Цари́цы Небе́сныя./ Ра́дуйся, боля́щих исцеле́ние,/ малоду́шных укрепле́ние,/ заблу́ждших путеводи́тельнице,/ мона́шествующих богому́драя наста́внице!/ Помяни́ и нас в моли́твах твои́х ко Го́споду,// прося́щи душа́м на́шим ве́лию ми́лость.
Ра́дуйся, богому́драя ма́ти Алекса́ндро,/ ве́лия в жена́х и преподо́бных красото́!/ Восхваля́ем смире́ние твое́/ и любо́вь ко всем нелицеме́рную,/ и́миже благода́ть Свята́го Ду́ха стяжа́ла еси́./ Те́мже честну́ю па́мять твою́ соверша́ющим/ пода́ждь да́ры целе́бныя/ и моли́ Христа́ Бо́га/ мир ми́рови дарова́ти// и душа́м на́шим ве́лию ми́лость.
Сла́ва, глас 3:
Преподо́бная ма́ти Алекса́ндро,/ кто испове́сть по́двиги многотру́днаго жития́ твоего́/ и ми́лости Бо́жия, чрез тя явле́нныя, кто исчи́слит?/ Мы же, избра́нницу тя Пречи́стыя Богоро́дицы ве́дуще/ и на дерзнове́ние твое́ пред Бо́гом упова́юще,/ во умиле́нии серде́чнем зове́м ти:/ о, преподо́бная ма́ти на́ша!/ Помоли́ся за ны// и помяни́ нас во Ца́рствии Небе́снем.
И ны́не, Богоро́дичен, глас то́йже:
Без се́мене зачала́ еси́ от Ду́ха Свята́го/ и родила еси́ Сына Бо́жия,/ сего́ ра́ди, славосло́вяще, воспева́ем Ти:// ра́дуйся, Пресвята́я Де́во.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 208. Аллилу́ия, глас 1: Терпя́ потерпе́х Го́спода, и внят ми, и услы́ша моли́тву мою́. Ева́нгелие от Матфе́я, зача́ло 104. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О свята́я уго́днице Бо́жия, преподо́бная ма́ти Алекса́ндро! Приими́ недосто́йныя моли́твы на́ша, с ве́рою и любо́вию к тебе́ возноси́мыя, и помози́ нам христиа́нския доброде́тели стяжа́ти, ве́ру кре́пкую и любо́вь к Бо́гу и бли́жним име́ти, крест скорбе́й и боле́зней с терпе́нием носи́ти. О блаже́нная ма́ти на́ша! Мно́гими труды́ и по́двиги благода́ть у Бо́га обре́тши, помяни́ нас во Ца́рствии Небе́снем, помоли́ся за нас, да твои́ми моли́твами спаса́еми в ны́нешнем ве́це, и в бу́дущем удосто́имся хвали́ти и воспева́ти всесвято́е и́мя Отца́, и Сы́на, и Свята́го Ду́ха, во ве́ки веко́в. Ами́нь.
