Служба новомученице Татиане Гримблит

Ме́сяца сентября́ в 10-й день
Святы́я новому́ченицы Татиа́ны Гри́мблит

 

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 2.

Подо́бен: Егда́ от Дре́ва:

Восхва́лим, ве́рнии, пе́сньми духо́вными,/ му́ченицу добропобе́дную Татиа́ну,/ я́же, стра́ха муче́ний не убоя́вшися,/ к страда́нием му́жественне устреми́ся/ и ду́шу свою́, я́ко же́ртву непоро́чную,/ в ру́це Подвигополо́жника Христа́ предаде́./ Ны́не же с ли́ки святы́х жен Ему́ предстои́т/ и мо́лится приле́жно// мир душа́м на́шим дарова́ти и ве́лию ми́лость.

Христу́ Жениху́ раче́нием твоего́ се́рдца/ от младе́нства порабо́тати возжеле́ла еси́,/ во дни же гоне́ний лю́тых,/ любо́вию к Нему́ распала́ема,/ страда́ния и му́ки небоя́зненно претерпе́ла еси́,/ неве́сто благосла́вная Татиа́но./ Ны́не же, в нетле́ннем черто́зе пребыва́ющи,/ приле́жно моли́ся Спа́су и Влады́це всех,// мир душа́м на́шим дарова́ти и ве́лию ми́лость.

Я́ко жены́ мироно́сицы дре́вле,/ доброде́тельми мно́гими преукра́шена/ и дела́ми милосе́рдия испо́лнена,/ прехва́льная страда́лице Татиа́но,/ Христа́ всем се́рдцем возлюби́ла еси́/ и вме́сто ми́ра благово́ннаго/ ду́шу твою́ в же́ртву Ему́ принесла́ еси́./ Ны́не же, Бо́гу предстоя́щи,// испроси́ душа́м на́шим мир и ве́лию ми́лость.

Сла́ва, глас 6:

Ини́и язы́цы му́дростию хва́лятся,/ ини́и бога́тством и си́лою,/ мы же сла́вными новому́ченики и испове́дники,/ по́двиги свои́ми процве́тшими,/ кро́вию зе́млю на́шу обагри́вшими/ и ве́рныя прославля́ти научи́вшими/ Отца́ и Сы́на и Свята́го Ду́ха,// Тро́ицу Единосу́щную и Неразде́льную.

И ны́не, пра́здника.

Вход. Проки́мен дне. И чте́ния 3 му́ченическая.

На лити́и стихи́ры, глас 1:

Я́ко не́когда восто́чнии ца́рие/ Богомладе́нцу Христу́ да́ры принесо́ша,/ та́кожде и ты, Татиа́но богому́драя,/ принесла́ еси́ от сокро́вища се́рдца твоего́/ вме́сто зла́та – ве́ру чи́стую,/ вме́сто фимиа́ма – моли́тву те́плую,/ вме́сто сми́рны – страсте́й умерщвле́ние,// и яви́лася еси́ вои́стину же́ртва благоприя́тная.

Я́ко а́гница нескве́рная,/ посреде́ мучи́телей предста́ла еси́/ и, сих зверонра́вие кро́тостию победи́вши,/ де́рзость же тех терпе́нием посрами́вши,/ Го́рняго Иерусали́ма дости́гла еси́,/ му́ченице Татиа́но добропобе́дная,/ иде́же, Христу́ предстоя́щи,// мо́лишися о душа́х на́ших.

Сла́ва, глас 8:

Ру́це твои́ на ра́ло за́поведей Бо́жиих возложи́вши,/ вспять не обрати́лася еси́/ и, Христу́ усе́рдно рабо́тающи,/ плод стори́чный доброде́телей принесла́ еси́:/ ве́ру несумне́нную, наде́жду изве́стную/ и любо́вь нелицеме́рную,/ наипа́че же милосе́рдию прилежа́ла еси́,/ свята́я му́ченице Татиа́но./ Те́мже моли́ся от бед и скорбе́й изба́витися// благоче́стно соверша́ющим святу́ю па́мять твою́.

И ны́не, пра́здника.

На стихо́вне стихи́ры, глас 6.

Подо́бен: Все отло́жше:

Му́ченице пресла́вная Татиа́но,/ ты, жена́ естество́м су́щи,/ му́жественне смерть прия́ла еси́/ и, Кресто́м Христо́вым вооружи́вшися,/ стра́сти душетле́нныя отсекла́ еси́/ и го́рдаго зми́я смире́нием попра́ла еси́./ Ны́не же, в ра́дости ве́чней пребыва́ющи,/ Христу́ Бо́гу моли́ся,/ грехо́в проще́ние нам дарова́ти,// благоче́стно соверша́ющим святу́ю па́мять твою́.

Стих: Зане́ Тебе́ ра́ди умерщвля́емся весь день,// вмени́хомся я́ко о́вцы заколе́ния.

Огне́м любве́ распала́ема/ и дела́ми милосе́рдия укра́шена,/ стра́ждущим и в заточе́нии су́щим/ усе́рдно послужи́ла еси́/ и в ра́дость Го́спода твоего́ вошла́ еси́,/ Татиа́но, му́ченице пресла́вная./ Те́мже и нас, доброде́тельми убо́гих/ и мно́гими страстьми́ испо́лненных,/ от язв душетле́нных изба́ви// и на путь благоче́стия напра́ви.

Стих: Ди́вен Бог во святы́х Свои́х,// Бог Изра́илев.

Я́ко ма́слина плодови́та/ в стране́ на́шей яви́лася еси́,/ му́ченице Христо́ва Татиа́но,/ исцеля́ющи еле́ем милосе́рдия/ ду́ши и телеса́ неду́гующих/ и твоея́ по́мощи прося́щих./ Ны́не же, Бо́гу предстоя́щи,/ да́нною тебе́ свы́ше благода́тию/ испроси́ боля́щим исцеле́ние// и душа́м нашим ве́лию ми́лость.

Сла́ва, глас 8:

Ра́дуйся, свята́я му́ченице Татиа́но,/ прему́драя учени́це Христо́ва,/ вре́менная бо искуше́ния преше́дши,/ ны́не в ра́дости ве́чней пребыва́еши/ и гла́са А́нгелов наслажда́ешися,/ непреста́нно воспева́ющих:// Свят, Свят, Свят еси́, Го́споди.

И ны́не, пра́здника.

Тропа́рь, глас 3:

Мироно́сицам жена́м в доброде́телех подража́ющи,/ в темни́цах и ю́зах су́щим усе́рдно послужи́ла еси́,/ и, о́браз ева́нгельскаго милосе́рдия нам показа́вши,/ за Христа́ му́ченическую смерть прия́ла еси́,/ Татиа́но пресла́вная./ Ны́не, Бо́гу предстоя́щи,// моли́ спасти́ся душа́м на́шим.

 

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, святы́я. И ны́не, пра́здника.

По 1-м стихосло́вии седа́лен, глас 4:

Житие́м пра́ведным ны́не обнища́х/ и грехи́ мно́гими ура́них ду́шу мою́,/ но ты, му́ченице честна́я,/ бога́тством милосе́рдия и лечбо́ю моли́тв твои́х/ исцели́ мене́ немощна́го,/ я́ко да воспою́ сла́вныя твоя́ по́двиги.

Сла́ва, и ны́не, пра́здника.

По 2-м стихосло́вии седа́лен, глас 4:

Я́ко разбо́йницы, обыдо́ша мя стра́сти моя́,/ светови́дную оде́жду души́ моея́ совлеко́ша/ и ту ра́нами грехо́вными уязви́ша,/ но ве́дый тя ми́лостивую помо́щницу,/ из глубины́ се́рдца моего́ взыва́ю:/ проле́й еле́й милосе́рдия на мя/ и е́ле жи́ва су́ща, возста́ви,/ Татиа́но, му́ченице честна́я.

Сла́ва, и ны́не, пра́здника.

Велича́ние:

Велича́ем тя,/ свята́я му́ченице Татиа́но,/ и чтим честна́я страда́ния твоя́,/ я́же за Христа́// претерпе́ла еси́.

Псало́м избра́нный: Бог нам прибе́жище и си́ла:

По полиеле́и седа́лен, глас 8:

В багряни́цу от крове́й твои́х оде́явшися/ и порфи́рою сла́вы украси́вшися,/ вошла́ еси́ в черто́г Христо́в, Татиа́но богому́драя,/ иде́же святи́и новому́ченицы и испове́дницы Це́ркве Ру́сския/ Престо́лу Боже́ственныя сла́вы предстоя́т./ Сего́ ра́ди мо́лим тя:/ вознеси́ с ни́ми моли́твы о нас,/ любо́вию па́мять твою́ пра́зднующих.

Сла́ва, и ны́не, пра́здника.

Та́же степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 6:

Днесь восхва́лим, ве́рнии,/ ди́внаго во святы́х Свои́х Бо́га/ и воспои́м Ему́ благода́рственно,/ я́ко яви́ нам Татиа́ну пречу́дную,/ чистото́ю и милосе́рдием укра́шенную/ и благода́ть Свята́го Ду́ха стяжа́вшую,/ и та́ко возопии́м:/ Го́споди, моли́твами Твоея́ му́ченицы,/ не помяни́ беззако́ний на́ших,// но спаси́ ду́ши на́ша.

Кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Днесь па́мять му́ченицы пресла́вныя Татиа́ны нас созва́, да восхва́лим, ве́рнии, доброде́тели и труды́ ея́ и, торжество́м духо́вне напита́вшеся, просла́вим Изба́вителя и Бо́га на́шего.

Благочести́ваго ко́рене о́трасль всечестна́я су́щи, му́ченице сла́вная, вся́цей доброде́тели от ю́ности навы́кла еси́ и, зако́на Бо́жия николи́же оставля́ющи, я́ко дре́во плодоно́сное при исхо́дищах вод яви́лася еси́.

Глаго́л Христо́в, я́ко блаже́ни ми́лостивии, от младе́нства в се́рдце твое́м восприе́мши, до́брою стезе́ю ше́ствовала еси́, всечестна́я Татиа́но, заключе́нных за и́мя Христо́во утеша́ющи и от гла́да избавля́ющи.

Богоро́дичен: Тя, благослове́нную в жена́х, арха́нгельским гла́сом велича́ем: ра́дуйся, Благода́тная, Госпо́дь с Тобо́ю.

Песнь 3

Ирмо́с: Небе́снаго кру́га Верхотво́рче Го́споди/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// еди́не Человеколю́бче.

Ста́рца Саро́вскаго почита́ющи, во оби́тель Диве́евскую всели́тися возжела́ла еси́, свята́я, оба́че, во́лю Госпо́дню о себе́ позна́вши, к сме́рти и страда́нию угото́вилася еси́, пою́щи: утверди́ мене́ в любви́ Твое́й, еди́не Человеколю́бче.

Преподо́бнаго Гаврии́ла, доброде́тельми укра́шена, наста́вника ко спасе́нию обрела́ еси́, блаже́нная Татиа́но, и́же поуча́ше тя в по́двизе духо́внем пребы́вати и в любви́ Госпо́дней утвержда́тися.

Святе́й Анастаси́и Узореши́тельнице в милосе́рдии подража́ющи, во у́зах и заточе́нии су́щим усе́рдно послужи́ла еси́, богозва́нная неве́сто Татиа́но, пою́щи: утверди́ мене́ в любви́ Твое́й, еди́не Человеколю́бче.

Богоро́дичен: Рождество́м Твои́м, Де́во Пречи́стая, род челове́ческий изба́вила еси́ служе́ния вра́жия и же́нское естество́ Тобо́ю почте́но бысть.

Седа́лен, глас 8:

Ка́я темни́ца не име́ тя ю́зницу,/ кий град не и́мать тя засту́пницу,/ не то́кмо земля́ Моско́вская о тебе́ хва́лится,/ но и Зыря́нская с на́ми ликовству́ет,/ и Казахста́нская о тебе́ ра́дуется,/ и мно́зи ини́и гра́ды и ве́си свеселя́тся с на́ми в торжестве́ твое́м,/ помина́юще изгна́ния и прославля́юще страда́ния твоя́,/ Татиа́но, му́ченице христоимени́тая.

Сла́ва, и ны́не, Богоро́дичен:

Боголюби́вая Влады́чице, А́нгелов украше́ние и му́чеников сла́во,/ с ни́ми моли́ся обрести́ нам ми́лость и разреше́ние от беззако́ний на́ших,/ помози́ тече́ние жи́зни на́шея до́бре соверши́ти/ и Ца́рствия Небе́снаго насле́дники яви́тися.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,// и просла́вих Твое́ Божество́.

Нрав благ пра́ведных жен Ма́рфы и Мари́и стяжа́вши, еди́ное на потре́бу обрела́ еси́ и ве́ру благи́ми де́лы украси́ла еси́, а́лчущих пита́ющи, стра́нных утеша́ющи и больны́х посеща́ющи, му́ченице сла́вная.

Доброде́телем безсребре́нников и чудотво́рцев подража́ющи, на служе́ние стра́ждущим устреми́лася еси́, Татиа́но терпеливоду́шная. Те́мже и на́ша теле́сныя и душе́вныя неду́ги исцели́ благоприя́тными твои́ми моли́твами.

Милосе́рдие твори́ти в житии́ твое́м возлюби́вши, вся име́ния твоя́ в ру́це ни́щих влага́ла еси́ и та́ко Бо́гу угоди́ла еси́. Те́мже мо́лим тя: ча́сти челове́ка бога́та, оба́че немилосе́рда, изба́ви нас и со все́ми святы́ми в не́дрех Авраа́мовых всели́тися Го́спода умоли́.

Богоро́дичен: Родила́ еси́ Сы́на Бо́жия пло́тию, де́вство сохра́ньши, те́мже притека́ют к Тебе́, Пречи́стая Влады́чице, отрокови́цы, де́вство возлюби́вшия, и я́ве побежда́ют неви́димыя враги́.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.

Де́вственных лик о тебе́, неве́сто Христо́ва, ны́не ра́дуется, собо́р му́чеников весели́тся и мно́жества благочести́вых в хра́ме взыва́ют: Твой мир пода́ждь нам, Человеколю́бче.

От тесноты́ темни́чныя и смра́днаго заточе́ния, му́ченице честна́я, к простра́нней широте́ рая́ сла́дости прешла́ еси́ и святы́х све́тлость узре́ла еси́. Ны́не приле́жно с ни́ми моли́ся, дарова́ти нам мир и ве́ры утвержде́ние.

О му́ченице добропобе́дная, ла́стовице кра́сная, голуби́це кро́ткая, го́рлице миролюби́вая! Ду́шу мою́ плодоно́сну покажи́ и нрав жестокосе́рдый премени́, и мир душе́вный низпосли́ моли́твами твои́ми.

Богоро́дичен: Ны́не род челове́ческий возра́довася, печа́ль преста́ и ра́дость процвете́, я́ко Бог всели́ся во утро́бу Твою́, Пречи́стая, и ви́ден бысть Тобо́ю.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

И́стинною любо́вию, милосе́рдием и кро́тостию, терпе́нием и целому́дрием украси́вшися, оби́тель Ду́ха Свята́го себе́ соде́лала еси́, свята́я, нас же, греха́ми отягче́нных, посети́ и наде́ждою на ми́лость Бо́жию обо́дри, моли́твами твои́ми.

Страда́ния и гоне́ния от безбо́жных претерпе́вши и си́лою Креста́ Христо́ва диа́вола победи́вши, Небе́снаго приста́нища дости́гла еси́, избра́ннице Христо́ва, иде́же неотъе́млемый мир обрела́ еси́.

Испове́дников Христо́вых в темни́цах утеша́ющи, нище́тою во́льною себе́ украси́ла еси́, свята́я Татиа́но, и, страда́ния ни во что́же вмени́вши, от сме́рти к Жи́зни прешла́ еси́.

Богоро́дичен: Тя, Де́во, я́ко Ма́терь Бо́жию, ли́цы му́ченичестии велегла́сно прославля́ют, те́мже и свята́я Татиа́на, Сы́ну Твоему́ после́довавши, ку́пно с ни́ми ублажа́ет Тя, Пречи́стая.

Конда́к, глас 2:

Сло́во Бо́жие се́рдцем твои́м восприе́мши,/ ми́ру распя́лася еси́,/ свята́я му́ченице Татиа́но,/ и, в служе́нии стра́ждущим Бо́гу угоди́вши,/ плод доброде́телей оби́лен пожа́ла еси́./ Сего́ ра́ди бу́ди нам хода́таица/ и умоли́ Созда́теля всех,/ безпло́дие серде́ц на́ших исцели́ти,/ да принесе́м Ему́ плоды́ покая́ния,// любо́вь, милосе́рдие и смире́ние.

И́кос:

Прииди́те, ве́рнии, духо́вне возвесели́мся в па́мяти святы́я му́ченицы Татиа́ны,/ и, прославля́юще по́двиги ея́, воспои́м та́ко:/ ра́дуйся, гра́да То́мска благо́е прозябе́ние;/ ра́дуйся, всея́ земли́ Ру́сския украше́ние./ Ра́дуйся, Це́ркве Бо́жия плод благоприя́тный;/ ра́дуйся, ли́ка новому́чеников на́ших цвет благоуха́нный./ Ра́дуйся, жена́м мироно́сицам в ре́вности подража́вшая;/ ра́дуйся, мно́гия доброде́тели стяжа́вшая./ Ра́дуйся, Татиа́но, му́ченице пресла́вная, о́браз милосе́рдия нам показа́вшая.

Песнь 7

Ирмо́с: От Иуде́и доше́дше о́троцы,/ в Вавило́не иногда́,/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Ка́я темни́ца не име́ тя ю́зницу, страда́лице терпеливоду́шная? Ты бо, лю́тое неи́стовство мучи́телей безбо́жных му́жественне претерпева́ющи, смире́нием Христо́вым сих победи́ла еси́. Ны́не же в ра́дости пое́ши: отце́в Бо́же, благослове́н еси́.

Ева́нгельскими глаго́лы святы́х ю́зников утеша́ла еси́, достохва́льная Татиа́но, и́мже боже́ственне поревнова́вши, вседу́шно пострада́ти за Христа́ возжеле́ла еси́. Ны́не же с ли́ки му́чеников в ра́дости пое́ши: отце́в Боже, благослове́н еси́.

Мироно́сицы взе́мши чин, всечестна́я страда́лице, Христу́, нас ра́ди во́лею обнища́вшему, усе́рдно послужи́ла еси́, егда́ вме́сто ми́ра, еле́ем милосе́рдия стра́ждущих и неду́жных ума́стила еси́. Ны́не же, Го́спода зря́щи, пое́ши: Бо́же, благослове́н еси́.

Богоро́дичен: Вся жены́ богому́дрыя с весе́лием прославля́ют Де́ву Пречи́стую, и́стинную Ма́терь Бо́жию, и, благогове́йно предстоя́ща, Христа́ восхваля́ют во ве́ки.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,// хвали́те и превозноси́те во вся́ ве́ки.

Сластьми́ ми́ра сего́ не прельсти́вшися, я́ко цвет кра́сный, в де́встве процвела́ еси́ и му́ченическаго венца́ сподо́билася еси́, Татиа́но богому́драя, и та́ко, сугу́бый по́двиг на земли́ соверши́вши, ны́не с ли́ки А́нгельскими Христа́ прославля́еши.

Христа́ всем се́рдцем возлюби́вши, Тому́ усе́рдно после́довала еси́, честна́я, и, скве́рны грехо́вныя избе́гши, я́ко голу́бица, крило́ма доброде́телей в Небе́сный черто́г возлете́ла еси́, иде́же, веселя́щися, песнь побе́дную воспева́еши.

Доброде́тельми и по́двиги твои́ми Бо́гу угоди́ла еси́, Татиа́но достохва́льная, сего́ ра́ди Той в ли́це му́чениц просла́ви тя и дерзнове́ние ве́лие дарова́ моли́тися при́сно о ве́рою и любо́вию чту́щих тя.

Богоро́дичен: Ты Бо́га еди́на родила́ еси́, Де́во, пресла́вно; Ты естество́ обнови́ла еси́ Рождество́м Твои́м, Богороди́тельнице Чи́стая.

Песнь 9

Ирмо́с: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще.

Свети́льник доброде́тели во мра́це беззако́ния возже́гши, му́дрым де́вам сопричи́слилася еси́, всечестна́я, и, в черто́г бра́чный возше́дши, Небе́сному Жениху́ Христу́ обручи́лася еси́. Его́же моли́ спасти́ся душа́м на́шим.

От земны́х к небе́сным ум впери́вши, сете́й вра́жиих избе́гла еси́, му́ченице Татиа́но, и крила́ми чистоты́ Ца́рствия Бо́жия дости́гла еси́, иде́же с безпло́тными си́лами Христа́ велича́еши.

Прии́ми, Триипоста́сный Бо́же, ма́лую песнь сию́, в па́мять святы́я Татиа́ны, добропобе́дныя му́ченицы Твоея́, сложе́нную. Ея́же моли́твами умягчи́ на́ша окамене́нная сердца́ и научи́ любви́ и милосе́рдию.

Богоро́дичен: Приими́, о Богома́ти, я́ко ми́ро, от любве́ приноси́мую песнь сию́, и принеси́ Сы́ну Твоему́, я́ко дар, во оставле́ние грехо́в на́ших.

Свети́лен:

Я́ко му́драя де́ва, свети́льник души́ твоея́ еле́ем украси́вши,/ во след Христа́ устреми́лася еси́, Татиа́но достоблаже́нная,/ и, Черто́га Небе́снаго дости́гши,/ Свет Невече́рний лицезре́ти сподо́билася еси́./ Укрепи́ и нас, ма́ти всехва́льная,/ во све́те за́поведей Госпо́дних ходи́ти/ и де́лы свои́ми Бо́га прославля́ти.

Сла́ва, и ны́не, пра́здника.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Голуби́ца нескве́рная, Татиа́на всеблаже́нная,/ де́вство и милосе́рдие возлюби́вши,/ си́ми, я́ко кри́лы духо́вными,/ возлете́ превы́ше ви́димыя тва́ри,/ в Ца́рство благода́ти и несконча́емыя ра́дости,/ иде́же, со все́ми святы́ми пребыва́ющи,/ мо́лится Бо́гу грехо́в оставле́ние дарова́ти,// све́тло пра́зднующим святу́ю па́мять ея́.

О, пресла́внаго чудесе́!/ Де́вства благо́е процвете́ние,/ Татиа́на му́ченица Христо́ва/ во дни гоне́ний на Це́рковь Ру́сскую,/ страда́ния му́жественне претерпева́ющи,/ в зако́не Госпо́дни непоро́чно хожда́ше,/ те́мже, нетле́нным венце́м увенча́вшися/ и обре́тши дерзнове́ние у Бо́га,// пода́ет ве́рным ве́лию ми́лость.

О, пресла́внаго чудесе́!/ О, Боже́ственнаго произволе́ния!/ Христо́ва му́ченица Татиа́на,/ жена́ немощна́я су́щи,/ победи́ кова́рствия де́монов/ и, лю́тыя сме́рти не убоя́вшися,/ и́стину пред беззако́нники испове́да./ Ны́не же с безпло́тными си́лами// Триипоста́снаго Бо́га прославля́ет.

Сла́ва, глас 6:

Ми́ра собла́зны презре́вши/ и любо́вию Боже́ственною возгоре́вшися,/ в темни́цах су́щим приле́жно послужи́ла еси́,/ му́ченице сла́вная Татиа́но,/ ра́ны же ю́зников слеза́ми омыва́ющи,/ во испове́дании ве́ры словесы́ твои́ми сих укрепля́ла еси́./ Ныне, во сла́ве ве́чной пребыва́ющи,/ благода́ть духо́вную нам низпосли́,// благоприя́тными твои́ми моли́твами.

И ны́не, пра́здника.

Славосло́вие вели́кое и отпу́ст.

 

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 6: Тебе́ ра́ди умерщвля́емся весь день,// вмени́хомся я́ко о́вцы заколе́ния. Стих: О Бо́зе похва́лимся весь день и о и́мени Твое́м испове́мыся во век. Апо́стол к Кори́нфяном, зача́ло 181. Аллилу́ия, глас 1: Терпя́ потерпе́х Го́спода, и внят ми. Стих: И услы́ша моли́тву мою́. Ева́нгелие от Матфе́я, зача́ло 39. Прича́стен: Весели́теся, пра́веднии, о Го́споде и испове́дайте па́мять святы́ни Его́.

Моли́тва

О до́блественная страстоте́рпице Христо́ва Татиа́но, земли́ на́шея до́брое прозябе́ние, Це́ркве Ру́сския благо́е украше́ние и Вы́шняго Иерусали́ма избра́нная дщи! Ты, на земли́ благоче́стно пожи́вши, Христа́ всем се́рдцем возлюби́ла еси́ и, в темни́цах су́щих посеща́ющи, а́лчущих пита́ла еси́, наги́х одева́ла еси́ и сло́вом Ева́нгельския любве́ утеша́ла еси́. Та́же, взе́мши крест свой, страда́ния и смерть за ве́ру правосла́вную прия́ла еси́ и Ца́рствия Небе́снаго дости́гла еси́. Те́мже тя, я́ко благу́ю и ве́рную рабу́ Госпо́дню досто́йно почита́юще, усе́рдно про́сим: моли́ о нас Всеще́драго Бо́га, да да́рует Це́ркви Ру́сской благостоя́ние, Оте́честву на́шему мир, лю́дем во благоче́стии преспе́яние, в ско́рбех утеше́ние, во обстоя́ниих по́мощь и заступле́ние, да благода́тию Бо́жиею и твои́м те́плым предста́тельством земно́е жи́тельство про́йдем и Го́рняго Иерусали́ма дости́гнем, иде́же вку́пе с тобо́ю сподо́бимся прославля́ти ди́внаго во святы́х Свои́х Бо́га на́шего, Отца́, и Сы́на, и Свята́го Ду́ха, во ве́ки веко́в. Ами́нь.



-
Яндекс.Метрика